(vovworld) - ໃນຊຸມປີມໍ່ໆມານີ້, ສະພາບການເສດຖະກິດປະສົບກັບຄວາມຫຍຸ້ງຍາກ ເຮັດໃຫ້ບັນດາຂະແຫນງສົ່ງອອກສ່ວນຫລາຍລ້ວນແຕ່ຖືກຫລຸດລົງ ຫລື ບັນລຸລະດັບຕຳ່. ເຖິງຢ່າງໃດກໍຕາມ, ໃນສະພາບການນັ້ນ ຍ້ອນມີການຫັນທິດຢ່າງວ່ອງໄວ, ເໝາະສົມກັບຄວາມຕ້ອງການຂອງຕະຫລາດ ສະນັ້ນ ວົງເງິນສົ່ງອອກເຄື່ອງເຟີນີເຈີ ແລະ ຜະລິດຕະພັນຈາກໄມ້ຂອງ ຫວຽດນາມ ຍັງຄົງບັນລຸລະດັບຈະເລີນເຕີບໂຕຢ່າງແຮງ ແລະ ປີນີ້ ສາມາດບັນລຸລະດັບ 4,6 ຕື້ USD.
ວົງເງິນສົ່ງອອກເຄື່ອງເຟີນີເຈີ ແລະ ຜະລິດຕະພັນຈາກໄມ້ຂອງຫວຽດນາມ ທັງປີສາມາດບັນລຸ 4,6 ຕື້ USD
ພາບ:vietbao.vn
|
ໃນ 9 ເດືອນຕົ້ນປີ 2012, ວົງເງິນສົ່ງອອກເຄື່ອງເຟີນີເຈີ ແລະ ຜະລິດຕະພັນຈາກໄມ້ຂອງ ຫວຽດນາມ ບັນລຸ 3.394 ລ້ານ USD (ສະເລ່ຍບັນລຸ 377 ລ້ານ USD/ເດືອນ). ສິ່ງເປັນຫນ້າສົນໃຈ ນັ້ນແມ່ນໃນ 2 ເດືອນມໍ່ໆມານີ້ແຕ່ລະເດືອນບັນລຸ ໄດ້ 400 ລ້ານ USD. ຖ້າຫາກຮັກສາໄດ້ລະດັບເຕີບໂຕສົ່ງອອກສະເລ່ຍໃນ 9 ເດືອນຜ່ານມາ ແລະ ພິເສດໃນ 2 ເດືອນມໍ່ໆມານີ້, ວົງເງິນສົ່ງອອກເຄື່ອງເຟີນີເຈີ ແລະ ຜະລິດຕະພັນຈາກໄມ້ຂອງຫວຽດນາມ ທັງປີສາມາດບັນລຸ 4,6 ຕື້ USD. ສິ່ງຫນ້າສົນໃຈນັ້ນແມ່ນໄລຍະຕົ້ນປີການສົ່ງອອກເຄື່ອງເຟີນີເຈີຍັງໄດ້ຮັບຖືວ່າແມ່ນຂະແຫນງຖືກຜົນສະທ້ອນຢ່າງຫນັກຫນ່ວງຍ້ອນສະພາບການເສດຖະກິດຂອງໂລກ, ມີຕະຫລາດເດີມຫລາຍແຫ່ງຂອງ ຫວຽດນາມ ຖືກຮັດແຄບເຂົ້າ ຫລືຫັນທິດສົ່ງອອກບັນດາປະເພດສິນຄ້າໃຊ້ສອຍມີຄຸນນະພາບສູງກວ່າ. ໃນສະພາບການນັ້ນ ມີວິສາຫະກິດຫລາຍແຫ່ງຂອງ ຫວຽດນາມ ຕ້ອງປະເຊີນຫນ້າກັບຄວາມຫຍຸ້ງຍາກ, ເປັນຕົ້ນແມ່ນຕະຫລາດເອີລົບຖືກຫລຸດລົງ. ບໍລິສັດ ສ່ົງອອກເຄື່ອງເຟີນີເຈີ ເລີມຫວຽດ ແມ່ນຫນຶ່ງໃນບັນດາວິສາຫະກິດຕົກໃນສະພາບຄືແນວນັ້ນ. ປີ 2011 ວົງເງິນສົ່ງອອກເຄື່ອງເຟີນິເຈີຂອງບໍລິສັດນີ້ໄປຍັງ ອີຢູ ບັນລຸ 7 ລ້ານ USD, ແຕ່ປີ 2012 ຄາດວ່າບັນລຸພຽງປະມານ 2 ລ້ານ USD. ໃນສະພາບການນັ້ນ, ບໍລິສັດເລີມຫວຽດກໍຄືວິສາຫະກິດສົ່ງອອກຜະລິດຕະພັນຈາກໄມ້ຫລາຍແຫ່ງຂອງຫວຽດນາມ ໄດ້ຊອກຫາຕະຫລາດແຫ່ງໃຫມ່ຢ່າງວ່ອງໄວ, ຫັນທິດເພື່ອຮັບມືກັບຄວາມຕ້ອງການຂອງຕະຫລາດ, ຈາກການສົ່ງອອກຜະລິດຕະພັນບໍ່ທັນສຳເລັດຮູບ ໄປສູ່ການສົ່ງອອກເຄື່ອງເຟີນີເຈີທີ່ມີຄຸນນະພາບສູງ. ໂດຍກຳໄດ້ທ່າອ່ຽງຂອງຕະຫລາດ ອີຢູ ກ່ອນນີ້ແມ່ນເຄີຍນຳເຂົ້າຜະລິດພັນຈາກໄມ້ປະດັບພາຍນອກ ແຕ່ປະຈຸບັນ ຫັນໄປສູ່ການນຳເຂົ້າເຄື່ອງເຟີນີເຈີ. ບໍລິສັດເລີມຫວຽດ ໄດ້ດັດປັບໂຄງປະກອບຜະລິດຕະພັນໃຫ້ເໝາະສົມກັບສະພາບຕົວຈິງ. ທ່ານ Nguyen Liem ຜູ້ອຳນວຍການບໍລິສັດ ເລີມຫວຽດ ໃຫ້ຮູ້ວ່າ:
“ປະຈຸບັນ ໂຮງງານຈຳນວນຫນຶ່ງຂອງ ຫວຽດນາມ ໃນນັ້ນ ມີບໍລິສັດເລີມຫວຽດຕ້ອງຫັນປ່ຽນໂຄງປະກອບ, ກ່ອນນີ້ ສົ່ງອອກຜະລິດຕະພັນຈາກໄມ້ຕົບແຕ່ງພາຍນອກໄປຍັງເອີລົບ ແລະ ອາເມລິກາກວມ 80%, ສ່ວນ 20% ແມ່ນເຄື່ອງເຟີນີເຈີ ແຕ່ປະຈຸບັນ ພວກຂ້າພະເຈົ້າໄດ້ສົ່ງອອກຜະລິດຕະພັນຈາກໄມ້ຕົບແຕ່ງພາຍນອກ 50% ແລະ 50% ແມ່ນເຄື່ອງເຟີນີເຈີ. ຖ້າຫາກບໍ່ມີບົດຮຽນ, ການຫັນປ່ຽນຈະປະສົບກັບຄວາມຫຍຸ້ງຍາກ, ເປັນຕົ້ນແມ່ນລາຍຈ່າຍຫັນປ່ຽນອຸປະກອນ, ດ້ານອື່ນ ເຄື່ອງເຟີນີເຈີ ກໍຮຽກຮ້ອງດ້ານເຕັກນິກມີຮູບແບບທີ່ສວຍງາມກວ່າ.”
