(vovworld)- ເຖິງວ່າຖືກຜົນສະທ້ອນຈາກວິກິດການເສດຖະກິດໂລກກໍຕາມ, ແຕ່ ໃນ 6 ເດືອນຜ່ານມາ, ນະຄອນໂຮ່ຈິມິນ ຍັງຄົງແມ່ນຫນຶ່ງໃນບັນດາທ້ອງຖິ່ນນຳຫນ້າໃນທົ່ວປະເທດກ່ຽວກັບການດຶງດູດເງິນລົງທຶນໂດຍກົງຂອງຕ່າງປະເທດ(FDI). ໝາກຜົນດັ່ງກ່າວເປັນການພິສູດໃຫ້ເຫັນບັນດາມາດຕະການຊື່ງນະຄອນ ໄດ້ ແລະ ພວມປະຕິບັດເພື່ອດຶງດູດວິສາຫະກິດມີເງິນລົງທຶນຂອງຕ່າງປະເທດໃນບໍລິເວນນະຄອນ. ນັ້ນກໍແມ່ນເນື້ອໃນຂອງບົດຂຽນຂອງນັກຂ່າວ ກາວທວາທີ່ມີຫົວຂໍ້ວ່າ: ຄວາມມານະພະຍາຍາມດຶງດູດເງິນລົງທຶນໂດຍກົງຢູ່ນະຄອນໂຮ່ຈິມີນ
ພາບປະກອບ:internet
ໃນໄລຍະກວ່າ 18 ປີແຫ່ງການເຄື່ອນໄຫວຢູ່ຫວຽດນາມ, ບໍລິສັດ Saigon Precision ຈຳກັດ ມີ 100% ເງິນລົງທຶນຂອງຍີ່ປຸ່ນ, ຜະລິດສະເພາະຂະແຫນງກົນຈັກ ມີໂຮງງານ 3 ແຫ່ງ ຕັ້ງຢູ່ເຂດຜະລິດສົ່ງອອກ ລີງຈູງ 1, ລີງຈູງ 2, ເມືອງ ຖູດືກ ນະຄອນໂຮ່ຈິມີນ. ໃນວິວັດການເຄ່ືອນໄຫວ, ຄະນະຄຸ້ມຄອງເຂດຜະລິດສົ່ງອອກ, ເຂດອຸດສາຫະກຳນະຄອນໄດ້ສ້າງເງື່ອນໄຂສະດວກເພື່ອໃຫ້ບໍລິສັດຜັນຂະຫຍາຍບັນດາໂຄງການລົງທຶນ. ເພາະສະນັ້ນ ມາຮອດຈຸດເວລານີ້, ໃນຂະນະທີ່ມີວິສາຫະກິດຫລາຍແຫ່ງພວມປະສົບກັບຄວາມຫຍຸ້ງຍາກ, ການຜະລິດຖືກຊັກຊ້າ, ແຕ່ Saigon Precision ພັດມີແຜນການເພີ່ມທຶນ, ເຊົ່າທີ່ດິນກໍ່ສ້າງໂຮງງານແຫ່ງທີ 4 ຢູ່ເຂດຜະລິດສົ່ງອອກ ລີງຈູງ 1. ທ່ານ Shigeki Okamura, ຜູ້ອຳນວຍການໃຫຍ່ບໍລິສັດ Saigon Precision ຈຳກັດ ໃຫ້ຮູ້ວ່າ:
“ນັບແຕ່ເມື່ອລົງທຶນເຂົ້ານະຄອນໂຮ່ຈິມີນ ມາຮອດປະຈຸບັນ, ພວກຂ້າພະເຈົ້າໄດ້ຮັບການຫນູນຊ່ວຍຫລາຍຢ່າງຈາກບັນດາອົງການມີຫນ້າທີ່ຮັບຜິດຊອບ. ເມື່ອປະສົບກັບຄວາມຫຍຸ້ງຍາກຫຍັງພວກຂ້າພະເຈົ້າໄດ້ຮັບການແກ້ໄຂຢ່າງທັນທີ່. ສະພາບແວດລ້ອມແຫ່ງການລົງທຶນຂອງຫວຽດນາມແມ່ນດີທີ່ສຸດ. ໃນອະນາຄົດ ພວກຂ້າພະເຈົ້າຫວັງວ່າ ບັນດາອົງການມີຫນ້າທີ່ຮັບຜິດຊອບ ຈະສືບຕໍ່ເອື້ອອຳນວຍຄວາມສະດວກ ແລະ ມີນະໂຍບາຍບຸລິມະສິດເພື່ອຫນູນຊ່ວຍພວກຂ້າພະເຈົ້ານັບມື້ນັບດີກວ່າ.”
