(vovworld)- ຫວຽດນາມ ແມ່ນປະເທດທີ່ມີແຫລ່ງແຮງງານອຸດົມສົມບູນ, ໃນບັນດາການແຂ່ງຂັນສີມືແຮງງານ ອາຊຽນ, ຍາມໃດຫວຽດນາມ ກໍຖືກຈັດອັນດັບສູງ. ເຖິງຢ່າງໃດກໍຕາມ, ໃນຄວາມຈິງ ສະມັດຕະພາບແຮງງານເວົ້າລວມຂອງຫວຽດນາມ ຍັງຕ່ຳເມື່ອທຽບໃສ່ບັນດາປະເທດໃນພາກພື້ນ. ເຮັດແນວໃດເພື່ອຍົກສູງສະມັດຕະພາບແຮງງານແມ່ນບັນຫາໄດ້ຮັບຄວາມເອົາໃຈໃສ່ທີ່ສຸດຈາກທຸກຂັ້ນ, ຂະແຫນງການ, ເປັນຕົ້ນໃນສະພາພາບທີ່ຫວຽດນາມ ເຂົ້າຮ່ວມປະຊາຄົມເສດຖະກິດ ອາຊຽນ. ບົດຂຽນ ຂອງນັກຂ່າວ ກີມແທງ ທີ່ມີຫົວຂໍ້ວ່າ: “ຍົກສູງສະມັດຕະພາບແຮງງານເຊື່ອມໂຍງເຂົ້າກັບສາກົນ”.
ຕາມບັນດາຕົວເລກໃນການຄົ້ນຄ້ວາຂອງອົງການແຮງງານສາກົນ (ILO), ສະມັດຕະພາບແຮງງານຂອງຫວຽດນາມ ໃນປະຈຸບັນ ແມ່ນຍັງຕ່ຳເມື່ອທຽບໃສ່ປະເທດຈຳນວນຫນຶ່ງໃນພາກພື້ນ. ໃນໂຄງປະກອບເສດຖະກິດຂອງຫວຽດນາມ, ກະສິກຳ ມີລະດັບມູນຄ່າເພີ່ມຍັງຕ່ຳ, ກວມອັດຕາສ່ວນພຽງ 18,4% ໃນ GDP ເມົ່ານັ້ນ, ແຕ່ນຳໃຊ້ເຖິງ 47% ຍອດຈຳນວນແຮງງານໃນສັງຄົມ. ສາຍເຫດນັ້ນແມ່ນ ເລື່ອງຄົ້ນຄ້ວາ, ໝູນໃຊ້ວິທະຍາສາດແລະປ່ຽນໃຫມ່ເຕັກໂນໂລຊີໃນການອອກແຮງງານທຳການຜະລິດຍັງຈຳກັດຢູ່, ອັດຕາສ່ວນຄົນງານໄດ້ຮັບການບຳລຸງສ້າງກວມພຽງ 20%. ນີ້ແມ່ນສາຍເຫດຕົ້ນຕໍເຮັດໃຫ້ສະມັດຕະພາບແຮງງານຂອງຫວຽດນາມບໍ່ທັນສູງ.
ສະມັດຕະພາບແຮງງານຂອງຫວຽດນາມ ໃນປະຈຸບັນ
ຍັງຕ່ຳ
ພາບ:chinhphu.vn
|
ເພື່ອພັດທະນາແຫລ່ງຊັບພະຍາກອນມະນຸດຢ່າງແຮງ ແລະ ຮອບດ້ານ, ຕ້ອງປ່ຽນໃຫມ່ຮູບການ ແລະ ຍົກສູງປະສິດທິຜົນການສອນວິຊາຊີບໃຫ້ແກ່ຄົນງານ ແລະ ຮ່ວມມືກັບຮາກຖານສອນວິຊາຊີບ. ທ່ານ ດົງວັນງອກ, ຜູ້ອຳນວຍການວິທະຍາໄລວິຊາກົນຈັກໄຟຟ້າ ຮ່າໂນ້ຍ, ຖືວ່າ:
“ບັນດາວິສາຫະກິດຄວນພ້ອມກັບບັນດາໂຮງຮຽນສອນວິຊາຊີບ. ຫລືເວົ້າແນວອື່ນ ຕ້ອງມີຍຸດທະສາດນຳໃຊ້ຄົນງານ. ຄວນເລືອກເຟັ້ນໂຮງຮຽນໃດຫນຶ່ງມີກຳລັງຄວາມສາມາດພຽງພໍເພື່ອສອນວິຊາຊີບໃຫ້ແກ່ຄົນງານ. ສະນັ້ນ ໃນຫລັກສູດການສິດສອນ ຕ້ອງພະຍາຍາມເຮັດແນວໃດເພື່ອໃຫ້ວິສາຫະກິດຫລາຍແຫ່ງສາມາດນຳໃຊ້ຄົນງານໄດ້, ເຮັດໃຫ້ນັກສຶກສາມີວຽກເຮັດງານທຳຫຼາຍກວ່າ.”
