ໃນຍາມໜາວຢູ່ຮ່າໂນ້ຍ, ຖ້າຫາກໄດ້ນັ່ງກິນເຂົ້າໜົມໝາກແປບຖືກຈືນກອບ, ສຸກເຫຼືອງ ແລະ ໄດ້ຈ້ຳກັບນ້ຳຈ້ຳສົ້ມຫວານນັ້ນ, ແມ່ນຈະບໍ່ມີສິ່ງໃດທຽບເທົ່າໄດ້.
 |
ຮ້ານຂາຍ ເຂົ້າໜົມໝາກແປບຂອງນາງ ແອງ ແມ່ນເຮືອນນ້ອຍເກົ່າມີເນື້ອທີ່ປະມານ 15 ຕາແມດ, ຕັ້ງແຄມທາງ ແລະ ຢູ່ໃຕ້ຮົ່ມເຢັນຂອງຕົ້ນໄຮໃຫຍ່. ຍ້ອນເຫດນີ້ເອງ, ຮ້ານນີ້ກໍໃສ່ຊື່ຂອງຕົ້ນໄຮເລີຍ. ເນື້ອທີ່ເຄິ່ງໜຶ່ງຂອງຮ້ານແມ່ນໃຊ້ເປັນບ່ອນປຸງແຕ່ງເຂົ້າໜົມ, ສ່ວນເຄິ່ງໜຶ່ງທີ່ຍັງເຫຼືອກໍສາມາດຈັດວາງໂຕະຕັ່ງພຽງ 3 ຊຸດເພື່ອຮັບໃຊ້ແຂກມາກິນ ແລະ ເມື່ອແຂກມາຫຼາຍ ກໍນັ່ງຢູ່ທາງຍ່າງໜ້າຮ້ານຕື່ມອີກ. ເຂົ້າໜົມໝາກແປບໃຫຍ່ສ່ຳຝາມື, ໄສ້ເຮັດດ້ວຍຊີ້ນໝູ, ເສັ້ນລ້ອນ, ເຫັດຫອມ ແລະ ເຫັດສະນຸ່ນ. ເຂົ້າໜົມໝາກແປບຢູ່ຮ້ານນາງແອງ ແມ່ນແຕກຕ່າງກັບຮ້ານອື່ນໆ, ເພາະວັດຖຸດິບທຸກຢ່າງລ້ວນແຕ່ຂອງຮ້ານເຮັດເອງ, ຈາກຂອດຍາກກວ່າໝູ່ຄືເຮັດຊັ້ນນອກຂອງເຂົ້າໜົມເປັນຕົ້ນ. ນາງແອງໃຫ້ຮູ້ວ່າ : ສຳລັບ ຊັ້ນນອກຂອງເຂົ້າໜົມນັ້ນ, ຮ້ານຂອງນາງເຮັດໄດ້ຢ່າງງ່າຍດາຍ, ຄືໃຊ້ພຽງແປ້ງເຂົ້າຄັ້ນກັບນ້ຳ , ແລ້ວຮີດດ້ວຍເຄື່ອງຮີດ 2-3 ເທື່ອໃຫ້ບາງໆ, ກໍຈະໄດ້ຊັ້ນນອກຂອງເຂົ້າໜົມ. ນາງແອງ ເປີດເຜີຍວ່າ :
“ ຄອບຄົວຂ້າພະເຈົ້າເຮັດ ເຂົ້າໜົມໝາກແປບຂາຍມາຫຼາຍປີແລ້ວ. ສຳລັບອາຫານເຍືອງນີ້, ແມ່ນການສືບທອດອາຊີບຈາກປູ່ຍ່າ. ປະຈຸບັນ, ຂ້າພະເຈົ້າກໍເຮັດເຂົ້າໜົມຕື່ມອີກບາງຊະນິດ, ແຕ່ສ່ວນຫຼາຍຍັງຄົງແມ່ນ ເຂົ້າໜົມໝາກແປບ. ກ່ອນນີ້, ຊັ້ນນອກຂອງ ເຂົ້າໜົມໝາກແປບຖືກຮີດດ້ວຍມື, ປະຈຸບັນຫັນມາຮີດດ້ວຍເຄື່ອງຈັກ, ດັ່ງນັ້ນ, ຊັ້ນນອກຂອງເຂົ້າໜົມກໍບາງກວ່າ ແລະ ສາມາດປະຢັດເວລາໄດ້ ”
