(vovworld) - ເພື່ອດຶງດູດນັກທ່ອງທ່ຽວມາຢ້ຽມຢາມນະຄອນຫລວງ ຮ່າໂນ້ຍ ເວົ້າສະເພາະ ແລະ ຫວຽດນາມ ເວົ້າລວມ, ບັນດາບໍລິສັດທ່ອງທ່ຽວຍາມໃດກໍ່ສ້າງລາຍການທ່ອງທ່ຽວສາຍໃຫມ່ ແລະ ມີຄວາມດູດດື່ມ. ເພາະສະນັ້ນ ພຽງໃນໄລຍະອັນສັ້ນໆເທົ່ານັ້ນ ນັກທ່ອງທ່ຽວສາກົນສາມາດເຂົ້າໃຈກ່ຽວກັບຮີດຄອງປະເພນີຂອງຊາວຫວຽດນາມ ກໍຄືແຖບຖິ່ນແຫ່ງຕ່າງໆຢູ່ ຫວຽດນາມ.
ນັກທ່ອງທ່ຽວເຄີຍເລືອກເຟັ້ນນະຄອນຫລວງຮ່າໂນ້ຍແມ່ນຈຸດນັດພົບທຳອິດໃນການເດີນທາງຄົ້ນຫາຫວຽດນາມ. ນັບແຕ່ຕົ້ນປີມາຮອດປະຈຸບັນ, ຈຳນວນນັກທ່ອງທ່ຽວມາຢ້ຽມຢາມຮ່າໂນ້ຍເພີ່ມຂຶ້ນຢ່າງແຮງ, ໃນ 6 ເດືອນຕົ້ນປີ 2012 ບັນລຸ 8,33 ລ້ານເທື່ອຄົນ, ເພີ່ມຂຶ້ນ 23% ເມື່ອທຽບໃສ່ໄລຍະດຽວກັນຂອງປີກາຍ. ໃນນັ້ນ ນັກທ່ອງທ່ຽວສາກົນບັນລຸ 1,03 ລ້ານເທື່ອຄົນ ເພີ່ມຂຶ້ນ 20%. ທ່ານ Mai Tien Dung ຮອງຫົວຫນ້າ ພະແນກວັດທະນະທຳ ກິລາ ແລະ ການທອ່ງທ່ຽວ ຮ່າໂນ້ຍ ຖືວ່າ: ແຫ່ຼ່ງຊັບພະຍາກອນທຳມະຊາດກໍຄືບັນດາຄຸນຄ່າປະຫວັດສາດຂອງຮ່າໂນ້ຍ ຍາມໃດກໍແມ່ນການດຶງດູດນັກທ່ອງທ່ຽວມາຢ້ຽມຢາມຮ່າໂນ້ຍເປັນຈຳນວນຫລວງຫລາຍ.
“ດ້ວຍປະຫວັດສາດນັບພັນປີ ຂອງນະຄອນຫລວງ ຮ່າໂນ້ຍ ມີສະຖານທີ່ທ່ອງທ່ຽວວັດທະນະທຳມະນຸດທີ່ອຸດົມສົມບູນ. ພາຍຫລັງເປີດກວ້າງເຂດປົກຄອງ ຍິ່ງມີສະຖານທີ່ທ່ອງທ່ຽວທຳມະຊາດຫລາຍແຫ່ງຕື່ມອີກຄື: ເຮືອງເຊີນ, ບາຫວີ່…ນັ້ນແມ່ນປັດໄຈທຳອິດເພື່ອໃຫ້ຂະແຫນງທ່ອງທ່ຽວຮ່າໂນ້ຍພັດທະນາ.”
