(vovworld) - ຍັງອີກບໍ່ດົນປານໃດກໍຈະຮອດວັນໄຫວ້ບູຊາເຈົ້າຊີວິດຮູ່ງ ຄືວັນທີ 10 ເດືອນ 3 ໄລ່ຕາມຈັນທະປະຕິທິນ. ແຕ່ປະຈຸບັນ ຈຳນວນນັກທ່ອງທ່ຽວທີ່ມາຢ້ຽມຢາມວິຫານຮູ່ງ ຢູ່ແຂວງ ຟູທໍ້ ນັບມື້ນັບຫລາຍ. ໂດຍແມ່ນຊາວຫວຽດນາມ ຜູ້ໃດກໍຢາກຖະຫວາຍທູບທຽນເພື່ອໄຫວ້ບູຊາສະແດງຄວາມຮູ້ບຸນຄຸນຕໍ່ບັນດາເຈົ້າຊີວິດຮູ່ງຜູ້ທີ່ໄດ້ໃຫ້ການກໍ່ຕັ້ງ ປະເທດຊາດ.
ຈາກນະຄອນຫລວງ ຮ່າໂນ້ຍ ຂີ່ລົດໂອໂຕພຽງ 1 ຊົ່ວໂມງເທົ່ານັ້ນ, ນັກທ່ອງທ່ຽວກໍຈະໄປຮອດເຂດປູຊະນີຍະສະຖານວິຫານຮູ່ງ. ວິຫານແຫ່ງນີ້ໄດ້ຮັບການລົງທຶນບູລະນະສ້ອມແປງຢ່າງໃຫຍ່ໂຕໂອ່ຖົງ ແລະສວຍງາມ. ທຸກເສັ້ນທາງພາໄປເຖິງວິຫານລ້ວນແຕ່ໄດ້ຮັບການເປີດກວ້າງ ແລະ ສະອາດ. ບັນດາຮ້ານອາຫານ, ຮ້ານຂາຍເຄື່ອງທີ່ລະນຶກ, ບ່ອນລະຫລິ້ນພັກຜ່ອນຢ່ອນອາລົມກໍຖືກສັບຊ້ອນເປັນແຕ່ລະຈຸດ, ເພື່ອຮັບໃຊ້ນັກທ່ອງທ່ຽວທີ່ມາຈາກທຸກສາລະທິດຢ່າງລອບຄອບຖີ່ຖ້ວນ. ທ່ານ ຫງວຽນຊວນກາກ ຜູ້ອຳນວຍການເຂດປູຊະນີຍະສະຖານປະຫວັດສາດ ວິຫານ ຮູ່ງ ໃຫ້ຮູ້ວ່າ:
“ນັບແຕ່ຊຸມມື້ຕົ້ນລະດູບານໃຫມ່, ວິຫານຮູ່ງ ໄດ້ຕ້ອນຮັບນັກທ່ອງທ່ຽວຢູ່ພາຍໃນປະເທດ, ຊາວຫວຽດນາມ ອາໄສຢູ່ຕ່າງປະເທດ ແລະ ນັກທ່ອງທ່ຽວສາກົນກວ່າ 2 ລ້ານເທື່ອຄົນມາຢ້ຽມຢາມ ແລະ ຖະຫວາຍທູບທຽນເພື່ອອາໄລຫາຄຸນງາມຄວາມດີຂອງບັນພະບຸລຸດ. ຄາດວ່າປີນີ້ມີນັກທ່ອງທ່ຽວກັບຄືນເມືອຢ້ຽມຢາມວິຫານຮູ່ງ ປະມານ 6 ລ້ານເທື່ອຄົນ. ເພື່ອປະຕິບັດວຽກງານຕ້ອນຮັບນັກທ່ອງທ່ຽວໃຫ້ເປັນຢ່າງດີ, ການນຳເຂດປູຊະນີຍະສະຖານໄດ້ຊີ້ນຳ ຕ້ອງຮັບປະກັນຫລັກອະນາໄມ, ຄວາມປອດໄພ, ຮັກສາສິ່ງແວດລ້ອມເພື່ອຮັບໃຊ້ນັກທ່ອງທ່ຽວ ພິເສດ ແມ່ນແນະນຳໃຫ້ພໍ່ແມ່ປະຊາຊົນຮູ້ຈັກເຖິງວິທີຖະຫວາຍທູບທຽນ ແລະ ຮ້ານຂາຍເຄື່ອງຕ່າງໆ ຕ້ອງຕິດປະກາດລາຄາຢ່າງເປີດເຜີຍ.”
ງານບຸນວິຫານຮຸ່ງ
ພາບ:denhung.org.vn
|
ວິຫານຮູ່ງຕັ້ງຢູ່ພູ ເຫງ້ຍຫລີງ ມີຄວາມສູງປະມານ 175 ແມດ ເມື່ອທຽບກັບລະດັບຫນ້ານ້ຳທະເລ ຢູ່ ບ້ານ ໂກ໋ຕີກ ຕາແສງ ຮີເກືອງ ເມືອງ ເລີມທາວ ແຂວງ ຟູທໍ້. ຄົນລຸ້ນກ່ອນໄດ້ຂະຫນານນາມວ່າ ພູ ເຫງ້ຍຫລີງ ປຽບເໝືອນມັງກອນພວມອວ່າຍ ຫນ້າໄປສູ່ທິດໃຕ້, ສ່ວນ ຕົວຄີງຄົດໂຄ້ງ ເປັນພູ ຈອກ, ພູວັ້ນ, ພູ ແຟວ .
