ຮີດຄອງປະເພນີຊື້, ຂາຍເກືອໃນວັນທີ 1 ຂອງບູນເຕັດຫວຽດນາມ
Minh Duc -
(vovworld) - ໃນອາທິດຜ່ານມາ, ພາກພາສາລາວ ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ, ໂທລະສັບ ຈາກທ່ານຜູ້ຟັງລາວ ແລະ ຫວຽດນາມ ຫຼາຍທ່ານ. ໃນຈົດໝາຍ, ທ່ານຜູ້ຟັງມີຄວາມສົນໃຈເຖິງຮີດຄອງປະເພນີຂອງຊາວຫວຽດນາມ, ນອກຈາກນັ້ນ, ຜູ້ຟັງຍັງຟາກຈົດໝາຍມາລາຍການສະແດງຄວາມຂອບໃຈທີ່ໄດ້ຮັບຂອງຂວັນເຊິ່ງລາຍການມອບໃຫ້ຜູ້ຟັງໃນປີ 2013. ໃນລາຍການຕິດຕໍ່ພົວພັນກັບຜູ້ຟັງພາກນີ້, ພວກເຮົາຂໍ້ຄັດສະເໜີເນື້ອໃນບາງຈົດໝາຍ ແລະ ຕອບຄຳຖາມເຊິ່ງທ່ານຜູ້ຟັງໄດ້ຝາກມາ.
ເພ່ືອນ ສຸວັນ ທິບພະຈັນ, ຫົວໜ້າຫ້ອງການທ່ອງທ່ຽວ, ເມືອງປາກລາຍ, ແຂວງໄຊຍະບູລີ ໄດ້ຝາກຈົດໝາຍມາໃຫ້ລາຍການໂດຍຂຽນວ່າ:
ໃນໄລຍະປີ 2013 ຜ່ານມາ, ຂ້າພະເຈົ້າໄດ້ຮັບໃບຢັ້ງຢືນເປັນຜູ້ຟັງເປັນປະຈຳຂອງວິທະຍຸກະຈາຍສຽງຫວຽດນາມ, ພ້ອມກັບຂອງຂວັນແມ່ນຮູບທີ່ເປັນສັນຍາລັກ ເຄວັນກ໋າກ 1 ອັນ, ແຜ່ນCD ບັນດາບົດເພງຂອງຫວຽດນາມ.... ຈາກວິທະຍຸກະຈາຍສຽງຫວຽດນາມ, ພາກພາສາລາວ. ຂ້າພະເຈົ້າຮູ້ສຶກບໍ່ມີສິ່ງໃດປະເສີດເລີດລ້ຳກວ່າ, ມີແຕ່ສະແດງຄວາມຂອບອົກຂອບໃຈຢ່າງລົ້ນເຫຼືອ. ຂໍໃຫ້ຄວາມຮັກແພງ, ຄວາມສາມັກຄີລະຫວ່າງພາກພາສາລາວ, ວິທະຍຸກະຈາຍສຽງຫວຽດນາມ ກັບຂ້າພະເຈົ້າຈົ່ງໝັ້ນຄົງຂະໜົງແກ່ນຕະຫຼອດໄປ. ແລະ ໃນໄລຍະຜ່ານມາ, ຂ້າພະເຈົ້າກໍ່ໄດ້ແນະນຳໃຫ້ໝູ່ເພື່ອນຫຼາຍຄົນຕິດຕາມ ແລະ ຮັບຟັງລາຍການພາກພາສາລາວ, ວິທະຍຸກະຈາຍສຽງຫວຽດນາມ. ສ່ວນຂ້າພະເຈົ້າໄດ້ຕິດຕາມ ແລະ ຮັບຟັງພາກພາສາລາວ, ວິທະຍຸກະຈາຍສຽງຫວຽດນາມ ມາເປັນເວລາ 5 – 6 ປີແລ້ວ. ສຸດທ້າຍ, ຂ້າພະເຈົ້າຂໍຂອບໃຈພາກພາສາລາວ ທີ່ໄດ້ເອົາໃຈໃສ່ເຖິງຜູ້ຟັງຄືຂ້າພະເຈົ້າໃນຕະຫຼອດໄລຍະຜ່ານມາ.