ອ່າວຮ້າລອງ
ພາບ: internet
ມີຫຼາຍທາງເລືອກ ໃຫ້ແກ່ນັກທ່ອງທ່ຽວເມື່ອມາຢ້ຽມຢາມ ຮ່າໂນ້ຍ. ບັນດາບໍລິສັດທ່ອງທ່ຽວເຄີຍຖືເອົານະຄອນຫລວງ ຮ່າໂນ້ຍ ແລະ ຮ້າລອງ ເປັນສະຖານ ທີ່ທ່ອງທ່ຽວຕົ້ນຕໍ. ຈາກຮ່າໂນ້ຍ ນັກທ່ອງທ່ຽວສາມາດໄປຢ້ຽມຢາມ ຮ້າລອງຜ່ານຫລາຍເສັ້ນທາງ. ປີ 2012, ບໍລິສັດທ່ອງທ່ຽວວິໄສທັດ ຫວຽດນາມ ໄດ້ສ້າງລາຍການທ່ອງທ່ຽວຕ່າງໆເພື່ອຄົ້ນຫາສີສັນຫວຽດນາມ ເພື່ອໃຫ້ນັກທ່ອງທ່ຽວເລືອກເຟັ້ນ. ທ່ານ Le Quang Dao ຜູ້ອຳນວຍການບໍລິສັດທ່ອງທ່ຽວວິໄສທັດ ຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າເຄີຍຈັດລາຍການທ່ອງທ່ຽວໃນເວລາແຕ່ 1 -4 ວັນໃຫ້ແກ່ນັກທ່ອງທ່ຽວເລືອກເຟັ້ນ. ລາຍການທ່ອງທ່ຽວ 1 ວັນ, ນັກທ່ອງທ່ຽວອາດຈະໄປຄົ້ນຫາຫນອງ Song Da, ຢ້ຽມຢາມ ນ້ຳຕົກຕາດ Thac Bo, ຫໍພິພິດທະພັນວັດທະນະທຳຊົນເຜ່ົາເມື່ອງ. ລາຍການທ່ອງທ່ຽວໃນເວລາ 2 ວັນ, ນັກທ່ອງທ່ຽວຈະໄປຢ້ຽມຢາມ ເມືອງ ດົງຈ່ຽວ ແຂວງ ກວ໋າງນີງ, ຄົ້ນຫາການດຳລົງຊີວິດຂອງປະຊາຊົນຢູ່ທີ່ນີ້. ຫລັງຈາກນັ້ນ ນັກທ່ອງທ່ຽວໄປຢ້ຽມຢາມ ອ່າວຮ້າລອງ. ລາຍການທ່ອງທ່ຽວຕໍ່ໄປແມ່ນຄົ້ນຫາໝູ່ບ້ານຢູ່ທາງທິດຕາເວັນອອກສຽງເຫນືອຂອງນະຄອນ ຮ່າໂນ້ຍ ແລະ ໄປຢ້ຽມຢາມໝູ່ບ້ານເຄື່ອງປັ້ນດິນເຜົາ ຟູຫລ໋າງ - ຫາຍເຢືອງ.”
ມີຫລາຍວິທີໄປທ່ອງທ່ຽວ, ນັກທ່ອງທ່ຽວອາດຈະເລືອກເຟັ້ນການໄປທ່ອງທ່ຽວດ້ວຍລົດຈັກ ຫລື ລົດຖີບ ຈາກຮ່າໂນ້ຍໄປຢ້ຽມຢາມໝູ່ບ້ານບູຮານ ເດື່ອງເລີມ. ຢູ່ໝ່ບ້ານແຫ່ງນີ້ ພື້ນຖານວັດທະນະທຳທີ່ເປັນມູນເຊື້ອຂອງຊາວ ຫວຽດນາມ ຍັງຄົງໄດ້ຮັບການອະນຸລັກຮັກສາຄືດັ້ງເດີ່ມ. ລາຍການທ່ອງທ່ຽວເຖິງໝູ່ບ້ານເດ່ືອງເລີມພຽງເສຍເວລາໃນມື້ຫນຶ່ງເທົ່ານັ້ນ, ນັກທ່ອງທ່ຽວສາມາດຢ້ຽມຊົມໝູ່ບ້ານຜະລິດກະສິກຳຂອງເຂດທົ່ງພຽງແມ່ນ້ຳແດງທາງພາກເຫນືອຫວຽດນາມ ທີ່ມີອາຍຸນັບຮ້ອຍປີ. ນາງ Nguyen Thi Thu Hoai ຜູ້ ນຳ ທ່ຽວຂອງຄະນະຄຸ້ມຄອງ ໝູ່ບ້ານບູຮານ ເດື່ອງເລີມໃຫ້ຮູ້ວ່າ:
“ໂຄງສ້າງຂອງທັງໝົດຂອງໝູ່ບ້ານບູຮານ ເດື່ອງເລີມ ລ້ວນແຕ່ຄ້າຍຄືກັນ. ເຮືອນຫລັງໃຫຍ່ແມ່ນເຮືອນຂອງຜູ້ຮັ່ງມີ ຫລືອາດຍາເຈົ້າຂຸນມຸນນາຍ, ສ່ວນເຮືອນຫລັງນ້ອຍແມ່ນເຮືອນມຸງຫຍ້າ. ເຮືອນຫລັງໃຫຍ່ປະກອບມີ 5 ຫ້ອງໃຫຍ່, 2 ຫ້ອງນ້ອຍຢູ່ຕາມ 2 ຂ້າງ. ເຮືອນຂອງອຳໝາດ, ເສນາ ມີຈຸດທີ່ແຕກຕ່າງກັນ, ເຮືອນຂອງອຳໝາດ, ເຈົ້ານາຍມີຄຳຜ້າຫຍາແຂວນໃນເຮືອນ ສ່ວນເຮືອນຂອງ ເສນາ, ເຈົ້ານາຍ ສ່ວນຫລາຍແມ່ນປະດັບປະດາດ້ວຍຮູບຕົວມັງກອນ ຫລື ຮູບພາບໃນຍຸກສະໄຫມ.”
