(vovworld) - ຍາມໃດບັນດາສະຖານທີ່ທ່ອງທ່ຽວທີ່ມີຊື່ສຽງຢູ່ເຂດຕາເວັນອອກສຽງເຫນືອ ກໍດຶງດູດນັກທ່ອງທ່ຽວຜູ້ມັກໄປຄົ້ນຫາ. ໃນລາຍການທ່ອງທ່ຽວພາກນີ້ ພວກເຮົາຂໍແນະນຳທິວທັດທຳມະຊາດທີ່ສວຍງາມຂອງເຂດພູຜາປ່າໄມ້ທີ່ໃຫຍ່ໂຕມະໂຫຖານພ້ອມກັບເຂດປູຊະນີຍະສະຖານປະຫວັດສາດຫລາຍແຫ່ງ ແລະ ບັນດາຈຸດວັດທະນະທຳທີ່ມີຫລາຍຮູບຫລາຍແບບ, ເຂັ້ມຂົ້ນໄປດ້ວຍສີສັນຊົນເຜົ່າສ່ວນຫນ້ອຍຢູ່ເຂດຕາເວັນອອກສຽງເຫນືອ.
ຮູບພາບຢູ່ເຂດຕາເວັນອອກສຽງເຫນືອ ຫວຽດນາມ
ພາບ:internet
|
ບັນດາສະຖານທີ່ທ່ອງທ່ຽວເຊິ່ງນັກທ່ອງທ່ຽວນິຍົມກວ່າໝູ່ນັ້ນແມ່ນແຂວງ ຮ່າຢາງ, ຕວຽນກວາງ, ບັກກ້ານ, ກາວບັ່ງ… ເສັ້ນທາງຄົດໂຄ້ງລະອິດລະອ້ຽວແລະທຸລະກັນດານຢູ່ ເຂດຕາເວັນອອກສຽງເຫນືອໄດ້ເຮັດໃຫ້ນັກທ່ອງທ່ຽວມຮູ້ສຶກວ່າຕົນເອງພວມເຂົ້າຮ່ວມລາຍການພະຈົນໄພຍາກທີ່ຈະຫລົງລືມໄດ້. ບັນດາເສັ້ນທາງທີ່ຄົດລ້ຽວລະອິດລະອ້ຽວອ້ອມຮອບເນີນພູແມ່ນໜຶ່ງໃນບັນດາສາຍເຫດທີ່ດຶງດູດນັກທ່ອງທ່ຽວມາຢ້ຽມຢາມເຂດຕາເວັນອອກສຽງເຫນືອ. ນາງເຟືອງຖາວ, ພະນັກງານສັງກັດບໍລິສັດທ່ອງທ່ຽວສາກົນດວງດາວໃຫມ່ໃຫ້ຮູ້ວ່າ:
“ລາຍການທ່ອງທ່ຽວເຂດຕາເວັນອອກສຽງເຫນືອລວມມີຫລາຍແຂວງ, ສະນັ້ນ ນັກທ່ອງທ່ຽວຄວນຍາດເວລາຫລາຍມື້ເພື່ອໄປຄົ້ນຫາ. ເມື່ອເຂົ້າຮ່ວມບັນດາລາຍການທ່ອງທ່ຽວຢ້ຽມຢາມເຂດຕາເວັນອອກສຽງເຫນືອພາຍຫລັງບຸນປີໃຫມ່ ນັກທ່ອງທ່ຽວຈະໄດ້ຮັບຊົມດອກໄມ້ທຸກຊະນິດທີ່ເປັນເອກະລັກສະເພາະຂອງເຂດຄື: ດອກຄາຍ, ດອກບານ. ສິ່ງທີ່ສ້າງຄວາມປະທັບໃຈໃຫ້ແກ່ຜູ້ເຂົ້າຮ່ວມລາຍການທ່ອງທ່ຽວເຂດຕາເວັນອອກສຽງເຫນືອນັ້ນແມ່ນ ເຂດພູພຽງຫີນຮ່າຢາງ, ຢູ່ທີ່ນີ້ ມີດອກໄມ້ 2 ຊະນິດທີ່ສວຍງາມ ແລະ ເຄີຍເບັ່ງບານອອກດອກໃນເດືອນ 4. ນອກນັ້ນ ເຂດພູພຽງຫີນ ຍັງມີເຂດປູຊະນີຍະສະຖານປະຫວັດສາດຫລາຍແຫ່ງອີກ. ”
