ທີ່ ຫວຽດນາມ, ລັດຖະບານ ຫວຽດນາມ ແລະ ປະຊາຄົມວິສາຫະກິດ ໄດ້ ແລະ ພວມມີບັນດານະໂຍບາຍ, ຍຸດທະສາດເພື່ອຍົກສູງກຳລັງຄວາມສາມາດແກ່ງແຍ້ງ, ໄປທັນກັບການພັດທະນາຂອງໂລກ, ພິເສດແມ່ນສ້າງສາປະເທດຊາດພັດທະນາແບບຍືນຍົງ.

         ປີ 2015, ຫວຽດນາມ ພ້ອມກັບ 192 ປະເທດສະມາຊິກສະຫະປະຊາຊາດຮັບຮອງເອົາ 17 ເປົ້າໝາຍການພັດທະນາແບບຍືນຍົງ (SDG) ຈຸດສຸມຂອງໂຄງການດຳເນີນງານ 2030. ເພື່ອຫັນ 17 ເປົ້າໝາຍນີ້ SDG ໃຫ້ປະກົດຜົນເປັນຈິງ ເດືອນພຶດສະພາ 2017, ນາຍົກລັດຖະມົນຕີແຫ່ງ ສສ.ຫວຽດນາມ ໄດ້ເຊັນຂໍ້ຕົກລົງປະກາດໃຊ້ແຜນການດຳເນີນງານລະດັບຊາດປະຕິບັດໂຄງການດຳເນີນງານ 2030 ກ່ຽວກັບການພັດທະນາແບບຍືນຍົງ. ດ້ວຍ 17 ເປົ້າໝາຍໃນຂອງ SDG, ລັດຖະບານ ແລະ ປະຊາຄົມວິສາຫະກິດ ຫວຽດນາມ ອາດຈະຊອກໄດ້ຫລາຍເນື້ອໃນທີ່ເໝາະສົມ ຊຶ່ງແຕ່ລະວິສາຫະກິດສາມາດປະສານສົມທົບເຂົ້າໃນຍຸດທະສາດດຳເນີນທຸລະກິດຂອງຕົນ ແນໃສ່ປະກອບສ່ວນສຳເລັດບັນດາເປົ້າໝາຍການພັດທະນາແບບຍືນຍົງໃນຍຸກສະໄໝ 4.0.

        ທ່ານປະທານຫ້ອງການການຄ້າ ແລະ ອຸດສາຫະກຳ ຫວຽດນາມ (VCCI) ຫວູຕ໋ຽນລົກ ໃຫ້ຮູ້ວ່າ: ລັດຖະບານ ຫວຽດນາມ ແລະ ທະນາຄານໂລກ ໄດ້ຍົກອອກບົດລາຍງານ ຫວຽດນາມ ຮອດປີ 2035 ດ້ວຍຄວາມມຸ່ງຫວັງ ນຳປະເທດ ຫວຽດນາມ ກາຍເປັນປະເທດທີ່ມີລາຍຮັບປານກາງດ້ວຍຕົວເລກກ່ວາ 10.000 USD ໃນປີ 2035. ບົດລາຍງານຂອງ ຫວຽດນາມ ກໍ່ຍົກອອກການຫັນປ່ຽນໃຫຍ່ 6 ປະການຂອງພື້ນຖານເສດຖະກິດ ຄ້າຍຄືກັບບັນດາເປົ້າໝາຍໃຫຍ່ຂອງໂຄງການດຳເນີນງານ 2030, ນັ້ນແມ່ນ: ຫັນພື້ນຖານເສດຖະກິດເປັນທັນສະໄໝ; ພັດທະນາຂົງເຂດພາກເອກະຊົນ; ກໍ່ສ້າງກຳລັງຄວາມສາມາດປ່ຽນແປງໃໝ່ ແລະ ມີຫົວຄິດປະດິດສ້າງແຫ່ງຊາດ; ຍົກສູງປະສິດທິຜົນເສດຖະກິດໃນການຫັນເປັນຕົວເມືອງ ແລະ ພັດທະນາສິ່ງແວດລ້ອມແບບຍືນຍົງ ແລະ ເພີ່ມທະວີຄວາມສາມາດໃນການຮັບມືກັບການປ່ຽນແປງຂອງດິນຟ້າອາກາດ; ຮັບປະກັນຄວາມຍຸຕິທຳ ແລະ ຊຸກຍູ້ການເຊື່ອມຕົວເຂົ້າກັບສັງຄົມ; ກໍ່ສ້າງລະບອບລະບຽບການທັນສະໄໝ ແລະ ກົງຈັກລັດຢ່າງມີປະສິດທິຜົນ. ທ່ານ ຫວູຕ໋ຽນລົກ ຢືນຢັນວ່າ:

        “ດ້ວຍຈຸດໝາຍຍົກສູງກຳລັງຄວາມສາມາດແກ່ງແຍ້ງ, ລັດຖະບານ ຫວຽດນາມ ໄດ້ປະກາດໃຊ້ມະຕິກ່ຽວກັບການປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງຄວາມສາມາດແກ່ງແຍ້ງລະດັບຊາດ. ດ້ວຍຈຸດໝາຍແມ່ນນຳ ຫວຽດນາມ ກາຍເປັນໜຶ່ງໃນສີ່ພື້ນຖານເສດຖະກິດທີ່ມີກຳລັງຄວາມສາມາດແກ່ງແຍ້ງ ແລະ ມີຄຸນນະພາບກ່ຽວກັບລະບອບລະບຽບການແຖວໜ້າໃນ ອາຊຽນ ໂດຍໄວ. 17 ເປົ້າໝາຍການພັດທະນາແບບຍືນຍົງຂອງສະຫະປະຊາຊາດ ໄດ້ຮັບຖືວ່າ ແມ່ນພື້ນຖານເພື່ອວາງອອກລະບົບລາຍການຂອງ ຫວຽດນາມ ເພື່ອພັດທະນາ”.

ທ່ານ ຫງວຽນເທ໋ເຟືອງ ຮອງລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ (ພາບ: baodauthau.vn)

         ທີ່ຕັ້ງບົດບາດຂອງ ຫວຽດນາມ ນັບມື້ນັບໄດ້ຍົກສູງບົນເວທີສາກົນ ດ້ວຍ 41 ປີແຫ່ງການຮ່ວມເດີນທາງກັບສະຫະປະຊາຊາດ ແລະ 25 ປີນັບແຕ່ເມື່ອ ຫວຽດນາມ ເຊື່ອມຕໍ່ການພົວພັນກັບທະນາຄານໂລກຄືນໃໝ່ໃນປີ 1993. ຫວຽດນາມ ໄດ້ສ້າງລັດຖະບານມີຫົວຄິດປະດິດສ້າງ, ມີການກະທຳ, ໂປ່ງໃສ, ຍາມໃດກໍ່ປ່ຽນແປງໃໝ່ໃນການບໍລິຫານເສດຖະກິດ ເພື່ອຊຸກຍູ້ວິວັດທະນາການເຊື່ອມໂຍງເຂົ້າກັບສາກົນຢ່າງເລິກເຊິ່ງກ້ວາງຂວາງ. ພ້ອມກັນນັ້ນ ແມ່ນປະຊາຄົມວິສາຫະກິດຂະຫຍັນຂັນເຄື່ອນ, ມີຫົວຄິດປະດິດສ້າງ ແລະ ຍາມໃດກໍ່ໝູນໃຊ້ບັນດາເຕັກໂນໂລຢີກ້າວໜ້າທີ່ສຸດ, ຍາດແຍ່ງບັນດາຜົນງານຂອງພື້ນຖານອຸດສາຫະກຳການປະຕິວັດ 4.0 ພວມນັບມື້ນັບປະກົດຕົວ ປ່ຽນແປງຈິນຕະນາການດຳເນີນທຸລະກິດດ້ວຍບັນດາຮູບແບບໃໝ່ຄື: ພື້ນຖານເສດຖະກິດໝູນວຽນພວມໄດ້ຮັບການຜັນຂະຫຍາຍຢ່າງກ້ວາງຂວາງໃນທົ່ວໂລກ.

