ຄຸນນະພາບ ແລະ ປະລິມານໃນການດຶງດູດເງິນລົງທຶນຂອງຕ່າງປະເທດປີ 2013

ວັນພະຫັດ ທີ 19 ທັນວາ ຄ.ສ. 2013 | 15:53:27

(vovworld)- ເຖິງວ່າຖືກປະເຊີນຫນ້າກັບຄວາມຫຍຸ້ງຍາກຫລາຍຢ່າງກໍຕາມ, ແຕ່ສະພາບການດຶງດູດເງິນລົງທຶນໂດຍກົງຂອງຕ່າງປະເທດເຂົ້າຫວຽດນາມຫລື FDI ປີ 2013 ຍັງບັນລຸບັນດາໝາກຜົນດີພໍສົມຄວນ. ເປັນຫນ້າສົນໃຈນັ້ນແມ່ນ ໃນໂຄງປະກອບດຶງດູດບັນດາໂຄງການລົງທຶນໄດ້ມີການຫັນທິດ, ໃນນັ້ນເອົາໃຈໃສ່ເປັນພິເສດເຖິງບັນດາໂຄງການ FDI ທີ່ມີຄຸນນະພາບສູງ, ເໝາະສົມກັບວິວັດການສ້າງໂຄງປະກອບ ແລະ ພັດທະນາເສດຖະກິດຄືນໃຫມ່ຢູ່ຫວຽດນາມ. ນັກຂ່າວໂຕຕວນມີບົດຂຽນທີ່ພາດຫົວເລື່ອງວ່າ: ຄຸນນະພາບ ແລະ ປະລິມານໃນການດຶງດູດເງິນລົງທຶນ ຂອງຕ່າງປະເທດປີ 2013.

ຄຸນນະພາບ ແລະ ປະລິມານໃນການດຶງດູດເງິນລົງທຶນຂອງຕ່າງປະເທດປີ 2013 - ảnh 1

ພາບປະກອບ:internet

ໂດຍຜ່ານຜ່າການທ້າທາຍຫລາຍຢ່າງ, ເປັນຕົ້ນແມ່ນຜົນສະທ້ອນຈາກວິກິດການເສດຖະກິດໂລກກໍຕາມ, ແຕ່ສະພາບການດຶງດູດເງິນລົງທຶນໂດຍກົງຂອງຕ່າງປະເທດເຂົ້າຫວຽດນາມໃນປີ 2013 ຍັງຄົງບັນລຸໝາກຜົນດີພໍສົມຄວນ, ລື່ນກາຍຄາດໝາຍທີ່ວາງອອກບໍ່ພຽງແຕ່ດ້ານປະລິມານເທົ່ານັ້ນ ຫາກນັບທັງຄຸນນະພາບອີກດ້ວຍ, ພິເສດ ຄວາມສາມາດການປ່ອຍເງິນຂອງບັນດາໂຄງການໄດ້ຮັບການປັບປຸງຢ່າງເຫັນໄດ້ຊັດ. ໄລ່ມາຮອດທ້າຍເດືອນ 11, ການດຶງດູດທຶນ FDI ໃນທົ່ວປະເທດບັນລຸໄດ້ 20,8 ຕື້ USD. ຄາດວ່າ ທັງປີເພີ່ມຂຶ້ນ 5,5% ເມື່ອທຽບໃສ່ໄລຍະດຽວກັນຂອງປີກາຍ, ໃນນັ້ນ ການປ່ອຍເງິນລົງທຶນບັນລຸ 10,5 ຕື້ USD. ບັນດານັກລົງທຶນຕ່າງປະເທດໄດ້ລົງທຶນເຂົ້າ 18 ຂະແຫນງ, ຂົງເຂດໃນນັ້ນ ສຸມໃສ່ເຂົ້າຂົງເຂດອຸດສາຫະກຳເຕັກໂນໂລຊີສູງ, ອຸດສາຫະກຳປຸງແຕ່ງ, ປະດິດສ້າງດ້ວຍ 557 ໂຄງການລົງທຶນຈົດທະບຽນໃຫມ່. ພິເສດບັນດາໂຄງການລົງທຶນ FDI ໃນປີນີ້ ໄດ້ມີການຫັນປ່ຽນຢ່າງເຫັນໄດ້ຊັດ ດ້ວຍຈຳນວນໂຄງການເຂົ້າຂົງເຂດເຕັກໂນໂລຊີ ນັບມື້ນັບຫລາຍ, ອັນໄດ້ນຳມາມູນຄ່າເພີ່ມສູງ. ບັນດາໂຄງການເຕັກໂນໂລຊີຕຳ່ ແລະ ປານກາງ ນຳໃຊ້ວັດຖຸດິບ, ເຊື້ອເພິງເປັນຈຳນວນຫລາຍ ສາມາດກໍ່ມົນລະພິດເຖິງສິ່ງແວດລ້ອມໄດ້ຫລຸດຜ່ອນຢ່າງເຫັນໄດ້ຊັດ. ເພື່ອບັນລຸໄດ້ໝາກຜົນນີ້, ຫວຽດນາມ ໄດ້ເປັນເຈົ້າການສ້າງເງື່ອນໄຂດຶງດູດຫລາຍໂຄງການໃຫຍ່, ໃນນັ້ນ ຖືເປັນສຳຄັນບັນຫາປ່ອຍເງິນໃຫ້ແກ່ບັນດາໂຄງການ. ທ່ານ ໂດ໋ເຍີດຮ່ວາງ, ຫົວຫນ້າກົມລົງທຶນຕ່າງປະເທດ, ຂຶ້ນກັບກະຊວງແຜນການ ແລະ ການລົງທຶນຫວຽດນາມໃຫ້ຂໍ້ສັງເກດວ່າ:

“ໃນຈຳນວນທຶນຈົດທະບຽນ, ພວກຂ້າພະເຈົ້າເຫັນວ່າ ມີ 2 ທ່າອ່ຽງຢ່າງເຫັນ ໄດ້ຊັດ. ທີຫນຶ່ງແມ່ນສຸມໃສ່ເຂົ້າໃນບັນດາໂຄງການມີມູນຄ່າໃຫຍ່, ທີສອງແມ່ນບັນດາໂຄງການຂະຫນາດກາງ ແລະ ນ້ອຍ ເພື່ອມີທຶນຈົດທະບຽນຫລາຍຄືແນວນັ້ນ. ນີ້ແມ່ນສ່ວນຫນຶ່ງໃນຄວາມມານະພະຍາຍາມຊີ້ນຳບໍລິຫານຂອງລັດຖະບານ ແລະ ການປະສານສົມທົບຂອງບັນດາກະຊວງ, ຂະແຫນງການ ແລະ ທ້ອງຖິ່ນ ໃນແຕ່ລະໂຄງການເພື່ອສາມາດໄດ້ຮັບຫນັງສືອະນຸຍາດ ແລະ ຜັນຂະຫຍາຍໂດຍໄວ.”

ການລົງທຶນຂອງຍີ່ປຸ່ນປະຈຸບັນແມ່ນແຫລ່ງທຶນສຳຄັນສຳລັບພື້ນຖານເສດຖະກິດຫວຽດນາມ. ຍີ່ປຸ່ນ ຍັງຄົງແມ່ນປະເທດນຳຫນ້າກ່ຽວກັບການດຶງດູດທຶນ FDI ເຂົ້າຫວຽດນາມ ດ້ວຍຍອດຈຳນວນເງິນລົງທຶນຈົດທະບຽນໃຫມ່ ແລະ ເພີ່ມເຕີມແມ່ນ 5,7 ຕື້ USD, ກວມ 27% ຍອດຈຳນວນທຶນຈົດທະບຽນຢູ່ ຫວຽດນາມ. ວັນທີ 23/10/2013, ໂຄງການເຂດປະສົມກັ່ນນຳ້ມັນງິເຊີນ ມີຍອດລະດັບເງິນລົງທຶນກວ່າ 9 ຕື້ USD, ແມ່ນໂຄງການຮ່ວມທຸລະກິດລະຫວ່າງກຸ່ມບໍລິສັດນຳ້ມັນອາຍແກສຫວຽດນາມ (PVN), ບໍລິສັດນຳ້ມັນສາກົນ ຄູເວດ, ບໍລິສັດ Idemitsu Kosan ແລະ ບໍລິສັດເຄມີ Mitsui ຍີ່ປຸ່ນ ໄດ້ກາຍເປັນໂຄງການ FDI ມີຈຳນວນທຶນຫລາຍກວ່າໝູ່ຢູ່ຫວຽດນາມ. ພ້ອມກັນນັ້ນ, ໂຄງການໄຟຟ້າໃຊ້ພະລັງຄວາມຮ້ອນ ງິເຊີນ 2 ມີຍອດຈຳນວນເງິນລົງທຶນ 2,3 ຕື້ USD ໄລຍະຕົ້ນກໍໄດ້ຈົດທະບຽນເພີ່ມ 2,9 ຕື້ USD ໄດ້ເຮັດໃຫ້ແຂວງ ແທງຮວາ ກາຍເປັນທ້ອງຖິ່ນນຳຫນ້າໃນທົ່ວປະເທດກ່ຽວກັບການດຶງດູດທຶນ FDI . ຫນຶ່ງໃນບັນດາໂຄງການສຳຄັນອື່ນ ນັ້ນແມ່ນໂຮງງານຜະລິດໂທລະສັບມືຖື ແລະ ບັນດາອຸປະກອນໄຟຟ້າເອເລັກໂຕນິກ Samsung ຢູ່ແຂວງ ບັກນີງ ກໍໄດ້ເພີ່ມທຶນ 1 ຕື້ USD, ນຳຍອດຈຳນວນທຶນຂອງໂຄງການນີ້ຂຶ້ນເຖິງ ທຶນ 2,5 ຕື້ USD, ກາຍເປັນໂຮງງານ Samsung ໃຫຍ່ກວ່າໝູ່ໃນໂລກ. ນີ້ກໍແມ່ນໂຄງການບັນລຸໄລຍະສະຖິຕິກ່ຽວກັບການປ່ອຍທຶນ FDI ຢູ່ຫວຽດນາມ. ບັນດາການຫັນປ່ຽນຢ່າງຕັ້ງຫນ້າຂອງການຜັນຂະຫຍາຍບັນດາໂຄງການ FDI ໃນປີນີ້ ໄດ້ ແລະ ພວມປະກອບສ່ວນຍູ້ໄວວິວັດການຟື້ນຕົວພື້ນຖານເສດຖະກິດ ແລະ ປະກອບສ່ວນສຳຄັນເຂົ້າໃນວິວັດການສ້າງພື້ນຖານໂຄງປະກອບເສດຖະກິດຄືນໃຫມ່ຢູ່ຫວຽດນາມ.

