(vovworld) - ເຜົ່າຢ້າວໂລກາງ, ແມ່ນໜຶ່ງໃນບັນດາໝວດເຜົ່າຢ້າວທີ່ເຫຼື້ອມໄສສາສະໜາຄຼິດ, ສິ່ງດ່ັງກ່າວໄດ້ສົ່ງຜົນສະທ້ອນຫຼາຍຢ່າງເຖິງຊີວິດຂອງເຂົາເຈົ້າ, ນັບແຕ່ການຈັດຕັ້ງພິທີງານສົບ, ງານດອງ ຕະຫຼອດຮອດພິທີຕ່າງໆໃນຄອບຄົວ ແລະ ໃນວົງຕະກຸນ. ພິເສດ, ໃນພິທີເຫຼົ່ານັ້ນພາບແຕ້ມບູຊາແມ່ນຂາດບໍ່ໄດ້. ສຳລັບຊາວເຜົ່າຢາວໂລກາງແລ້ວ, ພາບແຕ້ມບູຊາຄືດັ່ງການປະກົດຕົວຂອງເທວະດາຟ້າແຖນໃນບັນດາງານບຸນທີ່ສຳຄັນ ແລະ ມີລັກສະນະສຶກສາສູງ.
ຮູບເທວະດາໃນພາບແຕ້ມບູຊາຂອງຊາວເຜົ່າຢ້າວໂລກາງ
(ພາບ: ອິນເຕີແນດ)
ລະບົບພາບແຕ້ມບູຊາຂອງຊາວເຜົ່າຢ້າວແມ່ນອຸດົມສົມບູນທີ່ສຸດ, ຮູບແຕ້ມສະແດງໃຫ້ເຫັນທັດສະນະຂອງຊາວເຜົ່າຢ້າວກ່ຽວກັບກົກເຄົ້າຂອງໂລກຈັກກກະວານ, ສາຍພົວພັນລະຫວ່າງສັດສາວາສິງ, ໃນນັ້ນມີມະນຸດ. ໃນທັດສະນະນັ້ນ, ບັນດາເທວະດາຟ້າແຖນຍັງມີກຳລັງແຮງ ແລະ ສິດອຳນາດອະພິນິຫານທີ່ກະທົບເຖິງທຸກດ້ານຂອງຊີວິດ. ທ່ານ ຈ້ຽວຍືຮົ່ງ, ຊາວເຜົ່າຢາວໂລກາງຢູ່ບ້ານແດ່ວບູດ, ຕາແສງເຫີບຕ໋ຽນ, ເມືອງດົງຫີ, ແຂວງທ໋າຍງວຽນ, ໃຫ້ຮູ້ວ່າ:
“ພາບແຕ້ມບູຊາແມ່ນບັນດາຮູບເທວະດາຟ້າແຖນເທິງສະຫວັນຊັ້ນຟ້າ. ເທິງຟ້າມີແດນສະຫວັນ, ໃຕ້ດິນມີນາລົກ. ໃນຮູບແຕ້ມຂອງຊາວເຜົ່າຢ້າວ ມີຮູບເທວະດາຟ້າແຖນທຸກອົງ. ເພາະເຂົາເຈົ້າຄິດວ່າເທິງຟ້າມີເທວະດາຟ້າແຖນອົງໃດ ແລະ ເຮັດວຽກໃດ, ໃຕ້ດິນກໍ່ມີເທວະດາຟ້າແຖນອົງນັ້ນ ແລະ ເຮັດວຽກນັ້ນເຊັ່ນກັນ“.
ເທວະດາຟ້າແຖນທັງໝົດໃນພາບແຕ້ມບູຊາຂອງຊາວເຜົ່າຢ້າວໂລກາງ
(ພາບ: ອິນເຕີແນດ) ພາບແຕ້ມບາງແຜ່ນຂອງຊາວເຜົ່າຢ້າວກໍ່ມີຫົວເລື່ອງຄືກັນກັບພາບແຕ້ມບູຊາຂອງຊົນເຜົ່າອື່ນຈຳນວນໜຶ່ງເຊັ່ນ: ຊົນເຜົ່າໄຕ, ນຸ່ງ, ຊ໋ານຢີ່ວ, ໃນນັ້ນຕ້ອງເວົ້າເຖິງພາບແຕ້ມຂອງເທວະດາ 4 ອົງຄື: ເທວະດາຟ້າຮ້ອງ, ເທວະດາຝົນ, ເທວະດາລົມ, ເທວະດາເມກ. ທ່ານ ດັ້ງຮົ່ງ, ໝໍຜີຊາວເຜົ່າຢ້າວໂລກາງ, ຢູ່ຕາແສງເຫີບຕ໋ຽນ, ເມືອງດົງຫີ, ແຂວງທ໋າຍງວຽນ, ໃຫ້ຮູ້ວ່າ, ແຕ່ລະງານບຸນຂອງຊາວເຜົ່າຢ້າວກໍ່ມີຮູບແຕ້ມທີ່ແຕກຕ່າງກັນ.
“ເທິງແທ່ນບູຊາຂອງແຕ່ລະຄອບຄົວລ້ວນແຕ່ມີຊຸດພາບແຕ້ມບູຊາ. ໃນປີໜຶ່ງມີ 4 ງານບຸນໃຫຍ່. ໃນພິທີງານບຸນເຫຼົ່ານັ້ນ, ອ້າຍນ້ອງໃນແຕ່ລະຄອບຄົວຕ້ອງຜັດປ່ຽນກັນນຳເອົາເຫຼົ້າແກ້ວໜຶ່ງ ແລະ ໄກ່ມາເພື່ອທຳພິທີບູຊາພາວະນາຂໍໃຫ້ດິນຟ້າອາກາດເອື້ອອຳນວຍຄວາມສະດວກໃຫ້ລະດູການເກັບກ່ຽວໄດ້ຮັບຜົນດີ “.
ເທວະດາອົງໜຶ່ງໃນໃນພາບແຕ້ມບູຊາຂອງຊາວເຜົ່າຢ້າວໂລກາງ
(ພາບ: ອິນເຕີແນດ) ພາບແຕ້ມບູຊາຂອງຊາວເຜົ່າຢ້າວສະແດງໃຫ້ເຫັນຄວາມເຊື່ອໝັ້ນຂອງເຂົາເຈົ້າຕໍ່ໂລກຈັກກະວານ ແລະ ບັນດາປະກົດການໃນຊີວິດນັບແຕ່ກີ້ແຕ່ກ່ອນ. ປະຈຸບັນ, ເຖິງວ່າວິທະຍາສາດໄດ້ຮັບການພັດທະນາ ແລະ ໄດ້ມີການອະທິບາຍກ່ຽວກັບປະກົດການນີ້ຢ່າງສົມເຫດສົມຜົນແລ້ວກໍ່ຕາມ, ແຕ່ຊາວເຜົ່າຢ້າວຍັງຄົງເຊື່ອໝັ້ນ ແລະ ຮັກສາບັນດາພາບແຕ້ມບູຊາມາແຕ່ບູຮານນະການໄວ້ຢູ່.
