ໃນຈົດໝາຍ 14 ສະບັບ ແລະ ຂໍ້ຄວາມທີ່ທ່ານຜູ້ຟັງໄດ້ຝາກມາລາຍການໃນອາທິດຜ່ານມາ, ເນື້ອໃນສ່ວນຫຼາຍແມ່ນກ່ຽວຂ້ອງເຖິງເຫດການ ຊີເກມ 31 ທີ່ພວມດຳເນີນໄປຢູ່ ຫວຽດນາມ.

ເພື່ອນດວງຈັນ ຢູ່ແຂວງຈຳປາສັກ ແບ່ງປັນວ່າ: “ໃນເວັບໄຊຂອງລາຍການກະຈາຍສຽງພາກພາສາລາວ, ວິທະຍຸກະຈາຍສຽງ ຫວຽດນາມ ໄດ້ສ້າງຄໍລຳສະເພາະສຳລັບເຫດການ ຊີເກມ 31, ແມ່ນມີຄວາມສະດວກທີ່ສຸດໃຫ້ແຟນກິລາສາມາດຕິດຕາມການເຄື່ອນໄຫວຕ່າງໆຂອງຊີເກມ 31.”

ຄືດັ່ງເພື່ອນ ດວງຈັນ ໄດ້ແບ່ງປັນມາ. ທ່ານສາມາດຕິດຕາມ ແລະ ອັບເດດທຸກການເຄື່ອນໄຫວ ແລະ ການຜັນແປຕ່າງໆທີ່ກ່ຽວຂ້ອງເຖິງເຫດການຊີເກມ 31 ໄດ້ຢ່າງງ່າຍດາຍ ດ້ວຍການເຂົ້າເວັບໄຊ vovworld.vn  ແລະ ເລືອກພາສາ ລາວ, ຫຼັງຈາກນັ້ນກໍກົດເລືອກຄໍລຳ ຊີເກມ 31. ນະທີ່ນີ້, ພວກຂ້າພະເຈົ້າຈະອັບເດດທຸກການແຂ່ງຂັນຢ່າງເປັນປະຈຳ, ພິເສດແມ່ນການແຂ່ງຂັນຂອງຄະນະນັກກິລາລາວ. ທ່ານຜູ້ຟັງກໍສາມາດສົ່ງຄຳອວຍພອນໃຫ້ກຳລັງໃຈຊ່ວຍຊົມຊ່ວຍເຊຍບັນດານັກກິລາຂອງຕົນທີ່ພວມແຂ່ງຂັນຢູ່ ຫວຽດນາມ ໄດ້ ດ້ວຍການຄອມເມັ້ນໃນເວັບໄຊ ຫຼື ສົ່ງຈົດໝາຍມາຫາລາຍການຂອງພວກເຮົາດ້ວຍທີ່ຢູ່ເລກທີ 45, ຖະໜົນບ່າຈ້ຽວ, ຮ່າໂນ້ຍ ຫຼື ຜ່ານທາງອີເມວ laovov5@gmail.com.

ຂໍ້ຄວາມຕໍ່ໄປແມ່ນຂອງເພື່ອນ ຄຳມາ ຢູ່ແຂວງຈຳປາສັກ. ເພື່ອນແບ່ງປັນວ່າ: “ຂ້າພະເຈົ້າມີຄວາມຕຶ້ນຕັນໃຈເມື່ອເຫັນຮູບພາບຜູ້ຊົມຜູ້ເຊຍຢູ່ແຂວງ ນາມດິ້ງ ຂອງ ຫວຽດນາມ ໄດ້ກະກຽມທຸງຊາດລາວ, ຜ້າຄຳຂວັນມັດຫົວ, ນຸ່ງເສື້ອທີ່ພິມຮູບທຸງຊາດລາວເພື່ອເປັນກຳລັງໃຈຊ່ວຍຊົມຊ່ວຍເຊຍໃຫ້ທິມ U23 ລາວ ຢູ່ສະໜາມກິລາ ທຽນເຈືອງ, ແຂວງ ນາມດິ້ງ ໃນນັດແຂ່ງຂັນກັບທິມ U23 ສິງກະໂປ. ຂອບໃຈປະເທດຫວຽດນາມ ອ້າຍນ້ອງທີ່ຍາມໃດກໍສະໜັບສະໜູນ ແລະ ເພີ່ມກຳລັງໃຈໃຫ້ແກ່ປະເທດ ລາວ ພວກຂ້າພະເຈົ້າ”

ກອງເຊຍ ແຂວງນາມດິ້ງ ຢູ່ສະໜາມກິລາ ທຽນເຈື່ອງ

ບໍ່ພຽງແຕ່ເທົ່ານັ້ນ, ກ່ອນເວລາແຂ່ງຂັນ, ກອງເຊຍ ແຂວງນາມດິ້ງ ຍັງໄດ້ພາກັນໄປເຕົ້າໂຮມຢູ່ໂຮງແຮມເຊິ່ງນັກກິລາລາວ ພັກເຊົາຢູ່ ເພື່ອສະແດງຄວາມຮັກທີ່ມີຕໍ່ U23 ລາວ. ພິເສດ, ຈຳນວນຜູ້ຊົມຜູ້ເຊຍທີ່ມີໜ້າຢູ່ສະໜາມກິລາ ທຽນເຈື່ອງເພື່ອໃຫ້ກຳລັງໃຈນັກກິລາ ໄດ້ສ້າງສະຖິຕິໃໝ່ໃນ ຊີເກມ ດ້ວຍຈຳນວນຫຼາຍທີ່ສຸດ ແມ່ນ 30.000 ຄົນ.

