(VOVWORLD) -ເປັນຄັ້ງທີ 4 ຢ່າງລຽນຕິດ, ອັນດັບຫນຶ່ງໃນຕາຕະລາງຈັດອັນດັບດັດຊະນີກຳລັງແກ້ງແຍ້ງຂັ້ນແຂວງ (PCI) ແມ່ນຂຶ້ນກັບແຂວງ ກວ໋າງນີງ. ດ້ວຍຄຸນນະພາບການບໍລິຫານເສດຖະກິດທີ່ດີເດັ່ນ, ປັບປຸງດັດຊະນີເຂົ້າຮ່ວມການຕະຫລາດ, ແກ້ໄຂຄວາມຫຍຸ້ງຍາກຢ່າງທັນການ, ຮ່ວມເດີນທາງກັບວິສາຫະກິດ, ມີມາດຕະການຮັບມືຢ່າງວ່ອງໄວ ແລະ ມີໄຫວພິບ ເພື່ອຍົກສູງກຳລັງຄວາມສາມາດໃນການປັບຕົວໃຫ້ແທດເໝາະກັບສະພາບການຂອງວິສາຫະກິດໃນຊ່ວງເວລາເກີດໂລກລະບາດໂຄວິດ 19 ແມ່ນສິ່ງທີ່ຊ່ວຍໃຫ້ ກວ໋າງນີງ ຮັກສາອັນດັບ 1 ໄວ້ໄດ້.
 ສູນບໍລິຫານສາທາລະນະທຸກຂັ້ນແມ່ນບາດກ້າວບຸກທະລຸໃນການປະຕິຮູບລະບຽບການບໍລິຫານຂອງແຂວງ |
ທີ່ພິທີປະກາດບົດລາຍງານ ດັດຊະນີແກ້ງແຍ້ງຂັ້ນແຂວງ ປີ 2020 ຊື່ງດຳເນີນໃນຕອນເຊົ້າວັນທີ 15 ເມສາ, ແຂວງ ກວ໋າງນີງ ອີກຄັ້ງຫນຶ່ງໄດ້ຖືກຈັດອັນດັບ 1 ໃນຕາຕະລາງ. ນີ້ແມ່ນປີທີ 8 ຢ່າງລຽນຕິດ ທີ່ຢືນໃນ Top 5 ແຂວງ, ນະຄອນ ທີ່ມີຄຸນນະພາບບໍລິຫານເສດຖະກິດດີເດັ່ນກວ່າໝູ່ໃນທົ່ວປະເທດ. ເປັນຫນ້າສົນໃຈ ດັດຊະນີ PCI ຂອງ ແຂວງ ກວ໋າງນີງ ປີ 2020 ແມ່ນ 75,09 ແລະ ແມ່ນທ້ອງຖິ່ນຫນຶ່ງດຽວທີ່ບັນລຸດັດຊະນີກວ່າ 75. ເພື່ອບັນລຸໄດ້ໝາກຜົນດັ່ງກ່າວ, ແຂວງ ກວ໋າງນີງ ໄດ້ສຸມໃສ່ຜັນຂະຫຍາຍບັນດາຫນ້າທີ່, ມາດຕະການຢ່າງຂ້ຽວຂາດ. ໃນນັ້ນ ປະຕິຮູບລະບຽບການບໍລິຫານຢ່າງແຮງ ແລະ ໄດ້ຮັບຖືວ່າແມ່ນຂອດບຸກທະລຸສຳຄັນ.
ປີ 2012, ແຂວງ ກວ໋າງນີງ ແມ່ນແຂວງ ທຳອິດທີ່ທົດລອງຮູບແບບສູນບໍລິຫານສາທາລະນະຂັ້ນແຂວງ ແລະ ເມືອງ, ຫັນພື້ນຖານບໍລິຫານສາທາລະນະເປັນທັນສະໄຫມເທື່ອລະກ້າວ, ຍົກສູງຄຸນນະພາບບໍລິການສາທາລະນະ ຮັບໃຊ້ປະຊາຊົນ, ວິສາຫະກິດ. ເລື່ອງເປີດເຜີຍລະບຽບການບໍລິຫານຢ່າງຈະແຈ້ງ ໄດ້ເຮັດໃຫ້ບັນດາສຳເນົາເອກະສານຫລຸດລົງ, ເວລາແກ້ໄຂລະບຽບການບໍລິຫານ, ລາຍຈ່າຍໃນການເຮັດລະບຽບການຕ່າງໆ ກໍ່ຫລຸດລົງ ແຕ່ 40 – 60%.
