ໃນນັ້ນ, ລາຍການກະຈາຍສຽງພາກພາສາລາວ ໄດ້ຮັບຈົດໝາຍ, ອີແມວ 23 ສະບັບຈາກທ່ານຜູ້ຟັງທີ່ມີຄວາມສົນໃຈເຖິງງານບຸນໃນລະດູບານໃໝ່ ແລະ ວັດແຫ່ງຕ່າງໆຂອງ ຫວຽດນາມ, ພິເສດແມ່ນຢູ່ພາກເໜືອ. ໃນລາຍການ “ໂອ້ລົມກັບເພື່ອນລາວ” ມື້ຶ້ນີ້, ພວກຂ້າພະເຈົ້າຂໍຄັດສະເໜີບາງເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງມີຄວາມສົນໃຈ.

ເມື່ອເຂົ້າຮ່ວມງານບຸນຢູ່ ວັດເຮືອງ ມີຈຸດທີ່ເປັນເອກະລັກສະເພາະທີ່ສຸດແມ່ນແຂກທ່ອງທ່ຽວຈະໄດ້ພາຍເຮືອຊົມທິວທັດທຳມະຊາດກ່ອນ ທີ່ເຂົ້າເຂດໃຈກາງ

 

       ໃນອາທິດ, ເພື່ອນແກ້ວ ຄຳມະນີ, ຢູ່ແຂວງ ຫົວພັນ ໄດ້ຝາກອີແມວ ເຖິງລາຍການໂດຍໃຫ້ຮູ້ວ່າ: “ຂ້າພະເຈົ້າມັກຊົມພາບສາລະຄະດີອອກໃນເວັບໄຊ vovworld.vn ໃນອາທິດຜ່ານມາທີ່ສຸດ, ຍ້ອນນີ້ແມ່ນຄັ້ງທຳອິດຂ້າພະເຈົ້າຮູ້ຈັກເຖິງປະເພນີໃຫ້ ແລະ ຂໍຕົວໜັງສືຂອງຊາວ ຫວຽດນາມ. ການເຄື່ອນໄຫວວັດທະນະທຳນີ້ມີຄວາມໝາຍທີ່ສຸດ, ຫວັງວ່າພວກເພື່ອນຈະຮັກສາ ແລະ ເສີມຂະຫຍາຍບັນດາຈຸດວັດທະນະທຳອັນລ້ຳຄ່າຄືແນວນີ້.”

        ເພື່ອນແກ້ວ ຄຳມະນີ ທີ່ຮັກແພງ, ພວກຂ້າພະເຈົ້າຍາມໃດກໍ່ພະຍາຍາມສົ່ງບັນດາຂ້ໍມູນຂ່າວດ້ວຍຮູບພາບ ເພື່ອໃຫ້ຜູ້ອ່ານຜູ້ຊົມມີຄວາມເຂົ້າໃຈແຈ້ງກ່ວາກ່ຽວກັບບັນດາຈຸດວັດທະນະທຳທີ່ເປັນເອກະລັກສະເພາະຂອງ ຫວຽດນາມ. ຫວັງວ່າ, ພວກເພື່ອນຍາມໃດກໍ່ເອົາໃຈໃສ່ ແລະ ປະກອບຄຳເຫັນເພື່ອໃຫ້ລາຍການພາກພາສາລາວນັບມື້ນັບອຸດົມສົມບູນ, ມ່ວນກ່ວາອີກ.

++++++

        ໃນອາທິດ, ເພື່ອນ ລັດຕະນາພອນ ໄດ້ສົ່ງອີແມວ ເຖິງລາຍການດ້ວຍເນື້ອໃນວ່າ: “ອາທິດຜ່ານມາ, ຂ້າພະເຈົ້າໄດ້ຮັບຟັງຂ່າວຕ່າງໆກ່ຽວກັບບັນດາງານບຸນໃນລະດູບານໃໝ່ເຊິ່ງໄດ້ດຳເນີນພາຍຫຼັງບຸນເຕັດຢູ່ ຫວຽດນາມ. ມີເພື່ອນຜູ້ໜຶ່ງຂອງຂ້າພະເຈົ້າ, ປະຈຸບັນ ພວມຮ່ຳຮຽນຢູ່ມະຫາວິທະຍາໄລການແພດ ຮ່າໂນ້ຍ ໄດ້ບອກວ່າ: ພາຍຫຼັງບຸນເຕັດ, ລາວຈະໄປງານບຸນ ວັດ ເຮືອງ. ລາວ ເວົ້າວ່ານີ້ແມ່ນໜຶ່ງໃນບັນດາງານບຸນໃຫຍ່ທີ່ສຸດຢູ່ ຫວຽດນາມ. ຂ້າພະເຈົ້າຢາກຮູ້ແຈ້ງກ່ວາກ່ຽວກັບງານບຸນນີ້ໄດ້ບໍ່? ຂໍຂອບໃຈ.”

