ອ່າວຍາຈາງ ແມ່ນຫນຶ່ງໃນຈຳນວນອ່າວ 29 ແຫ່ງ ທີ່ສວຍງາມຢູ່ໃນໂລກ ໂດຍທຳມະຊາດບັນດານໃຫ້ມີຄວາມສວຍສົດງົດງາມ ແລະ ອຸດົມສົບບູນ. ບັນດາຫາດຊາຍຂາວຍາວຢຽດ, ຫີນປະກາລັງສະຫລັບຊັບຊ້ອນກັນ, ມີສິນທະເລອັນລ້ຳຄ່າຫລາຍຊະນິດ ແລະ ພິເສດ ແມ່ນບັນດາເກາະນົກແອ່ນ. ໃນທ່າມກາງຄວາມກ້ວາງໃຫຍ່ໄພສານຂອງທະເລນັ້ນ,ເກາະນ້ອຍໃຫຍ່ຫຼາຍແຫ່ງໄດ້ໂຮມເຂົ້າກັນເປັນກຸ່ມ, ອັນໄດ້ສ້າງຄວາມງາມແບບຮົກເຮື້ອມະຫັດສະຈັນ, ນີ້ແມ່ນບ່ອນອາໃສຂອງນົກແອ່ນຊຶ່ງແມ່ນ ນົກທະເລທີ່ມີຄ່າຫາຍາກ.
ເກາະນົກແອ່ນ ບໍ່ແມ່ນຊື່ສະເພາະຂອງເກາະໃດຫນຶ່ງ ຫາກເກາະແຫ່ງໃດມີຮັງນົກແອ່ນ ກໍລ້ວນແຕ່ເອີ້ນວ່າ ເກາະນົກແອ່ນ. ໃນເກາະປະມານ 70 ແຫ່ງຢູ່ເຂດທະເລນີ້ ມີເຖິງ 12 ແຫ່ງນົກແອ່ນມາກໍ່ຮັງ. ແຕ່ເກາະຮ່ອນໂນ້ຍ ແລະ ຮ່ອນງວ໋າຍ ແມ່ນເກາະສອງແຫ່ງທີ່ນັກທ່ອງທ່ຽວມາຢ້ຽມຊົມຫລາຍກວ່າໝູ່. ເພື່ອໄປຄົ້ນຫາຊີວິດຂອງນົກແອ່ນ, ນັກທ່ອງທ່ຽວຄວນເດີນທະເລໃນໄລຍະແຕ່ເດືອນ 3 ເຖິງ ເດືອນ 9 ໃນປີ, ຊ່ວງເວລານັ້ນຄື້ນທະເລກໍສະຫງົບງຽບ. ນີ້ກໍແມ່ນໄລຍະນົກແອ່ນມາກໍ່ຮັງ. ເຖິງຢ່າງໃດກໍຕາມ, ເມື່ອເດີນທະເລໄປຍັງເກາະແຕ່ລະເທື່ອນັ້ນ, ບໍລິສັດທ່ອງທ່ຽວ ອຽນຊ່າວ(ຮັງນົກແອ່ນ) ແຂວງ ແຄນຮ່ວາ ພຽງແຕ່ຮັບນັກທ່ອງທ່ຽວ 60 ຄົນເທົ່ານັ້ນ ເພື່ອຫລີກລ້ຽງການສົ່ງຜົນສະທ້ອນບໍ່ດີເຖິງສະພາບແວດລ້ອມຊຶ່ງຝຸງນົກແອ່ນໄດ້ບິນມາອາໃສຢູ່ທີ່ນີ້ນັບຮ້ອຍປີມານີ້. ທ່ານ ເລຫືວຮ່ວາງ, ຜູ້ອຳນວຍການບໍລິສັດອຽນຊ່າວ ແຂວງ ແຄນຮ່ວາ ໃຫ້ຮູ້ວ່າ:
“ລາຍການທ່ອງທ່ຽວຢ້ຽມຊົມເກາະນົກແອ່ນ, ຢ້ຽມຊົມຖ້ຳນົກແອ່ນຢູ່ຮ່ອນໂນ້ຍ ແມ່ນລາຍການທ່ອງທ່ຽວທີ່ໄດ້ຮັບການຕີລາຄາວ່າ ແມ່ນລາຍການເປັນເອກະລັກສະເພາະທີ່ສຸດ ແລະ ແມ່ນລາຍການມີສິດຜູກຂາດຂອງບໍລິສັດ. ລາຍການທ່ອງທ່ຽວນີ້ ເອົາໃຈໃສ່ທີ່ສຸດເຖິງການຮັກສາທິວທັດທຳມະຊາດ, ສິ່ງແວດລ້ອມ ແລະ ສະເຫນີນັກທ່ອງທ່ຽວບໍ່ຄວນເຮັດຫຍັງທີ່ອາດຈະສົ່ງຜົນສະທ້ອນຫຼືທຳລາຍທິວທັດທຳມະຊາດຢູ່ເກາະແຫ່ງນີ້. ທີສອງແມ່ນ ເພື່ອຊ່ວຍໃຫ້ນັກທ່ອງທ່ຽວໄດ້ເຫັນປະຈັກຕາຮັງນົກແອ່ນ, ໃຫ້ເຂົາເຈົ້າເຂົ້າໃຈໄດ້ເຖິງວຽກງານຊອກຫາຮັງນົກແອ່ນຫຍຸ້ງຍາກລຳບາກຄືແນວໃດ, ແລ້ວເອົາ ກັບເມືອດິນຕໍ່ແຜ່ນໄດ້ກໍແມ່ນສິ່ງທີ່ລ້ຳຄ່າຄືແນວໃດ.“
ເວລາ 7 ໂມງ 30 ນາທີ, ຈາກທ່າກຳປັ່ນ ເກົາດ໋າ, ກຳປັ່ນຄວາມໄວສູງຕ້ອງໃຊ້ເວລາກວ່າ 1 ຊົ່ວໂມງ ເພື່ອຜ່ານ 13 ໄມທະວີບ ໄປທາງທິດຕາເວັນອອກຈຶ່ງຈະຮອດເກາະນົກແອ່ນ. ສະຖານທີ່ທຳອິດທີ່ນັກທ່ອງທ່ຽວໄປຢ້ຽມຊົມແມ່ນຖ້ຳ ຢູຮ້າ ຊຶ່ງແມ່ນບ່ອນທີ່ມີນົກແອ່ນພວມເຝົ້າຮັງ, ເພາະວ່າຢູ່ທີ່ນີ້ ຍັງເຫຼືອພຽງແຕ່ນົກແອ່ນມີຫນ້າທີ່ເຝົ້າຮັງ, ດູແລນົກນ້ອຍ ຍ້ອນວ່າ ນົກແອ່ນເຄີຍໄປຫາກິນນັບແຕ່ເຊົ້າ ຫ່າງຈາກນີ້ນັບ 20 ກິໂລແມດ.
ກຳປັ່ນສືບຕໍ່ເດີນຮອດຮ່ອນຊາມ ຊຶ່ງແມ່ນເກາະແຫ່ງຫນຶ່ງໃນກຸ່ມເກາະຮ່ອນໂນ້ຍ, ແມ່ນສະຖານທີ່ມີປະລິມານການຂຸດຄົ້ນຮັງນົກແອ່ນຫຼາຍອັນດັບທີສອງ ຖັດຈາກ ຮ່ອນງວ໋າຍ. ຄວາມປະທັບໃຈທີ່ສຸດສຳລັບນັກທ່ອງທ່ຽວ ນັ້ນແມ່ນນົກແອ່ນນັບພັນໂຕບິນເວີນໃນທ່າມກາງແສງແດດ. ບໍ່ເຫັນມີຢູ່ແຫ່ງໃດ ນົກແອ່ນມີຫລາຍຄືຢູ່ທີ່ນີ້. ເລື່ອງປົກປັກຮັກສາເກາະນົກແອ່ນ ແລະ ເຂດທະເລຢູ່ທີ່ນີ້, ຫ້າມຈັບຫານົກແອ່ນ, ໄດ້ຊ່ວຍໃຫ້ຝູງນົກແອ່ນມີອາຫານກິນ ແລະ ເຕີບໃຫຍ່ໄວ. ມາຢ້ຽມຊົມແຫ່ງນີ້ ນັກທ່ອງທ່ຽວຈະມີໂອກາດເຂົ້າໃນຖ້ຳ, ເຫັນປະຈັກຕາຮັງນົກແອ່ນ.
ພາຍຫລັງໄປຢ້ຽມຊົມຮັງນົກແອ່ນແລ້ວ, ນັກທ່ອງທ່ຽວຈະໄດ້ຂີ່ກຳປັ່ນພື້ນແກ້ວເພື່ອຮັບຊົມຫີນປະກາລັງທີ່ສວຍງາມດ້ວຍສີສັນຫລາກຫລາຍ ແລະ ມີຫຼາຍຮູບທີ່ແຕກຕ່າງກັນ.