ອາທິບາຍກ່ຽວກັບສາຍເຫດທີ່ພາໃຫ້ບັນດາພາບແຕ້ມນີ້ມີກຳລັງແຮງຄືແນວນັ້ນ, ທ່ານ ບ່ານຟຸກເຕ່, ຊາວເຜົ່າຢ້າວໂລກາງ, ປະຈຸບັນແມ່ນຮອງປະທານຄະນະກຳມະການປະຊາຊົນຕາແສງເຫີບຕ໋ຽນ, ເມືອງດົງຫີ, ໃຫ້ຮູ້ວ່າສຳລັບຊາວເຜົ່າທີ່ຖືສິນທຳເປັນສຳຄັນຄືຊາວເຜົ່າຢ້າວນັ້ນ, ບັນດາພາບແຕ້ມດັ່ງກ່າວບໍ່ພຽງແຕ່ແມ່ນການເຫຼື້ອມໄສເທົ່ານັ້ນ, ຫາກຍັງແມ່ນຄວາມໄວ້ເນື້ອເຊື່ອໃຈອີກດ້ວຍ. ເຖິງວ່າທັດສະນະຂອງຊາວເຜົ່າຢ້າວກ່ຽວກັບໂລກຈັກກະວານຍັງງ່າຍດາຍກໍ່ຕາມ ແຕ່ບັນດາຮູບໃນພາບດັ່ງກ່າວພັດສະແດງອອກຢ່າງຈະແຈ້ງ ແລະ ມີລັກສະນະສຶກສາສູງ. ຊາວເຜົ່າຢ້າວໂລກາງຖືວ່າ, ບັນດາເທວະດາຟ້າແຖນຍາມໃດກໍ່ເຂົ້າໃຈແຈ້ງທຸກສິ່ງທຸກຢ່າງຂອງມະນຸດ ແລະ ຈະລົງໂທດຜູ້ໃດທີ່ມີການກະທຳຜິດ. ພຽງແຕ່ເບິ່ງຮູບແຕ້ມທີ່ເຄັ່ງຂຶມຂອງບັນດາເທວະດາເຫຼົ່ານັ້ນ, ຜູ້ໃດທີ່ມີແນວຄວາມຄິດຫຼືອຸບາຍບໍ່ດີກໍ່ບໍ່ກ້າະຕິບັດອີກ.
ຕາມທຳມະດາແລ້ວ, ຮູບແຕ້ມເຫຼົ່ານັ້ນເຄີຍແຕ້ມກ່ອນບຸນປີໃໝ່ປະຈຳຊາດ (ບຸນເຕັດ) ສອງສາມເດືອນ. ແລະ ຜູ້ຢາກແຕ້ມພາບຕ້ອງອາໄສບັນດາໝໍຜີໃນປະຊາຄົມຊົນເຜົ່າຂອງຕົນແຕ້ມ. ຮອດບຸນເຕັດເຂົາເຈົ້າເຄີຍນຳເອົາພາບແຕ້ມບູຊານີ້ອອກມາເພື່ອສິດສອນກ່ຽວກັບຫຼັກສິນທຳໃຫ້ລູກຫຼານຂອງຕົນ.
“ຊຸດພາບແຕ້ມຕ້ອງຈ້າງໝໍຜີແຕ້ມໃຫ້, ເມື່ອມີຮູບແຕ້ມແລ້ວຕ້ອງມີຊີ້ໝູ, ຊີ້ນໄກ່ ເພື່ອບູຊາໃນເວລາ 1 ວັນຈຶ່ງສາມາດນຳໃຊ້ໄດ້“.
ໝໍຜີຊາວເຜົ່າຢ້າວໂລກາງແຕ້ມແຕ້ມພາບບູຊາ
(ພາບ: ອິນເຕີແນດ) ໃນບັນດາພິທີບູຊາຂອງຊາວເຜົ່າຢ້າວ, ເຖິງວ່າພິທີບູຊາຖືກຈັດໃນຂອບເຂດຄອບຄົວກໍ່ຕາມ, ແຕ່ຍາມໃດກໍ່ມີຍາດຕິພີ່ນ້ອງ, ແລະ ຊາວບ້ານມາຮ່ວມຫຼາຍຄົນ. ຍ້ອນເນື້ອໃນພາບແຕ້ມຂອງຊາວເຜົ່າຢ້າວໂລກາງມີຫຼາຍຄຸນຄ່າກ່ຽວກັບການສຶກສາ, ວັດທະນະທຳມະນຸດ. ດັ່ງນັ້ນປະເພນີບູຊາພາບແຕ້ມພື້ນເມືອງຂອງເຂົາເຈົ້າຈຶ່ງໄດ້ຮັບການອະນຸລັກຮັກສາໄວ້ແຕ່ລຸ້ນກ່ອນຈົນຮອດປະຈຸບັນ.