ກ້ວຍປິ້ງຂອງ ຫວຽດນາມ (ພາບປະກອບ)

ໃນອາທິດ, ເພື່ອນ ອຳພາວັນ, ຢູ່ແຂວງ ໄຊສົມບູນ ໄດ້ສົ່ງອີເມວເຖິງລາຍການ, ດ້ວຍເນື້ອໃນວ່າ: ຂ້າພະເຈົ້າຫາກໍ່ອ່ານບົດສາລະຄະດີ ກ່ຽວກັບກ້ວຍປີ້ງຂອງ ຫວຽດນາມ. ທຳອິດຂ້າພະເຈົ້າຄິດວ່າ ກ້ວຍປີ້ງຂອງ ຫວຽດນາມ ຄ້າຍຄືກັນກັບກ້ວຍປິ້ງ (ຈີ່ກ້ວຍ) ຂອງລາວ. ກ້ວຍປີ້ງຂອງລາວຈະເລືອກກ້ວຍນ້ຳ, ສຸກເຮີ່ມ, ປອກເປືອກ ແລະ ປິ້ງໃສ່ເຕົາຖ່ານໃຫ້ສຸກເຫຼືອງແລ້ວກໍ່ນຳມາກິນເລີຍ. ນີ້ແມ່ນອາຫານຫວ່າງທີ່ໄດ້ຮັບຄວາມນິຍົມຈາກປະຊາຊົນລາວ ແລະ ຢູ່ທາງເຂົ້າຕະຫຼາດທຸກແຫ່ງຂອງລາວ ກໍ່ໄດ້ຂາຍອາຫານຫວ່າງປະເພດນີ້. ຂ້າພະເຈົ້າຫວັງວ່າ ບັນນາທິການຂອງພາກພາສາລາວທຸກທ່ານຈະມີໂອກາດຊິມລົດຊາດຂອງອາຫານຫວ່າງເຍື່ອງນີ້.

ທ້າຍອາທິດຜ່ານມາ, ພວກຂ້າພະເຈົ້າໄດ້ຮັບອີເມວ ຈາກ ເພື່ອນ ງອັກລານ, ນັກສຶກສາ ຫວຽດນາມ ທີ່ພວມຮ່ຳຮຽນຢູ່ລາວ, ເພື່ອນໄດ້ແບ່ງປັນວ່າ: ຜ່ານລາຍການຂ່າວ, ບົດຕ່າງໆໃນເວບໄຊຂອງພາກພາສາລາວ, ນ້ອງໄດ້ຮຽນ, ໄດ້ຮູ້ຈັກຫຼາຍຄຳສັບໃໝ່. ຍ້ອນວ່າ ນ້ອງຮຽນຂະແໜງເສດຖະກິດ, ດັ່ງນັ້ນ ຈິ່ງມີຄວາມສົນໃຈຊອກຮູ້ຄຳສັບສະເພາະຂະແໜງ. ບັນດາບົດຂຽນທີ່ເອົາລົງໃນເວບໄຊຂອງພາກພາສາລາວ ແມ່ນຊ່ອງທາງໜຶ່ງທີ່ຊ່ວຍໃຫ້ນ້ອງໄດ້ຮູ້ຈັກຫຼາຍຄຳສັບສະເພາະຂະແໜງເສດຖະກິດກ່ວາອີກ. ນ້ອງຫວັງວ່າ ໄລຍະຈະມາເຖິງ, ຈະມີໂອກາດໄດ້ມາຝຶກງານຢູ່ພາກພາສາລາວ ເພື່ອຮ່ຳຮຽນເອົາຄຳສັບໃຫ້ໄດ້ຫຼາຍກ່ວາອີກ.

ຂອບໃຈເພື່ອນ ອຳພາວັນ ແລະ ເພື່ອນ ງອັກລານ, ພວກຂ້າພະເຈົ້າມີຄວາມປະຕິຊົມຊື່ນທີ່ສຸດກ່ຽວກັບຂໍ້ມູນທີ່ພວກເພື່ອນສົ່ງມາໃຫ້ພວກຂ້າພະເຈົ້າ ແລະ ເມື່ອຂ່າວ, ບົດໃນເວບໄຊຂອງລາຍການຊ່ວຍໃຫ້ພວກເພື່ອນເຂົ້າໃຈກ່ຽວກັບພາສາລາວກ່ວາອີກ. ຫວັງວ່າ, ໄລຍະຈະມາເຖິງ, ທ່ານຜູ້ຟັງ, ຜູ້ອ່ານຈະມິຄຳຄິດເຫັນຕໍ່ບັນດາຂ່າວ, ບົດຂອງພວກຂ້າພະເຈົ້າຫຼາຍກ່ວາອີກ.

