ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກຂ້າພະເຈົ້າຂໍຄັດສະເໜີບາງຄຳເຫັນ, ເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການໃນອາທິດຜ່ານມາ.

ການເສັງ “ເພື່ອນຮູ້ຫຍັງແດ່ ກ່ຽວກັບ ຫວຽດນາມ”

ທ່ານຜູ້ຟັງທີ່ເຄົາລົບ! ໄລ່ຮອດຈຸດເວລານີ້, ພະແນກກະຈາຍສຽງບັນດາລາຍການພາສາຕ່າງປະເທດ, ວິທະຍຸກະຈາຍສຽງ ຫວຽດນາມ - ໄດ້ຮັບບົດເສັງກ່ວາ 100 ບົດຂອງທ່ານຜູ້ຟັງຈາກ 19 ປະເທດ ແລະ ເຂດແຄວ້ນສົ່ງມາລາຍການຕ່າງໆ. ໃນສະພາບການໂລກລະບາດໂຄວິດ-19 ພວມກັບຄືນມາແຜ່ລະບາດຮອບທີ 2 ຢູ່ຫລາຍປະເທດ, ໄດ້ກໍ່ຜົນສະທ້ອນບໍ່ແມ່ນໜ້ອຍເຖິງຊີວິດການເປັນຢູ່ຂອງປະຊາຊົນແຕ່ລະຄົນ, ຄວາມສົນໃຈ ແລະ ເຂົ້າຮ່ວມການເສັງ “ເພື່ອນຮູ້ຫຍັງແດ່ ກ່ຽວກັບ ຫວຽດນາມ” ຢ່າງສຸດອົກສຸດໃຈຂອງທ່ານຜູ້ຟັງ ແມ່ນສິ່ງທີ່ເຮັດໃຫ້ຄະນະຈັດຕັ້ງການເສັງມີຄວາມເຄົາລົບ ແລະ ຕື້ນຕັນໃຈທີ່ສຸດ, ຂໍຂອບໃຈ.

ທ່ານຜູ້ຟັງທີ່ເຄົາລົບ! ໃນເນື້ອໃນຈົດໝາຍຫລາຍສະບັບ ເຊິ່ງທ່ານຜູ້ຟັງສົ່ງມາໃຫ້ພວກຂ້າພະເຈົ້າ, ທ່ານຜູ້ຟັງຫລາຍທ່ານໄດ້ສະແດງຄວາມປິຕິຊົມຊື່ນ ເມື່ອ VOV ໄດ້ຈັດຕັ້ງການເສັງ ເຊິ່ງເຂົາເຈົ້າມີຄວາມຄອງຄອຍ; ແຕ່ກໍ່ສະແດງຄວາມເສຍດາຍເມື່ອ ບໍ່ໄດ້ເຂົ້າຮ່ວມການເສັງໃນປີນີ້ ຍ້ອນຜົນສະທ້ອນຈາກໂລກລະບາດໂຄວິດ-19.

ໃນສະພາບການນັ້ນ, ອີກຄັ້ງໜຶ່ງ, ຄະນະຈັດຕັ້ງການເສັງ “ເພື່ອນຮູ້ຍັງແດ່ກ່ຽວກັບ ຫວຽດນາມ” 2020 ໄດ້ຕົກລົງແກ່ຍາວເວລາຮັບບົດເສັງໄປຈົນຮອດວັນທີ 31 ສິງຫາ 2020 ຄືດັ່ງພວກຂ້າພະເຈົ້າໄດ້ປະກາດກ່ອນໜ້ານັ້ນ. ສິ່ງດັ່ງກ່າວ ແນໃສ່ສ້າງເງື່ອນໄຂໃຫ້ແກ່ທ່ານຜູ້ຟັງຫລາຍທ່ານຢູ່ທຸກປະເທດ, ເຂດແຄວ້ນໃນທົ່ວໂລກ ສາມາດສືບຕໍ່ເຂົ້າຮ່ວມການເສັງຊອກຮູ້ກ່ຽວກັບປະເທດ, ປະຊາຊົນ ຫວຽດນາມ.

ການເສັງບໍ່ໄດ້ຈຳກັດຈຳນວນບົດສົ່ງມາເຂົ້າຮ່ວມການເສັງ. ສະນັ້ນ, ສຳລັບທ່ານຜູ້ຟັງທີ່ໄດ້ສົ່ງບົດເສັງແລ້ວ ກໍ່ສາມາດສົ່ງມາຕື່ມອີກກໍ່ໄດ້; ສືບຕໍ່ສົ່ງຄຳຕອບໃຫ້ການເສັງພາກສ່ວນສຳຮອງກ່ຽວກັບ ຫວຽດນາມ ແລະ ການຕໍ່ສູ້ຕ້ານໂຄວິດ-19.

