Festival ໝາກພ້າວ Ben Tre ຄັ້ງທີ 3 ປີ 2012

ວັນອັງຄານ ທີ 10 ເມສາ ຄ.ສ. 2012 | 10:20:48

ໝາກພ້າວຢູ່ Ben Tre
ພາບ:internet

(vovworld) - Festival ໝາກພ້າວ Ben Tre ຄັ້ງທີ 3 ປີ 2012 ພາຍໃຕ້ຫົວຂໍ້ວ່າ: “Ben Tre ບົນເສັ້ນທາງເຊື່ອມໂຍງ ແລະ ພັດທະນາ” ແມ່ນເຫດການພິເສດຊຶ່ງດຳເນີນແຕ່ວັນທີ 4 - 10/04/2012 ຢູ່ແຂວງ Ben Tre. Festival ໝາກພ້າວຄັ້ງນີ້ ບໍ່ພຽງແຕ່ແມ່ນວັນບຸນເພື່ອພົບປະແລກປ່ຽນ ແລະ ເຊີດຊູບັນດາຜູ້ປູກຕົ້ນໝາກພ້າວ, ເຊີດຊູບັນດາວິສາຫະກິດປຸງແຕ່ງໝາກພ້າວເທົ່ານັ້ນ ຫາກຍັງປະກອບສ່ວນເພີ່ມທະວີ, ໂຄສະນາພາບພົດເຂດປູກຕົ້ນໝາກພ້າວ ອີກດ້ວຍ ເພື່ອຈຸດໝາຍພັດທະນາເສດຖະກິດ, ການທ່ອງທ່ຽວຢູ່ ແຂວງ Ben Tre ຊຶ່ງແມ່ນເຂດດິນທີ່ຍັງມີຄວາມສາມາດບົ່ມຊ້ອນຫລາຍຢ່າງຄວນໄດ້ຮັບການຂຸດຂົ້ນ.