ບໍ່ພຽງແຕ່ບໍລິສັດ Saigon Precision ຫາກຍັງມີວິສາຫະກິດຫລາຍແຫ່ງທີ່ມີເງິນລົງທຶນຂອງຕ່າງປະເທດ ຢູ່ບັນດາເຂດຜະລິດສົ່ງອອກ-ເຂດອຸດສາຫະກຳ ຢູ່ ນະຄອນ ໂຮ່ຈິມີນ ກໍໄດ້ວາງແຜນການເພີ່ມທຶນໃຫ້ແກ່ບັນດາໂຄງການທີ່ນຳເຂົ້າເຄື່ອນໄຫວໃນປີນີ້. ຕາມການສະຖິຕິ, ໃນ 6 ເດືອນຜ່ານມາ, ບັນດາເຂດຜະລິດສົ່ງອອກ ເຂດອຸດສາຫະກຳ ຢູ່ ນະຄອນໂຮ່ຈິມີນ ໄດ້ດຶງດູດຈຳນວນທຶນໂດຍກົງຂອງຕ່າງປະເທດກວ່າ 146 ລ້ານ USD, ເພີ່ມຂຶ້ນເກືອບ 79% ເມື່ອທຽບໃສ່ໄລຍະດຽວກັນຂອງປີກາຍ. ໃນນັ້ນ ອອກຫນັງສືອະນຸຍາດລົງທຶນໃຫມ່ໃຫ້ແກ່ 8 ໂຄງການ ແລະ ເພີ່ມທຶນໃຫ້ແກ່ 10 ໂຄງການ. ໃນຊຸມເດືອນຕົ້ນປີນີ້, ໂຄງການລົງທຶນຫລຸດລົງ ແຕ່ຈຳນວນເງິນລົງທຶນພັດເພີ່ມຂຶ້ນເມື່ອທຽບໃສ່ໄລຍະດຽວກັນຂອງປີກາຍ. ສິ່ງທີ່ເປັນຫນ້າປະທັບໃຈສຳລັບບັນດານັກລົງທຶນ ນັ້ນແມ່ນທຸກລະບຽບການອອກຫນັງສືອະນຸຍາດລົງທຶນເຂົ້າເຂດຜະລິດສົ່ງອອກ, ເຂດອຸດສາຫະກຳຄືປະຈຸບັນ ພຽງເສຍເວລາປະມານ 6 ມື້ເທ່ົານັ້ນ, ແທນທີ່ 15 ມື້ຄືກົດໝາຍໄດ້ກຳນົດ. ຄະນະຄຸ້ມຄອງເຂດຜະລິດສົ່ງອອກ -ເຂດອຸດສາຫະກຳ ນະຄອນ ໄດ້ເປັນເຈົ້າການໃນການດຶງດູດນັກລົງທຶນຕ່າງປະເທດ. ທ່ານ ຫງວຽນຮ່ວາງແບກຟຸ້ງ, ຮອງຫົວຫນ້າຄະນະຄຸ້ມຄອງເຂດຜະລິດສົ່ງອອກ - ເຂດອຸດສາຫະກຳນະຄອນໂຮ່ຈິມີນ ໃຫ້ຮູ້ວ່າ:
“ສະເພາະຄະນະຄຸ້ມຄອງ ຕ້ອງປະຕິຮູບລະບຽບການບໍລິຫານດ້ວຍວິທີຫລຸດຜ່ອນບັນດາລະບຽບການລົງທຶນກໍຄືບັນດາລະບຽບການອື່ນທີ່ກ່ຽວຂ້ອງເຖິງການລົງທຶນ ເພື່ອສ້າງເງື່ອນໄຂສະດວກໃຫ້ແກ່ບັນດານັກລົງທຶນຜັນຂະຫຍາຍໂຄງການໂດຍໄວ. ນອກນັ້ນ ພວກຂ້າພະເຈົ້າກໍກະກຽມຈຳນວນເນື້ອທີ່ດິນປຸກສ້າງເຮືອນຢູ່, ໂຮງຈັກໂຮງງານເພື່ອສາມາດຕ້ອນຮັບບັນດານັກລົງທຶນເມື່ອເຂົາເຈົ້າຢາກລົງທຶນຢູ່ ຫວຽດນາມ.”
