(VOVWORLD) -ໃນອາທິດຜ່ານມາ, VOV5 ໄດ້ຮັບຈົດໝາຍຈຳນວນ 402 ສະບັບ ຈາກທ່ານຜູ້ຟັງທີ່ມາຈາກ 36 ປະເທດ ແລະ ເຂດແຄວ້ນ, ໃນນັ້ນ, ລາຍການກະຈາຍສຽງພາກພາສາ ລາວ ໄດ້ຮັບຈົດໝາຍ 12 ສະບັບ.
ພາຍຫຼັງເຫດການ ນາງ ຫງວຽນທຸກຖຸ່ຍຕຽນ - ຜູ້ຕາງໜ້າຫວຽດນາມ ໄດ້ຄອງຕຳແໜ່ງນາງງາມສັນຕິພາບສາກົນ ປີ 2021 – Miss Grand International 2021 ໃນທ້າຍອາທິດຜ່ານມາ, ມີຜູ້ຟັງລາວຫຼາຍທ່ານ ສົ່ງຂໍ້ຄວາມຜ່ານທາງເຟັດບຸກມາຫາລາຍການ ສະແດງຄວາມຍິນດີນຳ ຫວຽດນາມ ແລະ ຍ້ອງຍໍຄວາມງາມ, ຄວາມເກັ່ງກ້າສາມາດຂອງນາງສາວຜູ້ນີ້. ໃນນັ້ນ ມີເພື່ອນ ກະຕັນ ແລະ ເພື່ອ ອູເທ. ເພື່ອນ ກະຕັນ ໄດ້ຂຽນມາວ່າ: “ຂໍສະແດງຄວາມຍິນດີນຳນາງ ຫງວຽນທຸກຖຸ່ຍຕຽນ - ນາງງາມຜູ້ທຳອິດຂອງ ຫວຽດນາມ ແລະ ຜູ້ທີສອງຂອງ ອາຊີ ທີ່ໄດ້ຄອງມຸງກຸດ ນາງງາມແຫ່ງສັນຕິພາບສາກົນ - Miss Grand International”.
ຕໍ່ໄປແມ່ນຄຳແບ່ງປັນຂອງເພື່ອນ ບົວລະພາ ກ່ຽວກັບຄວາມງາມຂອງປະເທດຊາດ ແລະ ປະຊາຊົນ ຫວຽດນາມ ເມື່ອຮັບຊົມພາບສາລະຄະດີ “ຄວາມງາມທີ່ເປັນເອກະລັກຂອງ ຫວຽດນາມ ຜ່ານກ້ອງຖ່າຍຮູບຂອງນັກຖ່າຍຮູບສາກົນ” ໃນເວັບໄຊ vovworld.vn. ເພື່ອນແບ່ງປັນວ່າ “ຄໍລຳ Media - ພາບສາລະຄະດີ ແມ່ນຄໍລຳທີ່ຂ້າພະເຈົ້າໄດ້ຕິດຕາມເປັນປະຈຳ. ຂ້າພະເຈົ້າໄດ້ເຫັນຫຼາຍຮູບພາບທີ່ສວຍງາມກ່ຽວກັບທິວທັດທຳມະຊາດ, ງານບຸນຕ່າງໆຂອງ ຫວຽດນາມ ຜ່ານສື່ສັງຄົມອອນລາຍຕ່າງໆ. ແຕ່ເຖິງຢ່າງໃດກໍຕາມ, ບັນດາພາບຖ່າຍທີ່ສວຍງາມ, ເປັນເອກະລັກ ແລະ ໄດ້ຈັດວາງສະແດງຕາມຫົວຂໍ້, ມີເລື່ອງລາວສະເພາະທີ່ເປັນໜ້າຈັບອົກຈັບໃຈ ແລະ ມີຄຳແນະນຳ, ຄຳອະທິບາຍເປັນພາສາ ລາວ ນັ້ນ ແມ່ນສາມາດຕິດຕາມໄດ້ຢູ່ແຕ່ໃນເວັບໄຊຂອງ VOV ເທົ່ານັ້ນ. ທິວທັດທຳມະຊາດຂອງ ຫວຽດນາມ ສວຍງາມຫຼາຍ. ຂອບໃຈອ້າຍເອື້ອຍນ້ອງບັນນາທິການລາຍການພາກພາສາລາວ ຫຼາຍໆເດີ.!”
