(vovworld) -ໄຕງວຽນ ແມ່ນເຂດມີທີ່ຕັ້ງຍຸດທະສາດສຳຄັນພິເສດ ກ່ຽວກັບເສດຖະກິດ ສັງຄົມ, ການປ້ອງກັນຊາດປ້ອງກັນຄວາມສະຫງົບ ຂອງ ຫວຽດນາມ. ເພື່ອຂຸດຄົ້ນຄວາມສາມາດບົ່ມຊ້ອນ, ທ່າໄດ້ປຽບຢ່າງສຸດຂີດເພື່ອພັດທະນາເສດຖະກິດ ສັງຄົມ, ບັນດາແຂວງ ເຂດໄຕງວຽນ ມີນະໂຍບາຍບຸລິມະສິດພິເສດກໍຄືຕ້ອງມີແຫລ່ງກຳລັງລົງທຶນຢ່າງແຂງແຮງກວ່າ ເພື່ອພັດທະນາຢ່າງວ່ອງໄວ ແລະ ໝັ້ນຄົງ.
ຊາວເຜົ່າຢູ່ໄຕງວຽນ ເຂົ້າຮ່ວມງານບຸນ
ພາບ:tuyengiao.vn
|
ດ້ວຍເງື່ອນໄຂທຳມະຊາດ, ດິນຟ້າອາກາດແຕກຕ່າງກັບບັນດາເຂດອື່ນ, ໄຕງວຽນ ມີທ່າໄດ້ປຽບໃນການພັດທະນາເສດຖະກິດກະສິກຳ, ໃນນັ້ນ ຕົ້ນຕໍແມ່ນບັນດາຕົ້ນໄມ້ອຸດສາຫະກຳສຳຄັນຄື: ກາເຟ, ໝາກພິກໄທ, ຢາງພາລາ. ນອກນັ້ນ, ນີ້ກໍແມ່ນເຂດປູກຜັກ, ດອກໄມ້ດ້ວຍເຕັກໂນໂລຊີສູງຮັບໃຊ້ການສົ່ງອອກ. ດ້ວຍທີ່ຕັ້ງຢູ່ຍານລຸ່ມຂອງແມ່ນ້ຳໃຫຍ່ 3 ລຳເຊັ່ນ: ເຊຊານ, ຊະເຣປົກ ແລະ ແມ່ນ້ຳດົງນາຍ. ໄຕງວຽນ ມີຄວາມສາມາດບົ່ມຊ້ອນໃຫຍ່ດ້ານໄຟຟ້ານ້ຳຕົກ, ກວມ 27% ຄວາມສາມາດບົ່ມຊ້ອນດ້ານເສດຖະກິດ, ເຕັກນິກໄຟຟ້ານ້ຳຕົກຂອງຫວຽດນາມ. ໄຕງວຽນ ມີປະລິມານໂລຫະປະເພດຕ່າງໆຫລາຍສົມຄວນຄື: ໂບສິດ, ບໍ່ຄຳ, ວັດສະດຸກໍ່ສ້າງ, ….ອາກາດ ແລະ ເງື່ອນໄຂທຳມະຊາດເອື້ອອຳນວຍຄວາມສະດວກ, ເໝາະສົມກັບການຜັກຜ່ອນບຳລຸງສຸຂະພາບ, ໄຕງວຽນ ມີສະຖານທີ່ທ່ອງທ່ຽວລືຊື່ຫລາຍແຫ່ງຄື: ດາລາດ (ເລີມດົງ), ກອນປະລົງ(ກອນຕູມ). ທ່ານ ເຈີນວຽດຮຸ່ງ, ຮອງຫົວຫນ້າຄະນະປະຈຳຄະນະຊີ້ນຳເຂດໄຕງວຽນໃຫ້ຮູ້ວ່າ:
“ປະຈຸບັນ, ທ່ານນາຍົກລັດຖະມົນຕີ ໄດ້ເຫັນດີຕໍ່ຫລັກການ ແລະ ມອບໃຫ້ກະຊວງແຜນການ ແລະ ການລົງທຶນເປັນເຈົ້າພາບ, ສົມທົບກັບບັນດາກະຊວງ, ຂະແຫນງການ ແລະ ຄະນະຊີ້ນຳເຂດໄຕງວຽນ ສຳຫລວດກວດຄືນບັນດານະໂຍບາຍທີ່ມີຢູ່ແລ້ວ ແລະ ສຸມໃສ່ເຂົ້າບັນດາຂົງເຂດຊື່ງໄຕງວຽນ ມີທ່າແຮງ. ດ້ວຍບັນດານະໂຍບາຍດຶງດູດການລົງທຶນເຂົ້າເຂດໄຕງວຽນ ທີ່ນັບມື້ນັບລະອຽດກວ່າ. ຕົວຢ່າງຄືຂົງເຂດທ່ອງທ່ຽວ, ຂົງເຂດປູກຕົ້ນໄມ້ອຸດສາຫະກຳເຊັ່ນ: ກາເຟ, ຢາງພາລາ, ບັນດາປະເພດຕົ້ນໄມ້ຊື່ງ ໄຕງວຽນ ມີທ່າແຮງ.”