ນາງແອງ, ປີນີ້ມີອາຍຸກວ່າ 30 ປີແລ້ວ, ນາງໄດ້ສືບທອດອາຊີບຂາຍເຂົ້າໜົມໝາກແປບຈາກປູ່ຍ່າມາໄດ້ 10 ປີແລ້ວ. ນາງໃຫ້ຮູ້ວ່າ : ເຄັດລັບເພື່ອເຮັດໃຫ້ແຂກກິນດ້ວຍຄວາມແຊບນົວນັ້ນ, ແມ່ນຂັ້ນຕອນຈືນເຂົ້າໜົມ, ເມື່ອຈືນກໍຕ້ອງປ່ອຍເຂົ້າໜົມແຕ່ລະອັນລົງໝໍ້ຂາງມີນຳ້ມັນພືດພວມຮ້ອນ. ພຽງ 2-3 ນາທີເທົ່ານັ້ນ, ຕ້ອງເອົາເຫຼັກຄີບລີບຂຶ້ນຂຶ້ນເລີຍ, ຫາກບໍ່ຄວນຈືນໃຫ້ສຸກ. ຖ້າມີແຂກມາກິນ, ຈຶ່ງຈືນຕື່ມອີກເທື່ອໜຶ່ງໃຫ້ສຸກເຫຼືອງ ແລະ ກອບຮ້ອນ. ນອກຈາກປຸງແຕ່ງຊັ້ນນອກຂອງເຂົ້າໜົມແລ້ວ, ໄສ້ຂອງເຂົ້າໜົມກໍຖືກນາງແອງປຸງແຕ່ງດ້ວຍວັດຖຸດິບສົດເຊັ່ນ ຊີ້ນໝູດິບ, ເຫັດສະນຸ່ນ ແລະ ເຫັດຫອມຊະນິດພິເສດ. ນາງແອງ ເວົ້າວ່າ :
“ ສຳລັບໄສ້ຂອງເຂົ້າໜົມ, ຮ້ານຂອງຂ້າພະເຈົ້າບໍ່ຄົນວັດຖຸດິບທັງໝົດເຂົ້າກັນໃນພາບດຽວ. ພຽງແຕ່ຄົນເຫັດຫອມ, ເຫັດສະນຸ່ນ, ເສັ້ນລ້ອນໄວ້ກ່ອນ. ເມື່ອຫໍ່ເຂົ້າໜົມ, ກໍຍັດວັດຖຸດິບປະສົມໃສ່ກ່ອນ, ແລ້ວກໍເອົາຊີ້ນຍັດໃສ່ຕາມຫຼັງ. ຕ້ອງເຮັດເຊັ່ນນັ້ນ, ຈຶ່ງສາມາດຮັກສາຄວາມອ່ອນຂອງຊີ້ນ. ຢູ່ຮ້ານອື່ນໆ, ເຂົາເຈົ້າມັກເຮັດໄສ້ມີໄຂ່ນົກຕື່ມອີກ. ແຕ່ຮ້ານຂ້າພະເຈົ້າບໍ່ໃສ່ໄຂ່ຕື່ມເພາະວ່າ ໄສ້ເຂົ້າໜົມມີຫຼາຍຢ່າງແລ້ວ, ຖ້າຫາກໃສ່ໄຂ່ຕື່ມ, ຈະເຮັດໃຫ້ແຂກເບື່ອໄວ ”
ກໍຍ້ອນການເລືອກເຟັ້ນວັດຖຸດິບ ແລະ ປຸງແຕ່ງເຂົ້າໜົມຢ່າງລະອຽດເຊັ່ນນັ້ນ, ດັ່ງນັ້ນ ຮ້ານຂອງນາງແອງມີແຂກມາກິນເຕັມໃນທຸກເວລາ. ນາງແອງໃຫ້ຮູ້ວ່າ ເພື່ອຮັບໃຊ້ຄວາມນິຍົມບໍລິໂພກຂອງແຂກເປັນຢ່າງດີນັ້ນ, ມີບາງເວລາ, ຮ້ານຂອງນາງກໍຕ້ອງການຄົນຮັບໃຊ້ເຖິງ 10-20 ຄົນ.
