ປີ 2011 ເປັນຂີດໝາຍແຫ່ງລະດັບສະຖິຕິຂອງການສົ່ງອອກຫວຽດນາມ, ດ້ວຍວົງເງິນສົ່ງອອກບັນລຸປະມານ 96 ຕຶ້ USD ລື່ນກາຍແຜນການທີ່ໄດ້ວາງອອກ ແມ່ນ 80 ຕຶ້ USD. ລະດັບເພີ່ມຂຶ້ນສູງສຸດຂອງປີນີ້ເມື່ອທຽບໃສ່ປີກ່ອນແມ່ນເກືອບ 24 ຕຶ້ USD ນີ້ກໍແມ່ນລະດັບເພີ່ມຂຶ້ນຫລາຍສຸດນັບແຕ່ກ່ອນມາຮອດປະຈຸບັນ. ການສົ່ງອອກກາຍເປັນຈຸດພົ້ນເດັ່ນຂອງພື້ນຖານເສດຖະກິດຫວຽດນາມໃນປີ 2011, ອັນໄດ້ປະກອບສ່ວນຈຳກັດການນຳເຂົ້າເກີນດຸນ, ຂຸກຍູ້ການຈະເລີນເຕີບໂຕເສດຖະກິດ.
ປີ 2011 ເປັນຂີດໝາຍແຫ່ງການຈະເລີນເຕີບໂຕຂອງການສົ່ງອອກໃນປະເພດສິນຄ້າຕົ້ນຕໍເປັນສ່ວນຫລາຍ, ໃນນັ້ນ ເພີ່ມຂຶ້ນຫລາຍສຸດແມ່ນບັນດາປະເພດຄື: ນ້ຳມັນດິບ, ກາເຟ, ຢາງພາລາ, ນ້ຳມັນ, ໝາກມ່ວງຫິມະພານ, ເຂົ້າສານ... ນຳຫນ້າໃນໝວດສິນຄ້າມີລະດັບການສົ່ງອອກສູງ ແມ່ນຂະແຫນງຕ່ຳແຜ່ນຕັດຫຍິບ. ປີ 2011 ຂະແຫນງຕ່ຳແຜ່ນຕັດຫຍິບໄດ້ຜ່ານຜ່າການແກ້ງແຍ້ງ ຢ່າງຂ້ຽວຂາດຂອງຕະຫລາດການຄ້າໂລກ, ບັນລຸວົງເງິນສົ່ງອອກເກືອບ 16 ຕຶ້ USD. ທ່ານ ເລຕຽນເຈື່ອງ ຮອງຜູ້ອຳນວຍການໃຫຍ່ກຸ່ມບໍລິສັດຕ່ຳແຜ່ນຕັດຫຍິບຫວຽດນາມ ໃຫ້ຮູ້ວ່າ: ປີນີ້ ໃບສັ່ງຊຶ້ສິນຄ້າຈາກຕະຫລາດສົ່ງອອກເດີມໄດ້ເພີ່ມຂຶ້ນ 52% ເມື່ອທຽບກັບໄລຍະດຽວກັນຂອງປີກາຍ, ຍ້ອນມີການເລືອກເຟັ້ນຕະຫລາດຢ່າງເໝາະສົມເພື່ອຂຸດຄົ້ນທ່າໄດ້ປຽບໃນການແກ້ງແຍ້ງ.