ຮັງນົກແອ່ນ
ສຸດທ້າຍ ກຳປັ່ນກໍແວ່ຫາດຊາຍຮ່ອນໂນ້ຍ, ຫໍບູຊາຜູ້ກໍ່ຕັ້ງອາຊີບຂຸດຄົ້ນຮັງນົກແອ່ນ ຊຶ່ງໄດ້ຮັບການກໍ່ສ້າງກ່ອນນີ້ກວ່າ 10 ປີ ແລະ ກາຍເປັນສະຖານທີ່ພັກຜ່ອນຊົ່ວຄາວຂອງນັກທ່ອງທ່ຽວໃນການເດີນທາງ. ມາຢ້ຽມຊົມເກາະນົກແອ່ນ, ນັກທ່ອງທ່ຽວຄົນໃດກໍຢາກອາບນ້ຳທະເລ, ເພາະວ່າ ທະເລຢູ່ທີ່ນີ້ນ້ຳໃສສະອາດ ແລະ ອາກາດກໍເຢັນສະບາຍ. ນອກນັ້ນ ນັກທ່ອງທ່ຽວອາດຈະຂຶ້ນຂັ້ນໄດ 100 ຂັ້ນ, ປີນພູ ຢູຫ້າ ມີຄວາມສູງ 60 ແມດ ເພື່ອຈະຮູ້ສຶກເຖິງຄວາມເຢັນຂອງລົມພັດຈາກທະເລ ກໍຄືສາມາດມອງເຫັນໄດ້ທະເລທີ່ກວ້າງໃຫຍ່ໄພສານ. ທີ່ຮອ່ນໂນ້ຍ ພາຍຫລັງໄປຢ້ຽມຊົມທິວທັດທຳມະຊາດ, ອາບນ້ຳທະເລແລ້ວ, ນັກທ່ອງທ່ຽວຈະໄດ້ຮັບປະທ່ານອາຫານທ່ຽງດ້ວຍບັນດາເຍື່ອງອາຫານມີສິນທະເລ ແລະ ດື່ມນ້ຳຮັງນົກແອ່ນ. ອ້າຍແທ່ງ ນັກທ່ອງທ່ຽວມາຈາກນະຄອນ ໂຮ່ຈິມີນ ໃຫ້ຮູ້ວ່າ:
“ນີ້ແມ່ນຄັ້ງທີ 2 ຂ້າພະເຈົ້າເດີນທາງເຖິງ ຍາຈາງ ແລະ ເຫັນວ່າ ຍາຈາງ ນັບມື້ນັບມີຫລາຍລາຍການທ່ອງທ່ຽວທີ່ດູດດື່ມ. ສະເພາະລາຍການທ່ອງທ່ຽວໄປຢ້ຽມຊົມເກາະນົກແອ່ນເປັນສິ່ງທີ່ເປັນເອກະລັກສະເພາະ. ກ່ອນນີ້ພຽງແຕ່ໄດ້ເບິ່ງຜ່ານໂທລະພາບເທົ່ານັ້ນ ແຕ່ເມື່ອມາເຖິງເກາະແຫ່ງນີ້ ຈຶ່ງໄດ້ເຫັນປະຈັກຕານົກແອ່ນ, ຮັງນົກແອ່ນ ແລະ ວິທີຂຸດຄົ້ນຂອງປູຍາຕາຍາຍພວກເຮົາໃນເມື່ອກ່ອນຄືແນວໃດ. ນີ້ກໍເປັນຄັ້ງທຳອິດທີ່ ຂ້າພະເຈົ້າໄດ້ຊິມລົດຊາດຂອງຮັງນົກແອ່ນ. ຂ້າພະເຈົ້າມັກລາຍການທ່ອງທ່ຽວແບບນີ້ຫລາຍ.“
ເດີນທາງໄປຢ້ຽມຊົມເກາະນົກແອ່ນໃນເວລາມື້ຫນຶ່ງ, ນັກທ່ອງທ່ຽວມີຄວາມຮູ້ສຶກສະບາຍໃຈ ແລະ ປະທັບໃຈຫລາຍຕໍ່ທິວທັດທຳມະຊາດ ແລະ ເກາະພິເສດຢູ່ ຍາຈາງ ແຂວງ ແຄງຮ່ວາ./.
ຫວີງຟອງ