(vovworld)- ປີນີ້, ນັກທ່ອງທ່ຽວຫລາຍຄົນໄດ້ເລືອກເຟັ້ນໝູ່ເກາະ ກາດບ່າ ຢູ່ ນະຄອນ ຫາຍຟ່ອງ ເພື່ອທ່ອງທ່ຽວພະຈົນໄພ. ເຂົ້າຮ່ວມລາຍການທ່ອງທ່ຽວແບບນີ້, ນັກທ່ອງທ່ຽວມີໂອກາດພິຊິດພູຫີນ, ຍ່າງເຂົ້າປ່າສະຫງວນແຫ່ງຊາດ, ພາຍເຮືອ, ຂີ່ລົດຖີບຂື້ນພູ... ຜ່ານລາຍການທ່ອງທ່ຽວຄືແນວນີ້ ໄດ້ຊ່ວຍໃຫ້ນັກທ່ອງທ່ຽວຜ່ານຜ່າການທົດສອບແລະເຝິກຝົນຮ່າງກາຍ. ໃນລາຍການທ່ອງທ່ຽວພາກນີ້ ພວກເຮົາຢາກແນະນຳກ່ຽວກັບຮູບການທ່ອງທ່ຽວພະຈົນໄພຢູ່ໝູ່ເກາະ ກາດບ່າ.
ນັກທ່ອງທ່ຽວປິນພູຢູ່ ກາດບ່າ
ພາບ:internet
|
ໂດຍເຫັນໄດ້ທ່າອ່ຽງພັດທະນາຢ່າງວອ່ງໄວຂອງການທ່ອງທ່ຽວ ແລະ ເພື່ອຕອບສະຫນອງຄວາມຕ້ອງການຂອງນັກທ່ອງທ່ຽວ, ໃນຊຸມປີມໍ່ໆມານີ້ ຢູ່ ໝູ່ເກາະກາດບ່າ ໄດ້ປະກົດມີຫລາຍຮູບການທ່ອງທ່ຽວພະຈົນໄພຄື: ປິນພູ, ໂດດນ້ຳທະເລ, ດຳນ້ຳ, ພາຍເຮືອ Kaya, ຂີ່ລົດຈັກເທິງຫນ້ານ້ຳ, trekking ແລະ ຂີ່ລົດຖີບຂື້ນພູ. ໃນນັ້ນ ມີບາງຮູບການພະຈົນໄພແມ່ນມາຈາກຕ່າງປະເທດ. Ghe Xanh ແມ່ນຫນຶ່ງໃນຈຳນວນ 2 ບໍລິສັດທ່ອງທ່ຽວໃນປະຈຸບັນ ພວມຂຸດຄົ້ນຮູບການທ່ອງທ່ຽວພະຈົນໄພຢູ່ ໝູ່ເກາະກາດບ່າ. ທ່ານ ເລແມ້ງກຽນ, ຜູ້ອຳນວຍການບໍລິສັດທ່ອງທ່ຽວ Ghe Xanh ກາດບ່າ ໃຫ້ຮູ້ວ່າ:
“ຕາມທັດສະນະຂອງບໍລິສັດພວກຂ້າພະເຈົ້າແລ້ວ, ຮູບການທ່ອງທ່ຽວນີ້ແມ່ນຮູບການທີ່ໃຫມ່ອ່ຽມຢູ່ ຫວຽດນາມ. ທີ່ຈິງແລ້ວ, ບັນດາປະເທດຝ່າຍຕາເວັນຕົກ ໄດ້ພັດທະນາຮູບການທ່ອງທ່ຽວນີ້ມາແຕ່ດົນນານແລ້ວ, ສະນັ້ນ ພວກຂ້າພະເຈົ້າຈຶ່ງພັດທະນາບັນດາຜະລິດຕະພັນທີ່ຮັບໃຊ້ໃຫ້ແກ່ຄວາມຕ້ອງການຄົ້ນຫາແລະທ່ອງທ່ຽວຢູ່ໝູ່ເກາະ ກາດບ່າ, ອ່າວ ລານຮ້າ. ພວກຂ້າພະເຈົ້າຍັງຂະຫຍາຍລາຍການທ່ອງທ່ຽວຄົ້ນຫາ ແລະ ພະຈົນໄພດ້ວຍຮູບການໃຫມ່ຕື່ມອີກ ນັ້ນແມ່ນດຳນ້ຳ ແລະ ໄປຢ້ຽມຊົມບັນດາຖ້ຳ ຢູ່ ຮ້າລອງ.”