ພ້ອມກັບການຫັນທິດໃນການຜະລິດດຳເນີນທຸລະກິດ, ຄວາມສຳພັດກັບ ຕະຫລາດຢ່າງວອ່ງໄວຂອງວິສາຫະກິດກໍແມ່ນປັດໄຈຕົ້ນຕໍ ຊ່ວຍໃຫ້ບັນດາວິສາຫະກິດສົ່ງອອກຜະລິດຕະພັນຈາກໄມ້ຮັກສາທ່າເຕີບໂຕໄດ້. ໃນສະພາບການຕະຫລາດເອີລົບປະສົບກັບຄວາມຫຍຸ້ງຍາກ, ມີວິສາຫະກິດສົ່ງອອກຫລາຍແຫ່ງໄດ້ຫັນທິດໄປຍັງຕະຫລາດ ອາເມລິກາ ແລະ ຍີ່ປຸ່ນ, ເພາະວ່າ ນີ້ແມ່ນຕະຫລາດສອງແຫ່ງມີຄວາມສາມາດບົ່ມຊ້ອນຫລາຍຢ່າງ. ທ່ານນາງ Do Kim Loan ຜູູ້ອຳນວຍການບໍລິສັດໄມ້ ຊາວນາມ ໃຫ້ຮູ້ວ່າ:
“ຂ້າພະເຈົ້າຄິດວ່າ ຕະຫລາດອາເມລິກາ ແລະ ຍີ່ປຸ່ນ ປີນີ້ມີຄວາມສາມາດບົ່ມຊ້ອນຫລາຍຢ່າງ. ປະຈຸບັນ ພວກຂ້າພະເຈົ້າໄດ້ສຳພັດກັບບາງບໍລິສັດຂອງຍີ່ປຸ່ນ ແລະເຂົາເຈົ້າໄດ້ນຳເຂົ້າເຄື່ອງເຟີນີເຈີ ຂອງບໍລິສັດພວກຂ້າພະເຈົ້າຫລາຍທີ່ສຸດ. ສ່ວນຕະຫລາດ ອາເມລິກາ ປີນີ້ ບໍລິສັດພວກຂ້າພະເຈົ້າຄາດວ່າຈະສົ່ງອອກເຄື່ອງເຟີນີເຈີໄປຍັງຕະຫລາດນີ້ປະມານ 12% ແລະ ບັນລຸລະດັບຈະເລີນເຕີບໂຕປະມານ 25%ໃນປີ 2013 ຍ້ອນສະພາບການກໍ່ສ້າງຢູ່ ອາເມລິກາ ພັດທະນາ. ປະຈຸບັນ ຫວຽດນາມຢືນອັນດັບ 2 ຖັດຈາກຈີນໃນການສົ່ງອອກເຄື່ອງເຟີນີເຈີໄປຍັງຕະຫລາດ ອາເມລິກາ.”
