(ພາບປະກອບອີນເຕີແນັດ)

ສັນຍາການຄ້າເສລີຫວຽດນາມ - ອີຢູ (EVFTA) ໄດ້ເລີ່ມປະຕິບັດໃນສະພາບການພົວພັນ 2 ຝ່າຍຫວຽດນາມ - ອີຢູ ນັບມື້ນັບພັດທະນາຢ່າງດີງາມ, ພິເສດແມ່ນໃນຂົງເຂດເສດຖະກິດ - ການຄ້າ, ສະນັ້ນ ອາດຢືນຢັນໄດ້ວ່າຄວາມສາມາດບົ່ມຊ້ອນພາຍຫຼັງສັນຍາດັ່ງກ່າວໄດ້ຮັບການປະຕິບັດແມ່ນໃຫຍ່ຫຼວງທີ່ສຸດ, ນຳມາເຊິ່ງຜົນປະໂຫຍດໃຫ້ແກ່ປະຊາຊົນ ແລະ ປະຊາຄົມເສດຖະກິດໃຫ້ທັງ 2 ຝ່າຍ. ສັນຍາດັງກ່າວຈະລົບລ້າງພາສີອາກອນ ໃນການແລກປ່ຽນຄ້າຂາຍ, ສິນຄ້າລະຫວ່າງ 2 ພື້ນຖານເສດຖະກິດເກືອບທັງໝົດຄືຂຶ້ນເຖິງ 99% ຈຳນວນປະເພດພາສີ.  ເລື່ອງໃຫ້ຄຳໝັ້ນສັນຍາເປີດປະຕູຕະຫຼາດຢ່າງແຮງໄດ້ຮັບຖືວ່າແມ່ນໜຶ່ງໃນບັນດາບາດກ້າວບຸກທະລຸຂອງສັນຍາ EVFTA, ປະກອບສ່ວນຊຸກຍູ້ການພົວພັນດ້ານການຄ້າຫວຽດນາມ - ອີຢູ. ຜ່ານນັ້ນຈະເປີດກວ້າງຕະຫຼາດໃຫ້ແກ່ສິນຄ້າສົ່ງອອກ, ພິເສດແມ່ນບັນດາສິນຄ້າທີ່ມີທ່າແຮງຂອງ 2 ຝ່າຍຄື: ເຄື່ອງຕ່ຳແຜ່ນຕັດຫຍິບ, ເກີບໜັງ, ຜະລິດຕະພັນກະເສດ ສິນໃນນ້ຳ… ຂອງຫວຽດນາມ ແລະ ພາຫະນະເຄືອງຈັກ, ລົດໂອໂຕ, ລົດຈັກ… ຂອງອີຢູ.

        ຄຽງຂ້າງການລົບລ້າງພາສີອາກອນ, ສັນຍາດັ່ງກ່າວກໍ່ຈະສ້າງບັນດາກາລະໂອກາດແຊກຊຶມກັບຕະຫຼາດໃໝ່ໃນຂົງເຂດການບໍລິການ ແລະ ລົງທຶນ. ຫວຽດນາມ ໄດ້ເຫັນດີຕໍ່ການຫັນການຄ້າເປັນເສລີໃນຂົງເຂດການບໍລິການດ້ານການເງິນ, ໂທລະຄົມມະນາຄົມ… ຫວຽດນາມ ກໍຈະຍົກເລີກ ແລະ ຫຼຸດຜ່ອນບັນດາຂໍ້ຈຳກັດໃນຂົງເຂດຜະລິດສິນຄ້າປະເພດອາຫານ ຫຼື ເຄື່ອງດື່ມ, ກໍຄືໃນບັນດາຂົງເຂດທີ່ບໍ່ຂຶ້ນກັບສະບຽງອາຫານ… ສຳລັບບັນດາວິສະຫະກິດອີຢູ.

