ການສົ່ງອອກໝາກມ່ວງຫິມະພານຂອງ ຫວຽດນາມ ມີການເຕີບໂຕຢ່າງແຮງໃນປີ 2015 ແລະ ຄາດຄະເນວ່າຈະສືບຕໍ່ເຕີບໂຕໃນປີ 2016. ບົດຂຽນ “ການສົ່ງອອກໝາກມ່ວງຫິມະພານເພິ່ມຂຶ້ນ,ສັນຍານທີ່ດີສຳລັບການສົ່ງອອກຜະລິດຕະພັນກະເສດ ຫວຽດນາມ ປີ 2016” ຂອງງອກລວນ, ນັກຂ່າວ VOV.
ພາບປະກອບ
|
|
ປະຈຸບັນ, ຫວຽດນາມ ມີເນື້ອທີ່ດິນປູກໝາກມ່ວງຫິມະພານ 450.000 ເຮັກຕາ, ສຸມໃສ່ຕົ້ນຕໍຢູ່ບັນດາແຂວງທາງທິດ ຕາເວັນອອກພາກໃຕ້ຄື: ບີ່ງເຟືອກ, ບ່າເຣ້ຍຫວູງເຕົ່າ, ດົ່ງນາຍ, ບັນດາແຂວງ ໄຕງວຽນ ແລະ ອາດສາມາດເປີດກ້ວາງເນື້ອທີ່ດິນປູກ ໝາກມ່ວງຫິມະພານອອກສູ່ທ້ອງຖິ່ນຕ່າງໆອີກ. ໃນຊຸມວັນມໍ່ໆມານີ້, ແກ່ນ ໝາກມ່ວງຫິມະພານແມ່ນຜະລິດຕະພັນກະເສດມີວົງເງິນສົ່ງອອກເພີ່ມຂຶ້ນຢ່າງຕໍ່ເນື່ອງຂອງ ຫວຽດນາມ. ປີ 2015, ຫວຽດນາມ ສົ່ງອອກໝາກມ່ວງຫິມະພານ 330.000 ໂຕນ, ບັນລຸຍອດວົງເງິນ 2,5 ຕື້ USD. 80 ປະເທດ ແລະ ເຂດແຄ້ວນໃນໂລກ, ໃນນັ້ນມີ ອາເມລິກາ, ຈີນ ແລະ ເອີລົບ ແມ່ນບັນດາຕະຫຼາດຕົ້ນຕໍໃນການສົ່ງອອກໝາກມ່ວງຫິມະພານຂອງ ຫວຽດນາມ. ທ່ານ ດັ່ງຮ່ວາງຢາງ, ເລຂາທິການໃຫຍ່ສະຫະສະມາຄົມໝາກມ່ວງຫິມະພານ ຫວຽດນາມ, ໃຫ້ຮູ້ວ່າ:
“ໝາກມ່ວງຫິມະພານໄດ້ຮັບຖືວ່າແມ່ນໜຶ່ງໃນ 2 ປະເພດສິນຄ້າສົ່ງອອກທີ່ເພີ່ມຂຶ້ນທັງດ້ານປະລິມານ ແລະ ມູນຄ່າໃນຈຳນວນຜະລິດຕະພັນກະເສດປະເພດຕ່າງໆຂອງ ຫວຽດນາມ ໃນປີ 2015. ດ້ວຍຜົນງານດັ່ງກ່າວ, ນີ້ແມ່ນປີທີ 10 ຢ່າງລຽນຕິດ ທີ່ໝາກມ່ວງຫິມະພານສືບຕໍ່ຮັກສາທີ່ຕັ້ງແມ່ນປະເພດສິນຄ້າສົ່ງອອກແຖວໜ້າໃນໂລກ ແລະ ປະຈຸບັນກວມ 50% ຍອດມູນຄ່າການຄ້າແກ່ນໝາກມ່ວງຫິມະພານ ໃນທົ່ວໂລກ.”