ທາງແຂວງ ກໍ່ສ້າງຕັ້ງ ຄະນະສົ່ງເສີມ ແລະ ຫນູນຊ່ວຍການລົງທຶນ ໂດຍຂຶ້ນກັບ ຄະນະກຳມະການປະຊາຊົນແຂວງ, ຫນູນຊ່ວຍນັກລົງທຶນໂດຍກົງ. ທ່ານ ດ່າວຟອງຈຸກດ້າຍ ຜູ້ອຳນວຍການໃຫຍ່ ບໍລິສັດຫຸ້ນສ່ວນພັດທະນາເຂດອຸດສາຫະກຳ ຫວຽດຮຶງ ຕີລາຄາວ່າ:
“ພວກຂ້າພະເຈົ້າໄດ້ປະຕິບັດໂຄງການລົງທຶນຢູ່ຫລາຍແຂວງ, ນະຄອນ ແຕ່ນີ້ແມ່ນຄັ້ງທຳອິດທີ່ພວກຂ້າພະເຈົ້າ ໄດ້ຮັບຫນັງສືຢັ້ງຢືນລົງທຶນຂອງໂຄງການພຽງໃນເວລາ 24 ຊົ່ວໂມງ. ສິ່ງນີ້ແມ່ນເຮັດໃຫ້ພວກຂ້າພະເຈົ້າມີຄວາມປະທັບໃຈຕໍ່ການປະຕິຮູບລະບຽບການບໍລິການຢ່າງແຮງຂອງແຂວງ ກວ໋າງນີງ”
ເລື່ອງຍູ້ແຮງການໝູນໃຊ້ເຕັກໂນໂລຊີຂໍ້ມູນຂ່າວສານ, ຫັນພື້ນຖານດ້ານບໍລິຫານໃຫ້ທັນສະໄຫມເທື່ອລະກ້າວ, ເສີມຂະຫຍາຍປະສິດທິຜົນອຳນາດການປົກຄອງເອເລັກໂຕນິກ ມຸ່ງໄປເຖິງການສ້າງອຳນາດການປົກຄອງດີຈີຕອນ, ກໍ່ສ້າງນະຄອນ ອັດສະລິຍະ ກໍ່ໄດ້ຮັບການປະຕິບັດຢ່າງມີປະສິດທິຜົນຈາກແຂວງ ກວ໋າງນີງ. ປະຈຸບັນ ແຂວງ ກວ໋າງນີງ ໄດ້ສະຫນອງການບໍລິການສາທາລະນະທາງອອນລາຍ ດ້ວຍລະດັບ 3-4 ແມ່ນກວ່າ 85%, ການຊຳລະຄ່າທຳນຽມແບບບໍ່ໃຊ້ເງິນສົດ, ເຊື່ອມຕໍ່ກັບປະຕູການບໍລິການສາທາລະນະແຫ່ງຊາດ ແມ່ນຫນຶ່ງໃນບັນດາແຂວງທຳອິດທີ່ນຳໃຊ້ທົດລອງສູນບໍລິຫານນະຄອນອັດສະລິຍະ.
ທ່ານ ດ່າວຢູຍຫາວ ຮອງປະທານຜູ້ປະຈຳການ ສະຫະສະມາຄົມວິສາຫະກິດ ແຂວງ ກວ໋າງນີງ ຖືວ່າ:
“ຍ້ອນມີການລະດົມກຳລັງໃຈສຳລັບວິສາຫະກິດ, ຊ່ວຍຜ່ານຜ່າຄວາມຫຍຸ້ງຍາກຈາກໂລກລະບາດໂຄວິດ 19, ການນຳອຳນາດການປົກຄອງໄດ້ຈັດຕັ້ງບັນດາກອງປະຊຸມມີລັກສະນະລົງເລິກ ກຳແຫນ້ນການເຄື່ອນໄຫວຂອງວິສາຫະກິດ, ຮູບແບບ ກາເຟ ນັກທຸລະກິດ ແລະ ແກ້ໄຂຂໍ້ຕິດຄັດຄວາມຫຍຸ້ງຍາກຢ່າງທັນການ. ບັນດາໂຄງການລ້ວນແຕ່ໄດ້ປະກາດຢ່າງເປີດເຜີຍ, ບັນດາວິສາຫະກິດ ລ້ວນແຕ່ສາມາດຕິດຕາມ, ພວກຂ້າພະເຈົ້າຕີລາຄາສູງລັກສະນະໂປ່ງໃສນັ້ນ”
ເລື່ອງກ້າໃນການຜັນຂະຫຍາຍຮູບແບບຮ່ວມມື ພາກລັດ - ເອກະຊົນເຂົ້າໃນບັນດາກິດຈະກຳຄື: ສະຫນາມບິນ, ທ່າກຳປັ່ນ, ເສັ້ນທາງຄວາມໄວສູງ ໄດ້ປະກອບສ່ວນຊ່ວຍແຂວງ ກວ໋າງນີງ ກໍ່ສ້າງພື້ນຖານໂຄງລ່າງໃຫ້ສຳເລັດຢ່າງຄົບຊຸດ, ປ່ຽນໃຫມ່ຮູບແບບເຕີບໂຕ, ສ້າງໂຄງປະກອບພື້ນຖານເສດຖະກິດຄືນໃຫມ່.
ປະຈຸບັນ ແຂວງ ກວ໋າງນີງ ໄດ້ສ້າງແຜນຮ່າງ ດ້ວຍຫນ້າທີ່ຈຸດສຸມ, ສຸມໃສ່ຍູ້ແຮງການປະຕິຮູບດ້ານບໍລິການ, ປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ຍົກສູງກຳລັງຄວາມສາມາດແກ້ງແຍ່ງຢ່າງສະເຫມີພາບ, ດູດດື່ມ, ສະດວກ ບົນພື້ນຖານໝູນໃຊ້ເຕັກໂນໂລຊີຂໍ້ມູນຂ່າວສານໃນການຄຸ້ມຄອງ ບໍລິຫານ.