(vovworld) - ໄປຢ້ຽມຢາມ ເຊີນລາ ຊື່ງແມ່ນແຂວງຊາຍແດນຢູ່ທາງທິດຕາເວັນຕົກພາກເຫນືອຂອງຫວຽດນາມ, ນັກທ່ອງທ່ຽວຈະໄດ້ຮັບຊົມພູຜາປ່າໄມ້ທີ່ກວ້າງໃຫຍ່ໄພສານ ແລະ ໄດ້ ຄົ້ນຫາຄຸນຄ່າດ້ານວັດທະນະທຳທີ່ເປັນເອກະລັກສະເພາະເປັນຫລາຍຮູບຫລາຍແບບຂອງບັນດາເຜົ່າຢູ່ເຂດ ໄຕບັກ (ໝາຍເຖິງທາງທິດຕາເວັນຕົກສຽງເຫນືອ) ຫວຽດນາມ. ຂະແຫນງທ່ອງທ່ຽວແຂວງ ເຊີນລາ ພວມມານະພະຍາຍາມນຳບັນດາຜະລິດຕະພັນການທ່ອງທ່ຽວທີ່ພົ້ນເດັ່ນ ນັ້ນແມ່ນທ່ອງທ່ຽວພັກຜ່ອນບຳລຸງສຸຂະພາບ, ການລະຫລິ້ນຢ່ອນອາລົມ, ທ່ອງທ່ຽວຢ້ຽມຢາມບັນດາທັດສະນີຍະພາບ, ທິວທັດທຳມະຊາດ, ທ່ອງທ່ຽວວັດທະນະທຳ, ງານບຸນຕ່າງໆຂອງບັນດາເຜົ່າ ແລະ ທ່ອງທ່ຽວລຽບຕາມແມ່ນ້ຳ... ໄດ້ກາຍເປັນບັນດາຄຸນຄ່າສະເພາະຂອງຂະແຫນງທ່ອງທ່ຽວ ເຊີນລາ.
 |
ນາງ ຫງວຽນຖາວຈາງ, ນັກທ່ອງທ່ຽວມາຈາກນະຄອນ ຫາຍຟ່ອງ ມີຄວາມຮູ້ສຶກປະທັບໃຈເມື່ອໄດ້ໄປທ່ອງທ່ຽວຢູ່ ແຂວງ ເຊີນລາ. ເຖິງວ່າ ມາຢ້ຽມຢາມແຫ່ງນີ້ຫລາຍເທື່ອແລ້ວກໍຕາມ, ແຕ່ໃນແຕ່ລະເທື່ອ ເອື້ອຍມີຄວາມຮູ້ສຶກໃຫມ່ອ່ຽມ. ເມື່ອໄປຢ້ຽມຢາມບັນດາເຂດປູຊະນີຍະສະຖານ, ສະຖານທີ່ທ່ອງທ່ຽວຊື່ງເອື້ອຍພຽງຮູ້ຈັກເຖິງຜ່ານປື້ມ, ໄດ້ເຂົ້າຮ່ວມງານບຸນວັດທະນະທຳ, ສິລະປະທີ່ເຂັ້ມຂົ້ນໄປດ້ວຍສີສັນວັດທະນະທຳຊົນເຜົ່າພ້ອມກັບນາງສາວ, ບ່າວຫນຸ່ມຊົນເຜົ່າໄທ ຫລືໄດ້ໄປທ່ອງທ່ຽວລຽບຕາມແມ່ນ້ຳ ດາ ເອື້ອຍຮູ້ສຶກວ່າຄວາມອິດເມື່ອຍໃນໄລຍະທາງເຖິງເຊີນລາ ແມ່ນຫາຍໄປ. ເອື້ອຍຈາງ ເວົ້າວ່າ:
“ຍ້ອນລັກສະນະພິເສດຂອງວຽກງານ ສະນັ້ນ ຂ້າພະເຈົ້າເຄີຍໄປຫລາຍແຫ່ງ ແລະ ຮູ້ຈັກເຖິງຫລາຍບ່ອນ. ຂ້າພະເຈົ້າກໍເຄີຍໄປຫລາຍແຂວງແຕກຕ່າງກັນໃນເຂດໄຕບັກ ແຕ່ສຳລັບເຊີນລາ ຂ້າພະເຈົ້າມີຄວາມປະທັບໃຈພິເສດ. ທິວທັດທຳມະຊາດຢູ່ ເຊີນລາແມ່ນສວຍງາມ, ປະຊາຊົນຢູ່ທີ່ນີ້ຮັກແພງແຂກຄົນຫລາຍ. ຂ້າພະເຈົ້າຄິດວ່າ ຜູ້ໃດມີໂອກາດມາຢ້ຽມຢາມ ເຊີນລາແລ້ວ ແນ່ນອນວ່າຈະຢາກກັບຄືນມາຢາມຫລາຍຄັ້ງອີກ.”