ຫວຽດນາມ ຢືນອັນດັບທີ 6 ໃນຈຳນວນບັນດາປະເທດສົ່ງອອກເຄື່ອງເຟີນີເຈີໃນໂລກ
ພາບ:internet |
ປະຈຸບັນ ຫວຽດນາມ ຢືນອັນດັບທີ 6 ໃນຈຳນວນບັນດາປະເທດສົ່ງອອກເຄື່ອງເຟີນີເຈີໃນໂລກ. ຜະລິດຕະພັນຈາກໄມ້ຂອງ ຫວຽດນາມ ສົ່ງອອກໄປຍັງ 20 ປະເທດ ແລະ ເຂດແຄ້ວນ, ໃນນັ້ນ ນຳຫນ້າແມ່ນ ອາເມລິກາ ບັນລຸວົງເງິນສົ່ງອອກ 1.147 ລ້ານ USD, ຖັດມາແມ່ນຈີນ ບັນລຸ 496 ລ້ານ USD, ຍີ່ປຸ່ນ 426 ລ້ານ USD, ສເກົາຫລີ 140 ລ້ານ USD, ອັງກິດ 122 USD ລ້ານ. ໃນນັ້ນ ມີບາງຕະຫລາດເພີ່ມຂຶ້ນຢ່າງແຮງເມື່ອທຽບໃສ່ກ່ອນນີ້ນັ້ນແມ່ນ: ອາເມລິກາ, ຍີ່ປຸ່ນ, ຈີນ ໄດ້ຊ່ວຍໃຫ້ຂະແຫນງໄມ້ ຫວຽດນາມຖົມຂູມຊ່ອງຫວ່າງຂອງຕະຫລາດ ອີຢູໄດ້ສ່ວນໃດຫນຶ່ງ. ເຖິງຢ່າງໃດກໍຕາມ, ໃນເງື່ອນໄຂແກ້ງແຍ້ງຢ່າງແຮງ, ບັນດາປະເທດນຳເຂົ້ານັບມື້ນັບຕ້ອງການສິນຄ້າທີ່ມີຄຸນນະພາບສູງກວ່າ. ສະນັ້ນ ຮຽກຮ້ອງໃຫ້ບັນດາວິສາຫະກິດ ຫວຽດນາມ ຕ້ອງຫັນປ່ຽນເພື່ອເໝາະສົມກັບຕະຫລາດໃນສະພາບການໃຫມ່. ທ່ານ Ha Cong Tuan ລັດຖະມົນຕີຊ່ວຍວ່າການກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຖືວ່າ:
“ທີຫນຶ່ງ ຕ້ອງຍົກສູງຄຸນນະພາບການປູກປ່າ ແລະ ຂະແຫນງປຸງແຕ່ງໄມ້ຕ້ອງມຸ່ງໄປເຖິງການປ່ຽນໃຫມ່ເຕັກໂນໂລຊີເພື່ອປຸງແຕ່ງໄມ້. ທີສອງ ຕ້ອງສຸມໃສ່ແກ້ໄຂບັນຫາຕະຫລາດ ແລະ ທີ 3 ແມ່ນຫນູນຊ່ວຍໃຫ້ແກ່ບັນດາວິສາຫະກິດສົ່ງອອກຮັກສາຕະຫລາດ, ຮັກສາອິດທິພົນຊື່ສຽງ ລັດຕ້ອງຮັບປະກັນການປະຕິບັດກົດໝາຍມີແຫລ່ງວັດຖຸດິບສະອາດ. ”
ໃນໄລຍະຈະມາເຖິງ ຄາດວ່າສະພາບເສດຖະກິດໂລກສືບຕໍ່ປະສົບກັບຄວາມຫຍຸ້ງຍາກ, ຕະຫລາດສົ່ງອອກເຄື່ອງເຟີນີເຈີ ຍັງຄົງຊ້ອນແຝງການຜັນແປຍາກທີ່ ຄາດຄະເນໄດ້. ເຖິງຢ່າງໃດກໍຕາມ, ດ້ວຍຄວາມມານະພະຍາຍາມຫັນທິດອັນຕັ້ງຂອງບັນດາວິສາຫະກິດ, ເປັນຕົ້ນຄວາມສຳພັດຢ່າງວ່ອງໄວເພື່ອເໝາະສົມກັບກົນໄກການຕະຫລາດ, ກຳໄດ້ກາລະໂອກາດ ແລະ ມຸ່ງໄປເຖິງການພັດທະນາແບບຍືນຍົງ, ບັນດາວິສາຫະກິດສົ່ງອອກຜະລິດຕະພັນຈາກໄມ້ຂອງ ຫວຽດນາມ ສາມາດສືບຕໍ່ຮັກສາທ່າເຕີບໂຕ ແລະ ສາມາດບັນລຸໄດ້ຄາດໝາຍສົ່ງອອກ 4,6 ຕື້ USD ຊຶ່ງຂະແຫນງໄມ້ໄດ້ວາງອອກສຳລັບປີນີ້.