ລາວໂຄ ແລະ ປະທານໄກສອນ ພົມວິຫານ - ນ້ຳໃຈອັນຊາບຊຶ້ງ
Bich Thuy -
ສຳລັບຊາວເຜົ່າມົ້ງຢູ່ບ້ານລາວໂຄ, ຕາແສງພຽງຄວາຍ, ເມືອງ ອຽນເຈົາ, ແຂວງ ເຊີນລາ ແລ້ວ, ນັກເຄື່ອນໄຫວປະຕິວັດ, ເລຂາທິການໃຫຍ່, ປະທານຄະນະບໍລິຫານງານສູນກາງພັກປະຊາຊົນປະຕິວັດລາວ ໄກສອນ ພົມວິຫານ, ຍາມໃດກໍແມ່ນລູກຫຼານຂອງຊາວບ້ານ. ເຖິງວ່າ, ປະທານ ໄກສອນ ພົມວິຫານ ໄດ້ເຖິງແກ່ມໍລະນະກຳ ແລະ ອຳລາຈາກໂລກໄປແລ້ວກໍຕາມ, ແຕ່ຮູບພາບຂອງເພິ່ນໃນຊຸມເດືອນປີແຫ່ງການເຄື່ອນໄຫວປະຕິວັດທີ່ເຕັມໄປດ້ວຍຄວາມລຳບາກກາກກຳແຕ່ອົງສະຫງ່າລາສີຂອງເພິ່ນພ້ອມກັບການອຸ້ມຊູຊ່ວຍເຫຼືອຂອງປະຊາຊົນບ້ານລາວໂຄ ຍັງຄົງຝັງເລິກໃນດວງໃຈຂອງປະຊາຊົນທຸກຄົນຢູ່ທີ່ນີ້.
ໃນຊາຍຄາເຮືອນຂອງທ່ານ Trang A Lu, ລູກຊາຍຂອງພໍ່ເຖົ້າ ລາວໂຄ, ເຈົ້າຂອງຄອບຄົວທີ່ເຄີຍເບິ່ງແຍງດູແລ, ອຸ້ມຊູຊ່ວຍເຫຼືອ ທ່ານເລຂາທິການໃຫຍ່ພັກປະຊາຊົນປະຕິວັດລາວ ໄກສອນ ພົມວິຫານ ໃນຊຸມເດືອນປີແຫ່ງການຕໍ່ສູ້ຕ້ານພວກລ່າເມືອງຂຶ້ນຝຣັ່ງ, ຮູບພາບຂອງປະທານໂຮ່ຈີມິນ ແລະ ທ່ານເລຂາທິການໃຫຍ່ ໄກສອນ ພົມວິຫານ ຖືກແຂວນໄວ້ເທິງແທ່ນບູຊາບັນພະບຸລຸດຂອງຄອບຄົວຢ່າງສົມກຽດ. ແຕ່ລະເທື່ອເມື່ອຈູດທູບທຽນບູຊາ, ທ່ານ Trang Lao Lu, ລູກຊາຍກົກຂອງພໍ່ເຖົ້າ ລາວໂຄ, ປະຈຸບັນໄດ້ມີອາຍຸກ່ວາ 70 ປີແລ້ວ, ກໍມີຄວາມຕື້ນຕັນໃຈຫຼາຍ. ທ່ານໃຫ້ຮູ້ວ່າ: ໃນຊຸມປີ, 1946 - 1949, ທ່ານ Lu ມີອາຍຸພຽງແຕ່ 9, 10 ປີ ເທົ່ານັ້ນ, ແຕ່ທ່ານຍັງຈື່ໄດ້ວ່າເຄີຍມີຄົນລາວຜູ້ໜຶ່ງ ແມ່ນເພື່ອນຂອງພໍ່ລາວໂຄ ໄດ້ມາອາໄສຢູ່ເຮືອນຂອງຕົນ. ຈົນກວ່າເຕີບໃຫຍ່ຂື້ນມາ, ທ່ານຈຶ່ງຮູ້ໄດ້ວ່ານັ້ນແມ່ນຜູ້ນຳຂອງການປະຕິວັດລາວ ທີ່ມາ ລາວໂຄເຄື່ອນໄຫວປະຕິວັດ. ຄາວນັ້ນ, ພໍ່ຂອງທ່ານ Lu ທັງສວມບົດບາດແມ່ນຜູ້ຕິດຕໍ່, ທັງເປັນຜູ້ປົກປ້ອງຜູ້ນຳ ໄກສອນ ອອກຈາກການຊອກຫາ, ສືບສວນຂອງພວກສັດຕູ. ໂດຍຮັບຮູ້ຄຸນງາມຄວາມດີຂອງພໍ່ເຖົ້າ ລາວໂຄ, ທ້ອງຖີ່ນໄດ້ເອົາຊື່ຂອງພໍ່ເຖົ້າຕ້ັງເປັນຊື່ຂອງບ້ານເຜົ່າມົ້ງແຫ່ງນີ້:
ທ່ານ Trang A Lu ແນະນຳກ່ຽວກັບບ້ານລາວໂຄ
(ພາບ:nhandan.org.vn)
“ຄາວນັ້ນ, ນ້ຳໃຈຂອງທ່ານ ໄກສອນ ກັບ ທ່ານລາວໂຄ ແລະ ປະຊາຊົນບ້ານລາວໂຄມີຄວາມສະໜິດສະໜົມຫຼາຍ. ປະຊາຊົນໄດ້ນຳເອົາທັນຍາຫານ, ສະບຽງອາຫານເຂົ້າປ່າເພື່ອສະໜອງໃຫ້ພະນັກງານຕໍ່ຕ້ານຂອງລາວ ແລະ ຫວຽດນາມ. ຄາວນັ້ນ, ລຸງໄກສອນ ຢູ່ທີ່ນີ້ມີຄວາມປອດໄພທີ່ສຸດ, ພວກສັດຕູບໍ່ອາດຮູ້ໄດ້”
ທ່ານ Lu ຍັງເລົ່າໃຫ້ຮູ້ວ່າ: ໃນຊຸມປີເຄື່ອນໄຫວ, ກໍ່ສ້າງຖານທີ່ໝັ້ນການປະຕິວັດລາວ ຢູ່ບ້ານລາວໂຄ, ຜູ້ນຳ ໄກສອນ ພົມວິຫານ ໄດ້ກາຍເປັນລູກຫຼານຂອງບ້ານເຜົ່າມົ້ງຢ່າງແທ້ຈິງ. ທ່ານນຸ່ງຖື, ອອກແຮງງານ, ເວົ້າພາສາມົ້ງຄືພໍ່ແມ່ປະຊາຊົນຢູ່ທີ່ນີ້, ດັ່ງນັ້ນໃຜໆກໍຄິດວ່າທ່ານແມ່ນຊາວບ້ານ. ທ່ານແມ່ນຄົນໃຈດີ, ບໍ່ມັກເວົ້າຫຼາຍ, ມີຄວາມເອົາໃຈໃສ່ເຖິງທຸກຄົນ ດັ່ງນັ້ນໃຜໆ ກໍຮັກແພງ. ຜູ້ນຳ ໄກສອນ ຖືພໍ່ເຖົ້າ ລາວໂຄ ຄືເພື່ອນເປັນຕາຍຂອງຕົນ, ພວກເພິ່ນເຄີຍເວ້ົາຄວາມໃນໃຈສູ່ກັນຟັງ ແລະ ປຶກສາຫາລືກ່ຽວກັບບັນຫາຕ່າງໆ, ບໍ່ພຽງແຕ່ເລື່ອງຮັບໃຊ້ການເຄື່ອນໄຫວປະຕິວັດເທົ່ານັ້ນ ຫາກນັບທັງດ້ານຊີວິດການເປັນຢູ່ອີກດ້ວຍ. ໃນຊຸມປີນັ້ນ, ພ້ອມກັບຄອບຄົວພໍ່ເຖົ້າລາວໂຄ, ພໍ່ແມ່ນປະຊາຊົນບ້ານ ລາວໂຄ ກໍໄດ້ປະກອບກຳລັງເຫື່ອແຮງໃຫ້ແກ່ການປະຕິວັດ 2 ປະເທດຫວຽດນາມ - ລາວ. ດ້ວຍການຊ່ວຍເຫຼືອຂອງພໍ່ແມ່ປະຊາຊົນໃນບ້ານ, ການເຄື່ອນໄຫວຂອງຜູ້ນຳ ໄກສອນ ພົມວິຫານ, ກໍຄືຖານທີ່ໝັ້ນແຫ່ງການປະຕິວັດລາວ ໃນຊຸມເດືອນປີທຳອິດຢູ່ຫວຽດນາມ ໄດ້ຮັບປະກັນຄວາມປອດໄພຢ່າງສິ້ນເຊີງ, ແມ່ນປະຖົມປັດໄຈໃຫ້ແກ່ໄຊຊະນະຄັ້ງຕ່າງໆໃນໄລຍະຕໍ່ມາ. ຮອດປີ 1950, ຜູ້ນຳ ໄກສອນ ພົມວິຫານ ໄດ້ອອກຈາກບ້ານລາວໂຄ ກັບເມືອປະເທດ ເພື່ອພັດທະນາຂະບວນການປະຕິວັດພາຍໃນປະເທດ. ຄາວນັ້ນ, ເຖິງວ່າເງື່ອນໄຂຍັງມີຄວາມຫຍຸ້ງຍາກຫຼາຍຢ່າງກໍຕາມ, ແຕ່ພໍ່ເຖົ້າ ລາວໂຄ ໄດ້ຂົນຂວາຍພີ່ນ້ອງໃນຄອບຄົວສະໜັບສະໜູນການປະຕິວັດລາວ ແລະ ຜູ້ນຳ ໄກສອນພົມວິຫານ ດ້ວຍເງິນຂາວ 50 ໝັນ ເພື່ອຊື້ອາວຸດ, ຍຸດໂທປະກອນຮັບໃຊ້ໃຫ້ແກ່ການປະຕິວັດ. ທ່ານ Lu ເລົ່າສູ່ຟັງຕໍ່ໄປວ່າ:
“ເມື່ອທ່ານກັບເມືອປະເທດ, ທ່ານໄດ້ເວົ້ານຳທ່ານ ລາວໂຄ ວ່າ: ປະຈຸບັນຂ້າພະເຈົ້າຈະກັບເມືອປະເທດ, ພວກເຮົາຕ້ອງຫ່າງໄກກັນ. ຍາມໃດປະເທດລາວ ໄດ້ຮັບການປົດປ່ອຍສົມບູນ, ທົ່ວປະເທດໄດ້ຮັບສັນຕິພາບແລ້ວ ຂ້າພະເຈົ້າຈະກັບຄືນມາຢ້ຽມຢາມທ່ານ ລາວໂຄ ແລະ ພໍ່ແມ່ປະຊາຊົນໃນໝູ່ບ້ານ”
ຢ້ຽມຢາມສະຖານທີ່ສ້າງຕັ້ງກຳລັງ ອິດສະຫຼະ ຢູ່ລາວໂຄ
(ພາບ: baosonla.org)
ເຖິງວ່າ, ໄດ້ດຳລົງຕຳແໜ່ງທີ່ສຳຄັນຂອງປະເທດຊາດ, ຂ້ອງຄາກັບວຽກບ້ານການເມືອງຫຼາຍກໍຕາມ, ແຕ່ຮອດປີ 1968, ຜູ້ນຳໄກສອນ ພົມວິຫານ ຍັງໄດ້ກັບຄືນມາຢ້ຽມຢາມ ລາວໂຄ. ຜູ້ນຳ ໄກສອນ ພົມວິຫານ ກໍໄດ້ຕັກເຕືອນໃຫ້ພໍ່ແມ່ປະຊາຊົນ ໃນບ້ານລາວໂຄວ່າ: ຄວນເສີມຂະຫຍາຍມູນເຊື້ອປະຕິວັດ, ສາມັກຄີກັນສ້າງສາບ້ານເກີດເມືອງນອນ ແລະ ປະເທດຊາດ ຢ່າງບໍ່ຢຸດຢັ້ງ, ພິເສດແມ່ນຕ້ອງອອກແຮງງານຢ່າງດຸໝັ່ນຂະຫຍັນພຽນ ເພື່ອປັບປຸງຊີວິດການເປັນຢູ່ໃຫ້ດີຂຶ້ນ. ນ້ຳໃຈສາມັກຄີມິດຕະພາບທີ່ເປັນມູນເຊື້ອ ແລະ ອາລົມຈິດອັນເລິກເຊິ່ງນັ້ນ ພໍ່ເຖົ້າ ລາວໂຄ ໄດ້ເລົ່າສືບໃຫ້ລຸ້ນລູກຫຼານໃນບ້ານຂອງຕົນ. ນ້ອງ Trang Thi Xo, ບ້ານລາວໂຄໃຫ້ຮູ້ວ່າ:
“ນ້ອງໄດ້ຮັບຟັງພໍ່ເຖົ້າແມ່ເຖົ້າໃນບ້ານ ເລົ່າສູ່ຟັງກ່ຽວກັບມູນເຊື້ອປະຕິວັດຂອງບ້ານ, ແລະ ເລື່ອງລາວກ່ຽວກັບຜູ້ນຳຂັ້ນສູງຂອງພັກປະຊາຊົນປະຕິວັດລາວ ທ່ານເລຂາທິການໃຫຍ່ ໄກສອນ ພົມວິຫານ ທີ່ໄດ້ມາດຳລົງຊີວິດຢູ່ບ້ານໃນຊຸມປີທຳການຕໍ່ສູ້, ນ້ອງຮູ້ສຶກເອກອ້າງທະນົງໃຈຫຼາຍ. ນ້ອງ ແລະ ເພື່ອນມິດໃນບ້ານໄດ້ຕັກເຕືອນກັນວ່າ: ຕ້ອງພະຍາຍາມຮ່ຳຮຽນ, ອອກແຮງງານຢ່າງດຸໝັ່ນຂະຫຍັນພຽນ ຊ່ວຍເຫຼືອພໍ່ແມ່ເພື່ອກາຍເປັນຄົນທີ່ມີປະໂຫຍດຕໍ່ສັງຄົມ”
ໂດຍໄດ້ຮັບຂ່າວວ່າ: ພັກ, ລັດ ຈະກໍ່ສ້າງເຂດປູຊະນີຍະສະຖານປະຕິວັດລາວຢູ່ໃນບ້ານ, ພໍ່ແມ່ປະຊາຊົນບ້ານ ລາວໂຄ ໃຜໆກໍມ່ວນຊື່ນ. ແລະຫວັງວ່າ: ເຂດປູຊະນີຍະສະຖານຈະໄດ້ຮັບການກໍ່ສ້າງສຳເລັດໂດຍໄວ ເພື່ອຍາມໃດກໍເຫັນຮູບພາບທ່ານ ໄກສອນ ພົມວິຫານ ປະທານປະເທດລາວ ເພື່ອເປັນການປຸກລະດົມ ພໍ່ແມ່ປະຊາຊົນ ໃນບ້ານ ລາວໂຄ ຕັ້ງໜ້າອອກແຮງທຳການຜະລິດ, ສາມັກຄີກໍ່ສ້າງບ້ານເກີດເມືອງນອນ, ພ້ອມກັນ ເພີ່ມພູນຄຸນສ້າງນ້ຳໃຈສາມັກຄີມິດຕະພາບຫວຽດນາມ - ລາວ ໃຫ້ນັບມື້ນັບເລິກເຊິ່ງກ່ວາອີກ.
Bich Thuy