ປະຈຸບັນ ເງິນລົງທຶນເຂົ້າເຂດໄຕງວຽນ ຍັງຄົງກວມອັດຕາສ່ວນຫນ້ອຍໃນຍອດຈຳນວນເງິນລົງທຶນຂອງທັງປະເທດ. ການດຶງດູດເງິນລົງທຶນໂດຍກົງຂອງຕ່າງປະເທດເຂົ້າຂົງເຂດນີ້ ຍັງຈຳກັດ ນັບທັງຈຳນວນໂຄງການ, ຈຳນວນທຶນ ແລະ ພຽງແຕ່ສຸມໃສ່ ຢູ່ແຂວງ ເລີມດົງ ເປັນຕົ້ນຕໍ. ເມື່ອທຽບໃສ່ທັງປະເທດ GDP ຂອງ ເຂດໄຕງວຽນ ບັນລຸພຽງປະມານ 9%. ອັດຕາຄອບຄົວທຸກຍາກຍັງຢູ່ໃນລະດັບສູງຢູ່, ໃນນັ້ນ ຄອບຄົວທຸກຍາກສ່ວນຫລາຍແມ່ນຊາວຊົນເຜົ່າສ່ວນຫນ້ອຍ. ຕາມບັນດາຜູ້ຊ່ຽວຊານດ້ານເສດຖະກິດແລ້ວ, ການເພີ່ມທະວີຄວາມສະຫນິດຕິດພັນລະຫວ່າງທະນາຄານກັບກະສິກຳ, ຊາວກະສິກອນ ແລະ ຊົນນະບົດ ໃນລະບົບຜະລິດເພື່ອຍົກສູງມູນຄ່າຜະລິດຕະພັນກະສິກຳ ຕາມບັນດາຮູບແບບຮ່ວມສຳພັນໃນການຜະລິດ, ໝູນໃຊ້ເຕັກໂນໂລຊີສູງນັ້ນ ແມ່ນຫນຶ່ງໃນບັນດາຂົງເຂດຈຸດສຸມທີ່ຄວນລົງທຶນເຂົ້າເຂດໄຕງວຽນໃນປີນີ້. ໄລຍະຈະມາເຖິງ, ບັນດາທະນາຄານການຄ້າ ຈະລົງທຶນປະມານ 15.000 ຕື້ດົງເຂົ້າເຂດໄຕງວຽນ, ໃນນັ້ນ ສຸມໃສ່ ເຂົ້າບັນດາຂົງເຂດ ຕົ້ນຕໍ ຄື: ໄຟຟ້ານ້ຳຕົກ, ໄຟຟ້າໃຊ້ພະລັງຄວາມຮ້ອນ, ຄົມມະນາຄົມ, ຜະລິດກະສິກຳໝູນໃຊ້ເຕັກໂນໂລຊີສູງ. ທ່ານ ຫງວຽນກີມແອງ, ຮອງຜູ້ວ່າການທະນາຄານແຫ່ງລັດໃຫ້ຮູ້ວ່າ:
“ຂະແຫນງທະນາຄານຈະສືບຕໍ່ຍູ້ແຮງການລົງທຶນສິນເຊື່ອເຂົ້າບັນດາແຂວງ ໄຕງວຽນ, ໃນນັ້ນ ກຳນົດ ກະສິກຳ, ຊາວກະສິກອນ, ຊົນນະບົດເວົ້າລວມ ແລະ ການລົງທຶນເຂົ້າຜະລິດຕະພັນທີ່ມີທ່າແຮງຂອງເຂດຄື: ກາເຟ, ຊາ, ຢາງພາລາ… ແມ່ນຂົງເຂດໄດ້ຮັບບຸລິມະສິດ. ພິເສດແມ່ນບຸລິມາສິດໃຫ້ການຜະລິດກະສິກຳຕາມລະບົບຮ່ວມສຳພັນ, ຫຼືຜະລິດອຸດສາຫະກຳທີ່ນຳໃຊ້ເຕັກໂນໂລຊີສູງໃນການຜະລິດກະສິກຳໄດ້ກູ້ຢືມທຶນ.”
