ບໍ່ພຽງແຕ່ມາຫວຽດນາມເພື່ອຄົ້ນຫາບັນດາສະຖານທີ່ທ່ອງທ່ຽວທີ່ດູດດື່ມເທົ່ານັ້ນ ຫາກນັກທ່ອງທ່ຽວຕ່າງປະເທດຍັງຢາກຊອກຮູ້ຮີດຄອງປະເພນີໃນການຕ້ອນຮັບບຸນປີໃຫມ່ປະຈຳຊາດ, ບັນຍາກາດໃນລະດູບານໃຫມ່ ກໍຄືວັດທະນະທຳຂອງຊາວຫວຽດນາມອີກດ້ວຍ. ບັນດາສະຖານທີ່ດຶງດູດນັກທ່ອງທ່ຽວຕ່າງປະເທດນັ້ນແມ່ນ: ນະຄອນຫລວງ ຮ່າໂນ້ຍ, ນະຄອນເຫວ້, ຄຸ້ມເມືອງເກົ່າໂຮ້ຍອານ, ນະຄອນ ດາຫນັງ, ຍາຈາງ, ຊາປາ ແລະ ອ່າວຮ້າລອງ. ແລະເພື່ອເປັນການເຮັດໃຫ້ພາບພົດຂອງຫວຽດນາມມີຄວາມດູດດື່ມຕໍ່ນັກທ່ອງທ່ຽວກວ່າ, ຍາມໃດບັນດາບໍລິສັດທ່ອງທ່ຽວກໍມີການບໍລິການທ່ອງທ່ຽວທີ່ໃຫມ່ອ່ຽມ ແລະ ຍົກສູງຄຸນນະພາບການບໍລິການ.
ຮ່າໂນ້ຍ ແມ່ນເຂດດິນແດນແຫ່ງອະລິຍະທຳດ້ວຍປະຫວັດສາດນັບພັນປີ ຊຶ່ງແມ່ນສະຖານທີ່ຮັກສາຄຸນຄ່າວັດທະນະທຳຫລາຍຢ່າງ, ແມ່ນແຫ່ງດຳເນີນງານບຸນໃຫຍ່ນ້ອຍນັບຮ້ອຍງານບຸນເມື່ອລະດູບານໃຫມ່ວຽນມາ. ນີ້ກໍແມ່ນຈຸດເວລາທີ່ຮ່າໂນ້ຍດຶງດູດນັກທ່ອງທ່ຽວນັບລ້ານເທື່ອຄົນ. ຢູ່ ຮ່າໂນ້ຍ, ນອກຈາກບັນດາທັດສະນີຍະພາບທີ່ລືຊື່ຄື: ວັນໝຽວ ກວກຕືຢາມ, ສຸສານປະທານໂຮ່ຈິມີນ, ໝູ່ບ້ານເຄື່ອງປັ້ນດິນເຜົາ ແລະອື່ນໆ ບັນດາບໍລິສັດຍັງສ້າງລາຍການທັດສະນະສຶກສາຢູ່ເຂດຊຸມຊົນຕ່າງໆອີກດ້ວຍ. ທ່ານ ເລກວາງດ໋າວ ຜູ້ອຳນວຍການບໍລິສັດທ່ອງທ່ຽວ ເຕີມຍ່ີນຫວຽດ (Vietvision Travel) ໃຫ້ຮູ້ວ່າ: ປີ 2012 ຂະແຫນງທ່ອງທ່ຽວອາດຈະປະສົບກັບຄວາມຫຍຸ້ງຍາກ, ເປັນຕົ້ນສຳລັບບັນດາບໍລິສັດທ່ອງທ່ຽວຕ້ອນຮັບແຂກທ່ອງທ່ຽວຕ່າງປະເທດ. ຈຳນວນນັກທ່ອງທ່ຽວມາຫວຽດນາມໃນຕົ້ນລະດູບານໃຫມ່ກໍຫລຸດລົງ, ພິເສດແມ່ນນັກທ່ອງທ່ຽວມາຈາກເອີລົບ ແລະ ອາເມລິກາ.