         ເພື່ອນ ຄຳຕັນ ຢູ່ ແຂວງ ເຊກອງ ໄດ້ສົ່ງຂໍ້ຄວາມມາຫາລາຍການສະແດງຄວາມປະທັບໃຈຕໍ່ບັນຍາກາດຕ້ອນຮັບ ຊີເກມ ຢູ່ ຫວຽດນາມ ແລະ ປາດຖະໜາວ່າ ຈະໄດ້ມາຢ້ຽມຢາມ ຮ່າໂນ້ຍ ໃນໂອກາດນີ້. ເພື່ອນໄດ້ແບ່ງປັນວ່າ: “ຜ່ານຂ່າວ, ບົດ ເຊິ່ງທາງລາຍການພາກພາສາລາວໄດ້ເອົາລົງໃນເວັບໄຊ vovworld.vn ໄດ້ສ່ອງແສງໃຫ້ເຫັນບັນຍາກາດຕ້ອນຮັບ ຊີເກມ ຢ່າງຟ້າວຟັງຂະຫຍັນໝັ່ນພຽນ. ເບິ່ງຄືວ່າທຸກຢ່າງໄດ້ກຽມພ້ອມໝົດແລ້ວ. ຖະໜົນສາຍຕ່າງໆໄດ້ປະດັບປະດາຢ່າງງາມຕາ. ຂ້າພະເຈົ້າຢາກມາຢ້ຽມຢາມ ຫວຽດນາມ ໃນໂອກາດນີ້ ເພື່ອໃຫ້ກຳລັງໃຈໃຫ້ບັນດານັກກິລາ ແລະ ຕາງໄປທ່ອງທ່ຽວເລີຍ. ຂ້າພະເຈົ້າຢາກຊອກຮູ້ກ່ຽວກັບຜະລິດຕະພັນທ່ອງທ່ຽວຢູ່ ຮ່າໂນ້ຍ ໃນໄລຍະດຳເນີນງານມະຫາກຳກິລາ ຊີເກມ ນີ້.

     ພວກຂ້າພະເຈົ້າດີໃຈຫຼາຍເມື່ອໄດ້ຮັບຂ່າວວ່າ ວັນທີ 9 ພຶດສະພາ ຜ່ານມາ, ລາວໄດ້ເປີດປະຕູອະນຸຍາດໃຫ້ຄົນເຂົ້າ-ອອກເມືອງແລ້ວ. ນີ້ແມ່ນເງື່ອນໄຂທີ່ສະດວກເພື່ອໃຫ້ເພື່ອນ ແລະ ທ່ານຜູ້ຟັງຄົນອື່ນໆສາມາດມາທ່ຽວ ຫວຽດນາມ ດັ່ງຄວາມປາດຖະໜາມາແຕ່ດົນແລ້ວ, ພິເສດແມ່ນໃນໂອກາດຊີເກມ 31 ນີ້. ສ່ວນຢູ່ທາງ ຫວຽດນາມ ນີ້, ທຸກຢ່າງໄດ້ກຽມພ້ອມໝົດແລ້ວເພື່ອຕ້ອນຮັບນັກກິລາມາແຂ່ງຂັນ ແລະ ຜູ້ຊົມຜູູ້ເຊຍມາໃຫ້ກຳລັງໃຈ ແລະ ມາທ່ຽວ ຫວຽດນາມ. ດັ່ງທີ່ເພື່ອນໄດ້ຮູ້ມາ, ກິລາບາງປະເພດໄດ້ ແລະ ພວມດຳເນີນການແຂ່ງຂັນແລ້ວ ແລະ ພິທີໄຂ ຊີເກມ 31 ຈະດຳເນີນໃນຕອນຄ່ຳຂອງວັນທີ 12 ພຶດສະພາ ນີ້.