        ເພື່ອນ ລັດຕະນາພອນ ທີ່ຮັກແພງ! ຄືດັ່ງແຫຼ່ງຂ່າວຊຶ່ງເພື່ອນໄດ້ຮັບຮູ້ນຳກັນແລ້ວ, ງານບຸນ ວັດ ເຮືອງ ແມ່ນງານບຸນໃຫຍ່ສຸດ ແລະ ຖືກດຳເນີນໃນເວລາຍາວສຸດຂອງ ຫວຽດນາມ. ພວກຂ້າພະເຈົ້າຂໍສະເໜີບາງຂໍ້ມູນຂ່າວຕົ້ນຕໍກ່ຽວກັບວັດ ເຮືອງ ແລະ ງານບຸນວັດເຮືອງ ເຖິງທ່ານຜູ້ຟັງ: ວັດ ເຮືອງ ແມ່ນກຸ່ມເຂດວັດທະນະທຳ -ສາສະໜາ ຫວຽດນາມ , ເຊິ່ງລວມມີ ວັດບູຊາພະພຸດທະເຈົ້າຫຼາຍແຫ່ງ ແລະ ວິຫານບູຊາ ພະອໍລະຫັນ, ສາລາ ບູຊາການເຫຼື້ອມໃສກະສິກຳ. ໃຈກາງຂອງວັດ ເຮືອງນອນໃນຕາແສງ ເຮືອງເຊີນ, ເມືອງ ໝີ້ດືກ, ຮ່າໂນ້ຍ, ນອນໃນແຄມແມ່ນ້ຳ ໄດ໋. ວັດແຫ່ງນີ້ໄດ້ຮັບການກໍ່ສ້າງດ້ວຍຂອບຂະໜາດໃຫຍ່ ໃນທ້າຍສະຕະວັດທີ 17 ແລະ ຖືກທຳລາຍໃນການຕໍ່ສູ້ຕ້ານລ່າເມືອງຂຶ້ນ ຝຣັ່ງ ໃນປີ 1947, ຫຼັງຈາກນັ້ນໄດ້ຮັບການກໍ່ສ້າງຄືນໃໝ່ເມື່ອປີ 1988. ວັນທີ 6 ເດືອນຈຽງ ແມ່ນວັນໄຂງານບຸນ. ງານບຸນເຄີຍແກ່ຍາວຮອດທ້າຍເດືອນ 3 (ໄລ່ຕາມຈັນທະປະຕິທິນ). ຈຸດສຸມຂອງງານບຸນແມ່ນຈາກວັນເພັງເດືອນຈຽງ ຮອດວັນທີ 18 ເດືອນ 2 (ໄລ່ຕາມຈັນທະປະຕິທິນ). ໃນຊຸມວັນນີ້ແມ່ນວັນບຸນເປີດປະຕູປ່າຂອງທ້ອງຖິ່ນ. ມາຮອດປະຈຸບັນ, ພິທີ “ເປີດປະຕູປ່າ” ມີຄວາມໝາຍໃໝ່ ແມ່ນວັນເປີດປະຕູວັດ. ກ່ອນມື້ໄຂງານບຸນມື້ໜຶ່ງ, ວິຫານ, ວັດ, ສາລາ, ຫໍບູຊານ້ອຍທຸກແຫ່ງຢູ່ທີ່ນີ້ລ້ວນແຕ່ໄດ້ຈຸດທູບທຽນ. ຢູ່ພາຍໃນວັດ ມີພິທີຖະຫວາຍທູບທຽນ, ເຊິ່ງລວມມີ: ທູບ, ທຽນ, ດອກໄມ້, ໝາກໄມ້ ແລະ ອາຫານເຈ. ງານບຸນ ວັດເຮືອງ ແມ່ນບ່ອນເຕົ້າໂຮມບັນດາການດຳເນີນຊີວິດວັດທະນະທຳທີ່ເປັນເອກະລັກສະເພາະຂອງຊາດຄື: ຊ່ວງເຮືອ, ປີນພູ ແລະ ຂັບແຈ໋ວ, ຂັບເຈົາວັນ… ເມື່ອເຂົ້າຮ່ວມງານບຸນຢູ່ ວັດເຮືອງ ມີຈຸດທີ່ເປັນເອກະລັກສະເພາະທີ່ສຸດແມ່ນແຂກທ່ອງທ່ຽວຈະໄດ້ພາຍເຮືອຊົມທິວທັດທຳມະຊາດກ່ອນທີ່ເຂົ້າເຂດໃຈກາງ. ໄລຍະທາງຈາກໃຈກາງນະຄອນຫຼວງ ຮ່າໂນ້ຍ ຮອດວັດເຮືອງ ແມ່ນປະມານ 50 ກມ.

