ໃນອາທິດ, ເພື່ອນ ຈັນທະພອນ ແລະ ເພື່ອນ ຄຳແສງ, ແຂວງ ຈຳປາສັກ ໄດ້ຝາກຈົດໝາຍເຖິງລາຍການໂດຍໃຫ້ຮູ້ວ່າ: “ທ້າຍອາທິດຜ່ານມາ, ໄດ້ເກີດພະຍຸຖະລົ່ມ, ໝາກເຫັບຕົກໃນເມືອງ ປາກຊ່ອງ. ເຖິງວ່າໝາກເຫັບ ແລະ ລົມແຮງໃນບໍລິເວນບໍ່ກວ້າງ ແຕ່ໄດ້ທຳລາຍຜົນລະປູກທັງໝົດຂອງພໍ່ແມ່ປະຊາຊົນ”. ນອກຈາກນັ້ນ, ຜູ້ຟັງສອງທ່ານຍັງໄດ້ຝາກຮູບຖ່າຍໝາກເຫັບທີ່ຕົກ ແລະ ຜົນເສຍຫາຍຕໍ່ຜົນລະປູກຂອງພໍ່ແມ່ປະຊາຊົນຊາວກະສິກອນໃນທ້ອງຖິ່ນຈຳນວນໜຶ່ງ.

ພວກຂ້າພະເຈົ້າຂໍແບ່ງເບົາຄວາມເສຍຫາຍນຳພໍ່ແມ່ປະຊາຊົນຊາວກະສິກອນຢູ່ເມືອງ ປາກຊ່ອງ ຍ້ອນຜົນສະທ້ອນຈາກພະຍຸ, ໝາກເຫັບກໍ່ຂຶ້ນ. ນີ້ກໍ່ແມ່ນໜຶ່ງໃນບັນດາຜົນກະທົບຈາກການປ່ຽນແປງຂອງດິນຟ້າອາກາດ. ຫວັງວ່າ, ພໍ່ແມ່ປະຊາຊົນຈະໄດ້ປູກໃໝ່ໃນເຂດນາຖືກເສຍຫາຍນັ້ນ ແລະ ຊີວິດການເປັນຢູ່, ການຜະລິດຂອງຊາວກະສິກອນຈະກັບຄືນສູ່ສະພາບປົກກະຕິໂດຍໄວ. ຂໍຂອບໃຈເພື່ອນ ຈັນທະພອນ ແລະ ເພື່ອນ ຄຳແສງ ທີ່ໄດ້ແບ່ງປັນກັບພວກຂ້າພະເຈົ້າ.

ນັກກຳກັບການສະແດງຍິງໜຸ່ມ ຮ່າເລ້ຢ້ຽມ

ເພື່ອນ ບຸນທັນ, ແຂວງ ວຽງຈັນ ໄດ້ຝາກອີເມວເຖິງລາຍການວ່າ ຢາກຊອກຮູ້ຂໍ້ມູນກ່ຽວກັບນັກກຳກັບການສະແດງຍິງ ຮ່າເລ້ຢ້ຽມ, ຊາວເຜົ່າໄຕ, ໂດຍຖາມວ່າ: ຫວ່າງແລ້ວນີ້, ຂ້າພະເຈົ້າໄດ້ອ່ານຂໍ້ມູນກ່ຽວກັບພິທີປະກາດຟິມຮູບເງົາທີ່ມີຊື່ວ່າ: “ນ້ອງໆໃນສາຍໝອກ”. ຟິບຮູບເງົາເລື່ອງນີ້ ຂອງນາງສາວຊາວເຜົ່າ ໄຕ່ ຍາດໄດ້ລາງວັນສາກົນ Amsterdam ປີ 2021 , ຫວັງວ່າບັນນາທິການພາກພາສາລາວຈະສະໜອງຂໍ້ມູນຫຼາຍກ່ວາກ່ຽວກັບຜູ້ກຳກັບຂອງຟິມຮູບເງົາເລື່ອງນີ້ໃຫ້ຊາບແດ່.