Tour ລົດຖີບ ຂີດໝາຍໝູ່ບ້ານເກົ່າແກ່ ບາດຈ່າງ”

ກ່ຽວກັບການທ່ອງທ່ຽວ, ບໍ່ພຽງແຕ່ຢູ່ ຮ່າໂນ້ຍ ເທົ່ານັ້ນ, ຢູ່ທຸກແຂວງ, ນະຄອນຂອງ ຫວຽດນາມ ກໍ່ລ້ວນແຕ່ສ້າງຫຼາຍລາຍການທ່ອງທ່ຽວດ້ວຍຫຼາຍຮູບຫຼາຍແບບ ແລະ ຈັບອົກຈັບໃຈເພື່ອຮັບໃຊ້ແຂກທ່ອງທ່ຽວໃນໂອກາດນີ້. ສຳລັບ ຮ່າໂນ້ຍ ບໍ່ພຽງແຕ່ເປັນການຮູ້ຈັກກັນດີກັບນະຄອນທີ່ມີວັດທະນະທຳຫຼາກຫຼາຍສີສັນ, ບ່ອນມີຫຼາຍເຂດປູຊະນີຍະສະຖານປະຫວັດສາດ, ທັດສະນີຍະພາບທີ່ສວຍສົດງົດງາມເທົ່ານັ້ນ ຫາກຍັງເປັນທີ່ຮູ້ຈັກກັບໝູ່ບ້ານອາຊີບຕ່າງໆທີ່ເປັນມູນເຊື້ອອີກດ້ວຍ. ເພື່ອນສາມາດເຂົ້າຮ່ວມ Tour ລົດຖີບ ຂີດໝາຍໝູ່ບ້ານເກົ່າແກ່ ບາດຈ່າງ” - ໝູ່ບ້ານອາຊີບຜະລິດເຄື່ອງປັ້ນດິນເຜົາທີ່ມີຊື່ສຽງຢູ່ ຮ່າໂນ້ຍ ເພື່ອຄົ້ນຫາໝູ່ບ້ານດັ່ງກ່າວ. ບັນດາວິສາຫະກິດ, ຮາກຖານຜະລິດຢູ່ທີ່ນີ້ ກໍ່ໄດ້ຜະລິດເຄື່ອງທີ່ລະນຶກທີ່ໄດ້ພິມຮູບສັນຍາລັກ, ສັດນຳໂຊກ ຊີເກມ 31 ເພື່ອຮັບໃຊ້ແຂກທ່ອງທ່ຽວ. ນອກຈາກນັ້ນແລ້ວ, ເພື່ອນ ກໍສາມາດເຂົ້າຮ່ວມ  Tour ຄົ້ນຫາ “ພະລາດຊະວັງທັງລອງ” ໃນກາງຄືນ ເຊິ່ງເປັນບ່ອນເຕົ້າໂຮມຈຸດທີ່ຍອດຍິ່ງຂອງວັດທະນະທໍາອະລິຍະທຳນັບພັນປີ, Tour ທ່ອງທ່ຽວ “ຄ່ຳຄືນທີ່ສັກສິດ 2: ຈົ່ງດຳລົງຊີວິດຄືກັບດອກໄມ້” ຢູ່ເຂດປູຊະນີຍະສະຖານປະຫວັດສາດ ຮ໋ວາລໍ່; ຫຼືວ່າ ຢ້ຽມຢາມທັດສະນີຍະພາບ, ສະຖານທີ່ທ່ອງທ່ຽວທີ່ມີຊື່ສຽງຂອງຮ່າໂນ້ຍ ດ້ວຍ Tour ທ່ອງທ່ຽວລົດເມສອງຊັ້ນ…

ກ່ອນທີ່ຈະສິ້ນສຸດລາຍການ “ໂອ້ລົມກັບເພື່ອນລາວ” ມື້ນີ້, ພວກຂ້າພະເຈົ້າຂໍຕອບຄຳຖາມຂອງເພື່ອນ ດິງມິງຮຸ່ງ ຢູ່ແຂວງ ກວ໋າງບິ່ງ ເພື່ອນຢາກຮູ້ກ່ຽວກັບກິລາປະເພດຕ່າງໆເຊິ່ງຄະນະນັກກິລາ ລາວ ຈະເຂົ້າຮ່ວມແຂ່ງຂັນໃນຊີເກມ 31 ນີ້.

ໃນງານມະຫາກຳກິລາ ຊີເກມ 31 ນີ້, ນັກກິລາລາວຈະເຂົ້າຮ່ວມການແຂ່ງຂັນ 29 ປະເພດກິລາ, ເຊິ່ງລວມມີ: ເປຕັງ, ບີລຽດ - ສະນຸກເກີ້, ຄິກບ໋ອກຊິງ, ມວຍລາວ, ວູຊູ, ລົດຖີບ, ເທຄັວນໂດ, ມວຍສາກົນ, ກະຕໍ້, ປັນຈັກສີລັດ, ກາຣາເຕໂດ, ຢູໂດ, ມວຍປ້ຳ, ຍິງທະນູ, ແລ່ນ - ລານ, ຍົກນ້ຳໜັກ, ໂວວີນາມ, ລອຍນ້ຳ, ບານເຕະຍິງ - ຊາຍ, ດອກປີກໄກ, ເທັນນິດ, ບານສົ່ງຫາດຊາຍ, ກ໋ອຟ, ຍິມນາສຕິກ, ອີສະປອດ, ຍິງປືນ, ປິ່ງປ່ອງ, ເພາະກາຍ ແລະ ແດ້ນສະປອດ.