ສຳລັບບັນດາການດັດແປງດັ່ງກ່າວ, ຄະນະຈັດຕັ້ງການເສັງຫວັງວ່າ ຈະສືບຕໍ່ໄດ້ຮັບບັນດາບົດເສັງ “ເພື່ອນຮູ້ຫຍັງແດ່ກ່ຽວກັບ ຫວຽດນາມ” 2020 ຂອງທ່ານຜູ້ຟັງ, ຜູ້ທີ່ຮ່ວມເດີນທາງພ້ອມກັບພວກຂ້າພະເຈົ້າໃນແຕ່ລະບາດກ້າວບົນເສັ້ນທາງແຫ່ງການພັດທະນາ.  ຂໍອວຍພອນໃຫ້ບັນດາທ່ານເຂົ້າຮ່ວມການເສັງດ້ວຍຜົນສຳເລັດຢ່າງຈົບງາມ ແລະ ສາມາດຍາດໄດ້ລາງວັນເປັນໜ້າຈັບໃຈຈາກຄະນະຈັດຕັ້ງການເສັງ. ຈົ່ງເຮັດຈິດໃຈໃຫ້ມີຄວາມໝັ້ນທ່ຽງ ແລະ ຮັກສາສຸຂະພາບເພື່ອຕໍ່ສູ້ຕ້ານໂລກລະບາດໂຄວິດ-19.

ໃນອາທິດຜ່ານມາ, ເພື່ອນ ທອງສະໄໝ ໄດ້ສົ່ງຂໍ້ຄວາມຜ່ານທາງ facebook ມາຫາລາຍການໂດຍແບ່ງປັນກ່ຽວກັບຄວາມຮູ້ສຶກທີ່ວ່າ: “ຂ້າພະເຈົ້າມັກລາຍການເພງ ຂອງລາຍການພາກພາສາລາວທີ່ສຸດ, ຜ່ານລາຍການເພງນີ້, ຂ້າພະເຈົ້າບໍ່ພຽງແຕ່ໄດ້ຮັບຟັງບັນດາບົດເພງມ່ວນໆກ່ຽວກັບ ຫວຽດນາມ ເທົ່ານັ້ນ ຫາກຍັງໄດ້ຮັບຟັງບັນດາບົດເພງທີ່ພັນລະນາກ່ຽວກັບບ້ານເກີດເມືອງນອນຂອງລາວ ອີກດ້ວຍ.

ເພື່ອນ ທອງສະໄໝ ທີ່ຮັກແພງ! ລາຍການພາກພາສາລາວ ຂໍຂອບໃຈຕໍ່ການແບ່ງປັນຂອງເພື່ອນທີ່ໄດ້ສະຫງວນໃຫ້ແກ່ລາຍການ. ພວກຂ້າພະເຈົ້າຈະມານະພະຍາຍາມປະຕິບັດວຽກງານໃຫ້ດີກ່ວາເກົ່າ ເພື່ອມີບັນດາລາຍການມ່ວນໆດີໆ ແລະ ເປັນປະໂຫຍດຮັບໃຊ້ທ່ານຜູ້ຟັງຢູ່ທັງພາຍໃນ ແລະ ຕ່າງປະເທດ, ພິເສດແມ່ນທ່ານຜູ້ຟັງລາວ. ຂໍອວຍພອນໃຫ້ພວກເພື່ອນຈົ່ງມີສຸຂະພາບເຂັ້ມແຂງ, ປະສົບຜົນສຳເລັດໃນໜ້າທີ່ວຽກງານ, ສືບຕໍ່ປະກອບຄຳຄິດຄຳເຫັນ ເພື່ອເຮັດໃຫ້ລາຍການພາກພາສາລາວ ນັບມື້ນັບມີຄວາມອຸດົມສົມບູນຂຶ້ນຕື່ມ, ສ້າງຄວາມດູດດື່ມຈັບອົກຈັບໃຈ ໃຫ້ແກ່ຜູ້ຟັງ ຜູ້ອ່ານຕື່ມອີກ ຂໍຂອບໃຈ.

ເພື່ອນ ເພັດສະຫວັນ ແລະ ເພື່ອນ ເບັ້ນ ພິມມະສອນ ນັກສຶກສາປີທີ 3, ພະແນກການຄ້າ, ສັງກັດມະຫາວິທະຍາໄລແຫ່ງຊາດ ລາວ ໄດ້ສົ່ງອີແມວມາຍັງລາຍການດ້ວຍເນື້ອໃນວ່າ: “ພວກຂ້າພະເຈົ້າພວມຂຽນບົດລາຍງານກ່ຽວກັບສະພາບການເສດຖະກິດຂອງບັນດາປະເທດ ອາຊຽນ.  ໃນນັ້ນ ເນື້ອໃນສ່ວນໜຶ່ງແມ່ນກ່ຽວຂ້ອງເຖິງວົງເງິນການຄ້ານຳເຂົ້າ-ສົ່ງອອກລະຫວ່າງ ຫວຽດນາມ ແລະ ລາວ. ດັ່ງນັ້ນ ຢາກໃຫ້ທາງລາຍການຊ່ວຍພວກຂ້າພະເຈົ້າຊອກຮູ້ຂໍ້ມູນ ກ່ຽວກັບວົງເງິນການຄ້ານຳເຂົ້າ-ສົ່ງອອກລະຫວ່າງ ຫວຽດນາມ - ລາວ ໃນ 6 ເດືອນຕົ້ນປີ 2020 ຕື່ມອີກແດ່ໄດ້ບໍ່? ຂໍຂອບໃຈ”.