ເພື່ອນ ບຸນທັນ ທີ່ຮັກແພງ, ໃນງານມະໂຫລານ ຟິມຮູບເງົາເອກະສານສາກົນ Amsterdam (IDFA, ຈັດຂຶ້ນແຕ່ວັນທີ 17 -28 ພະຈິກ 2021) ໄດ້ປະກາດບັນຊີລາຍຊື່ບັນດາຜູ້ທີ່ໄດ້ຮັບໄຊຊະນະທີ່ງານປະກວດປີນີ້. ໃນນັ້ນ, ຟິມຮູບເງົາທີ່ມີຊື່ວ່າ “ນ້ອງໆໃນສາຍໝອກ” ຂອງຜູ້ກຳກັບການສະແດງຍິງໜຸ່ມ ຮ່າເລ້ຢ້ຽມ ຍາດໄດ້ລາງວັນ “ຜູ້ກຳກັບການສະແດງດີເດັ່ນທີ່ສຸດ”.

ຜູ້ກຳກັບການສະແດງ ຮ່າເລ້ຢ້ຽມ (ເກີດປີ 1991, ເປັນຊາວເຜົ່າໄຕ່, ຢູ່ແຂວງ ບັກກ້ານ) ໄດ້ຮຽນຈົບພະແນກສື່ມວນຊົນ ຂອງມະຫາວິທະຍາໄລວິທະຍາສາດ, ສັງຄົມ ແລະ ມະນຸດສາດ. ໂດຍເປັນຊາວເຜົ່າສ່ວນໜ້ອຍ ດັ່ງນັ້ນ, ຜູ້ກຳກັບການສະແດງ ຮ່າເລ້ຢ້ຽມ ມີຄວາມເຫັນອົກເຫັນໃຈຕໍ່ບັນດາຕົວພະຍານຂອງຟີມຮູບເງົາ ເມື່ອເວົ້າເຖິງບັນດາສິ່ງທ້າທາຍເຊິ່ງບັນດານ້ອງສາວທີ່ໄດ້ກຳເນີດ ແລະ ດຳລົງຊີວິດຢູ່ເຂດພູສູງຕ້ອງປະເຊີນໜ້າ. ນອກຈາກລາງວັນຂອງ ຮ່າເລ້ຢ້ຽມ ແລ້ວ, ຟີມຮູບເງົາເອກະສານນີ້ ຍັງໄດ້ຮັບລາງວັນພິເສດ ຈາກຄະນະກຳມະການ ສຳລັບຜົນງານກຳກັບຟີມຮູບເງົາທຳອິດອີກດ້ວຍ. ງານມະໂຫລານ ຟີມຮູບເງົາສາກົນ  Amsterdam ຂອງປະເທດ ໂຮນລັງ ໄດ້ຈັດຂຶ້ນເປັນປະຈຳປີ ໃນເດືອນ ພະຈິກ ຢູ່ Amsterdam. ງານມະໂຫລານຟິມເອກະສານສານກົນ Amsterdam ໄດ້ຈັດຂຶ້ນເປັນຄັ້ງທຳອິດໃນປີ 1988 ເພື່ອກະຕຸກຊຸກຍູ້ວັດທະນະທຳຟິມຮູບເງົາເອກະສານທັງຢູ່ພາຍໃນ ແລະ ຕ່າງປະເທດ. ນັບແຕ່ນັ້ນມາ, ງານມະຫາລານຟີມຮູບເງົາສາກົນ Amsterdam ໄດ້ກາຍເປັນງານມະໂຫລານຟິບຮູບເງົາເອກະສານໃຫຍ່ທີ່ສຸດໃນໂລກ.

ແຕ່ວັນທີ 17 ມີນາ 2023, ຟີມຮູບເງົາເອກະສານເລື່ອງນີ້ໄດ້ຮັບສາຍຢູ່ໂຮງສາຍບາງແຫ່ງຂອງ ຫວຽດນາມ, ເພື່ອນ ບຸນທັນ ແລະ ຜູ້ຟັງທີ່ສົນໃຈ ກໍ່ສາມາດເຂົ້າເບິ່ງ trailer ຂອງ ຟີມຮູບເງົາເອກະສານນີ້ໄດ້ທີ່: https://www.youtube.com/watch?v=C2dVG2xHRVg