ຂໍຂອບໃຈທ່ານຜູ້ຟັງທຸກໆທ່ານທີ່ໄດ້ຕິດຕາມຂ່າວ, ບົດ ແລະ ຝາກຈົດໝາຍມາຫາລາຍການໃນອາທິດຜ່ານມາ. ນອກຈາກຄໍລຳ Media ແລ້ວ ຍັງມີຫຼາຍຄໍລຳອື່ນໆຄື ຄົ້ນຫາ ຫວຽດນາມ, ວັດທະນະທຳ ຫວຽດນາມ ແລະ ປະເທດຊາດ - ຊາວ ຫວຽດນາມ ກໍໄດ້ແນະນຳພາບຖ່າຍ, ບົດຂຽນດ້ວຍຫຼາຍເນື້ອໃນທີ່ເປັນເອກະລັກສະເພາະ ແລະ ມີເນື້ອຫາສາລະຢ່າງລະອຽດກວ່າກ່ຽວກັບວັດທະນະທຳ, ປະເທດຊາດ, ຊາວ ຫວຽດນາມ. ເຊີນທ່ານຜູ້ຟັງທຸກໆທ່ານຕິດຕາມຮັບຊົມ, ຮັບຟັງ ແລະ ເຂົ້າອ່ານໄດ້ເລີຍໃນເວັບໄຊ vovworld.vn ລາຍການພາກພາສາລາວ.
 ລົດໄຟຟ້າລອຍ ແລ່ນຢູ່ເສັ້ນທາງແຕ່ ກາດລິງ ຫາ ຮ່າດົງ |
ຈົດໝາຍສະບັບຕໍ່ໄປແມ່ນຂອງເພື່ອນ ຄຳແກ້ວ ຢູ່ ວຽງຈັນ. ເພື່ອນຄຳແກ້ວ ແບ່ງປັນວ່າ “ຫວ່າງມໍ່ໆມານີ້ ມີເພື່ອນຄົນລາວຫຼາຍຄົນຢູ່ຮ່າໂນ້ຍ ໄດ້ແບ່ງປັນຮູບໄປສຳຜັດກັບປະສົບການຂີ່ລົດໄຟຟ້າລອຍທີ່ສວຍງາມ ແລະ ທັນສະໄໝ. ຮູບແບບການສັນຈອນນີ້ມີຈຸດພິເສດແນວໃດນັ້ນ, ຫວັງວ່າອ້າຍເອື້ອຍນ້ອງບັນນາທິການລາຍການພາກພາສາລາວຈະ ແນະນຳໃຫ້ຮູ້ແດ່.”
ຮູບແບບການສັນຈອນທີ່ເພື່ອນໄດ້ຖາມມານັ້ນແມ່ນ ລົດໄຟຟ້າລອຍ ແລ່ນຢູ່ເສັ້ນທາງແຕ່ ກາດລິງ ຫາ ຮ່າດົງ (ໂຄງການລົດໄຟຟ້າລອຍ ເສັ້ນທາງແຕ່ ກາດລິງ - ຮ່າດົງ” ດ້ວຍຄວາມຍາວ 13 km. ຮູບແບບນີ້ໄດ້ນຳເຂົ້າເຄື່ອນໄຫວຢ່າງເປັນທາງການນັບແຕ່ວັນທີ 6 ພະຈິກ ເປັນຕົ້ນມາ. ເສັ້ນທາງລົດໄຟຟ້າລອຍແຫ່ງທຳອິດຂອງ ຮ່າໂນ້ຍ ນີ້ ມີລະດັບຄວາມໄວ 35km/ຊົ່ວໂມງ ແລະ ສາມາດບັນຈຸຜູ້ໂດຍສານໄດ້ປະມານ 1.000 ຄົນ.