        ໃນຂົງເຂດການລົງທຶນ, ດ້ວຍຄຳໝັ້ນສັນຍາຮັບປະກັນສະພາບແວດລ້ອມແຫ່ງການລົງທຶນ, ດຳເນີນທຸລະກິດທີ່ອຳນວຍຄວາມສະດວກກວ່າ, ສັນຍາ EVFTA ຈະຊ່ວຍຊຸກຍູ້ແຫຼ່ງເງິນລົງທຶນທີ່ມີຄຸນນະພາບສູງຂອງອີຢູ ແລະ ບັນດາຄູ່ຮ່ວມມືອື່ນໆເຂົ້າຫວຽດນາມ.  ຫວຽດນາມ ມີກາລະໂອກາດກາຍເປັນປະເທດທາງຜ່ານ, ເຊື່ອມຕໍ່ໃຫ້ແກ່ການເຄື່ອນໄຫວດ້ານການຄ້າ ແລະ ການລົງທຶນຂອງອີຢູ ໃນພາກພື້ນ. ທ່ານ Alann Bouvot, ເຊິ່ງເປັນ CEO ຂອງ SODEX Sport Vietnam ໄດ້ມີວິວັດແຫ່ງການລົງທຶນຢູ່ນະຄອນຍາຈາງ, ຫວຽດນາມ ນັບແຕ່ປີ 1991 ມາຮອດປະຈຸບັນ, ໃຫ້ຂໍ້ສັງເກດວ່າ.

        “ຂ້າພະເຈົ້າມີຄວາມປະເອີບໃຈກ່ຽວກັບສະພາບແວດລ້ອມແຫ່ງການລົງທຶນຢູ່ຫວຽດນາມ. ພວກຂ້າພະເຈົ້າໄດ້ເຄື່ອນໄຫວຢູ່ຫວຽດນາມ 26 ປີແລ້ວ ແລະ ແນ່ນອນວ່າມີຫຼາຍສາຍເຫດທີ່ເພິ່ງພໍໃຈ. ຫວຽດນາມ ໄດ້ມີການປ່ຽນແປງ ແລະ ມີຄວາມກ້າວໜ້າຫຼາຍຢ່າງ. ແຕ່ປີ 2017, ພວກຂ້າພະເຈົ້າໄດ້ຕົກລົງ ລົງທຶນກໍ່ສ້າງຮາກຖານຜະລິດຕື່ມອີກ, ເຊິ່ງມີເນື້ອທີ່ 15.000 ຕາແມັດ. ເລື່ອງເຂົ້າມາຫວຽດນາມ ໄດ້ນຳມາເຊິ່ງທ່າແຮງໃຫ້ແກ່ພວກຂ້າພະເຈົ້າຢູ່ທັງພາກພື້ນອາຊີຕາເວັນອອກສ່ຽງໃຕ້ ແລະ ດ້ວຍຍຸດທະສາດຫັນຜະລິດຕະພັນຂອງພວກຂ້າພະເຈົ້າເປັນສາກົນ, ແມ່ນການມີໜ້າຢູ່ຫວຽດນາມ ເປັນປັດໃຈຫຼັກແຫຼ່ງ”.

        ທີ່ກອງປະຊຸມສຳມະນາດ້ວຍຫົວຂໍ້ວ່າ “ສັນຍາການຄ້າເສລີອີຢູ - ຫວຽດນາມ” ເຊິ່ງໄດ້ດຳເນີນໃນວັນທີ 07 ກັນຍາ, ຢູ່ບຣຸກແຊນ, ປະເທດແບນຊິກ, ທ່ານ Jean Jacques Bouflet, ສະມາຊິກຄະນະການນຳຫ້ອງການການຄ້າເອີລົບ ປະຈຳຫວຽດນາມ (Eurochamp) ກໍຢືນຢັນວ່າ “ສຳລັບທັງ 2 ຝ່າຍສະຫະພາບເອີລົບ ແລະ ຫວຽດນາມ, ສັນຍາການຄ້າເສລີເຊິ່ງ 2 ຝ່າຍພວມເຈລະຈາເພື່ອກະກຽມລົງນາມນັ້ນ ໄດ້ຕອບສະໜອງຜົນປະໂຫຍດໃຫ້ທັງ 2 ຝ່າຍເປັນຢ່າງດີ ແລະ ຍ້ອນເຫດນັ້ນ, ຕ້ອງໄດ້ເພີ່ມຄວາມໄວໃນໄລຍະຕັດສິນຊີ້ຂາດນີ້”. ທ່ານ ຫງວຽນຮ່ວາງລອງ, ຫົວໜ້າກົມພົວພັນຕ່າງປະເທດ - ກະຊວງການຕ່າງປະເທດຫວຽດນາມ, ກໍໃຫ້ຮູ້ວ່າ, ບັນດາວິສາຫະກິດອີຢູ ທີ່ກອງປະຊຸມສຳມະນາໄດ້ລໍຖ້າສັນຍາການຄ້າເສລີຈະປະຕິບັດສຳເລັດໂດຍໄວ ແລະ ແມ່ນເຄື່ອງມືໜູນຊ່ວຍພິເສດໃຫ້ເຂົາເຈົ້າ.