        ທ່ານ ຫງວຽນເທ໋ເຟືອງ ຮອງລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ໃຫ້ຮູ້ວ່າ: ໃນຊຸມປີມໍ່ໆມານີ້, ຫວຽດນາມ ບັນລຸໄດ້ຜົນງານຫລາຍຢ່າງໃນການພັດທະນາເສດຖະກິດ - ສັງຄົມ. ປີ 2017, ຂອບຂະໜາດພື້ນຖານເສດຖະກິດ ຫວຽດນາມ ປະມານ 220 ຕື້ USD, ຖືກຈັດອັນດັບ 34 ໃນໂລກ, ດ້ວຍລາຍຮັບສະເລ່ຍຕໍ່ຫົວຄົນບັນລຸກ່ວາ 2.300 USD, ຖືກຈັດອັນດັບທີ 134 ໃນໂລກ. ລະດັບຄວາມໄວການເຕີບໂຕເສດຖະກິດປີ 2017 ບັນລຸລະດັບ 6,81% ຊຶ່ງແມ່ນລະດັບສູງສຸດໃນ 10 ປີ ມໍ່ໆມານີ້. ປີ 2016 ດັດຊະນີ HDI ຈັດອັນດັບ 115/188 ປະເທດ. ທ່ານ ຫງວຽນເທ໋ເຟືອງ ເນັ້ນໜັກວ່າ:

        “ບັນດາຄວາມມານະພະຍາຍາມປັບປຸງສະພາບແວດລ້ອມແຫ່ງການດຳເນີນທຸລະກິດຂອງ ຫວຽດນາມ ໃນຊຸມປີຜ່ານມາ ໄດ້ນຳມາເຊິ່ງບັນດາໝາກຜົນທີ່ເປັນໜ້າຊື່ນຊົມ. ໃນ 4 ປີແຫ່ງການຜັນຂະຫຍາຍມະຕິຂອງລັດຖະບານ, ສະພາບແວດລ້ອມແຫ່ງການດຳເນີນທຸລະກິດ ແລະ ກຳລັງຄວາມສາມາດແກ່ງແຍ້ງຂອງ ຫວຽດນາມ ປີ 2017 ໄດ້ຮັບການຮັບຮູ້, ປັບປຸງຫລາຍທີ່ສຸດຈາກບັນດາອົງການຈັດຕັ້ງສາກົນ”.

        ດ້ວຍໜ້າທີ່ຍົກສູງກຳລັງຄວາມສາມາດແກ່ງແຍ້ງ, ຫວຽດນາມ ພວມກຳນົດທີ່ຕັ້ງຂອງຕົນໃນການແຂ່ງຂັນກຳລັງຄວາມສາມາດແກ່ງແຍ້ງທົ່ວໂລກ. ໃນນັ້ນ, ປະຊາຄົມວິສາຫະກິດສວມບົດບາດສຳຄັນ, ດ້ວຍຖານະເປັນໃຈກາງຂອງເປົ້າໝາຍການພັດທະນາແບບຍືນຍົງ ແລະ ຍົກສູງກຳລັງຄວາມສາມາດແກ່ງແຍ້ງລະດັບຊາດ. ປະຕິບັດການພັດທະນາແບບຍືນຍົງກໍ່ແມ່ນໂອກາດ ເພື່ອຍົກກຳລັງຄວາມສາມາດແກ່ງແຍ້ງຂອງວິສາຫະກິດໃຫ້ຂຶ້ນສູງ, ຈາກນັ້ນ ສະມັດຕະພາບການບໍລິຫານວິສາຫະກິດກໍ່ໄດ້ຮັບການປັບປຸງ. ນີ້ແມ່ນໂອກາດ ເພື່ອໃຫ້ວິສາຫະກິດ ຫວຽດນາມ ຮັບເອົາໂອກາດເພື່ອພ້ອມກັບປະເທດຊາດພັດທະນາແບບຍືນຍົງ ແລະ ເຊື່ອມຕົວເຂົ້າກັບການປະຕິວັດ 4.0./.