ພາບປະກອບ: danvan.vn

ນີ້ແມ່ນການເດີນທາງໄປປະຕິບັດງານຄັ້ງທຳອິດຂອງທ່ານປະທານປະເທດ ເລືອງເກືອງໃນຖານະຕຳແໜ່ງໃໝ່, ເຊິ່ງມີຄວາມໝາຍ ແລະ ຄວາມສຳຄັນພິເສດນັບທັງດ້ານສອງຝ່າຍ ແລະ ຫຼາຍຝ່າຍ.

ເພີ່ມທະວີການຊຸກຍູ້ການພົວພັນກັບບັນດາປະເທດ ອາເມລິກາ ລາຕິນ

ສຳລັບຈີເລ, ນີ້ແມ່ນການຢ້ຽມຢາມຂອງທ່ານປະທານປະເທດ ຫວຽດນາມ ພາຍຫຼັງ 15 ປີ, ກົງກັບໂອກາດສະເຫຼີມສະຫຼອງ 55 ປີແຫ່ງວັນການພົບປະຄັ້ງປະຫວັດສາດລະຫວ່າງປະທານໂຮ່ຈີມິນ ແລະ ທ່ານອະດີດປະທານາທິບໍດີ Salvador Allende ເຊິ່ງແມ່ນເຫດການສ້າງພື້ນຖານໃຫ້ແກ່ເລື່ອງ ຈີເລກາຍເປັນປະເທດທຳອິດຢູ່ອາເມລິກາໃຕ້ ສ້າງການພົວພັນທາງການທູດກັບ ຫວຽດນາມ. ບົນພື້ນຖານນັ້ນ, ການພົວພັນລະຫວ່າງຫວຽດນາມ - ຈີເລ ໄດ້ ແລະ ພວມມີການພັດທະນາຢ່າງຕັ້ງໜ້າ, ເປັນຕົ້ນແມ່ນໃນຂົງເຂດການຄ້າ. ວົງເງິນການຄ້າສອງຝ່າຍໃນເວລາກ່ວາ 10 ປີຜ່ານມາໄດ້ເພີ່ມຂຶ້ນ 4 ເທົ່າ, ບັນລຸ 1,5 ຕື້ USD ໃນປີ 2023.

ປັດຈຸບັນ, ຈີເລແມ່ນໜຶ່ງໃນບັນດາຄູ່ຮ່ວມມືສຳຄັນແຖວໜ້າຂອງ ຫວຽດນາມ ຢູ່ພາກພື້ນ, ພ້ອມທັງ ແມ່ນປະເທດອາເມລິກາລາຕິນທຳອິດທີ່ ເຊັ່ນສັນຍາການຄ້າເສລີ ກັບ ຫວຽດນາມ (ປີ 2014). ຕາມນັ້ນແລ້ວ, ການຢ້ຽມຢາມຈະນຳພະລັງຊີວິດໃໝ່ ມາໃຫ້ການພົວພັນຫວຽດນາມ - ຈີເລ, ເປັນຕົ້ນແມ່ນໃນບັນດາຂົງເຂດເຊິ່ງສອງຝ່າຍຍັງມີຄວາມສາມາດບົ່ມຊ້ອນໃນການຮ່ວມມື.

ສຳລັບເປຣູ, ນີແມ່ນການຢ້ຽມຢາມຄັ້ງທຳອິດຂອງປະທານປະເທດ ຫວຽດນາມ. ໂດຍໄດ້ດຳເນີນກົງກັບໂອກາດສອງປະເທດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ (1994 - 2024), ການຢ້ຽມຢາມແມ່ນຂີດໝາຍປະຫວັດສາດ, ປະກອບສ່ວນປັບປຸງພື້ນຖານການພົວພັນດ້ານການເມືອງອັນດີງາມລະຫວ່າງສອງປະເທດ, ຍົກສູງປະສິດທິຜົນການຮ່ວມມືໃນບັນດາຂົງເຂດທີ່ມີຄວາມສາມາດບົ່ມຊ້ອນ ແລະ ມຸ່ງໄປເຖິງເລື່ອງນຳການພົວພັນຂຶ້ນສູ່ລະດັບສູງໃໝ່.

ປັດຈຸບັນ, ເປຣູແມ່ນປະເທດມີການລົງທຶນໂດຍກົງຈາກຫວຽດນາມ ຫຼາຍທີ່ສຸດຢູ່ພາກພື້ນ ອາເມລິກາລາຕິນ, ແມ່ນຄູ່ຮ່ວມມືທາງການຄ້າໃຫຍ່ອັນດັບທີ 6 ຂອງ ຫວຽດນາມ ຢູ່ພາກພື້ນ, ໃນຂະນະທີ່ ຫວຽດນາມ ແມ່ນຄູ່ຮ່ວມມືທາງການຄ້າໃຫຍ່ທີ່ສຸດຂອງ ເປຣູຢູ່ອາຊຽນ. ວົງເງິນການຄ້າສອງຝ່າຍໃນປີ 2023 ບັນລຸເກືອບ 500 ລ້ານ USD, ໃນ 7 ເດືອນຕົ້ນປີ 2024 ບັນລຸເກືອບ 300 ລ້ານ USD.