“ປີ 2012 ພວກຂ້າພະເຈົ້າມູ້ງໄປເຖິງຕະຫລາດນັກທ່ອງທ່ຽວອາຊີ ຄື: ສິງກະໂປ, ອິນເດຍ, ມາເລເຊຍ, ຮົ່ງກົງ, ຈີນ, ໄທ. ເຂົາເຈົ້າເຄີຍໄປທ່ອງທ່ຽວໃນໄລຍະສັ້ນ ປະມານ 4 - 5 ມື້ເທົ່ານັ້ນ. ຢູ່ພາກເຫນືອ ເຂົາເຈົ້າໄປຢ້ຽມຢາມ ຮ່າໂນ້ຍ, ຮ່າລອງ, ຊາປາ, ສ່ວນຢູ່ ພາກກາງ ແມ່ນຢ້ຽມຊົມນະຄອນດາຫນັງ, ຄຸ້ມເມືອງເກົ່າໂຮ້ຍອານ ແລະ ນະຄອນເຫ້ວ. ປີ 2012 ບໍລິສັດທ່ອງທ່ຽວ Vietvision Travel ຍູ້ແຮງການບໍລິການທ່ອງທ່ຽວຈຳນວນຫນຶ່ງ, ພິເສດແມ່ນ ພາຍຫລັງບຸນເຕັດ ທາງບໍລິສັດຈະສ້າງບັນດາລາຍການທ່ອງທ່ຽວລົງສູ່ໝູ່ບ້ານເຂດບ້ານນາ ເພື່ອໃຫ້ນັກທ່ອງທ່ຽວຊອກຮູ້ແລະຄົ້ນຫາຮີດຄອງປະເພນີຕ້ອນຮັບບຸນເຕັດ, ບັນຍາກາດໃນລະດູບານໃຫມ່ກໍຄືບັນດາງານບຸນທີ່ມີສີສັນແຕກຕ່າງກັນຊຶ່ງໄດ້ຮັບການຈັດຂຶ້ນຢູ່ໝູ່ບ້ານເຫຼົ້ານັ້ນ.”
ນັກທ່ອງທ່ຽວຕ່າງປະເທດເຂົ້າຮ່ວມການຟ້ອນພື້ນເມືອງກັບຊາວເມື່ອງ
ລາຍການທ່ອງທ່ຽວລົງໄປຢ້ຽມຢາມໝູ່ບ້ານເຂດບ້ານນາຂອງບໍລິສັດ Vietvision Travel ແມ່ນອຸດົມສົມບູນ ແລະ ຫລາຍຮູບແບບ. ມຸ້ງໄປເຖິງຄຸນນະພາບບໍລິການ ແລະ ບັນດາສະຖານທີ່ດູດດື່ມ, ສະນັ້ນ ບັນດາລາຍການທ່ອງທ່ຽວລົງສູ່ໝູ່ບ້ານຂອງ Vietvision Travel ໄດ້ຮັບຄວາມນິຍົມຈາກນັກທ່ອງທ່ຽວເປັນຈຳນວນຫລວງຫລາຍ. ທ່ານເລກວາງດ໋າວ ຜູ້ອຳນວຍການບໍລິສັດທ່ອງທ່ຽວ Vietvision Travel ໃຫ້ຮູ້ວ່າ: ທາງບໍລິສັດສ້າງລາຍການທ່ອງທ່ຽວໃນເວລາ 3 ມື້ ສຳລັບນັກທ່ອງທ່ຽວ 4 ຄົນ ດ້ວຍຄ່າບໍລິການ 350 USD/ຄົນ, ສ່ວນລາຍການທ່ອງທ່ຽວພາຍໃນຫນຶ່ງວັນ ແມ່ນ70 USD/ຄົນ.