ສິ່ງທີ່ສ້າງຄວາມດູດດື່ມໃນລາຍການທ່ອງທ່ຽວເຂດຕາເວັນອອກສຽງເຫນືອ ນັ້ນແມ່ນ, ແຂວງ ຮ່າຢາງ ດ້ວຍບັນດາທັດສະນີຍະພາບຄື: ດົ່ງວັນ, ແມ່ວວາກ, ຫລູງກູ. ເມື່ອເວົ້າເຖິງຮ່າຢາງ ແມ່ນເວົ້າເຖິງ ເຂດພູພຽງຫີນດົ່ງວັນ. ໂດຍຕັ້ງຢູ່ 4 ເມືອງໃນແຂວງຮ່າຢາງຄື: ກວ໋ານບ້າ, ອຽນມີນ, ແມ່ວວາກ, ເຂດພູພຽງຫີນດົ່ງວັນ ໄດ້ຮັບການຮັບຮອງຈາກ UNESCO ແມ່ນສວນທໍລະນີສາດຂອງໂລກ ຊຶ່ງແມ່ນນາມມະຍົດຫນຶ່ງດຽວຢູ່ ຫວຽດນາມ ແລະ ແມ່ນແຫ່ງທີ 2 ຢູ່ເຂດອາຊີຕາເວັນອອກສຽງໃຕ້. ເສັ້ນທາງໄປເຖິງເຂດພູພຽງຫີນດົ່ງວັນແມ່ນງາມຫລາຍ. ຖ້າຫາກໄປຢ້ຽມຢາມໃນເດືອນ 10, ນັກທ່ອງທ່ຽວຈະໄດ້ຮັບຊົມດອກໄມ້ຫລາຍຊະນິດທີ່ພວມເບັ່ງບານດ້ວຍສີສັນຫລາກຫລາຍຢູ່ເຂດພູພຽງຫີນດົ່ງວັນ.
ນອກຈາກໄດ້ຮັບຊົມຄວາມງາມທີ່ໃຫຍ່ໂຕມະໂຫຖານຂອງພູຜາປ່າໄມ້ຢູ່ຮ່າຢາງແລ້ວ, ຖ້າຢາກເຂົ້າໃຈກ່ຽວກັບພື້ນຖານວັດທະນະທຳຂອງບັນດາເຜົ່າຢູ່ເຂດຕາເວັນອອກສຽງເຫນືອ, ເຊີນທ່ານແວ່ຢາມຕະຫລາດນັດດົ່ງວັນ, ຊຶ່ງແມ່ນສະຖານທີ່ລືຊືດ້ວຍເຄື່ອງຫັດຖະກຳທີ່ອຸດົມສົມບູນຫລາຍຮູບຫລາຍແບບ ແລະ ມີສີສັນຫລາກຫລາຍ. ຕະຫລາດນັດເຄີຍຈັດຂຶ້ນໃນວັນເສົາ ແລະ ວັນອາທິດຢູ່ໃຈກາງເທດສະບານດົ່ງວັນ. ສິ່ງທີ່ສ້າງຄວາມປະທັບໃຈທີ່ສຸດໃຫ້ແກ່ນັກທ່ອງທ່ຽວກໍຄືຜູ້ໄປຕະຫລາດ ນັ້ນແມ່ນ ອາຫານການກິນ ແລະ ເຫລົ້າ.
ບັນຍາກາດຟົດຟື້ນມ່ວນຊຶ່ນ ພ້ອມກັບລົດຊາດທີ່ແຊບນົວຂອງເຍື່ອງອາຫານຕ່າງໆໄດ້ສ້າງຄວາມດູດດື່ມນັກທ່ອງທ່ຽວ.
“ຂ້າພະເຈົ້າມັກໄປຕະຫລາດນີ້ຫລາຍ, ເພາະວ່າ ຕະຫລາດນັດນີ້ເຕັມໄປດ້ວຍສີສັນສະເພາະຂອງຊົນເຜົ່າ ແລະ ເຫັນວ່າ ທຸກຄົນຢູ່ທີ່ນີ້ລ້ວນແຕ່ມີຄວາມເບິກບານມ່ວນຊື່ນ. ຂ້າພະເຈົ້າຈະຊື້ໂສ້ງເສື້ອຂອງຊາວຊົນເຜົ່າ. ເມື່ອກັບເມືອອາເມລິກາ ຂ້າພະເຈົ້າຈະແນະນຳໃຫ້ໝູ່ເພື່ອນກ່ຽວກັບຕະຫລາດແຫ່ງນີ້.”
ຕະຫລາດນັດດົ່ງວັນ
ພາບ:internet
|
ຜູ້ນຳທ່ຽວໃຫ້ແກ່ຄະນະນັກທ່ອງທ່ຽວທີ່ມາຈາກ ອາເມລິກາ ກໍ່ມັກໄປຕະຫລາດນັດເຂດພູສູງນີ້ຫຼາຍ
“ຕະຫລາດນັດແຕ່ລະແຫ່ງລ້ວນແຕ່ມີຄວາມແຕກຕ່າງກັນ, ຕະຫລາດນັດຂອງຊາວເຜົ່າມົ້ງ, ຕະຫລາດນັດຂອງຊາວເຜົ່າໄຕ່, ຢ່າວ ກໍຂາຍເຄື່ອງຫລາຍຢ່າງ, ຂ້າພະເຈົ້າຊື້ໄດ້ຫລາຍ. ຢູ່ຕະຫລາດບັກຮ່າ ຊື້ໄດ້ເຫລົ້າ ສ່ວນຢູ່ຮ່າຢາງ ຊື້ໄດ້ໝວກປະຈຳເຜົ່າ.”
ມາຢ້ຽມຢາມແຂວງ ຮ່າຢາງ, ນັກທ່ອງທ່ຽວລ້ວນແຕ່ຢາກຂຶ້ນກີ່ວ ໝ໋າພີ່ແລ່ງ, ນີ້ແມ່ນກີ່ວມີຄວາມຍາວ 7 ກິໂລແມດ, ທາງໄປຄົດໂຄ້ງລະອິດລະອ້ຽວ. ອາດຈະເວົ້າໄດ້ວ່າ ບໍ່ມີບ່ອນໃດຢູ່ດິນແດນຫວຽດນາມ ພັດມີຄວາມງາມ ແລະ ໃຫຍ່ໂຕມະໂຫຖານຄືດັ່ງກີ່ວ ໝ໋າພີ່ແລ່ງ. ຖ້າສັງເກດທິດເຫນືອ ແລະ ທິດຕາເວັນອອກສຽງເຫນືອ, ນັກທ່ອງທ່ຽວຈະເຫັນພູຫີນນັບພັນຫນ່ວຍສະຫລັບຊັບຊ້ອນ ແລະ ຕິດກັນເຖິງຂອບຟ້າ, ສ່ວນຢູ່ແຄມທາງແມ່ນເຫວເລິກ, ຕອນໃຕ້ສຸດແມ່ນແມ່ນ້ຳຍໍເກວ. ນອກຈາກບັນດາສະຖານທີ່ທ່ອງທ່ຽວໃນລາຍການທ່ອງທ່ຽວໃນເວລາ 5 ວັນ 4 ຄືນແລ້ວ, ນັກທ່ອງທ່ຽວຍັງໄດ້ໄປຢ້ຽມຢາມບັນດາປູຊະນີຍະສະຖານອື່ນຫລາຍແຫ່ງອີກດ້ວຍ. ພາຍຫລັງເດີນທາງອອກຈາກ ຮ່າຢາງ, ບັນດາສະຖານທີ່ທ່ອງທ່ຽວຢູ່ ແຂວງ ບັກກ້ານ, ກາວບັ່ງ ຍັງລໍຖ້ານັກທ່ອງທ່ຽວມາຢ້ຽມຊົມ ແລະ ຄົ້ນຫາ. ໃນລາຍການທ່ອງທ່ຽວ ຫວຽດນາມ ສັບປະດາຈະມາເຖິງ ເຊີນທ່ານຄົ້ນຫາຄວາມງາມຂອງແຂວງ ກາວບັ່ງ ຜ່ານບົດຂຽນຂອງນັກຂ່າວ ລານແອງ.