(vovworld)- ລຽບຕາມສອງຟາກທາງເຂົ້າໄປຕາແສງ ເມື່ອງຟັງ, ເມືອງດ້ຽນບຽນ ແມ່ນບັນດາທົ່ງນາຍາວຢຽດທີ່ສຸກເຫລືອງອາຮາມ. ລະດູນີ້ ຊາວເຜົ່າຜູ້ໄທ ຢູ່ ເມື່ອງຟັງ ຄອບຄົວໃດກໍກະກຽມເພື່ອເຮັດບຸນເຂົ້າໃຫມ່, ຊື່ງແມ່ນຮີດຄອງປະເພນີທີ່ມີມາແຕ່ດົນນານ ຊື່ງຊາວເຜົ່າຜູ້ໄທຍັງຄົງຮັກສາໄວ້ໄດ້.
ພໍ່ແມ່ປະຊາຊົນ ຮູດເຂົ້າກຽມເຮັດບຸນເຂົ້າໃຫມ່
ພາບ:lehoi.cinet.vn
|
ມື້ນີ້ ຄອບຄົວລຸງ ກວາງວັນຕູນ ຢູ່ ບ້ານບົວ, ຕາແສງ ເມື່ອງຟັງ ເຮັດບຸນເຂົ້າໃຫມ່ ເພື່ອເຊື້ອເຊີນອ້າຍເອື້ອຍນ້ອງ, ລູກຫລານໃນວົງຕະກຸນມາຮ່ວມກັບຄອບຄົວ ຕ້ອນຮັບລະດູການເກັບກ່ຽວໃຫມ່. ເມື່ອຈັບຈອກເຫລົ້າ, ລຸງຕຸນ ຮູ້ສຶກເບິກບານມ່ວນຊ່ືນສະແດງຄວາມຂອບອົກຂອບໃຈທຸກຄົນທີ່ໄດ້ມາຮ່ວມກັບຄອບຄົວຂອງຕົນ.
“ຂ້າພະເຈົ້າຂອບອົກຂອບໃຈໝົດທຸກຄົນທີ່ໄດ້ມາຮ່ວມສຸກກັບຄອບຄົວ. ຂໍເຊີນລຸງ, ປ້າ, ອາວ, ອາ ອ້າຍເອື້ອຍ ຍົກຈອກອວຍພອນໝົດທຸກຄົນມີສຸຂະພາບແຂງແຮງ, ໝັ້ນຍືນ.”
ທຸກຄົນມີຫນ້າຢູ່ທີ່ນີ້ລ້ວນແຕ່ຍົກຈອກ ອວຍພອນໃຫ້ ຄອບຄົວລຸງຕຸນມີໂຊກມີໄຊ. ລຸງ ຫລໍ່ວັນບູນ, ເພື່ອນບ້ານຂອງຄອບຄົວລຸງຕູນໃຫ້ຮູ້ວ່າ: ບຸນເຂົ້າໃຫມ່ມີຄວາມໝາຍສຳລັບແຕ່ລະຄອບຄົວຊາວເຜົ່າຜູ້ໄທຢູ່ເມື່ອງຟັງ ສະນັ້ນ ເຖິງວ່າຂ້ອງຄາກັບວຽກງານກໍຕາມ ແຕ່ຕ້ອງຍາດເວລາເພື່ອມາຮ່ວມກັບຄອບຄົວລຸງຕູນ.
“ໂດຍໄດ້ຮັບຄຳເຊີນຈາກອ້າຍຕູນ ມື້ນີ້ ຂ້າພະເຈົ້າມາອວຍພອນຄອບຄົວອ້າຍຕູນໄດ້ຮັບໂຊກຮັບໄຊ, ເຂົ້າເຕັມກະຖັງ.. ແຂກມາຮ່ວມມື້ນີ້ ສ່ວນຫລາຍບໍ່ຖືສິ່ງຂອງໃດໄປ ນຳ ພຽງແຕ່ມາອວຍພອນຄອບຄົວເຈົ້າພາບເທົ່ານັ້ນ.”
ຊາວເຜົ່າຜູ້ໄທເຄີຍຖືວ່າ: ເພື່ອໃຫ້ມີລະດູການເກັບກ່ຽວເຂົ້າໄດ້ຮັບຜົນດີ, ການຊ່ວຍດົນບັນດານຂອງບັນພະບຸລຸດ, ດິນຟ້າອາກາດແມ່ນສຳຄັນທີ່ສຸດ. ສະນັ້ນ ກ່ອນລະດູເກັບກ່ຽວ, ບັນດາຄອບຄົວລ້ວນແຕ່ເຮັດບຸນເຂົ້າໃຫມ່ ດ້ວຍຄວາມປາດຖະຫນາຢາກສະແດງຄວາມຮູ້ບຸນຄຸນຕໍ່ບັນພະບຸລຸດ, ດິນຟ້າອາກາດ. ອ້າຍເດືອງວັນລຽນ ໃຫ້ຮູ້ວ່າ:
“ຄອບຄົວໃດກໍຈັດບຸນເຂົ້າໃຫມ່. ໃນພາເຂົ້າ, ຊາວເຜົ່າຜູ້ໄທເຄີຍກະກຽມອາຫານທຸກເຍື່ອງເພື່ອໃຫ້ທຸກຄົນຮັບປະທານ, ສ່ວນເຄື່ອງບູຊາ ຕ້ອງມີໄກ່ຜູ້ໂຕຫນຶ່ງ ພ້ອມດ້ວຍມັນຕົ້ນ, ມັນດ້າງ, ໝາກໄມ້.. ເພື່ອເຊື້ອເຊີນບັນພະບຸລຸດ, ຍາດຕິພີ່ນ້ອງ.”