ສົ່ງສານກ່ຽວກັບສັງກາດບຸກບືນຕົວຂອງຫວຽດນາມ

        ພ້ອມກັນນັ້ນ, ເຂົ້າຮ່ວມສັບປະດາຂັ້ນສູງ APEC 2024 ຢູ່ ເປຣູ, ກໍ່ແມ່ນໂອກາດເພື່ອໃຫ້ທ່ານປະທານປະເທດ ເລືອງເກື່ອງ ພົບປະກັບບັນດາການນຳຂັ້ນສູງ APEC. ເລື່ອງທ່ານປະທານປະເທດ ເຂົ້າຮ່ວມເວທີປາໄສແມ່ນການສືບຕໍ່ຢືນຢັນການປະກອບສ່ວນຢ່າງຕັ້ງໜ້າ, ມີຄວາມຮັບຜິດຊອບຂອງ ຫວຽດນາມ ເຂົ້າໃນວຽກງານແກ້ໄຂບັນດາບັນຫາພາກພື້ນ ແລະ ທົ່ວໂລກ, ພິເສດແມ່ນຊຸກຍູ້ວິວັດທະນາການເຊື່ອມຕໍ່ເສດຖະກິດສາກົນ, ສ້າງກຳລັງໜູນໃໝ່ໃຫ້ແກ່ການເຕີບໂຕຢູ່ພາກພື້ນ.

        ຫົວຂໍ້ຂອງກອງປະຊຸມຂັ້ນສູງ APEC ປີ 2024 ແມ່ນ “ມອບສິດ - ກວມລວມ - ເຕີບໂຕ”, ດ້ວຍ 3 ບຸລິມະສິດ, ແມ່ນ: ການຄ້າ ແລະ ການລົງທຶນເພື່ອເຕີບໂຕແບບກວມລວມ ແລະ ເຊື່ອມຕໍ່; ປະດິດຄິດສ້າງ ແລະ ຫັນເປັນດີຈີຕອນເພື່ອເພີ່ມທະວີການຫັນໄປສູ່ເສດຖະກິດເປັນທາງການ ແລະ ເສດຖະກິດທົ່ວໂລກ; ການເຕີບໂຕແບບຍືນຍົງເພື່ອພັດທະນາດ້ວຍຄວາມເຂັ້ມແຂງຂອງຕົນເອງ. ບັນດາບຸລິມະສິດຂອງ APEC ແມ່ນສອດຄ່ອງກັບການກຳນົດທິດການພັດທະນາຂອງ ຫວຽດນາມ ໃນໄລຍະປະຈຸບັນ. ທີ່ກອງປະຊຸມ, ທ່ານປະທານປະເທດຈະສົ່ງສານກ່ຽວກັບຄວາມຄາດຫວັງບືນຕົວຂຶ້ນຂອງຊາດ ຫວຽດນາມ ໃນສັງກາດໃໝ່, ບັນດາການກຳນົດທິດໃຫຍ່ກ່ຽວກັບການພັດທະນາ, ການຕ່າງປະເທດ ແລະ ການເຊື່ອມໂຍງເຂົ້າກັບສາກົນຂອງ ຫວຽດນາມ.

        ການເຂົ້າຮ່ວມສັບປະດາຂັ້ນສູງ APEC ແລະ ຢ້ຽມຢາມ ສ.ຈີເລ ແລະ ສ.ເປຣູ ຢ່າງເປັນທາງການຂອງທ່ານປະທານປະເທດ ເລືອກເກື່ອງ ແມ່ນບາດກ້າວຜັນຂະຫຍາຍສຳຄັນຂອງແນວທາງການຕ່າງປະເທດທີ່ສະເໝີຕົ້ນສະເໝີປາຍຂອງ ຫວຽດນາມ, ສ້າງກຳລັງໜູນໃໝ່ເພື່ອນຳການພົວພັນຄູ່ຮ່ວມມືຮອບດ້ານ ຫວຽດນາມ - ຈີເລ ແລະ ການພົວພັນຮ່ວມມືຫຼາຍດ້ານ ຫວຽດນາມ - ເປຣູ ໃຫ້ກ້າວເຂົ້າໄລຍະພັດທະນາໃໝ່ທີ່ຂະຫຍັນຂັນເຄື່ອນ, ແທດຈິງ, ມີປະສິດທິຜົນ.