ພາບປະກອບຈາກອິນເຕີເນັດ

ເພື່ອນ ບຸນທະວີ, ແຂວງ ບໍ່ແກ້ວ ໄດ້ສົ່ງອີເມວ ມາຍັງລາຍການ ແລະ ແບ່ງປັນວ່າ: ຂ້າພະເຈົ້າແມ່ນຜູ້ມັກແລ່ນ ມາລາທອນ ແລະ ເຄີຍເຂົ້າຮ່ວມບັນດາການແຂ່ງຂັນແລ່ນຢູ່ພາຍໃນປະເທດ. ໄລຍະຜ່ານມາ, ເມື່ອອ່ານຂ່າວໃນເວບໄຊຂອງພາກພາສາລາວ, ຂ້າພະເຈົ້າເຫັນຫຼາຍຂ່າວ ກ່ຽວກັບການແຂ່ງຂັນກິລາ, ແຂ່ງຂັນແລ່ນຂອງ ຫວຽດນາມ, ຂ້າພະເຈົ້າມີຄວາມສົນໃຈຕໍ່ບັນດາລາຍການແລ່ນດ້ວຍຂອບຂະໜາດໃຫຍ່ ທີ່ໃຫ້ຊາວຕ່າງປະເທດເຂົ້າຮ່ວມນຳ. ບັນນາທິການຂອງພາກພາສາລາວ ຈົ່ງຊ່ວຍຂ້າພະເຈົ້າຊອກຮູ້ກ່ຽວກັບການແຂ່ງຂັນແລ່ນທີ່ມີຂອບຂະໜາດໃຫຍ່ຈຳນວນໜຶ່ງໃນໄລຍະຈະມາເຖິງໄດ້ບໍ່?

ເພື່ອນ ບຸນທະວີ ທີ່ຮັກແພງ, ເປັນໜ້າເສຍດາຍຫຼາຍ, ຍ້ອນໃນຕົ້ນເດືອນ ມີນາ ຜ່ານມາ, ມີຫຼາຍລາຍການແຂ່ງຂັນແລ່ນດ້ວຍຂອບຂະໜາດໃຫຍ່ໄດ້ຈັດຂຶ້ນ ດ້ວຍການເຂົ້າຮ່ວມຂອງຜູ້ນິຍົມການແລ່ນ, ນັກກິລາເປັນຈຳນວນຫຼວງຫຼາຍ. ແຕ່ວ່າ, ໃນປີນີ້ ກໍຍັງມີຫຼາຍລາຍການແຂ່ງຂັນແລ່ນທີ່ດຶງດູດກ່ວາອີກ, ຕົວຢ່າງຄື: ໃນຕົ້ນເດືອນ ເມສາ ມີ: ລາຍການແຂ່ງຂັນແລ່ນ ກຸກເຟືອງ Marathon 2023 ຢູ່ແຂວງ ນິງບິ່ງ; ລາຍການແຂ່ງຂັນແລ່ນ ໄຕໂຮ່ Half Marathon 2023 ຢູ່ຮ່າໂນ້ຍ; ໃນເດືອນ ມິຖຸນາ ມີລາຍການແຂ່ງຂັນແລ່ນ VnExpress Marathon Quy Nhơn 2023 ຈັດຂຶ້ນຢູ່ ກຸຍເຍີນ, ແຂວງ ບິ່ງດິ້ງ; ເດືອນ ສິງຫາ ມີລາຍການແຂ່ງຂັນແລ່ນ Manulife Danang International Marathon ຢູ່ນະຄອນ ດານັ້ງ; ເດືອນ ຕຸລາ ມີລາຍການແຂ່ງຂັນແລ່ນ Ha Giang Discovery Marathon ຢູ່ແຂວງ ຮ່າຢາງ ແລະ ໃນເດືອນ ພະຈິກ ມີລາຍການແຂ່ງຂັນແລ່ນ Halong Bay Heritage Marathon ຢູ່ແຂວງ ກ໋ວາງນິງ.

ຫວັງວ່າ, ບັນດາຂໍ້ມູນດັ່ງກ່າວຈະເປັນປະໂຫຍດໃຫ້ເພື່ອນ. ຖ້າມີໂອກາດເຂົ້າຮ່ວມບັນດາລາຍການແຂ່ງຂັນນີ້ ເພື່ອນຢ່າລືມຂຽນອີເມວ, ຈົດໝາຍ ແບ່ງປັນນຳພາກພາສາລາວແດ່ເດີ້.

ທ່ານຜູ້ຟັງທີ່ເຄົາລົບ, ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ພວກເພື່ອນກໍ່ສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼືໂທມາໂດຍກົງກໍ່ໄດ້ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວບໄຊ vovworld.vn ເພື່ອແລກປ່ຽນຄຳເຫັນ ແລະ ຕິຊົມບັນດາລາຍການທີ່ໄດ້ເອົາລົງໃນເວບໄຊດັ່ງກ່າວ.