ເມື່ອເວົ້າເຖິງແຂວງ Ben Tre ທຸກຄົນລ້ວນແຕ່ຄິດເຖິງຕົ້ນໝາກພ້າວ ດ້ວຍສວຍໝາກພ້າວທີ່ຂຽວອຸມທຸ່ມຢູ່ເຂດແມ່ນ້ຳລຳເຊ. ແຕ່ດົນນານມາແລ້ວ ຕົ້ນໝາກພ້າວໄດ້ຕິດພັນກັບປະຊາຊົນຢູ່ທີ່ນີ້ ແລະ ກາຍເປັນສັນຍາລັກໃຫ້ແກ່ເຂດດິນແຫ່ງນີ້, Ben Tre ຍັງຖືກເອີ້ນວ່າແມ່ນເຂດປູກໝາກພ້າວ. ບັນດາໝາກໄມ້ ແລະ ຜະລິດຕະພັນທີ່ໄດ້ຮັບການປຸງແຕ່ງຈາກຕົ້ນໝາກພ້າວບໍ່ພຽງແຕ່ແມ່ນແຫລ່ງລາຍຮັບດ້ານເສດຖະກິດຕົ້ນຕໍຂອງຊາວ Ben Tre ເທົ່ານັ້ນ ຫາກແຕ່ດົນແລ້ວ ຮູບພາບຕົ້ນໝາກພ້າວຍັງສ້າງເປັນຈຸດວັດທະນະທຳສິລະປະທີ່ເປັນເອກະລັກສະເພາະ, ດຶງດູດນັກທ່ອງທ່ຽວມາຢ້ຽມຢາມເຂດສວນໝາກພ້າວນັບມື້ນັບຫລາຍອີກດ້ວຍ. ເຖິງຢ່າງໃດກໍຕາມ, ໃນໄລຍະມໍ່ໆມານີ້ ຍ້ອນມີການຜັນແປຂອງພື້ນຖານເສດຖະກິດການຕະຫລາດ, ລາຄາຕົ້ນໝາກພ້າວຖືກຫລຸດລົງ ໄດ້ສ້າງຄວາມວິຕົກກັງວົນຕໍ່ປະຊາຊົນຜູ້ປູກຕົ້ນໝາກພ້າວ, ເນື້ອທີ່ປູກຕົ້ນໝາກພ້າວຫລາຍເຮັດຕາກໍຖືກຮັດແຄບລົງ. ສະນັ້ນ ເລື່ອງຈັດຕັ້ງ Festival ໝາກພ້າວປີ 2012 ບໍ່ພຽງແຕ່ແມ່ນໂອກາດເຊີດຊູຜູ້ປູກຕົ້ນໝາກພ້າວ, ບັນດາວິສາຫະກິດຜະລິດບັນດາຜະລິດຕະພັນຈາກໝາກພ້າວເທົ່ານັ້ນ ຫາກຍັງປະກອບສ່ວນຍົກສູງທີ່ຕັ້ງຂອງຕົ້ນໝາກພ້າວໃນການພັດທະນາເສດຖະກິດຂອງແຂວງ Ben Tre ແລະ ບັນດາແຂວງປູກຕົ້ນໝາກພ້າວອີກດ້ວຍ. Festival ຍັງແມ່ນສະຖານທີ່ເພື່ອໃຫ້ບັນດານັກວິທະຍາສາດ, ນັກທຸລະກິດ, ຊາວກະສິກອນປູກຕົ້ນໝາກພ້າວພົບປະກັນເພື່ອຕີລາຄາ ໄຈ້ແຍກ, ສະຫລຸບບັນດາຄຸນຄ່າ ຂອງຕົ້ນໝາກພ້າວ ຢ່າງຮ້ອບດ້ານເພື່ອມີວິໄສທັດກ່ຽວກັບການວາງແຜນກຳນົດສັງລວມທີ່ມີຕໍ່ການປູກ, ຂຸດຄົ້ນ, ປຸງແຕ່ງ ລົງທຶນເທັກໂນໂລຊີ, ຫນູນຊ່ວຍນະໂຍບາຍໃຫ້ແກ່ຊາວກະສິກອນປູກຕົ້ນໝາກພ້າວ, ຈາກນັ້ນ ເສີມຂະຫຍາຍກຳລັງຄວາມສາມາດທ່າໄດ້ປຽບຂອງຕົ້ນໝາກພ້າວ ປະກອບສ່ວນເຂົ້າໃນພື້ນຖານເສດຖະກິດຂອງປະເທດຊາດ. ທ່ານ Nguyen Van Hieu ປະທານຄະນະກຳມະການປະຊາຊົນແຂວງ Ben Tre ໃຫ້ຮູ້ວ່າ:

“ປະຈຸບັນ, ແຂວງ Ben Tre ມີເນື້ອທີ່ປູກຕົ້ນໝາກພ້າວກວ່າ 53.000 ເຮັກຕາ ດ້ວຍປະລິມານການຜະລິດບັນລຸກວ່າ 400 ລ້ານຫນ່ວຍ/ປີ, ກວມ 35% ຍອດຜະລິດຕະພັນໝາກພ້າວຂອງທັງປະເທດ. ມູນຄ່າການຜະລິດຈາກໝາກພ້າວກວມກວ່າ 25% ຍອດມູນຄ່າການຜະລິດອຸດສາຫະກຳຂອງທົ່ວແຂວງ Ben Tre. ຜະລິດຕະພັນໝາກພ້າວຂອງແຂວງ Ben Tre ແລະ ບັນດາແຂວງປູກຕົ້ນໝາກພ້າວ ໄດ້ຮັບການສົ່ງອອກເຖິງ ກວ່າ 60 ປະເທດ ແລະ ເຂດແຄ້ວນຢູ່ໃນໂລກ. ມີຜະລິດຕະພັນນັບຮ້ອຍຢ່າງໄດ້ຮັບການປຸງແຕ່ງຈາກຕົ້ນໝາກພ້າວ, ກວມທີ່ຕັ້ງຫລັກແຫລ່ງໃນພາລະກິດແຫ່ງການພັດທະນາຂອງແຂວງ Ben Tre, ບໍ່ສະເພາະກ່ຽວກັບຂົງເຂດເສດຖະກິດ, ວັດທະນະທຳ, ການທ່ອງທ່ຽວເທົ່ານັ້ນ ຫາກຍັງປະກອບສ່ວນຢ່າງຕັ້ງຫນ້າເຂົ້າໃນວິວັດການຮັບມືກັບການປ່ຽນແປງຂອງດິນຟ້າອາກາດ, ປົກປັກຮັກສາສິ່ງແວດລ້ອມອີກດ້ວຍ.”