(ພາບປະກອບ)

ເພື່ອນ ເພັດສະຫວັນ ແລະ ເພື່ອນ ເບັ້ນ ພິມມະສອນ ທີ່ຮັກແພງ! ເພື່ອໃຫ້ມີຄວາມເຂົ້າໃຈຕື່ມອີກ ກ່ຽວກັບວົງເງິນການຄ້າສົ່ງອອກຂອງ ຫວຽດນາມ, ພວກເພື່ອນສາມາດຕິດຕໍ່ໂດຍກົງກັບທູດເສດຖະກິດ ຫວຽດນາມ ປະຈຳ ລາວ . ເຖິງຢ່າງໃດກໍ່ຕາມ, ໃນລາຍການໂອ້ລົມກັບເພື່ອນລາວມື້ນີ້ ທາງລາຍການຂໍແນະນຳໂດຍສັງເຂບກ່ຽວກັບສະພາບການເສດຖະກິດນຳເຂົ້າ-ສົ່ງອອກຂອງສອງປະເທດໃນ 6 ເດືອນຕົ້ນປີ 2020 ເພື່ອໃຫ້ພວກເພື່ອນສາມາດເຂົ້າໃຈໄດ້ສ່ວນໃດສ່ວນໜຶ່ງຕື່ມອີກ. ຄືດັ່ງພວກຂ້າພະເຈົ້າໄດ້ຮັບຮູ້ວ່າ, ຍອດວົງເງິນການຄ້ານຳເຂົ້າ-ສົ່ງອອກລະຫວ່າງ ຫວຽດນາມ ແລະ ລາວ ໃນ 6 ເດືອນຕົ້ນປີ 2020 ບັນລຸ 491,7 ລ້ານ USD, ຫລຸດລົງ 14,6% ເມື່ອທຽບໃສ່ໄລຍະດຽວກັນປີ 2019. ໃນນັ້ນ, ຫວຽດນາມ ນຳເຂົ້າຈາກ ລາວ ບັນລຸ 214,85 ລ້ານ USD, ຫລຸດລົງ 6,1% ເມື່ອທຽບໃສ່ໄລຍະດຽວກັນປີ 2019 ແລະ ຫວຽດນາມ ສົ່ງອອກໄປຍັງ ລາວ ບັນລຸ 276,85 ລ້ານ USD, ຫລຸດລົງ 20,2% ເມື່ອທຽບໃສ່ໄລຍະດຽວກັນປີ 2019. ສະນັ້ນ, ຫວຽດນາມ ໄດ້ສົ່ງອອກເກີນດຸນໄປຍັງ ລາວ 62 ລ້ານ USD.

ເຖິງວ່າກະຊວງອຸດສາຫະກຳ ແລະ ການຄ້າ 2 ປະເທດໄດ້ມີຫລາຍມາດຕະການ ເພື່ອແນໃສ່ກະຕຸ້ນວົງເງິນການຄ້າລະຫວ່າງ 2 ປະເທດກໍ່ຕາມ ແຕ່ວົງເງິນການຄ້າລະຫວ່າງ ຫວຽດນາມ ແລະ ລາວ ໃນໄລຍະນີ້ ຖືກຫລຸດລົງຢ່າງແຮງ ຍ້ອນຜົນກະທົບຈາກໂລກລະບາດໂຄວິດ-19.

ສະພາບການໂລກລະບາດໂຄວິດ-19 ມີການຜັນແປສັບສົນຫລາຍຢ່າງຢູ່ບາງປະເທດຕິດກັບ ລາວ ແລະ ກໍ່ແມ່ນຄູ່ຄ້າຕົ້ນຕໍຂອງ ລາວ ນັ້ນກໍ່ແມ່ນໜຶ່ງໃນບັນດາສາຍເຫດ ທີ່ເຮັດໃຫ້ວົງເງິນການຄ້ານຳເຂົ້າ-ສົ່ງອອກຂອງ ລາວ ຫລຸດລົງ.

        ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.243.825.6631 ຫຼື ອີແມວ laovov5@gmail.com.