ແຕ່ເຖິງຢ່າງໃດກໍຕາມ, ໝາກມ່ວງຫິມະພານສົ່ງອອກຂອງ ຫວຽດນາມ ສ່ວນຫຼາຍແມ່ນບ່ໍທັນໄດ້ຮັບການປຸງແຕ່ງ, ກວມເຖິງ 90% ປະລິມານໝາກມ່ວງຫິມະພານສົ່ງອອກ. ດັ່ງນັ້ນ, ຂະແໜງໝາກມ່ວງຫິມະພານຂອງ ຫວຽດນາມ ພວມວາງອອກຈຸດໝາຍຍູ້ແຮງການປຸງແຕ່ງ, ຫັນຜະລິດຕະພັນເປັນຫຼາຍຮູບຫຼາຍແບບ ເພື່ອແນໃສ່ຍົກສູງມູນຄ່າໝາກມ່ວງຫິມະພານສົ່ງອອກໃນໄລຍະຈະມາເຖິງ. ໃນກອງປະຊຸມທີ່ຫາກໍ່ຈັດຕັ້ງຢູ່ນະຄອນ ໂຮ່ຈີມິນ, ສະຫະສະມາຄົມໝາກມ່ວງຫິມະພານ ຫວຽດນາມ ໃຫ້ຮູ້ວ່າ: ອັດຕາໝາກມ່ວງຫິມະພານສົ່ງອອກໄດ້ຮັບການປຸງແຕ່ງແມ່ນໄດ້ເພີ່ມຈາກ 5% ໃນປີ 2014 ຂຶ້ນເຖິງ 7% ໃນປີ 2015. ແຕ່ຕາມຂໍ້ສັງເກດແລ້ວ, ອັດຕານີ້ຍັງບໍ່ທັນເໝາະສົມກັບຄວາມສາມາດບົ່ມຊ້ອນຂອງ ຫວຽດນາມ ເທ່ື່ອ. ທ່ານ ຫງວຽນວັນຈ໋ຽວ, ປະທານສະພາບໍລິຫານບໍລິສັດຫຸ້ນສ່ວນປຸງແຕ່ງຜະລິດຕະພັນກະເສດລອງອານ, ຖືວ່າ:
“ເພື່ອເພີ່ມວົງເງິນສ່ົງອອກໝາກມ່ວງຫິມະພານ, ຂະແໜງໝາກມ່ວງຫິມະພານ ພວມມີແຜນນະໂຍບາຍຍົກສູງມູນຄ່າຜະລິດຕະພັນໝາກມ່ວງຫິມະພານ. ສິ່ງດັ່ງກ່າວ ມີຄວາມໝາຍວ່າ: ໃນໄລຍະຈະມາເຖິງ, ຈະຫລຸດຜ່ອນການສົ່ງອອກຜະລິດຕະພັນບໍ່ທັນໄດ້ຮັບການປຸງແຕ່ງ, ຫລຸດຜ່ອນການສົ່ງອອກໝາກມ່ວງຫິມະພານບໍ່ທັນໄດ້ຮັບການປຸງແຕ່ງ”
ເຖິງວ່າປະລິມານໝາກມ່ວງຫິມະພານສົ່ງອອກຫຼາຍ, ແຕ່ປະຈຸບັນ, ຂະແໜງ ໝາກມ່ວງຫິມະພານ ບໍ່ທັນເອົາໃຈໃສ່ເປັນພິເສດເຖິງເຕັກໂນໂລຢີປຸງແຕ່ງ. ເພື່ອເພີ່ມມູນຄ່າສິນຄ້າສົ່ງອອກ, ໄປຄຽງຄູ່ກັບການຍູ້ແຮງການລົງທຶນດ້ານວິທະຍາສາດເຕັກໂນໂລຢີແລ້ວ, ຂະແໜງ ໝາກມ່ວງຫິມະພານພວມສຸມໃສ່ຫັນຜະລິດຕະພັນເປັນຫຼາຍຮູບຫຼາຍແບບ, ພິເສດແມ່ນສ້າງບັນດາຜະລິດຕະພັນໃໝ່ມີມູນຄ່າ. ທ່ານ ຫວູວັນຕີກ, ຫົວໜ້າຄະນະວິທະຍາສາດເຕັກໂນໂລຢີ ມະຫາວິທະຍາໄລແຫ່ງຊາດ ຮ່າໂນ້ຍ, ຖືວ່າ:
“ຈາກໝາກມ່ວງຫິມະພານ ສາມາດຜະລິດຫົວນຳ້ມັນໄດ້, ແລະຈາກເປືອກແກ່ນໝາກມ່ວງຫິມະພານສາມາດຜະລິດເຊື້ອເພີງ ແລະ ຈາກຢາງຂອງຕົ້ນໝາກມ່ວງຫິມະພານສາມາດຜະລິດນຳ້ສີທີ່ມີຄວາມທົນທານກັບອາກາດຮ້າຍແຮງໄດ້. ບັນດາສິ່ງດັ່ງກ່າວແມ່ນຜະລິດຕະພັນກະເສດເຕັກໂນໂລຢີສູງ, ນຳມາເຊິ່ງມູນຄ່າສົ່ງອອກສູງກ່ວາ”
 |
ຄືໄດ້ກ່າວມາຂ້າງເທິງ, ຜະລິດຕະພັນໝາກມ່ວງຫິມະພານຂອງ ຫວຽດນາມ ໄດ້ສົ່ງອອກຕົ້ນຕໍ່ແມ່ນບໍ່ທັນໄດ້ຮັບການປຸງແຕ່ງເປັນຕົ້ນໄປຍັງຕະຫຼາດ: ອາເມລິກາ, ອີຢູ, ຍີ່ປຸ່ນ ແລະ ຈີນ… ແມ່ນບັນດາຕະຫຼາດໃຫຍ່, ມີຄວາມຕ້ອງການດ້ານຄຸນນະພາບ ແລະ ຫຼັກອະນາໄມສູງ. ໃນຂະນະນັ້ນ, ເຕັກໂນໂລຢີປຸງແຕ່ງຂອງບໍລິສັດໃຫຍ່ສົ່ງອອກໝາກມ່ວງຫິມະພານຫຼາຍແຫ່ງຂອງ ຫວຽດນາມ ຍັງມີສິ່ງຈຳກັດຢູ່. ຕາມທ່ານ ຫງວຽນກວາງຮວຽນ, ຜູ້ອຳນວຍການບໍລິສັດຫຸ້ນສ່ວນສົ່ງອອກ ຮ່ວາງເຊີນ (ແຂວງ ບີ່ງເຟືອກ) ແລ້ວ, ສິ່ງສຳຄັນທີ່ສຸດໃນປະຈຸບັນແມ່ນ ລັດຕ້ອງມີນະໂຍບາຍໜູນຊ່ວຍບັນດາບໍລິສັດສົ່ງອອກໝາກມ່ວງຫິມະພານ ເພີ່ມທະວີການລົງທຶນປະກອບເຕັກໂນໂລຢີປຸງແຕ່ງ, ຜະລິດຜະລິດຕະພັນຫຼາຍຮູບແບບ ແລະ ເປີດກ້ວາງຕະຫຼາດ. ທ່ານ ຫງວຽນກວາງຮວຽນ, ໃຫ້ຮູ້ວ່າ:
“ປະຈຸບັນ, ມີວິສາຫະກິດຜະລິດປຸງແຕ່ງດ້ວຍຂອບຂະໜາດໃຫຍ່ 160 ແຫ່ງ ແລະ ໃນນັ້ນມີວິສາຫະກິດ 30 ແຫ່ງເລີ່ມຕົ້ນການລົງທຶນ, ສ້າງພາບພົດຂອງຕົນ, ໝູນໃຊ້ບັນດາມາດຕະຖານສາກົນກ່ຽວກັບຫຼັກອະນາໄມດ້ານສະບຽງອາຫານຢ່າງເຂັມງວດເພື່ອເຊື່ອມໂຍງກັບປະເທດຕ່າງໆ. ແຕ່ໄລຍະຈະມາເຖິງ, ທ່າອ່ຽງນີ້ສືບຕໍ່ໄດ້ຮັບການຜັນຂະຫຍາຍຢ່າງແຮງກ່ວາອີກ.”
ນອກຈາກປັດໄຈຄຸນນະພາບຜະລິດຕະພັນແລ້ວ, ປະຈຸບັນ, ວິສາຫະກິດເຄື່ອນໄຫວໃນຂະແໜງໝາກມ່ວງຫິມະພານຫຼາຍແຫ່ງຍັງເອົາໃຈໃສ່ຫຼາຍກ່ວາເຖິງການພັດທະນາຕະຫຼາດ, ຍູ້ແຮງການລົງທຶນປະກອບເຕັກໂນໂລຢີຜະລິດປຸງແຕ່ງ, ສ້າງເຄື່ອງໝາຍການຄ້າ. ໃນປີນີ້ ແລະ ໄລຍະຈະມາເຖິງ, ຂະແໜງໝາກມ່ວງຫິມະພານ ຫວຽດນາມ ຈະເອົາໃຈໃສ່ກ່ວາອີກເຖິງບັນຫາຫຼັກອະນາໄມດ້ານສະບຽງອາຫານ ເພື່ອແນໃສ່ຫລຸດຜ່ອນບັນດາຄວາມສ່ຽງໃນການຜະລິດ ແລະ ສົ່ງອອກແກ່ນໝາກມ່ວງຫິມະພານໄປສູ່ຕະຫຼາດໂລກ.