ແຕ່ປີ 2012, ກະຊວງວິທະຍາສາດ ແລະ ເຕັກໂນໂລຊີ ໄດ້ຜັນຂະຫຍາຍໂຄງການແຫ່ງຊາດ ຍົກສູງສະມັດຕະພາບສິນຄ້າ ແລະ ຜະລິດຕະພັນຂອງວິສາຫະກິດຫວຽດນາມ ຮອດປີ 2020, ໃນນັ້ນ ສຸມໃສ່ຊຸກຍູ້ບັນດາມາດຕະການຍົກສູງກຳລັງຄວາມສາມາດ, ຄຸນນະພາບຢູ່ ວິສາຫະກິດ, ສົ່ງເສີມ ແລະ ຫນູນຊ່ວຍວິສາຫະກິດປ່ຽນໃຫມ່ເຕັກໂນໂລຊີ, ນຳໃຊ້ເຕັກໂນໂລຊີສູງ ແລະ ຄົ້ນຄ້ວາພັດທະນາ. ດຶງດູດບັນດານັກລົງທຶນພາຍໃນ ແລະ ຕ່າງປະເທດ ລົງທຶນເຂົ້າໃນການຜະລິດບັນດາຜະລິດຕະພັນເຕັກໂນໂລຊີສູງ ແລະ ອຸດສາຫະກຳຫນູນຊ່ວຍ. ທ່ານ ຫງວຽນແອງຕ໋ວນ, ຫົວຫນ້າສະຖາບັນສະມັດຕະພາບ, ກົມໃຫຍ່ມາດຕະຖານວັດແທກແລະ ຄຸນນະພາບ ໃຫ້ຮູ້ວ່າ:
“ສຳລັບບັນດາໂຄງການຂອງກະຊວງວິທະຍາສາດເຕັກໂນໂລຊີ, ໃນໄລຍະຜ່ານມາ, ພວກຂ້າພະເຈົ້າໄດ້ສ້າງ 200 ຮູບແບບທີ່ເປັນແບບຢ່າງກ່ຽວກັບວິສາຫະກິດນຳໃຊ້ບັນດາມາດຕະການຄຸ້ມຄອງກ້າວຫນ້າເພື່ອຊ່ວຍຍົກສູງສະມັດຕະພາບ, ຫລຸດຜ່ອນໄລຍະປະຕິບັດຂັ້ນຕອນ, ຫລຸດຜ່ອນລາຍຈ່າຍ ແລະ ພິເສດຫລຸດຜ່ອນຄວາມຟຸມເຟືອຍ. ຜ່ານບັນດາມາດຕະການນີ້, ບັນດາໂຄງການດັດແປງຢູ່ບັນດາວິສາຫະກິດ ລ້ວນແຕ່ສາມາດເພີ່ມສະມັດຕະພາບໄດ້ປະມານ 15-20% ຫລື ສູງກວ່າ. ນອກນັ້ນ ພວກຂ້າພະເຈົ້າກໍຫນູນຊ່ວຍເພື່ອທະວີຄູນໝາກຜົນດັ່ງກ່າວໃຫ້ແກ່ປະມານ 500 ວິສາຫະກິດ.”
ສະມັດຕະພາບແຮງງານຂອງປະເທດຫນຶ່ງ ແມ່ນລວບລວມສະມັດຕະພາບແຮງງານຂອງທຸກຂະແຫນງການໃນພື້ນຖານເສດຖະກິດຂອງຊາດ. ສະນັ້ນ ຢາກເພີ່ມສະມັດຕະພາບແຮງງານຂອງທັງພື້ນຖານເສດຖະກິດ ກ່ອນອື່ນໝົດຕ້ອງເພີ່ມສະມັດຕະພາບຂອງແຕ່ລະຂົງເຂດໃນພື້ນຖານເສດຖະກິດຄື: ກະສິກຳ, ອຸດສາຫະກຳ, ກໍ່ສ້າງ ແລະ ບໍລິການ. ທ່ານນາຍົກລັດຖະມົນຕີ ໄດ້ປະກາດໃຊ້ຂໍ້ຕົກລົງວາງແຜນກຳນົດພັດທະນາ 45 ໂຮງຮຽນຄຸນນະພາບສູງ ແລະ ມີຫລາຍນະໂຍບາຍລົງທຶນໃຫ້ຂະແຫນງຈຸດສຸມ, ພິເສດແມ່ນຂະແຫນງອຸດສາຫະກຳສຳຮອງ.
ເພື່ອຍົກສູງຄຸນນະພາບບຳລຸງສ້າງແຫລ່ງຊັບພະຍາກອນມະນຸດ ຄວນສ້າງເງື່ອນໄຂສະດວກໃຫ້ແກ່ບັນດາວິສາຫະກິດພາຍໃນປະເທດ ປ່ຽນໃຫມ່ວິທະຍາສາດເຕັກໂນໂລຊີ. ດຶງດູດວິສາຫະກິດລົງທຶນເຂົ້າເຂດຊົນນະບົດເພື່ອຫັນປ່ຽນແຮງງານຢູ່ເຂດຊົນນະບົດມາສູ່ເຂດອຸດສາຫະກຳ, ບໍລິການ ແລະ ຊຸກຍູ້ພັດທະນາການຜະລິດ, ຍົກສູງສະມັດຕະພາບແຮງງານໃນຂົງເຂດກະສິກຳ. ພິເສດ ແມ່ນປັບປຸງລະບອບ ເສດຖະກິດການຕະຫລາດ ແລະ ພັດທະນາເສດຖະກິດພາກເອກະຊົນ ແລະ ຖືວ່າ: ນີ້ແມ່ນກຳລັງຫນູນເພື່ອຮີບເຮັ່ງປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ຍົກສູງສະມັດຕະພາບແຮງງານ, ກຳລັງຄວາມສາມາດແກ້ງແຍ້ງ, ເພື່ອພັດທະນາຢ່າງວ່ອງໄວ ແລະ ໝັ້ນຄົງ, ຮັດແຄບຊ່ອງຫວ່າງການພັດທະນາກັບບັນດາປະເທດອື່ນ.