(vovworld) – ວັນທີ 22/4, ທີ່ກອງປະຊຸມຢູ່ ລຸກຊຳບວກ, ບັນດາລັດຖະມົນຕີການຕ່າງປະເທດສະຫະພາບເອີລົບ (ອີຢູ) ໄດ້ເຫັນດີນຍົກເລີກມາດຕະການຂວ້ຳບາດທາງດ້ານເສດຖະກິດ, ການຄ້າທັງໝົດສຳລັບມຽນມາກໍ່ຄືບັນດາມາດຕະການລົງໂທດສຳລັບສ່ວນບຸກຄົນຢູ່ມຽນມາ. ການກະທຳນີ້ໄດ້ຮັບຖືວ່າແມ່ນປັດໃຈທີ່ສຳຄັນ, ເປີດໜ້າໃໝ່ໃນການພົວພັນລະຫວ່າງອີຢູ ແລະ ມຽນມາ. ຕໍ່ໄປນີ້, ເຊີນທ່ານຮັບຟັງບົດຂຽນຂອງນັກຂ່າວ ຮົ່ງເວິນ ທີ່ມີຫົວຂໍ້ວ່າ ”ບາດລ້ຽວໃໝ່ໃນການພົວພັນລະຫວ່າງ ອີຢູ - ມຽນມາ”.
ທ່ານນາງ Catherine Ashton ຜູ້ຮັບຜິດຊອບນະໂຍບາຍພົວພັນກັບຕ່າງປະເທດຂອງອີຢູ
(ພາບ: ອິນເຕີແນດ)
ຂໍ້ຕົກລົງຍົກເລີກຄຳສັ່ງຂວ້ຳບາດມຽນມາ ຂອງອີຢູ ຖືກຍົກອອກມາ ພາຍຫຼັງ 1 ປີ ທີ່ອີຢູ ຕົກລົງຜ່ອນຄາຍບັນດາມາດຕະການລົງໂທດດ້ານເສດຖະກິດ, ການຄ້າ ແລະ ສ່ວນບຸກຄົນ ສ່ວນຫຼາຍສຳລັບມຽນມາ, ເວັ້ນເສຍແຕ່ ຄຳສັ່ງຂວ້ຳບາດອາວຸດເທົ່ານັ້ນ. ໂດຍລະອຽດແມ່ນ, ອີຢູ ຈະຍົດເລີກຄຳສັ່ງຂວ້ຳບາດສຳລັບ 800 ກວ່າບໍລິສັດທີ່ເຄື່ອນໄຫວໃນຂົງເຂດໄມ້, ຂຸດຄົ້ນແຮ່ທາດ; ອະນຸຍາດໃຫ້ລົງທຶນເຂົ້າ 50 ບໍລິສັດ ທີ່ມີການພົວພັນຢ່າງສະໜິດແໜ້ນກັບລັດຖະບານ; ຢຸດຕິການຈຳກັດເຂົ້າເມືອງ ແລະ ຄຳສັ່ງຫ້າມໄປມາບັນດາປະເທດອີຢູ ທີ່ພວມສົ່ງຜົນສະທ້ອນເຖິງຊາວມຽນມາ ເກືອບ 500 ຄົນ.
ສາຍເຫດທີ່ພາໃຫ້ບັນດາລັດຖະມົນຕີການຕ່າງປະເທດຂອງ 27 ປະເທດສະມາຊິກອີຢູ ເຫັນດີຍົກເລີກຄຳສັ່ງຂວ້ຳບາດມຽນມາ ນັ້ນແມ່ນຍ້ອນວິວັດການປະຕິຮູບຂອງປະເທດອາຊີຕາເວັນອອກສ່ຽງໃຕ້ນີ້ ພາຍຫຼັງການປະຕິຮູບຢ່າງເລິກເຊິ່ງກວ້າງຂວາງນັບທັງດ້ານການເມືອງ ແລະ ເສດຖະກິດ. ທ່ານນາງ Catherine Ashton ຜູ້ຮັບຜິດຊອບນະໂຍບາຍພົວພັນກັບຕ່າງປະເທດຂອງອີຢູ ໃຫ້ຮູ້ວ່າ, ຈຸດປະສົງຂອງກຸ່ມ ແມ່ນສະໜັບສະໜູນບັນດາຄວາມກ້າວໜ້າໃນການປະຕິຮູບຢູ່ປະເທດນີ້ ແລະ ແນ່ນອນວ່າການກະທຳນີ້ຈະເຮັດໃຫ້ລັດຖະບານມຽນມາ ເພິ່ງພໍໃຈ ແລະ ເປີດປະຕູໃຫ້ບັນດາວິສາຫະກິດຕ່າງປະເທດເຂົ້າມາເຄື່ອນໄຫວຢູ່ປະມຽນມາ.
ອາດເວົ້າໄດ້ວ່າ ເລື່ອງອີຢູ ຍົກເລີກຄຳສັ່ງຂວ້ຳບາດເກືອບທັງໝົດສຳລັບມຽນມາ, ດ້ານໜຶ່ງແມ່ນສະແດງໃຫ້ເຫັນບັນດາຄຳໝັ້ນສັນຍາຂອງອີຢູ ໃນການສະໜັບສະໜູນການປະຕິຮູບປະຊາທິປະໄຕ. ດ້ານອື່ນ ມັນກໍ່ຊ່ວຍໃຫ້ເອີລົບກ້າວເຂົ້າສູ່ຕະຫຼາດມຽນມາຢ່າງທັນການ, ພິເສດແມ່ນໃນສະຖານະການທີ່ຍີ່ປຸ່ນປະກາດຍົກເລີກໜີ້ສິນ 3,7 ຕື້ USD ເທື່ອລະກ້າວໃຫ້ມຽນມາ ແລະ ສືບຕໍ່ອຸປະຖຳໃຫ້ແກ່ການພັດທະນາຂອງປະເທດນີ້ ເພື່ອສະໜັບສະໜູນການປະຕິຮູບທາງດ້ານເສດຖະກິດຂອງມຽນມາ. ອົດສະຕາລີ ກໍ່ແຈ້ງວ່າຈະຍົກເລີກຄຳສັ່ງຂວ້ຳບາດສຳລັບປະທານາທິບໍດີມຽນມາ ພ້ອມກັບພົນລະເມືອງປະເທດນີ້ 200 ກວ່າຄົນ ເຊິ່ງພວມຖືກຂວ້ຳບາດດ້ານການເງິນ ແລະ ຫ້າມການໄປມາ. ກ່ອນໜ້ານັ້ນ, ອາເມລິກາ ໄດ້ປະກາດພວມຜ່ອນຄາຍບັນດາຂໍ້ຈຳກັດດ້ານການເງິນສຳລັບມຽນມາ ເທື່ອລະກ້າວ.
ການກະທຳໃໝ່ນີ້ຂອງອີຢູ ຈະອະນຸຍາດໃຫ້ບັນດາບໍລິສັດຂອງເອີລົບລົງທຶນເຂົ້າມຽນມາ, ເຊິ່ງແມ່ນປະເທດທີ່ຮັ່ງມີດ້ານຊັບພະຍາກອນທຳມະຊາດ, ໂດຍສະເພາະແມ່ນໃນການພັດທະນາອຸດສາຫະກຳຂຸດຄົ້ນແຮ່ທາດ, ເຊິ່ງແມ່ນຂົງເຂດທີ່ມີຄວາມສຳຄັນສຳລັບບັນດານັກລົງທຶນເອີລົບ. ຍິ່ງກວ່ານັ້ນ, ຫວ່າງແລ້ວນີ້, ມຽນມາ ຍັງຈັດການປະມູນສິດຂຸດຄົ້ນບໍ່ນ້ຳມັນ ແລະ ອາຍແກສ 30 ແຫ່ງຂອງປະເທດນີ້. ນອກນັ້ນ, ບັນດາຂົງເຂດອື່ນໆຄື ທະນາຄານ ແລະ ໂທລະຄົມຂອງມຽນມາ ກໍ່ໄດ້ສ້າງຄວາມດຶງດູດໃຫ້ບັນດາປະເທດເອີລົບອີກດ້ວຍ. ກ່ອນທີ່ບັນດາລັດຖະມົນຕີການຕ່າງປະເທດອີຢູ ມີຂໍ້ຕົກລົງນັ້ນ, ມີຫຼາຍບໍລິສັດຂອງເອີລົບໄດ້ສະແດງຄວາມປາຖະໜາຢາກລົງທຶນເຂົ້າມຽນມາ, ຕົວຢ່າງຄືບໍລິສັດເບຍ Carlsberg ຂອງແດນມາກ ໄດ້ປະກາດວ່າຈະລົງທຶນເຂົ້າມຽນມາ ພາຍຫຼັງທີ່ບັນດາຄຳສັ່ງຂວ້ຳບາດສາກົນຖືກຍົກເລີກ.
