(vovworld)- ເສດຖະກິດຫວຽດນາມ ໃນຊຸມເດືອນຕົ້ນປີ ເຖິງວ່າຍັງປະສົບກັບຄວາມຫຍຸ້ງຍາກຫລາຍຢ່າງກໍຕາມ, ແຕ່ກໍ່ປະກົດມີບັນດາສັນຍານທີ່ຕັ້ງຫນ້າສະແດງໃຫ້ເຫັນວ່າ ພວມຄ່ອຍໆຟື້ນຕົວ, ພິເສດແມ່ນຂົງເຂດອຸດສາຫະກຳ. ໃນລາຍການເສດຖະກິດພາກນີ້
ດັດຊະນີການຜະລິດໃນທ່ົວຂະແຫນງອຸດສາຫະກຳ(IIP) ໃນເດືອນ 7/2013 ເພີ່ມຂຶ້ນ 7% ແລະ ໄລ່ລວມດັດຊະນີການຜະລິດອຸດສາຫະກຳໃນ 7 ເດືອນຕົ້ນປີ ນີ້ຄາດວ່າເພີ່ມຂຶ້ນ 5,2% ເມື່ອທຽບໃສ່ໄລຍະດຽວກັນຂອງປີກາຍ. ເປັນຫນ້າສົນໃຈ ນັ້ນແມ່ນ ຢູ່ແຂວງ, ນະຄອນໃຫຍ່ຈຳນວນຫນຶ່ງ ພາຍຫລັງໄລຍະຫນຶ່ງພັດທະນາຢ່າງຊັກຊ້າ, ມາຮອດປະຈຸບັນ ລ້ວນແຕ່ບັນລຸລະດັບຈະເລີນເຕີບໂຕສູງກວ່າເມື່ອທຽບໃສ່ໄລຍະດຽວກັນຂອງປີກາຍຄື: ຮ່າໂນ້ຍ, ນະຄອນໂຮ່ຈິມີນ, ດົ່ງນາຍ, ບີ່ງເຢືອງ, ຫາຍຟ່ອງ, ບັກນີງ, ຫວີງຟຸກ, ເກີນເທີ, ຫາຍເຢືອງ, ຮຶງອຽນ,ດາຫນັງ… ການຜັນແປຂອງດັດຊະນີການຜະລິດອຸດສາຫະກຳ ໃນ 7 ເດືອນຜ່ານມາສະແດງໃຫ້ເຫັນວ່າ: ເມື່ອທຽບໃສ່ໄລຍະດຽວກັນຂອງປີກາຍ ການຜະລິດອຸດສາຫະກຳໄດ້ມີສັນຍານຟື້ນຕົວ. ບາງຂະແຫນງຄື: ຕຳ່ແຜ່ນຕັດຫຍິບ, ເກີບຫນັງ, ເຄື່ອງອາໄຫລ່ເອເລັກໂຕນິກ ແລະ ຄອມພິວເຕີ, ໂທລະສັບມືຖື…ການຜະລິດມີຄວາມສະດວກພໍສົມຄວນ, ຍ້ອນມີຕະຫລາດສົ່ງອອກ ແລະ ໃບສັ່ງຊື້ສິນຄ້າເປັນປົກກະຕິກວ່າ. ທ່ານນາງ ຟ້າມທິເຟືອງຮວາ, ຜູ້ອຳນວຍການບໍລິສັດຕັດຫຍິບ ຮຶງອຽນ ໃຫ້ຂໍ້ສັງເກດວ່າ:
“ປີນີ້ໃບສັ່ງຊື້ສິນຄ້າຫລາຍກວ່າເມື່ອທຽບໃສ່ທຸກປີ. ສ່ວນຫນຶ່ງ ຍ້ອນປະເທດບ້ານໃກ້ເຮືອນຄຽງຈຳນວນຫນຶ່ງມີລາຍຮັບເພີ່ມຂຶ້ນຢ່າງວ່ອງໄວ, ໃນຂະນະແຫລ່ງສິນຄ້າບໍ່ຕອບສະຫນອງຄວາມຕ້ອງການໄດ້ ສະນັ້ນ ເຂົາເຈົ້າສົ່ງໃບສັ່ງຊື້ສິນຄ້າມາຫວຽດນາມຫລາຍພໍສົມຄວນ. ສິ່ງດັ່ງກ່າວສ້າງທ່າໄດ້ປຽບໃຫ້ແກ່ບັນດາວິສາຫະກິດຂະແຫນງຕຳ່ແຜ່ນຕັດຫຍິບ.”
