(vovworld) - ໃນຄວາມຫຍຸ້ງຍາກລວມຂອງພື້ນຖານເສດຖະກິດ, ຂະແຫນງທ່ອງທ່ຽວບັນດາທ້ອງຖິ່ນແຄມທະເລພາກກາງ ຫວຽດນາມ ມີຫລາຍວິທີເຮັດທີ່ມີຫົວຄິດປະດິດສ້າງເພື່ອດຶງດູດນັກທ່ອງທ່ຽວທັງຢູ່ພາຍໃນປະເທດ ແລະ ສາກົນມາຈາກ ລັດເຊຍ ແລະ ປະເທດ ຈຳນວນຫນຶ່ງຢູ່ອາຊີ. ຍ້ອນເຫດນັ້ນ, ຂະແຫນງທ່ອງທ່ຽວແມ່ນຈຸດພົ້ນເດັ່ນຂອງພື້ນຖານເສດຖະກິດບັນດາແຂວງທາງພາກກາງ ຫວຽດນາມ ໃນປີ 2012 ແລະ ຊຸມມື້ຕົ້ນປີ 2013.
ໃນຊຸມມື້ທຳອິດຂອງປີໃຫມ່ 2013, ບັນດາກຳປັ່ນຂົນສົ່ງນັກທ່ອງທ່ຽວສາກົນນັບພັນໆຄົນໄດ້ເຂົ້າທຽບທ່າກຳປັ່ນ ດາຫນັງ, ເປີດບັນດາກາລະໂອກາດພັດທະນາຂອງຂະແຫນງທ່ອງທ່ຽວບັນດາທ້ອງຖິ່ນພາກກາງ ຫວຽດນາມ. ກ່ອນຫນ້ານັ້ນ, ໃນປີ 2012 ຂະແຫນງທ່ອງທ່ຽວແຂວງ ແຄງຮ່ວາ ພາກກາງ ຫວຽດນາມ ໄດ້ຕ້ອນຮັບນັກທ່ອງທ່ຽວຜູ້ທີ່ 2 ລ້ານໄດ້ມາຢ້ຽມຢາມ ນະຄອນ ຍາຈາງ. ນັບແຕ່ເມື່ອສະຫນາມບິນ ກາມແຣງ ໄດ້ກາຍເປັນສະຫນາມບິນສາກົນແຫ່ງທີ 3 ຢູ່ພາກກາງ ຫວຽດນາມ ຖັດຈາກສະຫນາມບິນ ເຫ້ວ, ສະຫນາມບິນ ດາຫນັງ, ສາຍການບິນໂດຍກົງຈາກລັດເຊຍ ມາ ແຄງຮວ່າ ໄດ້ຮັບການຮັກສາເປັນປະຈຳ, ແຕ່ລະມື້ຕ້ອນຮັບນັກທ່ອງທ່ຽວປະມານ 600 ຄົນ. ທ່ານ Andrey Smirinov ຜູ້ອຳນວຍການຂະແຫນງໂຄສະນາ ບໍລິສັດທ່ອງທ່ຽວ ແອນເຢືອງ, ຊຶ່ງແມ່ນວິສາຫະກິດໄດ້ສົ່ງຈຳນວນນັກທ່ອງທ່ຽວລັດເຊຍ ມາຢ້ຽມຢາມຫວຽດນາມ ຫລາຍກວ່າໝູ່ ໃຫ້ຮູ້ວ່າ: ຄາດວ່າ ລະດູຫນາວປີນີ້, ແຄງຮ່ວາ ຈະຕ້ອນຮັບນັກທ່ອງທ່ຽວລັດເຊຍ ປະມານ 100.000 ເທື່ອຄົນ. ດ້ວຍອາກາດອົບອຸ່ນ, ທິວທັດທຳມະຊາດ ແລະ ປະຊາຊົນແມ່ນຜູ້ສະຫນິດສະຫນົມຮັກແພງແຂກ ນັ້ນແມ່ນສິ່ງທີ່ດຶງດູດນັກທ່ອງທ່ຽວມາຢ້ຽມຢາມແຄງຮວ່ານັບມື້ນັບຫລາຍ.
“ເມື່ອມາຮອດ ຫວຽດນາມ, ນັກທ່ອງທ່ຽວລ້ວນແຕ່ເຫັນສິ່ງທີ່ແຕກຕ່າງ. ນັ້ນແມ່ນອາກາດເຢັນສະບາຍ ທະເລສວຍງາມ, ແສງແດດອົບອຸ່ນ ໃນຂະນະນັ້ນອາກາດຢູ່ລັດເຊຍ ຫນາວທີ່ສຸດ. ແລະ ກ້າວເຂົ້າສູ່ປີໃຫມ່ ພວກຂ້າພະເຈົ້າຈະສ້າງບໍລິການໃຫມ່ເພື່ອຮັບໃຊ້ນັກທ່ອງທ່ຽວລັດເຊຍ ແລະ ນັບແຕ່ນີ້ເປັນຕົ້ນໄປ ພວກຂ້າພະເຈົ້າຈະເພີ່ມທະວີຈຳນວນຖ້ຽວບິນ ແລະ ຈຳນວນນັກທ່ອງທ່ຽວໃຫ້ແກ່ຕະຫລາດ ຫວຽດນາມ.”