“ພວກຂ້າພະເຈົ້າສຸມໃສ່ເຂົ້າໃນຕະຫລາດຊຶ່ງພວກເຮົາມີທ່າໄດ້ປຽບໃນ ການແກ້ງແຍ້ງດີທີ່ສຸດ, ຮັບໃຊ້ດີທີ່ສຸດ ແລະເລືອກເຟັ້ນ ໄດ້ບັນດາຜະລິດຕະພັນທີ່ມີທ່າໄດ້ປຽບໃນການແກ້ງແຍ້ງ ສະນັ້ນຈຶ່ງບັນລຸປະສິດທິຜົນການຜະລິດດຳເນີນທຸລະກິດດີທີ່ສຸດ. ຍ້ອນບໍ່ມີຄວາມສາມາດ ແລະ ທຶນຮອນຢ່າງພຽງພໍ ສະນັ້ນ ຄວນສຸມໃສ່ລົງທຶນຕາມລວງເລິກ. ມາດຕະການຕົ້ນຕໍແມ່ນສຸມໃສ່ສະມັດຕະພາບ, ຫລຸດຜ່ອນລາຄາຜະລິດຕະພັນ ແລະ ລົງທຶນຕາມລວງເລິກເພື່ອສາມາດຕອບສະຫນອງບັນດາປະເພດສິນຄ້າມີມູນຄ່າສູງກວ່າ, ເໝາະສົມກັບກຳລັງຄວາມສາມາດການແກ້ງ ແຍ້ງຂອງຂະແຫນງຕ່ຳແຜ່ນຕັດຫຍິບຫວຽດນາມ.“
ນອກນັ້ນ, ການສົ່ງອອກຂອງຫວຽດນາມ ໃນປີ 2011 ຍັງມີຈຸດພົ້ນເດັ່ນອີກອັນຫນຶ່ງ ນັ້ນແມ່ນປະເພດສິນຄ້າກາເຟ. ຕາມສະຫະສະມາຄົມກາເຟກາກາວຫວຽດນາມແລ້ວ, ການສ່ົງອອກ ກາເຟປີນີ້ ເພີ່ມຂຶ້ນພຽງ 2% ດ້ານປະລິມານ ແຕ່ຄຸນຄ່າການສົ່ງອອກຍັງຄົງເພີ່ມຂຶ້ນສູງກວ່າປີກ່ອນ, ຍ້ອນລາຄາສົ່ງອອກຍາມໃດກໍ່ຮັກສາຢູ່ໃນລະດັບສູງຄື: ປະມານ 2 .210 USD/ໂຕນ, ເພີ່ມຂຶ້ນກວ່າ 51% ເມື່ອທຽບກັບໄລຍະດຽວກັນຂອງປີກາຍ. ສະນັ້ນ ການສົ່ງອອກກາເຟໃນລະດຸການຜ່ານມາ ບັນລຸວົງເງິນສົ່ງອອກ 2.7 ຕຶ້ USD, ຊຶ່ງແມ່ນລະດັບສູງສຸດນັບແຕ່ກ່ອນມາຮອດປະຈຸບັນ. ທ່ານ ຫງວຽນວຽດວີງ, ເລຂານຸການສະຫະສະມາຄົມກາເຟກາກາວຫວຽດນາມຖືວ່າ: ເຖິງວ່າ ມີທ່າໄດ້ປຽບກ່ຽວກັບດ້ານລາຄາກໍຕາມ ແຕ່ ຂະແຫນງກາເຟ ເວົ້າສະເພາະ ແລະບັນດາຂະແຫນງສິນຄ້າອື່ນເວົ້າລວມ ຄວນມີມາດຕະການເພື່ອເພີ່ມ ມູນຄ່າການສົ່ງອອກຂຶ້ນຕື່ມ.
“ຂະແຫນງກາເຟ ຄວນມຸ້ງໄປເຖິງການເພີ່ມມູນຄ່າການສົ່ງອອກກາເຟ. ຍູ້ແຮງປະເພດສິນຄ້າກາເຟສຳເລັດຮູບ, ປະຈຸບັນທົ່ວປະເທດມີໂຮງງານຜະລິດກາເຟສຳເລັດຮູບ ພຽງ 4 ແຫ່ງ, ດ້ວຍກຳລັງການຜະລິດ 10.000 ໂຕນ/ປີ ເທົ່າກັບ ກາເຟເມັດ 30 ໂຕນ. ປະຈຸບັນ ມີຕະຫລາດຫລາຍແຫ່ງສົນໃຈເຖິງການປຸງແຕ່ງກາເຟ. ພວກເຮົາທັງຄິດໄລ່ເຖິງການສົ່ງອອກກາເຟດິບ ທັງຄິດໄລ່ເຖິງການສົ່ງອອກກາເຟສຳເລັດຮູບເພື່ອເພີ່ມມູນຄ່າການສ່ົງອອກກາເຟ“.