ພິທີບູຊາໃນວັນເຮັດບຸນເຂົ້າໃຫມ່
ພາບ:lehoi.cinet.vn
|
ບຸນເຂົ້າໃຫມ່ ແມ່ນໂອກາດເພື່ອໃຫ້ປູ່ຍາຕາຍາຍ, ພໍ່ແມ່ຕັກເຕືອນລູກຫລານຕ້ອງເຄົາລົບນັບຖືການອອກແຮງງານ, ຫລັກສິນທຳ, ແບບແຜນດຳລົງຊີວິດ. ສະນັ້ນ ເຖິງວ່າ ຂ້າງຄາກັບວຽກງານແນວໃດກໍຕາມ, ແຕ່ລູກຫລານຍັງຄົງພະຍາຍາມຍາດເວລາກັບມາເຕົ້າໂຮມກັບຄອບຄົວໃນມື້ບຸນເຂົ້າໃຫມ່. ອ້າຍຫລໍ່ວັນຢູງ, ຫລານຂອງລຸງຕູນໃຫ້ຮູ້ວ່າ:
“ກໍເຊັ່ນດຽວກັນກັບທຸກຄອບຄົວໃນເມື່ອງຟັງນີ້ ປີໃດເມື່ອຮອດລະດູເກັບກ່ຽວ ແຕ່ລະຄອບຄົວລ້ວນແຕ່ເຮັດບຸນເຂົ້າໃຫມ່. ຮີດຄອງປະເພນີດັ່ງກ່າວແມ່ນສືບທອດຈາກຄົນລຸ້ນກ່ອນ. ນີ້ແມ່ນຈຸດວັດທະນະທຳອັນດີງາມຂອງຊາວກະສິກອນຢູ່ເມື່ອງຟັງ.
ຊາວເຜົ່າຜູ້ໄທມີວິທີສະແດງຄວາມເຄົາລົບນັບຖືຕໍ່ບັນພະບຸລຸດພິເສດທີ່ສຸດ. ນອກຈາກເຄື່ອງບູຊາຄື: ຊີ້ນໝູ, ໄກ່, ໝາກໄມ້ນາໆຊະນິດແລ້ວ, ໃນພາເຂົ້າຖະຫວາຍບູຊາຍັງມີຖ້ວຍເຂົ້າໃຫມ່ອີກດ້ວຍ. ແລະ ວັນເວລາເຮັດບຸນເຂົ້າໃຫມ່ກໍບໍ່ຖືກກຳນົດ. ອີງຕາມແຕ່ລະຄອບຄົວ, ແຕ່ລະວົງຕະກຸນ, ສະນັ້ນ ແຕ່ລະຄອບຄົວເຮັດບຸນເຂົ້າໃຫມ່ໃນມື້ແຕກຕ່າງກັນ ແຕ່ມີຈຸດລວມ ນັ້ນແມ່ນຊາວເຜົ່າຜູ້ໄທເລືອກເຟັ້ນມື້ເຮັດບຸນເຂົ້າໃຫມ່ ແມ່ນມຸ່ງໄປສູ່ ປູ່ຍ່າຕາຍາຍຂອງຕົນ. ທ່ານ ຫລໍ່ວັນບຽນ, ເລຂາຄະນະພັກຕາແສງ ເມື່ອງຟັງ ໃຫ້ຮູ້ວ່າ:
“ທຳມະດາຊາວເຜົ່າຜູ້ໄທ ໃນ10 ມື້ໃດເຮັດພິທີບູຊາເທື່ອຫນຶ່ງ. ຄອບຄົວຮັ່ງມີກ່ວາແມ່ນໃນ 5 ມື້ເຂົາເຈົ້າເຮັດພິທີບູຊາເທື່ອຫນຶ່ງ. ກ່ອນທີ່ທຳການເກັບກ່ຽວ, ຊາວເຜົ່າຜູ້ໄທເຄີຍຈັດບຸນເຂົ້າໃຫມ່ ເພື່ອຖະຫວາຍເຂົ້າໃຫມ່ຕໍ່ບັນພະບຸລຸດຂອງຕົນກ່ອນ.”
ຊາວເຜົ່າຜູ້ໄທຖືບຸນເຂົ້າໃຫມ່ເປັນສຳຄັນ ແລະ ໄດ້ຮັບການຮັກສາ ແລະ ສືບທອດຈາກຄົນລຸ້ນນີ້ໄປສູ່ຄົນລຸ້ນອື່ນ. ບຸນເຂົ້າໃຫມ່ ທັງສ່ອງແສງໃຫ້ເຫັນການເຫລື້ອມໃສດ້ານຈິດວິນຍານ, ທັງສະແດງໃຫ້ເຫັນຈຸດວັດທະນະທຳພື້ນເມືອງທີ່ເປັນເອກະລັກສະເພາະ, ມີລັກສະນະວັດທະນະທຳມະນຸດ ແລະ ມີຄວາມໝາຍສັງຄົມຢ່າງເລິກເຊິ່ງ. ນີ້ກໍແມ່ນໂອກາດເພື່ອໃຫ້ອ້າຍເອື້ອຍນ້ອງໃນຄອບຄົວຂອງຕົນກໍຄືຄອບຄົວແກ່ວດອງ, ເພື່ອນບ້ານໃກ້ຄຽງໄດ້ເຕົ້າໂຮມໂອ້ລົມນຳກັນກ່ຽວກັບການທຳມາຫາກິນ, ວິທີສ້າງຄອບຄົວໃຫ້ມີຄວາມອີ່ມຫນຳສຳລານສົມບູນພູນສຸກ ແລະ ຮັດແຫນ້ນຄວາມສາມັກຄີລະຫວ່າງຄອບຄົວໃນບ້ານເມືອງ.