ລະບົບຫໍພິພິດທະພັນຢູ່ ຮ່າໂນ້ຍ ໃນວິວັດການກາຍເປັນຈຸດນັດພົບຂອງ Citytour

ວັນພະຫັດ ທີ 2 ສິງຫາ ຄ.ສ. 2012 | 15:43:13

(vovworld) - ກໍເຊັນດຽວກັນກັບນະຄອນຫລວງຫຼາຍແຫ່ງຢູ່ໃນໂລກ, ຮ່າໂນ້ຍ ມີຫໍພິພິດທະພັນນັບສີບແຫ່ງທີ່ພວມເຄື່ອນໄຫວຮັບໃຊ້ຜູ້ຊົມ. ເຖິງຢ່າງໃດກໍຕາມ, ມີຫໍພິພິດທະພັນຫຼາຍແຫ່ງຢູ່ ຮ່າໂນ້ຍ ຍັງບໍ່ທັນສ້າງຄວາມດູດດື່ມໃຫ້ແກ່ນັກທ່ອງທ່ຽວເທື່ອ. ເພາະສະນັ້ນ, ໃນວິວັດການພັດທະນາຂອງຕົນ, ລະບົບຫໍພິພິດທະພັນ ຢູ່ ຮ່າໂນ້ຍ ພວມຄ່ອຍໆປ່ຽນໃຫມ່ເພື່ອຂຸດຄົ້ນແຫລ່ງເອກະສານ, ວັດຖຸພັນທີ່ມີຄວາມໝາຍວັດທະນະທຳມະນຸດນີ້ໃຫ້ແກ່ການພັດທະນາຂອງຂະແຫນງທ່ອງທ່ຽວ ຮ່າໂນ້ຍ.

ລະບົບຫໍພິພິດທະພັນຢູ່ ຮ່າໂນ້ຍ ໃນວິວັດການກາຍເປັນຈຸດນັດພົບຂອງ Citytour - ảnh 1

ຫ້ອງວາງສະແດງໃນຫໍພິພິດທະພັນແມ່ຍິງ ຫວຽດນາມ
ພາບ:internet

ໂດຍຕັ້ງຢູ່ໃຈກາງນະຄອນຫລວງ ຮ່າໂນ້ຍ, ຫໍພິພິດທະພັນ ແມ່ຍິງ ຫວຽດນາມ ດ້ວຍເນື້ອທີ່ເກືອບ 2000 ຕາລາງແມັດ ແລະ ລະບົບສາງເກັບຮັກສາເອກະສານ, ວັດຖຸພັນກວ່າ 25.000 ຊິ້ນນັ້ນໄດ້ສ່ອງແສງໃຫ້ເຫັນການປະກອບສ່ວນຂອງແມ່ຍິງຫວຽດນາມ ໃນປະຫວັດສາດ ແລະ ຊີວິດໃນຍຸກປະຈຸບັນ. ຫໍພິພິດທະພັນແມ່ຍິງ ຫວຽດນາມ ແມ່ນສູນໂຄສະນາເຜີຍແຜ່ຄວາມຮູ້ດ້ານປະຫວັດສາດວັດທະນະທຳຂອງແມ່ຍິງ ຫວຽດນາມ ໃຫ້ແກ່ມະຫາຊົນ. ຈາກຮູບແບບແມ່ນສະຖານທີ່ວາງສະແດງປະຫວັດສາດວັດທະນະທຳ ແລະ ໄດ້ຮັບການຊ່ວຍເຫລືອຈາກບັນດາຜູ້ຊ່ຽວຊານຝລັ່ງ, ຫໍພິພິດທະພັນໄດ້ຫັນປ່ຽນຮູບການວາງສະແດງຕາມຫົວເລື່ອງສະເພາະກ່ຽວກັບເພດ, ຄວາມຂະຫຍັນຂັນເຄື່ອນ ແລະ ທັນສະໄຫມກວ່າ. ຫໍພິພິດທະພັນ ມີ 3 ຫົວເລື່ອງຕົ້ນຕໍ, ຊຶ່ງລວມມີ: ແມ່ຍິງໃນຄອບຄົວ, ແມ່ຍິງໃນປະຫວັດສາດ ແລະ ອາພອນສະໄຫມຍິງ ເພື່ອສະແດງໃຫ້ເຫັນບັນດາພິທີການ, ຮີດຄອງປະເພນີໃນການແຕ່ງດອງ, ຊີວິດໃນຄອບຄົວ, ຊຸດອາພອນພື້ນເມືອງ ແລະ ເລື່ອງລາວກ່ຽວກັບແມ່ຍິງໃນການຕໍ່ສູ້ປົກປັກຮັກສາປະເທດຊາດຢ່າງມີຊີວິດຊີວາ. ພ້ອມກັບການວາງສະແດງບັນດາວັດຖຸພັນນັ້ນ, ຫໍພິພິດທະພັນແມ່ຍິງ ຫວຽດນາມ ຍັງຈັດຕັ້ງເຫດການຕ່າງໆເພື່ອສະຫງວນໃຫ້ແກ່ຜູ້ຊົມ, ບັນດາການເຄື່ອນໄຫວສຶກສາ ແລະ ງານວາງສະແດງຫົວເລ່ືອງສະເພາະ, ຈັດຕັ້ງກອງປະຊຸມສຳມະນາຕ່າງໆ. ທ່ານນາງ Nguyen Thi Bich Van ຜູ້ອຳນວຍການຫໍພິພິດທະພັນ ໃຫ້ຮູ້ວ່າ: ການຫັນປ່ຽນ, ປ່ຽນໃຫມ່ ແມ່ນສິ່ງທີ່ຫໍພິພິດທະພັນແມ່ຍິງ ຫວຽດນາມ ພວມມຸ່ງໄປເຖິງເພື່ອຕອບສະຫນອງຄວາມຕ້ອງການຂອງຜູ້ຊົມ. ທ່ານນາງ Nguyen Thi Bich Van ໃຫ້ຮູ້ວ່າ:

“ພ້ອມກັບບັນດາວັດຖຸພັນໃຫມ່ທີ່ວາງສະແດງຢູ່ຫໍພິພິດທະພັນ ພວກຂ້າພະເຈົ້າກໍບູລະນະສອ້ມແປງແລະປັບປຸງການເຄື່ອນໄຫວຂອງຫໍພິພິດທະພັນທັງໝົດ. ພວກຂ້າພະເຈົ້າໄດ້ກໍ່ສ້າງຮ້ານອາຫານຫລັງຫນຶ່ງເພື່ອຮັບໃຊ້ຜູ້ຊົມ ແລະ ບຸລະນະລະບົບບໍລິການທັງໝົດ, ນອກນັ້ນຍັງມີຫ້ອງຫນຶ່ງເພື່ອຮັບໃຊ້ໃຫ້ແກ່ການຄົ້ນຫາຂອງເດັກນ້ອຍ.”

ທ່ານ Nguyen Manh Cuong, ຮອງຫົວຫນ້າກົມໃຫຍ່ທ່ອງທ່ຽວ ຫວຽດນາມ ຖືວ່າ: ວິທິວາງສະແດງຂອງຫໍພິພິດທະພັນແມ່ຍິງ ຫວຽດນາມ ໃນປະຈຸບັນໄດ້ຕອບສະຫນອງມາດຕະຖານແມ່ນຈຸດນັດພົບຂອງນັກທ່ອງທ່ຽວ. ທ່ານ Nguyen Manh Cuong ເນັ້ນຫນັກວ່າ:

“ນີ້ແມ່ນຫໍພິພິດທະພັນທີ່ວາງສະແດງຕາມວິທີໃຫມ່ເມື່ອທຽບໃສ່ຫໍພິພິດທະພັນຕ່າງໆຢູ່ ຫວຽດນາມ ໃນປະຈຸບັນ. ສຳລັບຂ້າພະເຈົ້າແລ້ວຫໍພິພິດທະພັນນີ້, ແມ່ນຈຸດນັດພົບທີ່ດຶງດູດນັກທ່ອງທ່ຽວເປັນຈຳນວນຫລາຍ.”