ເຖິງແນວໃດກໍຕາມ, ເມື່ອທົບທວນຄືນການສົ່ງອອກໃນປີຜ່ານມາ ຍັງມີຫລາຍຈຸດເປັນຫນ້າເອົາໃຈໃສ່ຄື: ອັດຕາສ່ວນວົງເງິນສົ່ງອອກຂອງບັນດາປະເພດສິນຄ້າ ຊຶ່ງແມ່ນວັດຖຸດິບຄື: ນ້ຳມັນດິບ, ຖ່ານຫີນ ຍັງໃຫຍ່ຫລວງຢູ່. ຕາມທ່ານ ດັ້ງກວາງຫາຍ, ຫົວຫນ້າກົມຕະຫລາດເອີລົບ ສັງກັດກະຊວງອຸດສາຫະກຳ ແລະການຄ້າ ແລ້ວ, ຍ້ອນການຜະລິດແບບປະກອບສິ້ນສ່ວນເພື່ອສົ່ງອອກຂອງຫວຽດນາມຍັງໃຫຍ່ຫລວງຢູ່ ສະນັ້ນສິນຄ້າສົ່ງອອກຍັງອີງໃສ່ວັດຖຸດິບ ແລະ ສົ້ນອອກຢູ່ຕ່າງປະເທດ. ນີ້ແມ່ນສິ່ງທ້າທາຍໃຫຍ່ ຖ້າພວກເຮົາບໍ່ມີມາດຕະການແກ້ໄຂ ຍາກທີ່ຈະສ້າງມູນຄ່າເພີ່ມສຳລັບປະເພດສິນຄ້າສົ່ງອອກຕົ້ນຕໍໄດ້. ທ່ານ ດັ້ງກວາງຫາຍ ເວົ້າວ່າ:
“ຂໍ້ຈຳກັດນີ້ ຍ້ອນບໍ່ສາມາດສົ່ງອອກໂດຍກົງໄດ້ ຫາກສົ່ງອອກຜ່ານສາຂາ ແລະ ຂອດກາງ ພວກເຮົາບໍ່ຮັກສາເຄ່ືອງໝາຍການຄ້າໄດ້. ຊ້ຳບໍ່ໜຳ ສິນຄ້າຂອງຫວຽດນາມສົ່ງໄປຍັງປະເທດອື່ນແລ້ວ ເຂົາເຈົ້າພັດຫຸ້ມຫໍເປັນສິນຄ້າຂອງໄທ, ສິງກະໂປ. ຖ້າບໍ່ພັດທະນາເຄື່ອງໝາຍການຄ້າ ແມ່ນຍາກທີ່ຈະຮັກສາຄຸນນະພາບຜະລິດຕະພັນຂອງຕົນໄດ້ ແລະ ຍາກທີ່ຈະມີບາດກ້າວບຸກທະລຸກ່ຽວກັບຄຸນນະພາບການສົ່ງອອກ ແລະ ການພັດທະນາໄດ້“
ເຖິງແມ່ນວ່າ ຍັງມີຫລາຍບັນຫາຄວນໄດ້ຮັບການແກ້ໄຂ ເພື່ອຍູ້ແຮງການສົ່ງອອກໃນໄລຍະຈະມາເຖິງ, ແຕ່ຕາມທ່ານ ຫງວຽນແທ່ງບຽນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າຫວຽດນາມ ແລ້ວ, ຕົວເລກຂອງວົງເງິນສົ່ງອອກບັນລຸ 96 ຕຶ້ USD, ລະດັບເຕີບໂຕບັນລຸກວ່າ 33% ເມື່ອທຽບກັບໄລຍະດຽວກັນຂອງປີກາຍ ແມ່ນໝາກຜົນເປັນຫນ້າປະທັບໃຈ. ນີ້ແມ່ນລະດັບການເຕີບໂຕສູງສຸດນັບແຕ່ປີ 1997 ມາຮອດປະຈຸບັນ ແລະ ກໍ່ແມ່ນລະດັບສູງສຸດເມື່ອທຽບກັບລະດັບເພີ່ມຂຶ້ນຂອງບັນດາຂະແຫນງ, ຂົງເຂດອື່ນ. ອັດຕາສ່ວນການນຳເຂົ້າເກີນດຸນຫລຸດລົງກວ່າ 10%, ຕ່ຳຫລາຍເມື່ອທຽບກັບຕົວເລກ 17.5% ຊຶ່ງສະພາແຫ່ງຊາດໄດ້ວາງອອກ. ສິ່ງດັ່ງກ່າວຊີ້ໃຫ້ເຫັນວ່າ ການສົ່ງອອກສິນຄ້າຂອງຫວຽດນາມ ໃນປີ 2011 ກາຍເປັນກຳລັງຫນູນຂອງການເຕີບໂຕເສດຖະກິດ. ທ່ານ ຫງວຽນແທ່ນບຽນ ຢືນຢັນວ່າ:
“ຍ້ອນບັນລຸລະດັບເຕີບໂຕໃນການສົ່ງອອກສິນຄ້າ ພວກເຮົາຈຶ່ງສ້າງໄດ້ກຳລັງຫນູນໃຫ້ແກ່ການເຕີບໂຕດ້ານເສດຖະກິດ, ຊ່ວຍໃຫ້ລັດຖະບານປະຕິບັດບັນດາຄຳຮຽກຮ້ອງຕ້ອງການກ່ຽວກັບການຮັກສາເສດຖະກິດມະຫາພາກເປັນປົກກະຕິໄດ້, ສ້າງແຫລ່ງເງິນຕາຕ່າງປະເທດ ເພື່ອສ້າງຄວາມດຸນດຽງການຮັດແຄບຄວາມຜິດໂຕນກັນທາງດ້ານການຄ້າ, ຊ່ວຍໃຫ້ອັດຕາແລກປ່ຽນເງິນດົ່ງຂອງຫວຽດນາມເປັນປົກກະຕິ. ກ້າວເຂົ້າສູ່ປີ 2012 ຫນ້າທີ່ວາງອອກແມ່ນຫນັກຫນ່ວງທີ່ສຸດ, ເຖິງວ່າ ລະດັບການຈະເລີນເຕີບໂຕໃນປະຈຸບັນ, ເຊິ່ງລັດຖະບານໄດ້ມອບໝາຍໃຫ້ກະຊວງອຸດສາຫະກຳ ແລະ ການຄ້າ ສູ້ຊົນບັນລຸລະດັບຈະເລີນເຕີບໂຕໃຫ້ໄດ້ແມ່ນ 13%. ເມື່ອທຽບກັບປີ 2011 ແມ່ນບໍ່ສູງປານໃດ, ແຕ່ຕົວເລກນີ້ເປັນຄັ້ງທຳອິດຈະນຳການສົ່ງອອກຂອງຫວຽດນາມລື່ນກາຍລະດັບ 100 ຕຶ້ USD“
ດ້ວຍບັນດາໝາກຜົນທີ່ສ້າງຄວາມປະທັບໃຈໃນຂົງເຂດການສົ່ງອອກ ປີ 2011, ອາດຈະເວົ້າໄດ້ວ່າ ສິນຄ້າສົ່ງອອກຂອງຫວຽດນາມ ນັບມື້ນັບເພີ່ມຂຶ້ນນັບທາງດ້ານປະລິມານ ແລະ ຄຸນນະພາບ. ການເຕີບໂຕນີ້ ໄດ້ຢັ້ງຢືນວ່າ: ເສດຖະກິດ ຂອງຫວຽດນາມ ນັບມື້ນັບເຕີບໂຕ, ພວມເຊື່ອມໂຍງ ແລະ ຢືນຢັນທີ່ຕັ້ງບົດບາດຂອງຕົນໃນເວທີສາກົນໄດ້ ເທ່ືອລະກ້າວ./.