ເພ່ືອນ ສຸວັນ ທິບພະຈັນ ທີ່ຮັກແພງ, ບັນນາທິການພາກພາສາລາວ VOV, ຂໍຂອບໃຈທີ່ເພື່ອນໄດ້ສົ່ງຈົດໝາຍມາຍັງລາຍການ. ຫວັງວ່າ, ໃນໄລຍະຈະມາເຖິງ, ເພື່ອນຄົງຈະສືບຕໍ່ຮັບຟັງລາຍການ ແລະ ປະກອບຄຳເຫັນເປັນປະຈຳເພື່ອໃຫ້ລາຍການນັບມື້ນັບດີກວ່າ.
ເພື່ອນ ສຸກມາລີວົງ, ນັກສຶກສາມະຫາວິທະຍາໄລແຫ່ງຊາດຮ່າໂນ້ຍ, ໄດ້ສົ່ງອີແມວມາຍັງລາຍການໂດຍຖາມວ່າ: ປີ 2014 ນີ້ເປັນປີທຳອິດທີ່ຂ້າພະເຈົ້າຕ້ອນຮັບບູນເຕັດຢູ່ຫວຽດນາມ. ໃນຊຸມມື້ຕົ້ນປີໃໝ່, ຂ້າພະເຈົ້າໄດ້ເຫັນບາງຄົນໄປເລາະຂາຍເກືອຢູ່ຕາມຖະໜົນ ແລະ ມີຄົນຊື້ເປັນຈຳນວນຫຼາຍ. ຂ້າພະເຈົ້າຢາກຖາມວ່າ, ເປັນຍັງຈຶ່ງມີການຊື້, ຂາຍເກືອຊຸມມື້ຕົ້ນປີໃໝ່? ແລະມັນມີຄວາມໝາຍຄືແນວໃດສຳລັບຊາວຫວຽດນາມ?
(ການຊື້, ຂາຍເກືອແມ່ນຮີດຄອງປະເພນີສະແດງໃຫ້ເຫັນຄວາມງາມ
ໃນຊີວິດວັດທະນະທຳຂອງຊາວຫວຽດນາມ)
ເພື່ອນ ສຸກມາລີວົງ ທີ່ຮັກແພງ. ຊາວຫວຽດນາມ ເຄີຍມີສຸພາສິດທີ່ວ່າ “ຕົ້ນປີຊື້ເກືອ, ທ້າຍປີຊື້ປູນ”. ນີ້ແມ່ນຮີດຄອງປະເພນີສະແດງໃຫ້ເຫັນຄວາມງາມໃນຊີວິດວັດທະນະທຳຂອງຊາວຫວຽດນາມ, ພິເສດແມ່ນປະຊາຊົນເຂດພາກເໜືອ. ໃນນັ້ນ, ເກືອແມ່ນສັນຍາລັກແຫ່ງນ້ຳໃຈ, ຄວາມສະໜິດຕິດພັນພັນ ແລະ ຄວາມອີ່ມໜຳສຳລານ. ການຊື້, ຂາຍເກືອໃນວັນທີ 1 ຂອງບູນເຕັດຫວຽດນາມ ແມ່ນເພື່ອຊື້ເອົາຄວາມໂຊກລາບໃນຕະຫຼອດປີ. ປ້າ ຫງວຽນທິເຟື້ອງ, ຜູ້ຂາຍເກືອມາເປັນເວລາກວ່າ 10 ປີແລ້ວ ໃຫຮູ້ວ່າ.