        “ຄະນະກຳມະການເອີລົບ, ເຊິ່ງຕາງໜ້າແມ່ນທ່ານຫົວໜ້າຄະນະເຈລະຈາສັນຍາການຄ້າເສລີ Mauro Petriccione ຢືນຢັນວ່າ: ເລື່ອງຍື່ນສະເໜີ ແລະ ຜ່ານການຮັບຮອງຈາກ EVFTA ໂດຍໄວ ແມ່ນບຸລິມະສິດຂອງຄະນະກຳມະການເອີລົບ ເຊິ່ງຈະເຮັດວຽກກັບບັນດາຄູ່່ຮ່ວມມືຫວຽດນາມ ຢ່າງແໜ້ນແຟ້ນ ເພື່ອບັນດາວິວັດທະນາການຮັບຮອງເອົາທີ່ລັດຖະສະພາເອີລົບ ກໍ່ຄືວິວັດທະນາການແລກປ່ຽນກັບບັນດາຄູ່ຮ່ວມມືທີ່ມີຄວາມສົນໃຈທີ່ສະຫະພາບເອລີບ ໄດ້ຮັບການຮັບຮອງເອົາໂດຍໄວ, ຕອບສະໜອງຄວາມມຸ່ງມາດປາດຖະໜາຂອງປະຊາຄົມວິສາຫະກິດຫວຽດນາມ ກໍຄືຂອງປະຊາຄົນວິສາຫະກິດເອີລົບ ປະຈຳຫວຽດນາມ”.

        ບັນດານັກລົງທຶນ ແລະ ວິສາຫະກິດເອີລົບ ແລະ ຫວຽດນາມ ລ້ວນແຕ່ສະແດງຄວາມເຊື່ອໝັ້ນວ່າ, ສັນຍາ EVFTA ໄດ້ຮັບການປະຕິບັດ ຈະນຳມາເຊິ່ງບັນດາກາລະໂອກາດໃໝ່ທີ່ໃຫຍ່ຫຼວງໃຫ້ວິສາຫະກິດຂອງທັງ 2 ຝ່າຍ. ດ້ວຍຕະຫຼາດທີ່ຫາກໍພົ້ນເດັ່ນ ແລະ ພັດທະນາຢ່າງໄວຄືຫວຽດນາມ, ເຊິ່ງແມ່ນປະເທດທີ່ມີຜູ້ບໍລິໂພກອຸປະໂພກ 90 ລ້ານຄົນ ແມ່ນກາລະໂອກາດທີ່ດີສຳລັບບັນດານັກລົງທຶນ ວິສາຫະກິດເອີລົບ. ພ້ອມກັນນັ້ນ, ບັນດານັກສົ່ງອອກຂອງຫວຽດນາມ ກໍຈະສາມາດແຊກຊຶມຕະຫຼາດອີຢູ ງ່າຍກວ່າ, ປະກອບສ່ວນສຳຄັນເຂົ້າໃນການຊຸກຍູ້ພື້ນຖານເສດຖະກິດຂອງຫວຽດນາມ.