ນາງຊາວເກັບກ່ຽວກາເຟຢູ່ ຈ່ຽງບ້ານ ໃນແຂວງ ເຊີນລາ

ເພື່ອນ ລັດດາພອນ, ແຂວງ ຈຳປາສັກ ໄດ້ຝາກອີເມວ ເຖິງລາຍການ, ເພື່ອນຢາກຖາມກ່ຽວກັບກາເຟທີ່ປູກໃນແຂວງ ເຊີນລາ, ເພື່ອນຖາມວ່າ: ຂ້າພະເຈົ້າມີເພື່ອນ ຫວຽດນາມ ຜູ້ໜຶ່ງ, ລາວເອົາກາເຟ Arabica ທີ່ໄດ້ປູກ ແລະ ປຸງແຕ່ງຢູ່ແຂວງ ເຊີນລາ ມາຕ້ອນ. ຂ້າພະເຈົ້າຮູ້ວ່າ ກາເຟຊະນິດນີ້ປູກຍາກ, ບໍ່ແມ່ນດິນແຫ່ງໃດກໍ່ສາມາດປູກໄດ້ ດັ່ງນັ້ນ ຈຶ່ງແປກໃຈ ຍ້ອນວ່າ ແຂວງໜຶ່ງຢູ່ພາກເໜືອຂອງ ຫວຽດນາມ ກໍ່ສາມາດປູກ ແລະ ຜະລິດກາເຟຊະນິດນີ້ໄດ້. ຂ້າພະເຈົ້າຢາກຊອກຮູ້ຕື່ມກ່ຽວກັບເຂດປູກກາເຟ ເຊີນລາ, ຫວັງວ່າ ບັນນາທິການຂອງພາກພາສາລາວ ຈະໃຫ້ຮູ້ຕື່ມອີກແດ່.

ເພື່ອນ ລັດດາພອນ ທີ່ຮັກແພງ, ເມື່ອໄດ້ຮັບອີແມວຂອງເພື່ອນພວກຂ້າພະເຈົ້າຄິດເລີຍວ່າເພື່ອນແມ່ນຜູ້ນິຍົມ ແລະ ຢາກຊອກຮູ້ກ່ຽວກັບກາເຟ. ມື້ນີ້, ພວກຂ້າພະເຈົ້າຈະແນະນຳໃຫ້ເພື່ອນກ່ຽວກັບແຂວງທີ່ປູກກາເຟ Arabica ໃຫຍ່ຂອງ ຫວຽດນາມ. Arabica ແມ່ນກາເຟຊະນິດໜຶ່ງທີ່ໄດ້ປູກຫຼາຍຢູ່ປະເທດ ບຣາຊິນ ແລະ ບັນດາປະເທດ ອາເມລິກາ ໃຕ້. ເຖິງວ່າ ຫວຽດນາມ ແມ່ນປະເທດປູກກາເຟ Robusta ເປັນຕົ້ນ, ແຕ່ກໍ່ແມ່ນປະເທດປູກກາເຟ Arabica ຫອມແຊບທີ່ສຸດໃນໂລກ, ກາເຟ Arabica ໄດ້ປູກຫຼາຍຢູ່ແຂວງ: ເລີມດົ່ງ, ເຊີນລາ, ກວາງຈິ້, ດ້ຽນບຽນ. ກາເຟຊະນິດນີ້ໄດ້ນຳມາປູກຢູ່ແຂວງ ເຊີນລາ ເມື່ອປີ 1945, ພາຍຫຼັງກ່ວາ 70 ປີ, ຕົ້ນກາເຟ ກາຍເປັນຕົ້ນໄມ້ຫຼັກຢູ່ແຂວງນີ້. ດ້ວຍເນື້ອທີ່ດິນທີ່ກ້ວາງຂວາງນັ້ນ, ເຊີນລາ ແມ່ນທ້ອງຖິ່ນປູກກາເຟ Arabica ໃຫຍ່ຂອງ ຫວຽດນາມ, ຖັດຈາກແຂວງ ເລີມດົ່ງ. ຫວັງວ່າ, ເພື່ອນ ລັດດາພອນ ຈະແມ່ນ “ທູດ” ໂຄສະນາກາເຟ ຫວຽດນາມ ເຖິງເພື່ອນມິດລາວເດີ້.