ຂໍ້ຕົກລົງຍົກເລີກຄຳສັ່ງຂວ້ຳບາດມຽນມາ ຂອງອີຢູ ກໍ່ໄດ້ຮັບການຕ້ອນຮັບຢ່າງສຸດອົກສຸດໃຈຈາກວົງການວິສາຫະກິດມຽນມາ. ທ່ານ Myint Soe ຮອງປະທານສະຫະພັນບັນດາຫ້ອງການການຄ້າ ແລະ ອຸດສາຫະກຳ, ປະທານສະມາຄົມບັນດານັກຜະລິດເຄື່ອງຕຳ່ແຜ່ນຕັດຫຍິບມຽນມາ ຖືວ່າ, ຂໍ້ຕົກລົງຂອງອີຢູ ຈະເປີດຕະຫຼາດສຳຄັນໃຫ້ແກ່ສິນຄ້າຂອງປະເທດນີ້.
ເຖິງຢ່າງໃດກໍ່ຕາມ, ສຳລັບອີຢູແລ້ວ, ເລື່ອງຍົກເລີກຄຳສັ່ງຂວ້ຳບາດສຳລັບມຽນມາ ພຽງແຕ່ແມ່ນບາດກ້າວທຳອິດຂອງກຸ່ມສຳລັບມຽນມາ ເທົ່ານັ້ນ, ເພາະວ່າປະຈຸບັນມຽນມາ ຍັງຂາດເງື່ອນໄຂຫຼາຍຢ່າງກ່ຽວກັບພື້ນຖານໂຄງລ່າງ, ພິເສດແມ່ນດ້ານນິຕິກຳ, ເພື່ອສ້າງຄວາມອູ່ນອ່ຽນໃຈໃຫ້ບັນດານັກລົງທຶນ. ລັກສະນະຈະແຈ້ງໃນການບໍລິຫານຢູ່ມຽນມາ ກໍ່ແມ່ນສິ່ງທີ່ພາໃຫ້ວົງການນັກລົງທຶນວິຕົກກັງວົນ ເມື່ອປະເທດນີ້ຖືກຈັດອັນດັບ 172/174 ປະເທດກ່ຽວກັບຄວາມຈະແຈ້ງ ແລະ ການສໍ້ລາດບັງຫຼວງ ກໍ່ຄືການໃຊ້ຄວາມຮຸນແຮງຍ້ອນການປະທະກັນລະຫວ່າງເຊື້ອຊາດຜີວພັນ ທີ່ພວມເກີດຂຶ້ນຢູ່ມຽນມາ.
ເຖິງວ່າຈຳເປັນຕ້ອງມີເວລາເພື່ອຢັ້ງຢືນກ່ຽວກັບການກະທົບຈາກຂໍ້ຕົກລົງຍົກເລີກຄຳສັ່ງຂວ້ຳບາດດ້ານເສດຖະກິດ, ການຄ້າຂອງອີຢູ ສຳລັບມຽນມາ ກໍ່ຕາມ, ແຕ່ຂໍ້ຕົກລົງນີ້ ໄດ້ເປັນການເປີດໜ້າໃໝ່ໃນການພົວພັນກັບມຽນມາ, ເປັນພື້ນຖານເພື່ອສ້າງການພົວພັນຄູ່ຮ່ວມມືຢ່າງໝັ້ນຄົງລະຫວ່າງອີຢູ ກັບມຽນມາ.