ໃນໄລຍະຈະມາເຖິງ, ບັນດາແຂວງ ໄຕງວຽນ ສືບຕໍ່ຫັນບັນດາແຜນນະໂຍບາຍ, ນະໂຍບາຍຂອງລັດຖະບານເປັນລະອຽດ, ປ່ຽນໃຫມ່ກົນໄກ, ນະໂຍບາຍເພື່ອສຸມໃສ່ປັບປຸງສະພາບແວດລ້ອມແຫ່ງການລົງທຶນ, ດຶງດູດແຫລ່ງກຳລັງຢູ່ພາຍໃນ ແລະ ຕ່າງປະເທດເພື່ອສຸມໃສ່ບັນດາຂົງເຂດຫລັກແຫລ່ງໃຫ້ເໝາະສົມກັບຄວາມສາມາດບົ່ມຊ້ອນ, ທ່າໄດ້ປຽບທີ່ໄດ້ຮັບການກຳນົດ. ທ່ານ ຫວູວັນຕື, ຜູ້ອຳນວຍການສູນສົ່ງເສີມການລົງທຶນ, ການຄ້າ ແລະ ການທ່ອງທ່ຽວ ແຂວງ ເລີມດົງ ໃຫ້ຮູ້ວ່າ: ແຂວງ ເລີມດົງ ເວົ້າສະເພາະ ແລະ ບັນດາແຂວງ ໄຕງວຽນ ຮຽກຮ້ອງບັນດານັກລົງທຶນທີ່ມີຄວາມສຸດຈິດສຸດໃຈ, ມີແຫລ່ງກຳລັງ, ມີຄວາມສາມາດເຂົ້າມາລົງທຶນ.
“ແຂວງ ເລີມດົງ ປະກາດໃຊ້ຫລາຍນະໂຍບາຍຫນູນຊ່ວຍໃຫ້ບັນດານັກລົງທຶນເຂົ້າໃນຂົງເຂດກະສິກຳ, ລະອຽດຄື: ຫນູນຊ່ວຍອັດຕາດອກເບ້ຍພາຍຫລັງລົງທຶນສຳລັບ 3 ຂົງເຂດ, ນັ້ນແມ່ນຂົງເຂດຜະລິດກະສິກຳເຕັກໂນໂລຊີສູງ, ການຜະລິດປຸງແຕ່ງ, ວັດສະດຸກໍ່ສ້າງຈາກທຳມະຊາດ ແລະ ອຸດສາຫະກຳປຸງແຕ່ງຜະລິດຕະພັນກະເສດ. ພວກຂ້າພະເຈົ້າມີນະໂຍບາຍຫນູນຊ່ວຍເພື່ອພັດທະນາເຄື່ອງໝາຍການຄ້າໃຫ້ແກ່ວິສາຫະກິດ, ພິເສດແມ່ນວຽກງານເປີດກວ້າງຕະຫລາດ.”
ຫວ່າງແລ້ວນີ້ ບັນດາແຂວງ ໄຕງວຽນ ໄດ້ຈັດຕັ້ງກອງປະຊຸມສົ່ງເສີມການລົງທຶນຢູ່ເຂດໄຕງວຽນຄັ້ງທີ 3, ແນໃສ່ດຶງດູດການລົງທຶນຂຸດຄົ້ນບັນດາຄວາມສາມາດບົ່ມຊ້ອນເພື່ອໃຫ້ເຂດໄຕງວຽນ ພັດທະນາເສດຖະກິດສັງຄົມແບບຍືນຍົງ, ຮັບປະກັນຊີວິດສັງຄົມ.