ພາບປະກອບ:internet
|
ບັນດາຂະແຫນງອຸດສາຫະກຳອື່ນຄື: ຜະລິດລົດໃຊ້ກົນຈັກ, ຜະລິດເຈ້ຍ ແລະ ບັນດາຜະລິດຕະພັນຈາກເຈ້ຍ, ເຄມີ, ຜະລິດຕະພັນຈາກທາດໂລຫະ ລ້ວນແຕ່ບັນລຸລະດັບຈະເລີນເຕີບໂຕດີພໍສົມຄວນຈາກ 10-14%. ຄຽງຄູ່ກັນນັ້ນ ດັດຊະນີການຈຳຫນ່າຍບັນດາຜະລິດຕະພັນອຸດສາຫະກຳປຸງແຕ່ງ, ປະດິດສ້າງກໍເປັນປົກກະຕິຄື: ຜະລິດຕະພັນເຄື່ອງດືມ, ເຄື່ອງນຸ່ງ, ອຸປະກອນໄຟຟ້າ, …..ພ້ອມກັບດັດຊະນີການເຕີບໂຕ, ດັດຊະນີສິນຄ້າຄ້າງສາງໃນຂະແຫນງອຸດສາຫະກຳເວົ້າລວມກໍຫລຸດຜ່ອນກວ່າ 18%. ໃນຂະນະນັ້ນ ບາງຂະແຫງສິນຄ້າມີຈຳນວນສິນຄ້າຄ້າງສາງຫລາຍພໍສົມຄວນເມື່ອທຽບໃສ່ໄລຍະດຽວກັນຂອງປີກາຍ, ມາຮອດປະຈຸບັນໄດ້ຫລຸດຜ່ອນພໍສົມຄວນຄື: ເຄື່ອງອາໄຫລ່ເອເລັກໂຕນິກຫລຸດຜ່ອນກວ່າ 50%, ຊີມັງ ຫລຸດຜ່ອນເກືອບ 35%, ແຜ່ນແພຫລຸດຜ່ອນກວ່າ 31%. ຕາມການເວລາ, ດັດຊະນີສິນຄ້າຄ້າງສາງຂອງຫລາຍຂະແຫນງການ, ຂົງເຂດອຸດສາຫະກຳອື່ນກໍຄ່ອຍໆຫລຸດຜ່ອນໃນຊຸມເດືອນຕົ້ນປີ. ບັນດາການຫັນປ່ຽນຢ່າງຕັ້ງຫນ້າໃນການຜະລິດ ແລະ ຈຳຫນ່າຍຜະລິດຕະພັນອຸດສາຫະກຳໃນ 7 ເດືອນຕົ້ນປີ ສະແດງໃຫ້ເຫັນວ່າບັນດາສັນຍານດີພໍສົມຄວນ, ເຖິງຢ່າງໃດກໍຕາມ, ຍັງຄົງຈຳເປັນຕ້ອງນຳໃຊ້ຫລາຍມາດຕະການຢ່າງຄົບຊຸດເພື່ອສືບຕໍ່ຟື້ນຕົວການຜະລິດອຸດສາຫະກຳໃນຊຸມເດືອນທ້າຍປີ. ທ່ານ ຫວໍຈີແທ່ງ, ຜູ້ຊ່ຽວຊານດ້ານເສດຖະກິດໄດ້ໃຫ້ຂໍ້ສັງເກດວ່າ:
“ເປັນທີ່ຈະແຈ້ງແລ້ວວ່າ ຄວາມສ່ຽງຍັງມີຢູ່, ແຕ່ໄດ້ຫລຸດຜ່ອນຫລາຍພໍສົມຄວນແລ້ວ. ຈາກການຫລຸດຜ່ອນຄວາມສ່ຽງໄດ້ສ້າງເງື່ອນໄຂຫລາຍຢ່າງໃຫ້ຫວຽດນາມ ເພື່ອບໍລິຫານນະໂຍບາຍຫນູນຊ່ວຍການຜະລິດດຳເນີນທຸລະກິດຢ່າງມີໄຫວພິບ. ເນື້ອໃນຈິດໃຈລວມ ແມ່ນບໍ່ຜ່ອນຄາຍຫລືປະຕິບັດນະໂຍບາຍກະຕຸ້ນຄວາມຕ້ອງການຢ່າງແຮງຄືໃນປີ 2009, ເພາະລັດຖະບານ ມີສານຢ່າງຈະແຈ້ງ ວ່າ ສືບຕໍ່ຮັກສາ, ຢືດໝັ້ນເສດຖະກິດມະຫາພາກເປັນປົກກະຕິ.”