“ການຊື້ເກືອໃນຊຸມມື້ຕົ້ນປີໃໝ່ ເພື່ອໃຫ້ພໍ່ແມ່ບອກສອນໃຫ້ລູກຫຼານ ຕ້ອງປະຢັດ ເພື່ອມີເງິນຊື້ປູນສ້າງເຮືອນໃນທ້າຍປີ. ແລະ ຕາມການເວລາ ການຊື້ເກືອຍາມຕົ້ນປີໃໝ່ ໄດ້ກາຍເປັນຮີດຄອງປະເພນີອັນດີງາມຂອງຊາວຫວຽດນາມ.”
ໃນຊີວິດປະຈຳວັນ, ເກືອມີທີ່ຕັ້ງສຳຄັນຖັດຈາກເຂົ້າ. ຕາມການເລົ່າຂານກັນມາຈາກປູ່ຍ່າຕາຍາຍແລ້ວ, ໃນຍາມຕົ້ນລະດູບານໃໝ່, ເຂົ້າເຈົ້າມັກຊື້ເກືອຖ້ວຍໜຶ່ງ ຫຼື ຖົງໜຶ່ງ ນອກຈາກຄວາມໝາຍຢາກມີໂຊກລາບໃນປີແລ້ວ, ການຊື້ເກືອຍັງສະແດງໃຫ້ເຫັນຄວາມຫວັງຢາກມີຄວາມສະຫງົບສຸກ, ຄວາມສະດວກສະບາຍໃນຕະຫຼອດປີໃຫ້ທັງຄອບຄົວອີກ. ປ້າ ຫງວຽນທິເຟື້ອງ ແບ່ງປັນຕື່ມອີກວ່າ.
“ຊື້ເກືອຍາມຕົ້ນປີໃໝ່ ບໍ່ພຽງແຕ່ມີຄວາມໝາຍໃນວັດທະນະທຳອາຫານການກິນເທົ່ານັ້ນ, ຫາກຍັງມີຄວາມໝາຍດ້ານຈິດໃຈ, ນຳມາເຊິ່ງຄວາມອົບອຸ່ນ, ຄວາມປອງດອງໃນການພົວພັນລະຫວ່າງສະມາຊິກໃນຄອບຄົວອີກດ້ອຍ. ມີບາງຄົນຍັງຫວ່ານເກືອຢູ່ຫົນທາງ, ອ້ອມຂ້າງເຮືອນ ດ້ວຍຄວາມຫວັງທີ່ວ່າ ຢູ່ບ່ອນໃດກໍ່ມີຄວາມສະຫງົບສຸກ”.
ຜ່ານຈຸດເວລາສົ່ງທ້າຍປີເກົ່າ, ຕ້ອນຮັບປີໃໝ່ ຫຼື ໃນຕອນເຊົ້າວັນທີ 1 ຂອງບູນເຕັດ, ຜູ້ໃດກໍ່ລໍຖ້າສຽງຈ່າວຂາຍທີ່ວ່າ “ໃຜຊື້ເກືອແດ່” ເພື່ອຊື້ເອົາຄວາມໂຊກລາບໃຫ້ແກ່ຕົນເອງ ແລະ ທັງຄອບຄົວ.
ທີ່ກ່າວມາຂ້າງເທິງແມ່ນຄຳເຫັນຂອງທ່ານຜູ້ຟັງ ກໍ່ຄືຄຳຕອບຂອງພວກເຮົາກ່ຽວກັບບາງບັນຫາທີ່ທ່ານສົນໃຈ. ຖ້າທ່ານຜູ້ຟັງທ່ານໃດຢາກຊອກຮູ້ບັນຫາໃດ ກະລູນາຝາກຈົດໝາຍມາຍັງລາຍການຂອງພວກເຮົາຕາມທີ່ຢູ່: ວິທະຍຸກະຈາຍສຽງຫວຽດນາມ ພາກພາສາລາວ, ເຮືອນເລກທີ 45 ຖະໜົນບ່າຈ້ຽວຮ່າໂນ້ຍ ຫຼື ເບີໂທ: 00844.38256631 ແລະ ອີແມວ: Laovov@yahoo.com
Minh Duc