ນັກທ່ອງທ່ຽວລັດເຊຍ ມາຢ້ຽມຢາມ ຍາຈາງ
ພາບ:internet
|
ນະຄອນ ທະເລ ດາຫນັງ ກໍແມ່ນສະຖານທີ່ດູດດື່ມຂອງການທ່ອງທ່ຽວພາກກາງ ຫວຽດນາມ ເມື່ອນະຄອນນີ້ພວມຢືນຢັນເຄື່ອງໝາຍຂອງນະຄອນແຫ່ງສິ່ງແວດລ້ອມ, ນະຄອນແຫ່ງເຫດການ ແລະ ຈັດຕັ້ງການແຂ່ງຂັນຍິງບັ້ງໄຟດອກສາກົນເປັນຫລາຍຄັ້ງສຳເລັດຜົນ ...... ບັນດາເຫດການໃຫຍ່ດັ່ງກ່າວ ໄດ້ສ້າງລາຍຮັບມາໃຫ້ນະຄອນ ດາຫນັງປະມານ 6000 ຕື້ດົ່ງ. ຄຽງຄູ່ກັນນັ້ນ ພື້ນຖານໂຄງລ່າງການທ່ອງທ່ຽວ, ເຂດພັກຜ່ອນບຳລຸງສຸຂະພາບໄດ້ຮັບການເພີ່ມທະວີລົງທຶນ ໄດ້ເຮັດໃຫ້ ດາຫນັງ ກາຍເປັນຫນຶ່ງໃນບັນດາສະຖານທີ່ທ່ອງທ່ຽວດູດດື່ມສຳລັບນັກທ່ອງທ່ຽວສາກົນ. ດາຫນັງ ພວມສ້າງຫລາຍແຜນການເພື່ອດຶງດູດນັກທ່ອງທ່ຽວຕ່າງປະເທດ. ທ່ານ ເຈີນຈີເກືອ່ງ, ຮອງຫົວຫນ້າພະແນກວັດທະນະທຳ ກິລາ ແລະທ່ອງທ່ຽວ ດາຫນັງ ໃຫ້ຮູ້ວ່າ:
“ທີຫນຶ່ງ ຈະຮັກສາການຈັດຕັ້ງບັນດາເຫດການໃຫຍ່. ຄຽງຄູ່ກັນນັ້ນ ເລື່ອງລົງທຶນຍົກລະດັບໃຫ້ແກ່ສິ່ງແວດລ້ອມ ແລະ ບັນດາບໍລິການໃຫມ່, ສ້າງເງື່ອນໄຂໃຫ້ແກ່ນັກລົງທຶນສືບຕໍ່ລົງທຶນບັນດາຜະລິດຕະພັນໃຫມ່, ເຂດພັກຜ່ອນບຳລຸງສຸຂະພາບທັນສະໄຫມ. ທີສອງ ຖ້າຫາກດຶງດູດນັກທ່ອງທ່ຽວມາຈາກເອີລົບ ຫຍຸ້ງຍາກ ພວກຂ້າພະເຈົ້າຫັນທິດດຶງດູດນັກທ່ອງທ່ຽວມາຈາກ ຈີນ, ສ ເກົາຫລີ, ຍ່ີປຸ່ນ ຫລື ບັນດາປະເທດອາຊີຕາເວັນອອກສຽງໃຕ້. ຄຽງຄູ່ກັນນັ້ນ ພວກຂ້າພະເຈົ້າຍັງຄົງສືບຕໍ່ດຶງດູດນັກທ່ອງທ່ຽວພາຍໃນ ແມ່ນຕະຫລາດຈຸດສຸມປະຈຸບັນ.”