ຂັບເຈົາວັນ

 

        ສ່ວນເພື່ອນ ແສງອາລຸນ, ແຂວງ ຊຽງຂວາງ ໄດ້ສົ່ງອີແມວ ເຖິງລາຍການດ້ວຍເນື້ອໃນວ່າ: “ຫວຽດນາມ ແມ່ນປະເທດມີພື້ນຖານວັດທະນະທຳອຸດົມສົມບູນ ແລະ ມີຫຼາຍມໍລະດົກໄດ້ຮັບການຮັບຮູ້ເປັນມໍລະດົກວັດທະນະທຳບໍ່ແມ່ນວັດຖຸ. ຂ້າພະເຈົ້າຢາກຖາມວ່າ ມາຮອດປະຈຸບັນ, ຫວຽດນາມ ມີມໍລະດົກວັດທະນະທຳບໍ່ແມ່ນວັດຖຸເທົ່າໃດ ແລະ ແນະນຳບັນດາມໍລະດົກນັ້ນໄດ້ບໍ່?”

        ເພື່ອນ ແສງອາລຸນ ທີ່ຮັກແພງ, ມາຮອດປະຈຸບັນ, ຫວຽດນາມ ມີມໍລະດົກໄດ້ຮັບຮູ້ແມ່ນມໍລະດົກວັດທະນະທຳບໍ່ແມ່ນວັດຖຸ 10 ຢ່າງຄື: ເພງພະລາດຊະວັງ ເຫ້ວ; ບັນຍາກາດວັດທະນະທຳຄ້ອງ ໄຕງວຽນ; ຂັບກວານຫໍ້ ບັກນີງ; ງານບຸນ ຢ໋ອງ ຢູ່ວິຫານ ຟູ່ດົ໋ງ ແລະ ວິຫານ ຊອກ; ການເຫຼື້ອມໄສບູຊາເຈົ້າຊີວິດ ຮູ່ງ ຢູ່ແຂວງ ຟູ໋ເທາະ; ຂັບເດີ່ນກາຕາຍຕື໋ ພາກໃຕ້; ຂັບ ວີ໋, ຢ້ຳ ເງ້ຕິ້ງ; ປະຕິບັດການເຫຼື້ອມໃສບູຊາ 3 ພະແມ່ຂອງຊາວ ຫວຽດນາມ; ພິທີການ ແລະ ການລະຫຼິ້ນ ດຶງເຊືອກ ແລະ ສິລະປະຂັບຈ່ອຍ ພາກກາງ. ນອກຈາກນັ້ນ, ຍັງມີ 2 ມໍລະດົກໄດ້ຮັບການຮັບຮູ້ແມ່ນມໍລະດົກວັດທະນະທຳບໍ່ແມ່ນວັດຖຸໄດ້ຮັບການອະນຸລັກຮັກສາຢ່າງຮີບດ່ວນນັ້ນແມ່ນ: ຂັບກາຈູ່ ແລະ ຂັບຊວານ. ຫວັງວ່າ, ບັນດາຂໍ້ມູນຂ່າວດັ່ງກ່າວຈະມີຜົນປະໂຫຍດຕໍ່ເພື່ອນ ແສງອາລຸນ.

ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານ ທີ່ຝາກມາລາຍການ ໃນອາທິດທີ່ຜ່ານມາ. ຖ້າຫາກທ່ານຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາ ໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.243.825.6631 ຫຼື ອີແມວ laovov5@gmail.com. ທ່ານຜູ້ຟັງກໍ່ສາມາດໃຫ້ ຄຳຕິຊົມໃນເວັບໄຊ vovworld.vn ຂອງພວກເຮົາ.