ກ່ອນຫນ້ານັ້ນ, ຫໍພິພິດທະພັນຊົນເຜົ່າວິທະຍາ ຫວຽດນາມທີ່ຫ່າງຈາກໃຈກາງນະຄອນຫລວງ ຮ່າໂນ້ຍ ປະມານ 8 ກິໂລແມັດ ກໍກາຍເປັນສະຖານທີ່ດຶງດູດນັກທ່ອງທ່ຽວ ຍ້ອນວັດຖຸພັນວາງສະແດງຢູ່ທີ່ນີ້ແມ່ນລຽບງ່າຍ, ສ່ອງແສງໃຫ້ເຫັນທຸກແງ່ມູມດ້ານວັດທະນະທຳທີ່ມີຮູບຮ່າງ ແລະ ບໍ່ມີຮູບຮ່າງ, ບັນດາຈຸດພົ້ນເດັ່ນໃນຊີວິດ ແລະ ຫົວຄິດປະດິດສ້າງຂອງບັນດາເຜົ່າຫວຽດນາມ. ຄຽງຄູ່ກັບການວາງສະແດງວັດຖຸພັນໃນປະຈຸບັນ, ຫໍພິພິດທະພັນກໍ່ໄດ້ປະສົບຜົນສຳເລັດທີ່ສຸດດ້ວຍບັນດາການເຄື່ອນໄຫວຢູ່ກາງແຈ້ງ, ການວາງສະແດງພິເສດ, ລາຍການແລກປ່ຽນວັດຖຸພັນ, ສົມທົບກັບຫໍພິພິດທະພັນອາເມລິກາ ວາງສະແດງວັດຖຸພັນຢູ່ຕ່າງປະເທດ. ທ່ານ Alain Philippe ນັກທ່ອງທ່ຽວມາຈາກ ຝລັ່ງ ພາຍຫລັງໄປຢ້ຽມຊົມຫໍພິພິດທະພັນໃຫ້ຮູ້ວ່າ:

“ຂ້າພະເຈົ້າບໍ່ທັນຮູ້ໄດ້ວ່າ ຫວຽດນາມ ມີ 54 ຊົນເຜົ່າສ່ວນຫນ້ອຍ. ຂ້າພະເຈົ້າໄດ້ຮັບຊົມບັນດາຊຸດອາພອນພື້ນເມືອງທີ່ເຂັ້ມຂົ້ນໄປດ້ວນສີສັນວັດທະນະທຳບັນດາເຜົ່າທາງພາກໃຕ້. ຂ້າພະເຈົ້າຄິດວ່າ ບັນດາຫໍພິພິດທະພັນຄວນວາງສະແດງວັດຖຸພັນຄືແນວນີ້ໃຫ້ຫລາຍກວ່າ. ໄດ້ຮັບຊົມຫໍພິພິດທະພັນໃນມື້ນີ້ຂ້າພະເຈົ້າຮູ້ສຶກປະທັບໃຈຫລາຍ.”

ບັນດາຫໍພິພິດທະພັນທີ່ຊອກໄດ້ທິດກ້າວເດີນ ແລະ ປະສົບຜົນສຳເລັດໃນວິວັດກາຍເປັນຈຸດນັດພົບຂອງນັກທ່ອງທ່ຽວຢູ່ຮ່າໂນ້ຍຄື: ຫໍພິພິດທະພັນຊົນເຜ່ົາວິທະຍາ ຫວຽດນາມ, ຫໍພິພິດທະພັນແມ່ຍິງ ຫວຽດນາມ, ຫໍພິພິດທະພັນໂຮ່ຈິມີນ, ຫໍພິພິດທະພັນປະຫວັດສາດການທະຫານ, ຫໍພິພິດທະພັນປະຫວັດສາດແຫ່ງຊາດ ຫວຽດນາມ. ຖ້າຫາກຢາກດຶງດູດນັກທ່ອງທ່ຽວ, ສິ່ງຈຳເປັນທີ່ສຸດນັ້ນແມ່ນ ຫໍພິພິດທະພັນຕ້ອງມີທັດສະນະໃຫມ່, ແລະຕ້ອງຈັດຕັ້ງການວາງສະແດງວັດຖຸພັນ ກໍ່ຄືການເຄື່ອນໄຫວຕ່າງໆຕາມທິດທັນສະໄຫມ. ທ່ານນາງ Le Thi Minh Ly ຫົວຫນ້າກົມມໍລະດົກ, ກະຊວງວັດທະນະທຳ, ກິລາ ແລະ ທ່ອງທ່ຽວ ໄດ້ໃຫ້ຂໍ້ສັງເກດວ່າ: ນີ້ແມ່ນທ່າອ່ຽງການເຄື່ອນໄຫວໃຫມ່ຂອງຫໍພິພິດທະພັນ:

“ຫລາຍຄົນຄິດວ່າວັດຖຸພັນທີ່ວາງສະແດງຢູ່ຫໍພິພິດທະພັນຕ້ອງເກົ່າແກ່. ຂ້າພະເຈົ້າຢາກພິສູດໃຫ້ເຫັນວ່າ ຫໍພໍພິດທະພັນຊົນເຜົ່າວິທະຍາ ຫວຽດນາມ ໄດ້

ຮັບການສ້າງຂຶ້ນເມື່ອປີ 1997 ບໍ່ມີວັດຖຸພັນຈັກຢ່າງເທື່ອ ມີພຽງວັດຖຸພັນທຳມະດາໃນຊີວິດການເປັນຢູ່ເທົ່ານັ້ນ. ແຕ່ພວກເຮົາລ້ວນແຕ່ເຫັນໄດ້ວ່າ ຫໍພິພິດທະພັນຊົນເຜົ່າວິທະຍາແມ່ນຫໍພິພິດທະພັນທີ່ດູດດື່ມ ແມ່ນສະຖານທີ່ ຊຶ່ງຂະແຫນງທ່ອງທ່ຽວຫວຽດນາມ ຮັບຮູ້ວ່າແມ່ນສະຖານທີ່ຂາດບໍ່ໄດ້ໃນລາຍການຢ້ຽມຢາມນະຄອນຫລວງຮ່າໂນ້ຍ. ແລະ ຄະນະຜູ້ແທນຂັ້ນສູງປະເທດຕ່າງໆເມື່ອມາຮ່າໂນ້ຍ ລ້ວນແຕ່ມາຢ້ຽມຢາມຫໍພິພິດທະພັນຊົນເຜົ່າວິທະຍາ ຫວຽດນາມ. ບັນດານັກຄົ້ນຄ້ວາຊີ້ໃຫ້ເຫັນວ່າ ຄຸນຄ່າຢູ່ຫໍພິພິດທະພັນແມ່ນຊ້ອນແຝງໃນບັນດາວັດຖຸພັນທຳມະດາທີ່ວາງສະແດງໃນຫໍພິພິດທະພັນແຫ່ງນີ້.”

ລະບົບຫໍພິພິດທະພັນຢູ່ ຮ່າໂນ້ຍ ໃນວິວັດການກາຍເປັນຈຸດນັດພົບຂອງ Citytour - ảnh 2

ຫໍພິພິດທະພັນຊົນເຜົ່າວິທະຍາດ ຫວຽດນາມ
ພາບ:vctv.vn

ເປັນອັນວ່າ, ເພື່ອສາມາດດຶງດູດນັກທ່ອງທ່ຽວ Citytour ແນ່ນອນວ່າລະບົບຫໍພິພິດທະພັນຢູ່ ຮ່າໂນ້ຍ ຕ້ອງມີການປະຕິຮູບຢ່າງແຮງໃນການເຄື່ອນໄຫວວາງສະແດງ, ຈຳເປັນຕ້ອງມີບັນດາການເຄື່ອນໄຫວເພີ່ມເຕີມຫລືເຫດການທີ່ພົ້ນເດັ່ນເພື່ອດຶງດູດນັກທ່ອງທ່ຽວທີ່ສົນໃຈເຖິງວັດຖຸພັນ ພ້ອມທັງຊີ້ແຈງບັນດາຄຸນຄ່າວັດທະນະທຳທີ່ບໍ່ມີຮູບຮ່າງຂອງບັນດາວັດຖຸພັນທີ່ວາງສະແດງ. ນອກນັ້ນກໍ່ເອົາໃຈໃສ່ເຖິງການເຄື່ອນໄຫວບໍລິການເປັນຫລາຍຮູບຫລາຍແບບ, ເອົາໃຈໃສ່ເປັນພິເສດເຖິງການໂຄສະນາພາບພົດ ແລະ ເຄື່ອງໝາຍ, ຮັບຟັງຄວາມຄິດເຫັນແລະ ຄວາມຕ້ອງການຂອງບັນດາບໍລິສັດທ່ອງທ່ຽວຫລາຍກວ່າອີກເພື່ອປ່ຽນໃຫມ່ ແລະ ເພີ່ມຄວາມດູດດື່ມໃຫ້ແກ່ຫໍພິພິດທະພັນແຕ່ລະແຫ່ງ./.