“ໃນວິຫານຫຼັງລາຊະວັງ, ຕັ້ງຮູບຫຼໍ່ ລາກລອງກວັນ ດ້ວຍທອງແດງ ມີນ້ຳຫນັກ 1.5 ໂຕນ, ສູງ 1.8 ແມດ ເທິງພະລາຊະບັນລັງ. ພາຍຫລັງວິຫານແຫ່ງນີ້ໄດ້ຮັບການກໍ່ສ້າງສຳເລັດ ພໍ່ແມ່ປະຊາຊົນໃນທົ່ວປະເທດລ້ວນແຕ່ກັບຄືນເມືອແຫ່ງນີ້ເພື່ອໄຫວ້ບູຊາເຈົ້າຊີວິດ.”
ກຸ່ມປູຊະນີຍະສະຖານວິຫານ ຮູ່ງ ລວມມີວິຫານ 4 ແຫ່ງ, ວັດ ແຫ່ງຫນຶ່ງ ແລະ ສຸສານຂອງເຈົ້າຊີວິດຮູ່ງ ເຊິ່ງຖືກຈັດສັນແຕ່ຕຳຂື້ນສູງ. ທາງເບື້ອງຂວາຂອງປະຕູໂຂງແມ່ນວິຫານຢຽງ (ໝາຍເຖິງນ້ຳສ້າງ). ຢູ່ທີ່ນີ້ ມີນ້ຳສ້າງອອກບໍ່ຕະຫລອດປີ, ນ້ຳໃສສະອາດ. ຜ່ານວິຫານ ຢຽງ ແມ່ນສີລາຈາລຶກຄຸນງາມຄວາມດີ. ຕໍ່ມາແມ່ນວິຫານ ຫ້າ ເພື່ອບູຊາບັນດາເຈົ້າຊີວິດຮູ່ງ. ຢູ່ເບື້ອງຂວາຂອງວິຫານ ຫ້າແມ່ນວັດ ທຽນກວາງທ່ຽນຕື້. ທາງຫລັງວິຫານຫ້າແມ່ນວິຫານຈູງ. ຊຶ່ງແມ່ນບ່ອນພັກຜ່ອນຊົ່ວຄາວຂອງບັນດາເຈົ້າຊີວິດຮູ່ງ. ນີ້ກໍແມ່ນສະຖານທີ່ເຊິ່ງເຈົ້າຊີວິດເຄີຍຈັດການປະຊຸມເພື່ອປຶກສາຫາລືກ່ຽວກັບບັນຫາຕ່າງໆຂອງປະເທດຊາດ.
ກັບຄືນເມືອຢ້ຽມຢາມວິຫານຮູ່ງ ແມ່ນກັບຄືນສູ່ເຂດດິນແດນຂອງບັນພະບຸລຸດ ເພາະວ່າ ທັງຊາດຫວຽດນາມ ລ້ວນແຕ່ບູຊາບັນພະບຸລຸດຜູ້ດຽວ ຊຶ່ງບໍ່ເຄີຍມີຢູ່ປະເທດໃດໃນໂລກ. ສະນັ້ນ ການໄປນະມັດສະການວິຫານຮູ່ງໃນຍາມຕົ້ນປີ ແມ່ນຈຸດວັດທະນະທຳດ້ານຈິດວິນຍານຂອງຊາວຫວຽດນາມແຕ່ລະຄົນ. ທ່ານນາງ ບູ່ຍທິຕວານ, ຜູ້ອຳນວຍການສູນບໍລິການ ແລະ ການທ່ອງທ່ຽວວິຫານຮູ່ງໃຫ້ຮູ້ວ່າ: ນັກທ່ອງທ່ຽວມາຢ້ຽມຢາມວິຫານຮູ່ງ ຍາມໃດກໍຮູ້ສຶກອຸ່ນອ່ຽນໃຈຕໍ່ການບໍລິການຢູ່ທີ່ນີ້.
“ສູນບໍລິການ ແລະ ການທ່ອງທ່ຽວວິຫານຮູ່ງ ຈະຕອບສະຫນອງການບໍລິການຕ່າງໆໃຫ້ແກ່ແຂກທ່ອງທ່ຽວຄື: ການຂົນສົ່ງນັກທ່ອງທ່ຽວມາຢ້ຽມຊົມ, ພານັກທ່ອງທ່ຽວໄປຢ້ຽມຢາມກຸ່ມປູຊະນີຍາສະຖານວິຫານຮູ່ງ, ຮັບໃຊ້ການກິນການຢູ່ໃຫ້ນັກທ່ອງທ່ຽວ. ”
ເຖິງວ່າຈະໄປອາໄສ, ຫຼືເຮັດວຽກຢູ່ປະເທດໃດກໍຕາມແຕ່ຊາວຫວຽດນາມຜູ້ໃດກໍ່ບໍ່ສາມາດຫລົງລືມວັນໄຫວ້ບູຊາເຈົ້າຊີວິດຮຸ່ງໄດ້ ຍາມໃດເຂົາເຈົ້າກໍອ່ວາຍເມືອຫາເຂດດິນແດນທີ່ໄດ້ຮັບຖືວ່າແມ່ນກົກເຄົ້າເຫງົ້າກໍຂອງປະເທດຊາດ. ນີ້ແມ່ນແຫ່ງເຕົ້າໂຮມດ້ານວັດທະນະທຳຈິດວິນຍານຂອງຊາດຫວຽດນາມ. ນັບແຕ່ດົນນານມາແລ້ວ, ວິຫານຮູ່ງ ໄດ້ກາຍເປັນແຫ່ງອາໄລຫາ, ເຊີດຊູບຸນຄຸນ ຂອງບັນດາເຈົ້າຊີວິດຮູ່ງ ແມ່ນສັນຍາລັກຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດຫວຽດນາມ.
ລານແອງ