ປິນພູຢູ່ທະເລ ແມ່ນຮູບການທ່ອງທ່ຽວພວມໄດ້ຮັບຄວາມນິຍົມທີ່ສຸດຈາກນັກທ່ອງທ່ຽວ. ຢູ່ ກາດບ່າ ມີຫລາຍບ່ອນສາມາດຕອບສະຫນອງຮູບການທ່ອງທ່ຽວປິນພູ. ຕົວຢ່າງຄື ຢູ່ ເກາະ ຕຽນອົງ ຕັ້ງຢູ່ອ່າວ ລານຮ້າ ດ້ວຍເກາະແຫ່ງຫນຶ່ງທີ່ມີຖ້ຳນ້ອຍ ແລະ ສ່ວນຍັງເຫລືອແມ່ນຜາຫີນ ດ້ວຍຫີນນົມຜາ, ນີ້ແມ່ນບ່ອນປິນພູທີ່ດູດດື່ມ ແລະ ເໝາະສົມກັບນັກທ່ອງທ່ຽວຫລາຍຄົນ.
 |
ໝູ່ເກາະກາດບ່າ ແມ່ນຈຸດນັດພົບທີ່ເຕົ້າໂຮມທຸກເງື່ອນໄຂຢ່າງຄົບຖ້ວນເພື່ອສາມາດຂຸດຄົ້ນຮູບການທອ່ງທ່ຽວເປັນຫລາຍຮູບຫລາຍແບບ ແລະ ການທ່ອງທ່ຽວພະຈົນໄພແມ່ນຮູບການທ່ອງທ່ຽວທີ່ໄດ້ສ້າງຄວາມດຶງດູດໃຫ້ແກ່ນັກທ່ອງທ່ຽວມາຢ້ຽມຢາມກາດບ່າທັງ 4 ລະດູ. ການທ່ອງທ່ຽວພະຈົນໄພໄດ້ສ້າງກາລະໂອກາດເພື່ອໃຫ້ບັນດາບໍລິສັດທ່ອງທ່ຽວຂຸດຄົ້ນທັດສະນີຍະພາບທີ່ສວຍງາມຂອງກາດບ່າ ໃນຕະຫລອດປີ. ເພື່ອກະກຽມໃຫ້ປີທ່ອງທ່ຽວແຫ່ງຊາດເຂດທົ່ງພຽງແມ່ນ້ຳແດງ ຫາຍຟ່ອງ ປີ 2013, ການນຳນະຄອນ ຫາຍຟ່ອງ ກໍຄືເມືອງ ກາດບ່າ ໄດ້ຄົ້ນຄ້ວາກ່ຽວກັບການລົງທຶນ, ກໍ່ສ້າງພື້ນຖານໂຄງລ່າງຄື: ລະບົບຄົມມະນາຄົມ, ສາຍໄຟຟ້າ, ລະບົບໂຮງແຮມບັນລຸມາດຕະຖານສູງກໍຄືບຸລິມະສິດແກ່ການລົງທຶນສ້າງຜະລິດຕະພັນທ່ອງທ່ຽວທີ່ມີເຄື່ອງໝາຍທ່ອງທ່ຽວທີ່ເປັນເອກະລັກສະເພາະໃຫ້ແກ່ ກາດບ່າ. ແລະ ບ້ານ ລຽນມີນ, ຕາແສງ ເຈີນເຈົາ ເມືອງກາດຫາຍ ນະຄອນ ຫາຍຟ່ອງ ແມ່ນສະຖານທີ່ໄດ້ຮັບການເລືອກເຟັ້ນລົງທຶນກໍ່ສ້າງໃຫ້ກາຍເປັນຈຸດນັດພົບຂອງການທ່ອງທ່ຽວພະຈົນໄພ. ເພື່ອຮັບໃຊ້ການທ່ອງທ່ຽວ, ສ້າງລາຍຮັບໃຫ້ແກ່ປະຊາຊົນ, ຊາວ ບ້ານລຽນມີນ ໄດ້ສຸມໃສ່ດຳເນີນທຸລະກິດທ່ອງທ່ຽວພະຈົນໄພ. ແລະ ຈັດການບໍລິການໃຫ້ນັກທ່ອງທ່ຽວພັກຜ່ອນ ແລະ ຢູ່ໃນເຮືອນຂອງຊາວທ້ອງຖິ່ນ. ນີ້ແມ່ນຮູບການທີ່ນັກທ່ອງທ່ຽວເຄີຍເລືອກເຟັ້ນ. ເພາະວ່າ ຕາມຮູບການນີ້ ນັກທ່ອງທ່ຽວບໍ່ພຽງແຕ່ໄດ້ໄປຢ້ຽມຢາມບ້ານນາ, ຊອກຮູ້ຊີວິດທາງດ້ານວັດທະນະນຳຂອງປະຊາຊົນຢູ່ໝູ່ເກາະເທົ່ານັ້ນ ຫາກຍັງໄດ້ຮັບປະທານອາຫານພິເສດຂອງຊາວທ້ອງຖິ່ນອີກດ້ວຍ. ປ້າ ຟ້າມທິງາ ຢູ່ ຕາແສງ ລຽນມີນ ໃຫ້ຮູ້ວ່າ:
“ຄອບຄົວຂ້າພະເຈົ້າເຮັດບໍລິການທ່ອງທ່ຽວນັບແຕ່ປີ 2003, ໃນເວລານັ້ນຈຳນວນນັກທ່ອງທ່ຽວມາຢ້ຽມຢາມໝູ່ເກາະແຫ່ງນີ້ຍັງຫນ້ອຍ, ເຂົາເຈົ້າພຽງແຕ່ຊັ່ງເຂົ້າທ່ຽງເທົ່ານັ້ນ. ປະຈຸບັນ ນັກທ່ອງທ່ຽວຍັງສະເຫນີຈັດຕັ້ງພິທີລະນຶກວັນເກີດໃນຕອນຄ່ຳ, ຈັດການສຸມກອງໄຟຕັ້ງຄ້າຍສາມັກຄີ ແລະ ຮັບປະທານອາຫານຄ່ຳ ພວກ ຂ້າພະເຈົ້າຮັບໃຊ້ໝົດ.”
ແພລ້ຽງປູກສິນໃນນ້ຳ
ພາບ:internet
|
ໄປຢ້ຽມຢາມໝູ່ບ້ານປະມົງ, ຮັບປະທານອາຫານສິນທະເລຢູ່ບັນດາເຮືອນແພລ້ຽງປູກສິນໃນນ້ຳປະຈຸບັນ ແມ່ນຮູບການທ່ອງທ່ຽວທີ່ດຶງດູດຫລາຍຄົນເຂົ້າຮ່ວມກວ່າໝູ່. ແລະ ກໍແມ່ນຮູບການທ່ອງທ່ຽວຊຶ່ງເມືອງ ກາດຫາຍ ພວມສຸມໃສ່ຄົ້ນຄ້ວາເພື່ອວາງອອກບັນດາຮູບການເຮືອນແພ ດ້ວຍລາຍການທ່ອງທ່ຽວເປັນຊາວປະມົງມື້ຫນຶ່ງຢູ່ອ່າວລານຮ້າ. ນັກທ່ອງທ່ຽວມີຄວາມປະທັບໃຈທີ່ສຸດເມື່ອຕຶກມອງເອງຫລືປ່ອຍອາຫານໃຫ້ປາ. ວຽກງານນີ້ຄິດວ່າແມ່ນງ່າຍດາຍ, ແຕ່ເມື່ອປະຕິບັດນັກທ່ອງທ່ຽວຈຶ່ງຮູ້ສຶກໄດ້ຄວາມຫຍຸ້ງຍາກຂອງຊາວປະມົງຄືແນວໃດ.
ກາດບ່າ ບໍ່ພຽງແຕ່ແມ່ນສະຖານທີ່ລືຊື່ດ້ວຍເກາະນ້ອຍທີ່ສວຍງາມຫລາຍແຫ່ງ, ຫາດຊາຍທະເລຂາວສະອາດ ແລະ ຍາວຢຽດເທົ່ານັ້ນ ຫາກປະຈຸບັນ ມາຢ້ຽມຢາມເກາະແຫ່ງນີ້ ນັກທ່ອງທ່ຽວຍັງໄດ້ສູບອາກາດເຢັນສະບາຍ, ໄດ້ຢ້ຽມຊົມທິວທັດທຳມະຊາດສວຍງາມ, ໄດ້ພິຊິດຈອມພູກາງທະເລ, ຂີ່ລົດຖີບຕາມເສັ້ນທາງນ້ອຍໆ ແລະ ຄົດລ້ຽວຢູ່ອ້ອມພູ,ໄດ້ແອບຫັດກາຍດ້ວຍບັນດາຮູບການພະຈົນໄພອີກດ້ວຍ. ສະນັ້ນ ກາດບ່າ ແມ່ນສະຖານທີ່ນັບມື້ນັບດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ.