ແຕ່ລະປີ, ພາຍລັງບຸນປີໃໝ່ປະຈຳຊາດ, ຊາວຫວຽດນາມ ມັກສະຫງວນເວລາໄປນະມັດສະການເຂດດິນແດນພະພຸດທະເຈົ້າ, ເຂົ້າຮ່ວມງານບຸນຕ່າງໆເພື່ອພາວະນາຂໍໃຫ້ປີໃໝ່ມີຄວາມໂຊກດີ ແລະ ປະສົບຜົນສຳເລັດ. ເພື່ອຕອບສະໜອງຄວາມຕ້ອງການຂອງປະຊາຊົນ, ບໍລິສັດຕ່າງໆໄດ້ຈັດບັນດາລາຍການທ່ອງທ່ຽວໄປນະມັດສະການ, ງານບຸນທີ່ດູດດື່ມໃຈ. ໃນລາຍການທ່ອງທ່ຽວຫວຽດນາມ ພາກນີ້, ເຊີນທ່ານເຂົ້າຮ່ວມບັນດາງານບຸນໃຫ່ຍຂອງຫວຽດນາມ ຜ່ານບົດຂຽນຂອງນັກຂ່າວລານແອງ.
ງານບຸນວັດເຮືອງ
(ພາບ:ອິນເຕີແນັດ)
ຕາມການສະຖິຕິຂອງບັນດານັກຄົ້ນຄ້ວາວັດທະນະທຳພື້ນເມືອງແລ້ວ, ຫວຽດນາມ ມີກ່ວາ 500 ງານບຸນພື້ນເມືອງໃຫ່ຍນ້ອຍໃນທົ່ວປະເທດເຊິ່ງຖືກຈັດຂຶ້ນໃນຕະຫຼອດ 4 ລະດູຄື: ລະດູບານໃໝ່, ລະດູແລ້ງ, ລະດູໃບໄມ້ຫຼົ່ນ ແລະ ລະດູໜາວ, ແຕ່ງານບຸນສ່ວນຫຼາຍຖືກຈັດຂຶ້ນໃນລະດູບານໃໝ່. ຄວາມອຸດົມສົມບູນຂອງງານບຸນຢູ່ຫວຽດນາມ ນັ້ນແມ່ນຄວາມງາມດ້ານວັດທະນະທຳຂອງຊາດ, ແລະຜະລິດຕະພັນທ່ອງທ່ຽວທີ່ດຶງດູດແຂກທ່ອງທ່ຽວທັງພາຍໃນ ແລະ ຕ່າງປະເທດ. ເອື້ອຍທູເຮືອງ, ບໍລິສັດທ່ອງທ່ຽວສາກົນແຄງຊິງ ໃຫ້ຮູ້ວ່າ:
“ພາຍຫຼັງບຸນເຕັດ, ຊາວຫວຽດນາມ ມີປະເພນີໄປນະມັດສະການວັດວາອາຮາມເພື່ອຂໍໂຊກຂໍລາບ, ສະນັ້ນ, ພວກຂ້າພະເຈົ້າໄດ້ຈັດບັນດາລາຍການທ່ອງທ່ຽວໄປອຽນຕື໋, ບາຍດິງ, ຮວາລື, ວິຫານຮຸ່ງ, ວັດເຮືອງ. ຂ້າພະເຈົ້າເຫັນວ່າແຂກທ່ອງທ່ຽວສາກົນເຂົ້າຮ່ວມລາຍການທ່ອງທ່ຽວວັດເຮືອງ, ບາຍດິງ, ອຽນຕື…ເປັນຈຳນວນຫຼາຍ“
ແຂກທ່ອງທ່ຽວໄປງານບຸນອຽນຕື໋
(ພາບ:ອິນເຕີແນັດ)
ໃນມື້ທຳອິດທີ່ກັບຄືນສູ່ການເຮັດວຽກພາຍຫລັງຕ້ອນຮັບບຸນເຕັດ, ບໍລິສັດທ່ອງທ່ຽວສາກົນແຄງຊິງ ໄດ້ຮັບໃບສັ່ງຈອງຫຼາຍໃບຈາກບັນດາອົງການ, ຫົວໜ່ວຍ ເພື່ອໃຫ້ພະນັກງານພາລະກອນໄປທ່ອງທຽວບັນດາສະຖານທີ່ຄື: ວັດເຮືອງ, ອຽນຕື໋, ວິຫານເຈີ່ນ, ວັດບາຍດິງ, ວິຫານຮຸ່ງ, ໂກນເຊີນກຽບບາກ…. ບັນດາລາຍການທ່ອງທ່ຽວລະດູບານໃໝ່ເຄີຍຈັດຂຶ້ນໃນໄລຍະສັ້ນແຕ່ 1-2 ວັນ, ແຂກມັກໄປທ່ອງທ່ຽວຫຼາຍໃນມື້ທ້າຍສັບປະດາ. ເອື້ອຍທູເຮືອງ ເວົ້າວ່າ:
“ໃນລາຍການທ່ອງທ່ຽວງານບຸນ, ທຸກຄົນຢາກໄປຈູດທູບທຽນຖະຫວາຍບູຊາພະພຸດທະເຈົ້າແລ້ວກັບຄືນເມືອ, ດ້ວຍໄລຍະທາງຫ່າງຈາກຮ່າໂນ້ຍ ປະມານ 150 ກມ, ໄປກັບໃນມື້ໜຶ່ງແມ່ນພໍດີ. ດັ່ງນັ້ນແຂກຕ່າງປະເທດໄປທ່ອງທ່ຽວງານບຸນຫຼາຍທີ່ສຸດ, ເຂົາເຈົ້າຢາກຊອກຮູ້ວັດທະນະທຳ, ຮິດຄອງປະເພນີຂອງຊາວຫວຽດນາມ“
ດ້ວຍຫົວຂໍ້ “ຄວາມງາມດ້ານວັດທະນະທຳພື້ນເມືອງຫວຽດນາມ“. ງານບຸນທ່ອງທ່ຽວວັດເຮືອງປີ 2013 ແມ່ນໜຶ່ງໃນບັນດາເຫດການວັດທະນະທຳເປີດສາກໃຫ້ແກ່ປີທ່ອງທ່ຽວແຫ່ງຊາດເຂດທົ່ງພຽງແມ່ນ້ຳແດງ-ຫາຍຟອງ. ເມື່ອໄປນະມັດສະການວັດເຮືອງ, ແຂກທ່ອງທ່ຽວສາມາດເຈືອຈານເຂົ້າກັບທິວທັດທຳມະຊາດທີ່ສວຍງາມຂອງພູຜາປ່າໄມ້, ຫ້ວຍນ້ຳລຳເຊທີ່ກ້ວາງໃຫຍ່ ແລະ ສວຍງາມ ພ້ອມກັບເຂດທົ່ງນາທີ່ຂຽວສົດງົດງາມ. ພະອາຈານໃຫ່ຍ ທິກມິງຮ່ຽນ ເຈົ້າອະທິການວັດເຮືອງ ໃຫ້ຮູ້ວ່າ:
“ວັນທີ 6 ເດືອນຈຽງແມ່ນວັນເລີ່ມຕົ້ນງານບຸນວັດເຮືອງ ແລະ ງານບຸນຈະແກ່ຍາວໃນໄລຍະເວລາ 3 ເດືອນ. ໃນປີຜ່ານມາ, ຈຳນວນແຂກໄປທ່ອງທ່ຽວ, ນະມັດສະການວັດໄດ້ຂື້ນເຖິງ 1,5 ລ້ານຄົນ. ຖ້າທຸກຄົນມີເງື່ອນໄຂຄວນໄປວັດຫຼາຍເທື່ອເພື່ອມີຄວາມຮູ້ກ່ຽວກັບຄວາມງາມຂອງບ້ານເກີດເມືອງນອນ ແລະ ອ່ວາຍເມືອຫາເຂດດິນແດນແຫ່ງພະພຸດທະເຈົ້າ.