ສຳລັບແຂວງ ເທື່ອທຽນເຫ້ວ, ຊື່ງແມ່ນທ້ອງຖິ່ນເປັນເຈົ້າພາບຈັດຕັ້ງປີທ່ອງທ່ຽວແຫ່ງຊາດເຂດແຄມທະເລທາງທິດເຫນືອ ພາກກາງ ສຳເລັດຜົນ ດ້ວຍຈຸດພົ້ນເດັ່ນນັ້ນແມ່ນ Festival ເຫ້ວ ປີ 2012 ໄດ້ຢືນຢັນລັກສະນະວິຊາສະເພາະໃນການຈັດຕັ້ງງານບຸນ, ຂຸດຄົ້ນການທ່ອງທ່ຽວ, ຢືນຢັນຄວາມດູດດື່ມຂອງມໍລະດົກເຂດດິນແດນເມືອງຫລວງ. ໃນປີທ່ອງທ່ຽວແຫ່ງຊາດ 2012, ແຂວງເທື່ອທຽນເຫ້ວ ໄດ້ຕ້ອນຮັບນັກທ່ອງທ່ຽວ 2,5 ລ້ານເທື່ອຄົນ, ເພີ່ມຂຶ້ນເກືອບ 25% ເມື່ອທຽບໃສ່ປີ 2011, ລາຍຮັບຈາກການທ່ອງທ່ຽວບັນລຸເກືອບ 1.800 ຕື້ດົ່ງ. ນອກນັ້ນ ແຂວງເທື່ອທຽນເຫ້ວ ຍັງສົມທົບກັບບັນດາແຂວງ ພາກກາງ ສ້າງຫລາຍລາຍການທ່ອງທ່ຽວໃຫມ່ທີ່ດູດດື່ມຄື: ເດືອນທ່ອງທ່ຽວຄົ້ນຫາຖ້ຳຢູ່ ກວ໋າງບີ່ງ; ງານບຸນທ່ອງທ່ຽວວັດທະນະທຳ, ຂົວເຊື່ອມຕໍ່ອາຊີ ຄັ້ງທີ 3 ຢູ່ແຂວງ ກວ໋າງຈີ້ ແລະ ໃນປີທ່ອງທ່ຽວແຫ່ງຊາດເຂດແຄມທະເລທາງທິດເຫນືອພາກກາງ ໄດ້ດຶງດູດນັກທ່ອງທ່ຽວມາຢ້ຽມຢາມເຂດນີ້ກວ່າ 10 ລ້ານເທື່ອຄົນ.
ຄຸ້ມເມືອງເກົ່າ ໂຮ້ຍອານ
ພາບ:internet
|
ເຖິງຢ່າງໃດກໍຕາມ, ບັນດາແຂວງພາກກາງຍັງຄົງມີຫລາຍວຽກຕ້ອງເຮັດ ເພື່ອສ້າງບັນດາຜະລິດຕະພັນທ່ອງທ່ຽວເປັນເອກະພາບ, ມີລັກສະນະເປັນເຂດທີ່ເປັນເອກະລັກສະເພາະຂອງເຂດພາກ. ທ່ານ ຮ່ວາງຕວນແອງ ລັດຖະມົນຕີກະຊວງວັດທະນະທຳ ກິລາ ແລະ ທ່ອງທ່ຽວ ຫວຽດນາມ ໃຫ້ຮູ້ວ່າ:
“ປີ 2013 ຂະແຫນງທ່ອງທ່ຽວຍັງຄົງຈະປະເຊີນຫນ້າກັບຄວາມຫຍຸ້ງຍາກ ແລະ ສິ່ງທ້າທາຍຫລາຍຢ່າງ, ສະນັນ ບັນດາແຂວງໃນພາກພື້ນ ຄວນສຸມໃສ່ແກ້ໄຂຄວາມຫຍຸ້ງຍາກ, ນຳບັນດາແຂວງທາງພາກກາງ ກາຍເປັນສູນທ່ອງທ່ຽງໃຫຍ່ຂອງທົ່ວປະເທດຢ່າງແທ້ຈິງ. ບັນດາທ້ອງຖິ່ນໃນເຂດ ສືບຕໍ່ຄົ້ນຄວ້າ, ຊອກຫາມາດຕະການແກ້ໄຂຄວາມຫຍຸ້ງຍາກຄື: ວຽກງານຮ່ວມສຳພັນໃນການສົ່ງເສີມ ໂຄສະນາ, ສ້າງຜະລິດຕະພັນທ່ອງທ່ຽວທີ່ບໍ່ທັນໄດ້ຮັບການເສີມຂະຫຍາຍຢ່າງສູງສຸດ.”
ໃນສະພາບພື້ນຖານເສດຖະກິດປະສົບກັບຄວາມຫຍຸ້ງຍາກ, ບັນດາໝາກຜົນດີພໍສົມຄວນຊຶ່ງຂະແຫນງທ່ອງທ່ຽວພາກກາງ ຫວຽດນາມ ບັນລຸໄດ້ ນັ້ນແມ່ນກຳລັງຫນູນເພື່ອໃຫ້ປີ 2013, ຂະແຫນງທ່ອງທ່ຽວສືບຕໍ່ເສີມຂະຫຍາຍຢ່າງມີຫົວຄິດປະດິດສ້າງ, ຮັກສາທີ່ຕັ້ງແມ່ນຂະແຫນງເສດຖະກິດປາຍແຫລມຂອງບັນດາແຂວງພາກກາງ ຫວຽດນາມ.