Festival ໝາກພ້າວ Ben Tre ຄັ້ງທີ 3 ປີ 2012 - ảnh 2

Festival ໝາກພ້າວ Ben Tre ປີ 2012
ພາບ: sggp.com.vn

ຢູ່ Festival ໝາກພ້າວ Ben Tre ປີ 2012 ໄດ້ດຳເນີນການເຄື່ອນໄຫວທີ່ຟົດຟື້ນຫລາຍຢ່າງ ຊື່ງລວມມີ: ບັນດາກອງປະຊຸມສຳມະນາ, ການແຂ່ງຂັນ, ງານບຸນອາຫານການກິນ, ງານຕະຫລາດນັດການຄ້າ, ສິລະປະການຊັບຊ້ອນທີ່ມີຫົວຂໍ້ວ່າ: “ເສັ້ນທາງໝາກພ້າວ”, ງານປະກວດນາງງາມທີ່ມີຫົວຂໍ້ວ່າ: “ນາງງາມຢູ່ເຂດໝາກພ້າວ” ແລະ ການເຄື່ອນໄຫວທ່ອງທ່ຽວທັດສະນີຍະພາບສວນໝາກພ້າວ, ຮາກຖານຜະລິດເຂົ້າໜົມຈາກໝາກພ້າວ. ໃນນັ້ນ ຈຸດໃຈກາງຂອງ Festival ແມ່ນງານວາງສະແດງບັນດາຜະລິດຕະພັນໝາກພ້າວ ແລະ ງານຕະຫລາດນັດການຄ້າ ຫວຽດນາມ ທີ່ມີຄຸນນະພາບສູງ ໂດຍມີການເຂົ້າຮ່ວມຂອງວິສາຫະກິດພາຍໃນ ແລະ ນອກແຂວງ ກວ່າ 200 ແຫ່ງ, ດ້ວຍຮ້ານວາງສະແດງ 500 ຮ້ານ. ຢູ່ Festival ຍັງດຳເນີນບັນດາລາຍການສະແດງສິລະປະຢູ່ທ້ອງຖະຫນົນ ດ້ວຍຮູບການສິລະປະພື້ນເມືອງຕ່າງໆຄື: ຟ້ອນສິງໂຕ, ສະແດງຊຸດອາພອນສະໄຫມເຮັດດ້ວຍຕົ້ນໝາກພ້າວ ແລະ ກອງສະແດງກ້ອງ, ເປົ່າແຄນ. ນະທີ່ນີ້ ກໍຈັດໃຫ້ມີບັນດາກອງປະຊຸມສຳມະນາພາຍໃຕ້ຫົວຂໍ້ວ່າ: ຍົກສູງຄຸນຄ່າຂອງຕົ້ນໝາກພ້າວ, ສະພາບຕົວຈິງ ແລະ ການກຳນົດທິດພັດທະນາຕົ້ນໝາກພ້າວ, ຄຸນຄ່າຂອງຕົ້ນໝາກພ້າວຢູ່ປະເທດປູກຕົ້ນໝາກພ້າວຈຳນວນຫນຶ່ງ. ພາຍຫລັງດຳເນີນມາເປັນເວລາ 2 ວັນ, Festival ໝາກພ້າວ Ben Tre ໄດ້ດຶງດູດນັກທ່ອງທ່ຽວ, ວິສາຫະກິດພາຍໃນ ແລະ ຕ່າງປະເທດເຂົ້າຢ້ຽມຊົມ, ຊອກຮູ້ເປັນຈຳນວນຫລວງຫລາຍ. ທ່ານ Phan Huynh ນັກທຸລະກິດມາຈາກ ນະຄອນ ໂຮ່ຈິມີນ ໃຫ້ຮູ້ວ່າ:

“ຂ້າພະເຈົ້າເຫັນວ່າ Festival ໝາກພ້າວປີນີ້ ໄດ້ຮັບການລົງທຶນຢ່າງລອບຄອບຖິ່ຖ້ວນ ແລະ ດ້ວຍການລົງທຶນຄືແນວນີ້ ຂ້າພະເຈົ້າຄິດວ່າ Festival ຈະບັນລຸໝາກຜົນທີ່ດີ. ຄວາມມຸ້ງມາດປາດຖະຫນາຂອງປະຊາຊົນ ແລະ ບັນດາອົງການຈັດຕັ້ງ Festival ແມ່ນເຮັດແນວໃດເພື່ອຍົກສູງຄຸນຄ່າຂອງຕົ້ນໝາກພ້າວໃຫ້ໄດ້.”

ພາຍຫລັງຈັດຕັ້ງມາເປັນເວລາ 2 ຄັ້ງ ພາຍໃຕ້ຫົວຂໍ້ທີ່ວ່າ: ງານບຸນໝາກພ້າວ Ben Tre, ສ່ວນ ໃນຄັ້ງນີ້ ຄະນະກຳມະການປະຊາຊົນແຂວງ Ben Tre ຕົກລົງຍົກລະດັບງານບຸນນັ້ນໃຫ້ກາຍເປັນ Festival ແລະ ພວມຍື່ນສະເຫນີຕໍ່ລັດຖະບານເພື່ອຍົກຂຶ້ນເປັນລະດັບຊາດໃນຄັ້ງຕໍ່ໄປ. ພ້ອມກັບການເພີ່ມທະວີບົດບາດຂອງສະຫະສະມາຄົມໝາກພ້າວ ຫວຽດນາມ, ບັນດາການເຄື່ອນໄຫວຢູ່ Festival ປະກອບສ່ວນເພີ່ມທະວີການຮ່ວມສຳພັນຮ່ວມມືລະຫວ່າງ ບັນດາອົງການ, ບັນດານັກວິທະຍາສາດຄົ້ນຄ້ວາ, ວິສາຫະກິດ, ຜ່ານນັ້ນ ຮຽກຮ້ອງໃຫ້ບັນດານັກລົງທຶນສາກົນ ຈົ່ງລົງທຶນເຂົ້າບັນດາຜະລິດຕະພັນໝາກພ້າວ ເພື່ອຍົກສູງປະສິດທິຜົນ, ຄຸນຄ່າທາງດ້ານເສດຖະກິດຂອງໝາກພ້າວ ແນໃສ່ນຳຕົ້ນໝາກພ້າວໃຫ້ກາຍເປັນຕົ້ນອຸດສາຫະກຳແຫ່ງຊາດ. ບັນດາອົງການຈັດຕັ້ງ Festival ປາດຖະຫນາວ່າ: ໃນອະນາຄົດ ບໍ່ພຽງແຕ່ມີການຮ່ວມສຳພັນກັບບັນດາແຂວງປູກຕົ້ນໝາກພ້າວເທົ່ານັ້ນ ຫາກຍັງເພີ່ມທະວີການຮ່ວມມືກັບສາກົນອີກດ້ວຍ, ເພື່ອຮ່ຳຮຽນເອົາບົດຮຽນຈາກບັນດາປະເທດປູກຕົ້ນໝາກພ້າວໃນໂລກ ເຮັດໃຫ້ນັບມື້ນັບມີຜະລິດຕະພັນຈາກຕົ້ນໝາກພ້າວໃຫມ່ຫລາຍຢ່າງ ແລະ ບັນລຸປະສິດທິຜົນທາງດ້ານເສດຖະກິດສູງກວ່າ.

ໂຕຕວັນ