ໃນສະພາບການ ແລະ ທ່າອ່ຽງປະຈຸບັນ, ຫວຽດນາມ ຍັງຕ້ອງການຄວາມມານະພະຍາຍາມຫລາຍຢ່າງເພື່ອສ້າງສະພາບແວດລ້ອມແຫ່ງການລົງທຶນຢ່າງດູດດື່ມກວ່າອີກ, ເປັນຕົ້ນແມ່ນເພີ່ມລັກສະນະແກ້ງແຍ້ງກັບບັນດາປະເທດຢູ່ພາກພື້ນໃນການດຶງດູດເງິນລົງທຶນຂອງຕ່າງປະເທດ. ຈາກບົດຮຽນປ່ອຍເງິນໃຫ້ແກ່ໂຄງການ Samsung, ກະຊວງແຜນການ ແລະ ການລົງທຶນ ສະເຫນີແນະ ຄວນໝູນໃຊ້ບັນດາກົນໄກບຸລິດມະສິດໃຫ້ແກ່ບັນດານັກລົງທຶນໃຫຍ່ຢ່າງຄົບຊຸດ, ສ້າງກຳລັງຫນູນໃຫ້ແກ່ວິວັດການປ່ອຍເງິນບັນດາໂຄງການໃຫ້ຖືກກັບຄວາມຄືບຫນ້າໃນການຜັນຂະຫຍາຍ. ບັນດາໂຄງການລົງທຶນເຂົ້າຫວຽດນາມໃນໄລຍະຈະມາເຖິງ ຈະບໍ່ສຸມໃສ່ຈຳນວນ ແລະ ໄດ້ຮັບການເລືອກເຟັ້ນຕາມທິດຍົກສູງຄຸນນະພາບກະແສທຶນ FDI, ບຸລິມະສິດບັນດາໂຄງການປະກອບສ່ວນຊ່ວຍໃຫ້ຫວຽດນາມ ສ້າງໂຄງປະກອບອັດຕາສ່ວນບັນດາຂົງເຂດມີຜົນປະໂຫຍດໃຫ້ແກ່ພື້ນຖານເສດຖະກິດ, ສັງຄົມຫວຽດນາມ. ທ່ານ ບຸ່ຍກວາງວີງ, ລັດຖະມົນຕີກະຊວງແຜນການ ແລະ ການລົງທຶນຫວຽດນາມ ຊີ້ແຈ້ງວ່າ:

“ບັນດາໂຄງການເຕັກໂນໂລຊີຕຳ່, ຫລ້າຫລັງ, ນຳໃຊ້ເຊື້ອເພິງຫລາຍ, ກໍ່ມົນລະພິດເຖິງສິ່ງແວດລ້ອມ ພວກເຮົາເດັດຂາດປະຕິເສດ. ຢູ່ ຮ່າໂນ້ຍ, ນະຄອນ ໂຮ່ຈິມີນ, ດົ່ງນາຍ… ບັນດາສູນໃຫຍ່ ແລະມີຄວາມສະດວກ, ພວກເຮົາຈະຈຳກັດບັນດາໂຄງການເຕັກໂນໂລຊີຂະຫນາດກາງ ແລະ ຕຳ່. ບັນດາໂຄງການເຕັກໂນໂລຊີສູງຈະໄດ້ຮັບບຸລິມະສິດລົງທຶນເຂົ້າໃນບັນດາສະຖານທີ່ດັ່ງກ່າວ. ”

ຕາມທິດນັ້ນ ບັນດາກະຊວງ, ຂະແຫນງການ, ທ້ອງຖິ່ນຕ່າງໆພວມກວດກາ, ເພີ່ມເຕີມບັນດານະໂຍບາຍບຸລິມະສິດສຳລັບບັນດາໂຄງການກໍ່ສ້າງພື້ນຖານໂຄງລ່າງເສດຖະກິດ ສັງຄົມ ທີ່ມີຂອບຂະຫນາດໃຫຍ່, ກະທົບເຖິງພື້ນຖານເສດຖະກິດ. ປະຕິບັດການຊີ້ນຳຂອງນາຍົກລັດຖະມົນຕີ, ບັນດາກະຊວງ, ຂະແຫນງການ ແລະ ທ້ອງຖິ່ນ ພວມສົມທົບກັນເພື່ອປະຕິບັດຈຸດໝາຍດຶງດູດແຫລ່ງທຶນ FDI ຢ່າງລະອຽດ, ຊ່ວຍຫວຽດນາມ ເພີ່ມລັກສະນະດູດດື່ມກວ່າໃນການດຶງດູດທຶນ FDI ໃນໄລຍະຈະມາເຖິງ.