ພາບປະກອບ

ໃນອາທິດ, ເພື່ອນ ວັນໄຊ ຄຳມີ, ແຂວງ ບໍ່ແກ້ວ ໄດ້ຝາກອີເມວເຖິງລາຍການ ຊອກຮູ້ກ່ຽວກັບການເຄື່ອນໄຫວຕ່າງໆທີ່ຈະຈັດຂຶ້ນເນື່ອງໃນໂອກາດວັນບຸນບູຊາເຈົ້າຊີວິດຮຸ່ງ ປີ 2023, ເພື່ອນກ່າວວ່າ: ຂ້າພະເຈົ້າ ແລະ ຄອບຄົວຈະໄປທ່ຽວຢູ່ ຫວຽດນາມ ໃນຊຸມວັນທ້າຍເດືອນເມສານີ້, ຂ້າພະເຈົ້າໄດ້ອ່ານຫຼາຍຂ່າວກ່ຽວກັບການເຄື່ອນໄຫວໃນວັນບຸນບູຊາເຈົ້າຊີວິດຮຸ່ງ ຢູ່ແຂວງ ຝູເທາະ. ຄອບຄົວຂ້າພະເຈົ້າຢາກຊອກຮູ້ຕື່ມກ່ຽວກັບບັນດາການເຄື່ອນໄຫວນີ້ແດ່.

ເພື່ອນ ວັນໄຊ ທີ່ຮັກແພງ, ງານບຸນບູຊາ ເຈົ້າຊີວິດຮຸ່ງ, ງານບຸນວິຫານຮຸ່ງ ປີ 2023 ໄດ້ດຳເນີນແຕ່ວັນທີ 21 – 29 ເມສາ ດ້ວຍການເຄື່ອນໄຫວແນະນຳ ແລະ ໂຄສະນາບັນດາມໍລະດົກວັດທະນະທຳຂອງແຂວງ ຝູເທາະ. ພິເສດ, ໃນຊຸມວັນຈັດງານບຸນບູຊາເຈົ້າຊີວິດຮຸ່ງ ແລະ ສັບປະດາວັດທະນະທຳ - ທ່ອງທ່ຽວດິນແດນບັນພະບູລຸດ ປີ 2023, ແຂວງ ໄດ້ດຳເນີນຫຼາຍພິທີທີ່ເປັນມູນເຊື້ອຄື: ພິທີຖະຫວາຍທູບທຽນ ໄຫວ້ອາໄລບັນດາເຈົ້າຊີວິດຮຸ່ງ; ງານບຸນບູຊາ ລາກລອງກວັນ; ງານບຸນບູຊາພະແມ່ ເອົາເກີ; ງານບຸນບູຊາຢູ່ເຂດປູຊະນີຍະສະຖານ ບູຊາເຈົ້າຊີວິດຮຸ່ງ ແລະ ບັນດາຜູ້ມີອິດທິພົນຊື່ສຽງ, ນາຍພົນໃນສະໄໝເຈົ້າຊີວິດຮຸ່ງ ໃນບໍລິເວນແຂວງ… ຢູ່ເຂດປູຊະນີຍະສະຖານປະຫວັດສາດ ວິຫານ ຮຸ່ງ ແລະ ນະຄອນ ຫວຽດຈີ ຈະຈັດການເຄື່ອນໄຫວກິລາ, ວັດທະນະທຳຫຼາຍຢ່າງໂດຍຕໍ່ເນື່ອງຄື: ໄຂ “ງານບຸນບູຊາເຈົ້າຊີວິດຮຸ່ງ ແລະ ສັບປະດາວັດທະນະທຳ - ທ່ອງທ່ຽວເຂດດິນແດນບັນພະບູລຸດ ປີ 2023” ແລະ “ສັບປະດາມໍລະດົກວັດທະນະທຳບໍ່ເປັນວັດຖຸ ໂດຍ UNESCO ຮັບຮອງເອົາ”; ກອງປະຊຸມສຳມະນາສາກົນ “ເວທີປາໄສການທ່ອງທ່ຽວ, ວັດທະນະທຳ, ມໍລະດົກ ແລະ ການພັດທະນາແບບຍືນຍົງ”… ນອກຈາກນັ້ນ, ຍັງມີການເຄື່ອນໄຫວດ້ານວັດທະນະທຳ, ພົບປະແລກປ່ຽນ, ງານຕະຫຼາດນັດຫຼາຍຢ່າງ. ຫວັງວ່າ, ເພື່ອນ ວັນໄຊ ພ້ອມກັບຄອບຄົວຈະຍາດເວລາເພື່ອເຂົ້າຮ່ວມບັນດາເຫດການດັ່ງກ່າວ.

ທ່ານຜູ້ຟັງທີ່ເຄົາລົບ, ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາຍັງລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນຊ່ວຍໃຫ້ລາຍການຂອງພວກເຮົານັບມື້ນັບດີກວ່າເກົ່າ. ພວກເພື່ອນກໍ່ສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼືໂທມາໂດຍກົງກໍ່ໄດ້ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວບໄຊ vovworld.vn ເພື່ອແລກປ່ຽນຄຳເຫັນ ແລະ ຕິຊົມບັນດາລາຍການທີ່ໄດ້ເອົາລົງໃນເວບໄຊດັ່ງກ່າວ.