“ລາຍການໃນມື້ດຽວ, ນັກທ່ອງທ່ຽວໄປຄົ້ນຫາ ອ່າງເກັບນ້ຳຂອງເຂື່ອນໄຟຟ້ານ້ຳ ຕົກ ຊົງດ່າ, ຢ້ຽມຢາມຫໍວັດທະນະທຳຊົນເຜົ່າເມື່ອງ, ຢ້ຽມຢາມວິຫານ ທາກເບີ່ ແລະໄດ້ຮັບຊົມການສະແດງສິລະປະທີ່ມີລັກສະນະ ການເຫລື້ອມໃສ ພື້ນເມືອງ. ລາຍການທ່ອງທ່ຽວໃນເວລາ 2 ມື້, ນັກທ່ອງທ່ຽວສ່ວນຫລາຍ ໄດ້ຄົ້ນຫາເມືອງ ດົງຈ່ຽວ ແຂວງ ກວາງນີງ ແລະ ໄປຢ້ຽມຊົມອ່າວຮ້າລອງ. ລາຍການ 3 ມື້, ນັກທ່ອງທ່ຽວໄດ້ຄົ້ນຫາບັນດາໝູ່ບ້ານຢູ່ທາງທິດຕາເວັນອອກສຽງເຫນືອຂອງ ຮ່າໂນ້ຍ, ຢ້ຽມຢາມຫນອງ ລັງ ຢູ່ ເມືອງຊອກເຊີນ ແລະ ບັກຢາງ, ມື້ຕໍ່ມາຈະໄປຢ້ຽມຢາມໝູ່ບ້ານເຄື່ອງປັ້ນດິນເຜົາ ຟູຫລາງ, ຫລັງຈາກນັ້ນໄປຢ້ຽມຊົມອ່າວຮ້າລອງ. ມື້ສູດທ້າຍແມ່ນກັບເມືອທ່ຽວຊົມນະຄອນຫລວງຮ່າໂນ້ຍ. ”
ຖັດຈາກນະຄອນຫລວງຮ່າໂນ້ຍ, ມີສະຖານທີ່ແຫ່ງຫນຶ່ງທີ່ນັກທ່ອງທ່ຽວນິຍົມ ນັ້ນແມ່ນຄຸ້ມເມືອງເກົ່າ ໂຮ້ຍອານ ແຂວງ ກວາງນາມ. ຄຸ້ມເມືອງເກົ່າໂຮ້ຍອານໄດ້ຮັບການເລືອກເຟັ້ນຈາກແວບໄຊທ່ອງທ່ຽວອອນລາຍ Smart Travel Asia ວ່າ ແມ່ນຫນຶ່ງໃນຈຳນວນ 10 ສະຖານທີ່ທ່ອງທ່ຽວອັນດັບຕົ້ນຂອງ ອາຊີ . ທ່ານ ດີງຫາຍ, ຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງ ກວ້າງນາມ ໃຫ້ຮູ້ວ່າ:
“ນອກຈາກໄປຢ້ຽມຊົມຄຸ້ມເມືອງເກົ່າແລ້ວ, ນັກທ່ອງທ່ຽວຍັງໄດ້ຮັບຟັງເພງພື້ນເມືອງຂອງຊາວແຂວງກວ້າງນາມ, ຂັບບ່າຍຈ່ອຍ ແລະ ບັນດາຮູບການສິລະປະພື້ນເມືອງອື່ນອີກດ້ວຍ. ພວກຂ້າພະເຈົ້າຍັງຟື້ນຟູບັນດາງານບຸນປະເພນີ. ຜ່ານນັ້ນ ນັກທ່ອງທ່ຽວສາມາດເຂົ້າໃຈກ່ຽວກັບຊີວິດການເປັນຢູ່ຂອງປະຊາຊົນຢູ່ທີ່ນີ້ຕື່ມອີກ. ນອກນັ້ນ ພວກຂ້າພະເຈົ້າຍັງຈັດຕັ້ງບັນດາການເຄື່ອນໄຫວສິລະປະວັດທະນະທຳ ກ່ຽວກັບການວາງສະແດງຮູບພາບ, ການເສບດົນຕີພື້ນເມືອງ ແລະ ທັນສະໄຫມ, ງານບຸນຢູ່ຕາມຖະໜົນ ແລະອື່ນໆ.”
ການບໍລິການທ່ອງທ່ຽວຢູ່ໂຮ້ຍອານ ລ້ວນແຕ່ນຳມາຊຶ່ງຄວາມປະທັບໃຈໃຫ້ແກ່ນັກທ່ອງທ່ຽວ. ສະນັ້ນ ນັກທ່ອງທ່ຽວທ່ານໃດເມື່ອມີໂອກາດມາທ່ຽວຊົມໂຮ້ຍອານແລ້ວ ກໍຢາກຈະກັບຄືນມາຢ້ຽມຢາມຄຸ້ມເມືອງເກົ່າແຫ່ງນີ້ອີກຫຼາຍຄົ້ງ.
ລານແອງ