“ ແຕ່ລະມື້, ຮ້ານຂ້າພະເຈົ້າຂາຍເຂົ້າໜົມນັບແຕ່ 9 ໂມງຕອນເຊົ້າຮອດ 22 ໂມງຄ່ຳ. ຍາມລະດູໜາວ, ແຂກມາກິນຫຼາຍກວ່າຍາມຮ້ອນ. ເພາະອາຫານເຍືອງນີ້ ແທດເໝາະກັບຍາມໜາວ ”
ເມື່ອໄດ້ຍິນແຂກສັ່ງເຂົ້າໜົມ, ນາງແອງໄດ້ໃຊ້ເຫລັກຄີບລີບເອົາເຂົ້າໜົມແຕ່ລະອັນຂຶ້ນ, ແລ້ວກໍຕັດເຂົ້າໜົມເປັນ 3 ຕ່ອນ, ວາງໃສ່ຈານ ພ້ອມກັບຜັກຫອມ ແລະ ນ້ຳຈ້ຳ 2 ຖ້ວຍ . ທ້າວທິ້ງ ພ້ອມກັບແຟນພວມນັ່ງລໍຖ້າກິນເຂົ້າໜົມໝາກແປບ. ທ້າວທິ້ງເວົ້າວ່າ : (ເທບ)
“ເຂົ້າໜົມໝາກແປບຢູ່ນີ້ແຊບຫຼາຍ, ບໍ່ມີຮ້ານໃດທຽບເທົ່າໄດ້. ຂ້າພະເຈົ້າມັກນ້ຳຈ້ຳຢູ່ນີ້ເພາະມີລົດຫອມພິເສດ. ມັນຫວານ ແລະ ສົ້ມພໍດີ. ຂ້າພະເຈົ້າເຫັນວ່າ ເຂົ້າໜົມຢູ່ຮ້ານນີ້ຂາຍຖືກ ເມື່ອທຽບກັບຮ້ານອື່ນໆ ”
----------------------------------
ທ່ານຜູ້ຟັງທີ່ເຄົາລົບ !
ເພື່ອປຸງແຕ່ງເຍື່ອງອາຫານເຂົ້າໜົມໝາກແປບ ໃຫ້ 6 ຄົນກິນ, ພວກເພື່ອນກະກຽມວັດຖຸດິບດັ່ງນີ້ :
- ແປ້ງເຂົ້າ: 0,2 kg.
- ຊີ້ນໝູບົດ : 0,3 kg
- ເສັ້ນລ້ອນ :0,1 kg ພ້ອມກັບເຫັດຫອມ, ເຫັດສະນຸ່ນ, ນ້ຳປາ, ໝາກພີກໄທ, ນ້ຳຕານ, ນ້ຳສົ້ມ, ໝາກເຜັດ, ຫົວຜັກທຽມ.
ທຳອິດແມ່ນຂັ້ນຕອນເຮັດຊັ້ນນອກຂອງເຂົ້າໜົມ : ພວກເພື່ອນຄັ້ນແປ້ງກັບນ້ຳບໍລິສຸດຈົນໜຽວ, ປະໄວ້ປະມານ 20 ນາທີ, ແລ້ວກໍຕັດເປັນຕອນນ້ອຍໆ ເພື່ອນຳໄປຮີດໃຫ້ບາງ. ທີ່ 2 ແມ່ນ ຂັ້ນຕອນເຮັດໃສ້ເຂົ້າໜົມ. ເອົາຊີ້ນໝູບົດ, ເສັ້ນລ້ອນ, ເຫັດຫອມ, ເຫັດສະນຸ່ນ (ຕ້ອງແຊນ້ຳ 5 ນາທີ ແລ້ວຊອ່ຍໃຫ້ບາງ ) , ນ້ຳປາ, ໝາກພີກໄທ, ເກືອ, ທັງໝົດຕ້ອງຄົນເຂົ້າກັນ. ແລ້ວເອົາວັດຖຸດິບປະສົມນີ້ ຍັດໃສ່ຊັ້ນນອກເຂົ້າໜົມ, ແລ້ວກໍນຳໄປຈືນໃຫ້ສຸກເຫຼືອງ. ສຸດທ້າຍພວກເພື່ອນແຕ່ງນ້ຳຈ້ຳ ດ້ວຍນ້ຳປາ, ນ້ຳສົ້ມ, ນ້ຳຕານ, ຫົວຜັກທຽມ ແລະ ໝາກເຜັດ.
ຫວັງວ່າພວກເພື່ອນຈະກິນແຊບ.