ໃນວາລະປະຊຸມປະຈຳເດືອນ 7 ຂອງລັດຖະບານ, ເມື່ອໃຫ້ຂໍ້ສັງເກດກ່ຽວກັບສະພາບການເສດຖະກິດໃນເດືອນ 7 ແລະ 7 ເດືອນຂອງປີ 2013, ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ: ຄຽງຄູ່ກັບການຮັກສາເສດຖະກິດມະຫາພາກເປັນປົກກະຕິ, ລັດຖະບານ ຈະສືບຕໍ່ສຸມໃສ່ຜັນຂະຫຍາຍບັນດາກົນໄກນະໂຍບາຍຫນູນຊ່ວຍການຈຳຫນ່າຍຜະລິດຕະພັນເພື່ອຫລຸດຜ່ອນສິນຄ້າຄ້າງສາງ. ຕາມທິດດັ່ງກ່າວ, ລັດຖະບານໄດ້ຊີ້ນຳໃຫ້ບັນດາກະຊວງ, ຂະແຫນງການ ຄວນເປັນເຈົ້າການໃນການໝູນໃຊ້ບັນດາມາດຕະການ, ນະໂຍບາຍກ່ຽວກັບເງິນຕາ, ງົບປະມານ ຢ່າງມີໄຫວພິບ, ຄວບຄຸມລາຄາໃນທ້ອງຕະຫລາດຢ່າງແຫນ້ນແຟ້ນ… ຊ່ວຍໃຫ້ພື້ນຖານເສດຖະກິດເວົ້າລວມ ແລະ ຂົງເຂດອຸດສາຫະກຳເວົ້າສະເພາະ ບັນລຸຈຸດໝາຍການຈະເລີນເຕີບໂຕທີ່ໄດ້ວາງອອກ. ທ່ານ ເລກວກເຟືອງ, ຮອງຜູ້ອຳນວຍການສູນ ຂໍ້ມູນຂ່າວສານອຸດສາຫະກຳ - ການຄ້າ, ສັງກັດກະຊວງອຸດສາຫະກຳ - ການຄ້າ ຫວຽດນາມ ໃຫ້ຮູ້ວ່າ:
“ແກ້ໄຂຄວາມຫຍຸ້ງຍາກ, ຫນູນຊ່ວຍຕະຫລາດ ຈະສືບຕໍ່ໄດ້ຮັບການຜັນຂະຫຍາຍ ແລະ ໃນຊຸມເດືອນທ້າຍປີ ຈະໄດ້ຮັບການຍູ້ແຮງກວ່າ. ການສົ່ງອອກ ແມ່ນສົ້ນອອກອັນໃຫຍ່ຫລວງຂອງພື້ນຖານເສດຖະກິດ, ການສົ່ງອອກເພີ່ມຂຶ້ນກໍຊ່ວຍຍູ້ແຮງຂະແຫນງອຸດສາຫະກຳກວ່າ.”
ພື້ນຖານເສດຖະກິດຟື້ນຕົວ, ການສົ່ງອອກສືບຕໍ່ເຕີບໂຕຈະແມ່ນບັນດາປັດໄຈສຳຄັນເພື່ອໃຫ້ການຜະລິດອຸດສາຫະກຳສືບຕໍ່ໄດ້ຮັບການປັບປຸງໃນໄລຍະຈະມາເຖິງ. ຄາດຄະເນວ່າ ການຜະລິດອຸດສາຫະກຳໃນຊຸມເດືອນທ້າຍປີ ຈະບັນລຸການເຕີບໂຕ 5,7%, ປະກອບສ່ວນຢ່າງຕັ້ງຫນ້າເຂົ້າໃນຈຸດໝາຍບັນລຸລະດັບການເຕີບໂຕເສດຖະກິດລວມ 5,5% ໃນປີ 2013.