ໜຶ່ງໃນບັນດາຈຸດໃໝ່ອ່ຽມ ແລະ ພົ້ນເດັ່ນທີ່ສຸດຂອງໂຄງການເສັ້ນທາງລົດໄຟຟ້າລອຍ ຕອນ ກາດລິງ - ຮ່າດົງ ແມ່ນ ວິທີການຊຳລະຄ່າປີ້ ໄດ້ນຳໃຊ້ຢ່າງມີໄຫວພິບກວ່າ, ລາຄາເໝາະສົມ ຂຶ້ນເທື່ອໜຶ່ງມີພຽງແຕ່ 8.000 ດົ່ງ/ຄົນ ເທົ່ານັ້ນ, 30.000 ດົ່ງ/ຄົນ/ວັນ ຫຼື 200.000ດົ່ງ/ຄົນ/ເດືອນ, ໂດຍບໍ່ຈຳກັດຈຳນວນຖ້ຽວ. ພິເສດ, ຄ່າປີ້ສາມາດຊຳລະດ້ວຍເງິນສົດ ຫຼື ບັດ ATM ກໍ່ໄດ້. ສະຖານີລົດໄຟຟ້າທຸກແຫ່ງລ້ວນແຕ່ເຊື່ອມຕໍ່ກັບລະບົບລົດເມຢູ່ພາຍໃນນະຄອນ. ສິ່ງດັ່ງກ່າວໄດ້ຊ່ວຍໃຫ້ປະຊາຊົນໄປມາໄດ້ຢ່າງສະດວກສະບາຍ ແລະ ງ່າຍດາຍກວ່າ. ຍິ່ງໄປກວ່ານັ້ນ, ລະບົບສະຖານີລົດໄຟຟ້າເຫຼົ່ານີ້ ໄດ້ຮັບການກໍ່ສ້າງ ແລະ ນຳໃຊ້ເຄື່ອງອຸປະກອນທີ່ທັນສະໄໝ ແລະ ສະດວກຄື ລິບ, ຂັ້ນໄດເລື່ອນ, ຂັ້ນໄດຍ່າງ, ກະດານແຈ້ງຂໍ້ມູນ, ແນະນຳກ່ຽວກັບເວລາລົດໄຟແລ່ນ, ອຸປະກອນຊ່ວຍເຫຼືອຜູ້ເສຍອົງຄະ, ລະບົບຄວບຄຸມປີ້ແບບອັດຕະໂນມັດ, ລະບົບລະບາຍອາກາດໄດ້ມາດຕະຖານສາກົນ, ມີກ້ອງວົງຈອນປິດ… ຮູບແບບດັ່ງກ່າວໄດ້ນຳເຂົ້າເຄື່ອນໄຫວ ບໍ່ພຽງແຕ່ຊ່ວຍໃຫ້ສິ່ງແວດລ້ອມມີຄວາມສະອາດປອດໂປ່ງກວ່າ, ຈຳກັດຂີ້ຝຸ່ນ, ມົນລະຜິດທາງສິ່ງແວດລ້ອມ ແລະ ບັນຫາແອອັດລົດຕິດເທົ່ານັ້ນ, ຫາກຍັງຊ່ວຍໃຫ້ປະຊາຊົນສາມາດສັນຈອນໄປມາໄດ້ຢ່າງສະດວກກວ່າ, ພິເສດແມ່ນຊ່ວຍປະຢັດເວລາ ແລະ ຄ່າໃຊ້ຈ່າຍໃນການໄປມາ.
 ທ່ານປະທານປະເທດ ຫວຽດນາມ ຫງວຽນຊວັນຟຸກ ພ້ອມດ້ວຍກຸ່ມເພື່ອນໜຸ່ມທີ່ປະດິດແຕ່ງໝວກກັນໂຄວິດແບບເຄື່ອນທີ່ Vihelm |
ພວກຂ້າພະເຈົ້າຂໍຕອບຄຳຖາມຂອງເພື່ອນ ອະນຸສັກຢູ່ ແຂວງ ຈຳປາສັກ ກ່ຽວກັບໝວກກັນ ໂຄວິດ - 19 ແບບເຄື່ອນທີ່ຂອງບັນດາເພື່ອນໜຸ່ມ ຫວຽດນາມ ທີ່ໄດ້ຮັບການເຊີດຊູຈາກ ສະວິດ.
ໝວກກັນໂຄວິດ - 19 ທີ່ເພື່ອນໄດ້ເວົ້າເຖິງນັ້ນ ເອີ້ນວ່າ “ໝວກກັນໂຄວິດແບບເຄື່ອນທີ່ Vihelm”. ນີ້ແມ່ນໝາກຜົນການປະດິດແຕ່ງຂອງເພື່ອນໜຸ່ມ ຫວຽດນາມ 3 ຄົນ ຄື ໂດ໊ຈ້ອງມິງດຶກ (ເກີດປີ 2003), ເພື່ອນ ເຈິ່ນຫງວຽນແຄັງອານ (ເກີດປີ 2006) ແລະ ເພື່ອນ ຫງວຽນຮວ່າງຝຸກ (ເກີດປີ 2007). ໝວກ Vihelm ໄດ້ຮັບການອອກແບບຕາມຫຼັກການເຄື່ອນໄຫວຂອງໜ້າກາກກັ່ນຕອງອາກາດ PARR - ໜ້າກາກກັ່ນຕອງອາກາດທີ່ໄດ້ມາດຕະຖານ ແລະ ໄດ້ຮັບການຮັບຮອງໃນທົ່ວໂລກ ແລະ ມີຄວາມປອດໄພກວ່າຜ້າອັດປາກ N99 ທົບ 100 ເທົ່າ. ເພື່ອນໜຸ່ມ 3 ຄົນນີ້ ໄດ້ອອກແບບຖົງມືພິເສດຢູ່ຂ້າງລຸ່ມຂອງໝວກ, ຊ່ວຍໃຫ້ຜູ້ນຳໃຊ້ສາມາດເກົາໜ້າ, …...ຕາ ຫຼື ຍິ່ງກວ່ານັ້ນແມ່ນສາມາດກິນເຂົ້າກິນນ້ຳໄດ້ເປັນປົກກະຕິ ແຕ່ຍັງຮັກສາໄດ້ການສຳຜັດກັບສະພາບແວດລ້ອມພາຍນອກ. ດັ່ງນັ້ນ, ຜູ້ນຳໃຊ້ສາມາດໃສ່ໝວກນີ້ໄດ້ຢ່າງສະບາຍໃນ 4 ຊົ່ວໂມງ ໂດຍບໍ່ຕ້ອງເປັນຫ່ວງນຳບັນຫາຈະເກີດອາການຄັນ ຫຼືວ່າຮ້ອນ. ພ້ອມດຽວກັນນັ້ນ ຫຼຸດຜ່ອນຄວາມສ່ຽງຕິດເຊື້ອໄດ້ເຖິງ 99,9% ຕາມການຕີລາຄາຜ່ານການທົດລອງຂອງກຸ່ມນັກຄົ້ນຄວ້າ.
ເນື້ອໃນດັ່ງກ່າວກໍເປັນການປິດທ້າຍລາຍການໂອ້ລົມກັບເພື່ອນລາວໃນມື້ນີ້. ຂອບໃຈທ່ານຜູ້ຟັງທຸກໆທ່ານທີ່ໄດ້ໃຫ້ກຽດຕິດຕາມຮັບຟັງ. ຖ້າຫາກທ່ານຜູ້ຟັງ, ຜູ້ອ່ານທ່ານໃດມີ ຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການ ຂອງພວກເຮົາໄດ້ເລີຍໂດຍ ຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນບ່າຈ້ຽວ, ຮ່າໂນ້ຍ. ຫຼືໂທລະສັບມາໂດຍກົງກໍ່ໄດ້ຕາມເບີໂທ 0084.243.825.6631 ຫຼືອີເມວ laovov5@gmail.com. ທ່ານຜູ້ຟັງກໍ່ສາມາດໃຫ້ຄຳຕິຊົມໃນເວັບໄຊ vovworld.vn ຂອງພວກເຮົາໄດ້.