ພາບປະກອບ:tapchitaichinh.vn

EU ແມ່ນຕະຫລາດກວ້າງໃຫຍ່ ແລະດູດດື່ມ ລວມມີ 27 ປະເທດສະມາຊິກດ້ວຍ ພົນລະເມືອງປະມານ 500 ລ້ານຄົນ. GDP ກວມເອົາ 30% GDP ທົ່ວໂລກ ແລະ ກຳລັງຊື້ ຕໍ່ຫົວຄົນປະມານ 32.700 USD/ປີ. ຕາມທ່ານນາງ ຫງວຽນທິທູຈາງ, ອຳນວຍການ ສູນ WTO ແລະ ເຊື່ອມໂຍງ, VCCI ແລ້ວ, ດ້ວຍການກະກຽມທີ່ດີ ນັ້ນ, ບັນດາວິສາຫະກິດ ຫວຽດນາມ ໄດ້ມີຄວາມຮູ້ຄວາມເຂົ້າໃຈພໍສົມຄວນ, ສະນັ້ນ ເລື່ອງຍາດແຍ່ງບັນດາກາລະໂອກາດ ແລະ ແກ້ໄຂສິ່ງທ້າທາຍແມ່ນບໍ່ຢູ່ເຫນືອຄວາມອາດສາມາດ… ເຖິງຢ່າງໃດກໍຕາມ, ຕາມບັນດາຄຳໝັ້ນສັນຍາຂອງ EVFTA, ບັນດາປະເພດສິນຄ້າ ລ້ວນແຕ່ມີບັນດາຫລັກການແຕກຕ່າງກັນກ່ຽວກັບຮົ້ວກີດຂວາງດ້ານເຕັກນິກ, ຄຸນນະພາບ,  ຕົ້ນກຳເນີດ... ພ້ອມກັບບັນດາຂໍ້ກຳນົດໃນດ້ານການຄ້າ, ບັນດາມາດຕະການຫລັກອະນາໄມດ້ານສະບຽງອາຫານ ແລະ  ກວດກາໂລກລະບາດສັດສາວາສິ່ງ ຫລື ການຄວບຄຸມແຮງງານ, ສິ່ງແວດລ້ອມ, ຄຸນນະພາບຢ່າງເຄັ່ງຄັດຂອງ ສະຫະພາບເອີລົບ ສະນັ້ນ ຍາກທີ່ຈະປະຕິບັດຕາມໄດ້.

ທ່ານນາງ ຈາງ ໃຫ້ຮູ້ວ່າ: ຜ່ານການສຳຜັດ, ແລກປ່ຽນກັບບາງວິສາຫະກິດ, ບັນດາຂະແຫນງສົ່ງອອກຜະລິດຕະພັນກະເສດ, ໝາກໄມ້... ພວມມີທ່າໄດ້ປຽບ ແລະ ກາລະໂອກາດເພື່ອເປີດກວ້າງຕະຫລາດໄປຍັງບັນດາປະເທດ ອີຢູ ຍ້ອນມີສັນຍາ EVFTA. ຖ້າຫາກຕະຫລາດອາເມລິກາ, ອົດສະຕາລີ ມີວິທີການຄຸ້ມຄອງຜະລິດຕະພັນກະເສດ ນຳເຂົ້າຕາມຫນັງສືອະນຸຍາດ, ເງື່ອນໄຂ ໃຫ້ແກ່ແຕ່ລະປະເພດໝາກໄມ້  ເຊິ່ງຮຽກຮ້ອງຕ້ອງເສຍເວລາຫລາຍ ແລະ ຈຳເປັນຕ້ອງມີການເຂົ້າຮ່ວມຂອງທຸກກະຊວງ,ຂະແຫນງການນັ້ນ, ອີຢູ ກໍ່ຕ້ອງວາງອອກ ແລະ ເປີດເຜີຍບັນດາເງື່ອນໄຂ, ມາດຖານ... ສຳລັບຜະລິດຕະພັນກະເສດທັງໝົດ.

ຕາມ ສັນຍາ EVFTA ແລ້ວ, ບາງໝວດສິນຄ້າ ຈະໄດ້ຮັບການເປີດກວ້າງ ດ້ວຍວິທີຫລຸດຜ່ອນອັັດຕາພາສີ ຄື: ສິນໃນນ້ຳ, ເຂົ້າສານ, ຜະລິດຕະພັນກະເສດ, ລ້ຽງສັດ ຫລື ເຄື່ອງປ່າຂອງດົງ. ຕາມນັ້ນແລ້ວ ເມື່ອສັນຍາ EVFTA ມີຜົນສັກສິດແມ່ນຈະຍົກເລິກ 50% ປະເພດພາສີສຳລັບບາງປະເພດສິນໃນນ້ຳ, 50% ປະເພດພາສີ ຍັງເຫລືອ ຈະຫລຸດຜ່ອນແຕ່ 3 – 7 ປີ ຫລັງຈາກນັ້ນ.ສະເພາະ ປາຫນັງ ຈະຫລຸດຜ່ອນອັດຕາພາສີຢູ່ໃນລະດັບ 6,8% ຄືໃນປະຈຸບັນ ລົງໃນລະດັບ 0% ໃນປີທີ 3. ສຳລັບບັນດາປະເພດສິນຄ້າ ຄື ໝາກໄມ້ ມີ 520/556 ປະເພດ ຈະຖືກຫລຸດລົງໃນລະດັບ 0% ແລະ 85,6% ປະເພດພາສີສຳລັບປະເພດໝາກໄມ້ປຸງແຕ່ງ ອັດຕາພາສີກໍ່ຫລຸດລົງຢູ່ໃນລະດັບ0%, 93%ປະເພດພາສີສຳລັບ ກາເຟ, ໝາກພິກໄທ ກໍ່ໃນລະດັບ 0%, ສະເພາະໝາກມ່ວງຫິມະພານຈະຊົມໃຊ້ອັດຕາພາສີ 0% ເມື່ອສັນຍາມີຜົນບັງຄັບໃຊ້. ສຳລັບການສົ່ງອອກເຂົ້າສານ ກໍ່ມີທ່າໄດ້ປຽບຫລາຍຢ່າງເມື່ອ ອີຢູ ສະຫງວນໂຄ້ຕາ ໃຫ້ຫວຽດນາມ 80.000 ໂຕນ/ປີ. ສະເພາະການລ້ຽງສັດ ຈະມີ 59,95% ປະເພດອັດຕາພາສີຫລຸດລົງຢູ່ໃນລະດັບ0%.

ທ່ານນາງ ຫງວຽນທິທູຈາງ ຢືນຢັນ:ເພື່ອສາມາດຍາດແຍ່ງບັນດາທ່າໄດ້ປຽບຂອງຂະແຫນງໃນການສົ່ງອອກຜະລິດຕະພັນກະເສດໄປຍັງບັນດາປະເທດ ອີຢູ ໄດ້ນັ້ນ, ບັນດາວິສາຫະກິດ ຫວຽດນາມ ຄວນປ່ຽນແປງຈີນຕະນາການດຳເນີນທຸລະກິດ, ເປັນເຈົ້າການສ້າງແຜນການດຳເນີນທຸລະກິດໃຫ້ແກ່ໄລຍະກາງ ແລະ ຍາວນານ. ຄຽງຄູ່ກັນນັ້ນ ກໍ່ຍົກສູງກຳລັງແກ້ງແຍ້ງຢ່າງບໍ່ຢຸດຢັ້ງ, ເປັນເຈົ້າການຊອກຫາກາລະໂອກາດການຮ່ວມມືກັບບັນດາຄູ່ຮ່ວມມືຕ່າງປະເທດເຂົ້າຮ່ວມລະບົບສະຫນອງທົ່ວໂລກ.