ໃນເວລາ 20 ໂມງຂອງວັນທີ 9 ເດືອນຈຽງ, ສຽງກອງໄຂງານບຸນອຽນຕື໋ ໄດ້ດັງກອ້ງກັງວານ. ນອກຈາກບັນດາພິທີຖືກດຳເນີນໄປໃນງານບຸນຢ່າງສົມກຽດ, ຍັງມີບັນດາການເຄື່ອນໄຫວສິລະປະວັດທະນະທຳ, ການຟ້ອນສິງໂຕ, ສະແດງມວຍພື້ນເມືອງ ແລະ ບັນດາການເຄື່ອນໄຫວລະຫຼິ້ນອື່ນໆອີກດ້ວຍ. ພະອາຈານໃຫ່ຍ ທິກແທງກວຽດ ໃຫ້ຮູ້ວ່າ: ປີນີ້, ງານບຸນອຽນຕື໋ ມີຈຸດໃໝ່ອຽມຫຼາຍຢ່າງ:
“ຈຸດໃໝ່ອ່ຽມທີໜຶ່ງນັ້ນແມ່ນອຽນຕື໋ ໄດ້ຮັບໃບຢັ້ງຢືນແມ່ນເຂດປູສະນີຍະສະຖານພິເສດລະດັບຊາດ. ທີສອງແມ່ນອຽນຕື໋ ຫາກໍ່ຫຼໍ່ຮູບປັ້ນພະພຸດທະເຈົ້າ ເຈີນເຍີນຕົງ ດ້ວຍທອງທີ່ມີນ້ຳໜັກ 140 ໂຕນສຳເລັດແລ້ວ ແລະ ຕັ້ງໃນລະດັບສູງ 1000 ມ ເມື່ອທຽບກັບໜ້ານ້ຳທະເລ. ພາຍຫລັງຫຼໍ່ຮູບປັ້ນສຳເລັດໄດ້ພຽງ 2 ວັນ, ເຖິງວ່າບໍ່ທັນຮອດງານບຸນ, ແຕ່ຈຳນວນປະຊາຊົນມາຢ້ຽມຊົມກໍ່ຫຼາຍກວ່າທົບ 15 ເທົ່າເມື່ອເມື່ອທຽບກັບປີກ່ອນ“
ໂດຍຜ່ານການເວລາກ່ວາ 700 ປີ, ຜ່ານການຜັນແປຂອງປະຫວັດສາດ, ການກະທົບຈາກທຳມະຊາດ, ວັດວາອາຮາມຢູ່ອຽນຕື໋ ມີບາງແຫ່ງໄດ້ຖືກທຳລາຍ, ມີບາງແຫ່ງໄດ້ຮັບການບູລະນະປະຕິສັງຂອນ ແຕ່ຄຸນຄ່າດ້ານວັດທະນະທຳປະຫວັດສາດ, ແນວຄິດຂອງນິກາຍຈຸກເລີມ ຍັງຄົງຍືນຍົງຄົງຕົວຕະຫຼອດໄປ. ໃນງານບຸນລະດູບານໃໝ່ອຽນຕື໋, ແຂກທ່ອງທ່ຽວນັບໝື່ນໆຄົນທີ່ມາຈາກທຸກສາລະທິດໃນທົ່ວປະເທດ ໄດ້ພາກັນໄປເຂດພູຜາທີ່ສັກສິດແຫ່ງນີ້ ເໝືອນດັ່ງໄດ້ກັບຄືນສູ່ກົກເຄົ້າເຫງົ້າກໍ.