ແຂວງ ເຊີນລາ ຫ່າງຈາກນະຄອນຫລວງ ຮ່າໂນ້ຍ ປະມານ 300 ກິໂລແມດ, ແມ່ນແຫ່ງຂຶ້ນກັບລຸ່ມແມ່ນ້ຳດາ ແລະ ແມ່ນ້ຳໝ໋າ. ເຊີນລາ ມີທິວທັດທຳມະຊາດສວຍງາມຫລາຍແຫ່ງ ດ້ວຍລະບົບຖ້ຳເປັນຫລາຍຮູບຫລາຍແບບທີ່ສ້າງຄວາມປະທັບໃຈ, ມີປ່າດົງດິບ, ນ້ຳຕົກຕາດ, ບໍ່ນ້ຳອຸ່ນ ຫລື ຫນອງນ້ຳທີ່ກວ້າງໃຫຍ່... ກໍແມ່ນສິ່ງທີ່ດຶງດູດນັກທ່ອງທ່ຽວມາແຫ່ງນີ້ນັບມື້ນັບຫລາຍ. ພິເສດ ເຂດພູພຽງ ໂມກເຈົາ, ອາກາດເຢັນສະບາຍຕະຫລອດປີ, ມີສະຖານທີ່ທ່ອງທ່ຽວຊີວະພາບ, ພັກຜ່ອນຢ່ອນອາລົມຫລາຍແຫ່ງທີ່ດູດດື່ມ. ເຊີນລາ ກໍແມ່ນແຫ່ງທີ່ລືຊື່ດ້ວຍເຂດປູຊະນີຍະສະຖານປະຫວັດສາດຫລາຍແຫ່ງ, ໃນນັ້ນ ມີ 10 ແຫ່ງຖືກຈັດເຂົ້າບັນຊີລາຍຊື່ເຂດປູຊະນີຍະສະຖານລະດັບຊາດ, 29 ແຫ່ງແມ່ນລະດັບແຂວງ ພິເສດ ເຂດປູຊະນີຍະສະຖານປະຫວັດສາດຄຸກ ເຊີນລາ, ຊື່ງແມ່ນເຂດປູຊະນີຍະສະຖານແຜ່ນສີລາຈາລຶກເຈົ້າຊີວິດ ເລຖານຕົງ ຢູ່ ນະຄອນ ເຊີນລາ, ແລະສະຖານທີ່ຊື່ງປະທານໂຮ່ຈິມິນລົງຢ້ຽມຢາມ ແລະ ໂອ້ລົມກັບປະຊາຊົນບັນດາເຜົ່າ ຢູ່ ໄຕບັກ ແລະ ອື່ນໆ. ນອກນັ້ນ ເຊີນລາ ແມ່ນທ້ອງຖິ່ນຫນຶ່ງດຽວໃນທົ່ວປະເທດມີ ກວ່າ 2000 ກອງສິລະປະກອນໝູ່ບ້ານທີ່ເຂົ້າຮ່ວມບັນດາຮູບການທ່ອງທ່ຽວວົງຄະນາຍາດ. ທ່ານ ກວ່າງວັນເຮືອງ, ຮອງປະທານຄະນະກຳມະການປະຊາຊົນ ແຂວງ ເຊີນລາ ໃຫ້ຮູ້ວ່າ:
“ຕາມລາຍການຂອງແຂວງແລ້ວ, ນະຄອນເຊີນລາພວມປະສານສົມທົບບັນດາການເຄື່ອນໄຫວສະແດງສິລະປະ, ໂຄສະນາການທ່ອງທ່ຽວເຂົ້າໃນການເຄື່ອນໄຫວດຳເນີນຊີວິດດ້ານການເມືອງ. ງານບຸນຕ່າງໆ, ບັນດາການເຄື່ອນໄຫວຂອງຄະນະ, ຂະແຫນງການຕ່າງໆ ລ້ວນແຕ່ມີການສະແດງສິລະປະຂອງກອງສິລະປະກອນໝູ່ບ້ານ, ຜ່ານນັ້ນເພື່ອໂຄສະນາຈຸດທ່ອງທ່ຽວວັດທະນະທຳຂອງແຂວງ.”
ເສັ້ນທາງໄປເຖິງເຂດໄຕບັກ
ພາບ:internet
|
ເຖິງວ່າການເຕີບໂຕຂອງຂະແຫນງທ່ອງທ່ຽວເຊີນລາບັນລຸໝາກຜົນດີພໍສົມຄວນ, ແຕ່ຂະແຫນງທ່ອງທ່ຽວ ເຊີນລາ ບໍ່ທັນພັດທະນາສົມກັບຄວາມສາມາດບົ່ມຊ້ອນເທື່ອ. ພິເສດ ຄວາມຮັບຮູ້ ແລະ ວິທີດຳເນີນທຸລະກິດການທ່ອງທ່ຽວຢູ່ ເຊີນລາ ບໍ່ທັນກັບທ່າອ່ຽງໃຫມ່, ພື້ນຖານທາງດ້ານວັດຖຸ ແລະ ພາຫະນະການທ່ອງທ່ຽວບໍໍ່ທັນໄດ້ຮັບການລົງທຶນຢ່າງເປັນລະບົບ, ພື້ນຖານໂຄງລ່າງດ້ານເຕັກນິກຍັງບໍ່ທັນຕອບສະຫນອງຄວາມຕ້ອງການພັດທະນາໄດ້, ການຮ່ວມສຳພັນລະຫວ່າງການທ່ອງທ່ຽວ ເຊີນລາ ກັບບັນດາທ້ອງຖິ່ນໃນທົ່ວປະເທດກໍ່ບໍ່ບັນລຸປະສິດທິຜົນ. ເລື່ອງລົງທຶນບູລະນະປະຕິສັງຂອນບັນດາເຂດປູຊະນີຍະສະຖານປະຫວັດສາດ, ສະຖານທີ່ທ່ອງທ່ຽວຕ່າງໆບໍ່ໄດ້ຮັບຄວາມເອົາໃຈໃສ່ຖືກກັບລະດັບ ແລະ ບໍ່ຕອບສະຫນອງຄວາມຮຽກຮ້ອງຕ້ອງການຂອງນັກທ່ອງທ່ຽວ. ເພື່ອປະຕິບັດຈຸດໝາຍນຳທ່ອງທ່ຽວກາຍເປັນຂະແຫນງເສດຖະກິດປາຍແຫລມ, ຂະແຫນງທ່ອງທ່ຽວ ເຊີນລາໄດ້ວາງອອກການກຳນົດທິດພັດທະນາຮອດປີ 2015 ຊື່ງລວມມີ: ການພັດທະນາບັນດາຜະລິດຕະພັນການທ່ອງທ່ຽວ, ຕະຫລາດນັກທ່ອງທ່ຽວ ແລະ ບໍລິເວນຈັດຕັ້ງການທ່ອງທ່ຽວ. ກ່ຽວກັບຜະລິດຕະພັນການທ່ອງທ່ຽວ, ແຂວງເຊີນລາ ໄດ້ສຸມໃສ່ຂຸດຄົ້ນບັນດາທັດສະນີຍະພາບຄື: ທິວທັດຢູ່ນະຄອນ ເຊີນລາ ແລະ ເຂດອ້ອມແອ້ມ, ເຂດພູພຽງ ມົກເຈົາ, ບັນດາເຂດອະນຸລັກຮັກສາທຳມະຊາດ ຊວນຍາ, ໝູ່ບ້ານຊົນເຜົ່າ ຢູ່ ນະຄອນ ເຊີນລາ, ມົກເຈົາ, ເມືອງລາ, ເຂດປູຊະນີຍະສະຖານຄຸກເຊີນລາ, ເຈົ້າຊີວິດ ເລຖາຍຕົງ, ຂົວຫີນ, ທາດບູຮານ ເກົາຫວ່າ.... ທ່ານນາງ ມາຍທູເຮືອງ, ຜູ້ອຳນວຍການພະແນກວັດທະນະທຳກິລາ ແລະ ການທ່ອງທ່ຽວ ແຂວງ ເຊີນລາ ໃຫ້ຮູ້ວ່າ:
“ເຊີນລາແມ່ນແຂວງຫນຶ່ງນອນໃນສາຍທ່ອງທ່ຽວເຂດຕາເວັນອອກສຽງເຫນືອ ແລະ ເຂດໄຕບັກ. ພວກຂ້າພະເຈົ້າຈະເຊື່ອມຕໍ່ກັບບັນດາແຂວງໃນບໍລິເວນເພື່ອໂຄສະນາບັນດາຈຸດນັດພົບຂອງເຊີນລາ, ຄວາມສາມາດບົ່ມຊ້ອນການທ່ອງທ່ຽວຂອງ ເຊີນລາ ໃນໄລຍະຈະມາເຖິງ. ພວກຂ້າພະເຈົ້າຈະເພີ່ມທະວີການພິມຈຳຫນ່າຍບັນດາເອກະສານກ່ຽວກັບການທ່ອງທ່ຽວເຊີນລາ. ພວກຂ້າພະເຈົ້າກໍພະຍາຍາມສ້າງພາບພົດ, ເຄື່ອງໝາຍການທ່ອງທ່ຽວ ເຊີນລາ.”
ໃນຊຸມປີມໍ່ໆມານີ້, ຈຳນວນນັກທ່ອງທ່ຽວມາຢ້ຽມຢາມ ເຊີນລາ ນັບມື້ນັບເພີ່ມຂຶ້ນ, ແຕ່ໃນປີຜ່ານມາ, ມີນັກທ່ອງທ່ຽວພາຍໃນປະເທດກວ່າ 400. 000 ເທື່ອຄົນ, ນັກທ່ອງທ່ຽວສາກົນ 37.000ເທື່ອຄົນ, ສ້າງລາຍຮັບໃຫ້ແກ່ທ້ອງຖິ່ນກວ່າ 200 ຕື້ດົ່ງ. ດ້ວຍຄວາມສາມາດບົ່ມຊ້ອນກ່ຽວກັບທຳມະຊາດ, ປະຊາຊົນຂອງທ້ອງຖິ່ນທີ່ເຕັມໄປດ້ວຍສີສັນວັດທະນະທຳບັນດາເຜົ່າ ແລະ ການກຳນົດທິດໃຫມ່ສອດຄອ່ງກັບທ່າອ່ຽງທັນສະໄຫມ, ການທ່ອງທ່ຽວ ເຊີນລາ ຈະສ້າງຄວາມປະທັບໃຈໃຫ້ແກ່ນັກທ່ອງທ່ຽວຢ່າງແນ່ນອນ.