ພະແນກແຜນການ ແລະ ການລົງທຶນນະຄອນໂຮ່ຈິມີນ ໃຫ້ຮູ້ວ່າ: ໃນ 6 ເດືອນຕົ້ນປີນີ້, ນະຄອນໂຮ່ຈິມີນ ມີ 187 ໂຄງການລົງທຶນຂອງຕ່າງປະເທດໄດ້ຮັບຫນັງສືອະນຸຍາດລົງທຶນໃຫມ່, ເທົ່າກັບ 33,75% ຈຳນວນໂຄງການຂອງທັງປະເທດ ດ້ວຍຍອດຈຳນວນເງິນລົງທຶນກວ່າ 228 ລ້ານ USD. ນອກນັ້ນ ຍັງມີກວ່າ 60 ໂຄງການດັດປັບເງິນລົງທຶນກວ່າ 304 ລ້ານ USD. ສິ່ງດັ່ງກ່າວສະແດງໃຫ້ເຫັນວ່າ ເຖິງວ່າຖືກຜົນສະທ້ອນຈາກວິກິດການເສດຖະກິດກໍຕາມ ແຕ່ສະພາບແວດລ້ອມແຫ່ງການລົງທຶນຢູ່ນະຄອນ ໂຮ່ຈິມີນ ແມ່ນສະດວກ, ມີຫລາຍໂຄງການເຄື່ອນໄຫວຢ່າງມີປະສິດທິຜົນ, ສະນັ້ນ ບໍລິສັດລົງທຶນຫລາຍແຫ່ງຍັງຄົງເປັນເຈົ້າການເພີ່ມທຶນ, ເປີດກວ້າງການຜະລິດ. ມາຮອດປະຈຸບັນ, ນະຄອນ ໂຮ່ຈິມີນ ຍັງຄົງແມ່ນຫນຶ່ງໃນບັນດາທ້ອງຖິ່ນນຳຫນ້າໃນທົ່ວປະເທດກ່ຽວກັບການດຶງດູດເງິນລົງທຶນໂດຍກົງຂອງຕ່າງປະເທດ. ເພື່ອບັນລຸໄດ້ໝາກຜົນດັ່ງກ່າວ, ນະຄອນໂຮ່ຈິມີນ ໄດ້ມີຄວາມມານະພະຍາຍາມຫລາຍຢ່າງໃນວຽກງານປະຕິຮູບລະບຽບການບໍລິຫານ, ສ້າງເງື່ອນໄຂສະດວກໃຫ້ແກ່ບັນດານັກລົງທຶນ. ທ່ານ ທາຍວັນເຣ, ຫົວຫນ້າພະແນກແຜນການ ແລະ ການລົງທຶນນະຄອນ ໂຮ່ຈິມີນ ໃຫ້ຮູ້ວ່າ:
“ວິສາຫະກິດຕ່າງປະເທດ ມາເຮັດວຽກກັບພະແນກແຜນການ ແລະ ການລົງທຶນ ກ່ຽວກັບສະພາບລົງທຶນ, ລະບຽບການຄືແນວໃດ, ພະແນກພວກຂ້າພະເຈົ້າມີຫນ້າທີ່ຄວາມຮັບຜິດຊອບເຮັດວຽກກັບບັນດາພະແນກ, ຂະແຫນງການກ່ຽວຂ້ອງ, ບັນດາເມືອງໃນນະຄອນເພື່ອສ້າງເງື່ອນໄຂສະດວກໃຫ້ແກ່ບັນດານັກລົງທຶນ. ພະແນກແຜນການ ແລະ ການລົງທຶນ ຍັງສາມາດເຮັດລະບຽບການແທນທີ່ບັນດານັກລົງທຶນ. ນັ້ນແມ່ນຫນຶ່ງໃນບັນດານະໂຍບາຍຫນູນຊ່ວຍດຶງດູດການລົງທຶນຢູ່ນະຄອນໂຮ່ຈິມີນ.”
ຄຽງຄູ່ກັບການຍູ້ແຮງປະຕິຮູບລະບຽບການບໍລິຫານ, ນະຄອນໂຮ່ຈິມີນ ໄດ້ສ້າງຕັ້ງ ຫນ່ວຍປະຕິບັດງານ 5 ຫນ່ວຍ ເພື່ອຕິດຕາມບັນດາວິສາຫະກິດເປັນປະຈຳ, ຫນູນຊ່ວຍເຂົາເຈົ້າໃນການແກ້ໄຂຄວາມຫຍຸ້ງຍາກຂໍ້ຕິດຂັດຢ່າງທັນການ. ການນຳນະຄອນຫລາຍທ່ານໄດ້ນຳຫນ້າບັນດາຄະນະປະຕິບັດງານຈັດຕັ້ງການສົ່ງເສີມການລົງທຶນຢູ່ປະເທດຈຳນວນຫນ່ຶງໃນໂລກ ແລະ ພາກພື້ນ. ຜ່ານນັ້ນ ດຶງດູດກຸ່ມບໍລິສັດໃຫຍ່ຫລາຍແຫ່ງເຂົ້າມາລົງທຶນຢູ່ນະຄອນໂຮ່ຈິມີນ. ໃນໄລຍະຈະມາເຖິງ, ນະຄອນໂຮ່ຈິມີນ ດຶງດູດບັນດາໂຄງການລົງທຶນເຂົ້າໃນຂົງເຂດອຸດສາຫະກຳ, ເຕັກໂນໂລຊີສູງ, ມີການຄັດເລືອກ ແລະ ບໍ່ກໍ່ມົນລະພິດເຖິງສິ່ງແວດລ້ອມ. ດ້ວຍແຜນນະໂຍບາຍ“ປະຕິຮູບລະບຽບການບໍລິຫານຢ່າງລຽນຕິດ ຮ່ວມເດີນທາງພ້ອມກັບວິສາຫະກິດ”, ຍາມໃດ ນະຄອນ ໂຮ່ຈິມີນ ກໍແມ່ນຈຸດນັດພົບອັນດູດດື່ມໃຫ້ແກ່ບັນດານັກລົງທຶນຕ່າງປະເທດ.