ໝູ່ບ້ານບູຮານ ເດື່ອງເລີມ
ພາບ:talkvietnam.com
ເຍື່ອງອາຫານພິເສດຂອງໝູ່ບ້ານບູຮານເດື່ອງເລີມກໍມີຈຸດພິເສດສະເພາະ. ບັນດາເຍື່ອງອາຫານໂດຍແມ່ນຊາວບ້ານປຸງແຕ່ງເອງ. ນາງ Aiko ມາຈາກ ຍີ່ປຸ່ນ ເປັນຜູ້ນິຍົມບັນດາເຍື່ອງອາຫານຢູ່ທີ່ນີ້.
“ເມື່ອມາຢ້ຽມຢາມ ເດື່ອງເລີມໃນຄັ້ງທຳອິດ ຂ້າພະເຈົ້າເຫັນວ່າ ທິວທັດທຳມະຊາດຢູ່ທີ່ນີ້ສວຍງາມຫລາຍ ແຕ່ຊາວບ້ານບໍ່ທັນຮູ້ຈັກເຖິງວິທີນຳທ່ຽວ, ແຕ່ປະຈຸບັນ ພາລະກອນຂອງຄະນະຄຸ້ມຄອງ ແລະ ປະຊາຊົນຢູ່ໝູ່ບ້ານເດື່ອງເລີມໄດ້ຮູ້ຈັກເຖິງການນຳທ່ຽວແລ້ວ. ເດື່ອງເລີມມີເຮືອນບູຮານຫລາຍຫຼັງ ໂດຍສະເພາະປະຊາຊົນຢູ່ທີ່ນີ້ມີຄວາມເຂົ້າໃຈແຈ້ງກ່ຽວກັບວັດທະນະທຳ, ຮີດຄອງປະເພນີຂອງໝູ່ບ້ານ ສະນັ້ນ ເຂົາເຈົ້າສາມາດແນະນຳຢ່າງລະອຽດໃຫ້ນັກທ່ອງທ່ຽວໄດ້ຮັບຊາບ. ຂ້າພະເຈົ້າຮູ້ສຶກປະທັບໃຈທີ່ສຸດແມ່ນບັນດາເຍື່ອງອາຫານຢູ່ເດື່ອງເລີມ, ຊາວບ້ານເດື່ອງເລີມແຕ່ງກິນແຊບຫລາຍ ແລະ ເຂົ້າຫນົມປະເພດຕ່າງໆໂດຍຊາວບ້ານເດື່ອງເລີມຜະລິດກໍແຊບເຊັ່ນກັນ.”
ໝູ່ບ້ານເຄື່ອງປັ້ນດິນເຜົາຟູຫລາງ
ພາບ:vietbao.vn
ລານແອງ
ແລະກໍໃນເວລາມື້ຫນຶ່ງ, ນັກທ່ອງທ່ຽວຈາກຮ່າໂນ້ຍສາມາດໄປຢ້ຽມຢາມບັນດາໝູ່ບ້ານອາຊີບຢູ່ອ້ອມແອ້ມນະຄອນຮ່າໂນ້ຍຄື: ໝູ່ບ້ານສີຂັດມັນ ຮ້າທ໋າຍ ເມືອງເທື່ອງຕີນ; ໝູ່ບ້ານຜະລິດເຄື່ອງຈັດສານ ຟູວີງ ເມືອງເຈືອງໝີ; ໝູ່ບ້ານ ແກະສະຫລັກໄມ້ ທຽນອຶງ ເມືອງດົງແອງ, ໝູ່ບ້ານແພໄຫມ ຮ່າດົງ ເມືອງຮ່າດົງ. ແຕ່ລະລາຍການທ່ອງທ່ຽວນັ້ນ ນັກທ່ອງທ່ຽວມີຄວາມຮູ້ສຶກແຕກຕ່າງກັນ ແລະ ບ້ານນາຫວຽດນາມແຕ່ລະແຫ່ງນັ້ນ ລ້ວນແຕ່ນຳມາເຊິ່ງຄວາມງາມສະເພາະ ຊຶ່ງເຮັດໃຫ້ນັກທ່ອງທ່ຽວບໍ່ອາດຫລົງລືມໄດ້.
ລານແອງ