(vovworld)-ຍູ້ແຮງດຶງດູດການລົງທຶນເຂົ້າຂົງເຂດອຸດສາຫະກຳຫນູນຊ່ວຍແມ່ນຈຸດສຸມນະໂຍບາຍເສດຖະກິດໃຫຍ່ຂອງລັດຖະບານຫວຽດນາມໃນປີ 2015. ເພື່ອກໍ່ສ້າງຂະແຫນງອຸດສາຫະກຳຫນູນຊ່ວຍ ຫວຽດນາມ ພັດທະນາຢ່າງແທ້ຈິງ, ຄຽງຄູ່ການສ້າງກອບກົດໝາຍທີ່ສະດວກ, ຫວຽດນາມ ພວມມານະພະຍາຍາມປະຕິບັດບັນດາບາດກ້າວບຸກທະລຸເພື່ອດຶງດູດສ້າງກຳລັງຫນູນໃຫ້ຂະແຫນງອຸດສາຫະກຳພັດທະນາໃນໄລຍະຈະມາເຖິງ.
ພາບປະກອບ:internet
|
ອຸດສາຫະກຳຫນູນຊ່ວຍໄດ້ຮັບຖືວ່າແມ່ນຂະແຫນງຜະລິດພື້ນຖານຂອງຂະແຫນງອຸດສາຫະກຳ. ເຖິງຢ່າງໃດກໍຕາມ, ໃນຫລາຍປີຜ່ານມາ, ອຸດສາຫະກຳຫນູນຊ່ວຍ ຂອງຫວຽດນາມ ບໍ່ທັນພັດທະນາ. ບັນດາວິສາຫະກິດພາຍໃນປະເທດ ພຽງແຕ່ສະຫນອງຄວາມຕ້ອງການຜະລິດຕະພັນອຸດສາຫະກຳຫນູນຊ່ວຍພາຍໃນປະເທດໄດ້ສ່ວນຫນຶ່ງ, ໃນນັ້ນ ສ່ວນຫລາຍແມ່ນເຄື່ອງອາໄລ່, ວັດສະດຸມີມູນຄ່າຕ່ຳ.
ປະຈຸບັນ, ຫວຽດນາມ ມີປະມານ 30 ຂະແຫນງເສດຖະກິດ, ເຕັກນິກ ຕ້ອງການອຸດສາຫະກຳຫນູນຊ່ວຍ. ໃນນັ້ນ, ມີຫລາຍຂະແຫນງຜະລິດສິນຄ້ານຳມາເຊິ່ງວົງເງິນນັບສືບຕື້ USD/ປີ ແຕ່ພັດນຳເຂົ້າອຸປະກອນແຕ່ 80-85%, ເຮັດໃຫ້ອັດຕາສ່ວນມູນຄ່າເພີ່ມກວມສ່ວນຫນ້ອຍໃນໂຄງປະກອບຜະລິດຕະພັນ, ພົ້ນເດັ່ນຄື: ການຜະລິດ, ຕິດຕັ້ງລົດໂອໂຕ, ລົດຈັກ, ຕ່ຳແຜ່ນຕັດຫຍິບ, ເກີບຫນັງ. ກ່ຽວກັບສິ່ງດັ່ງກ່າວ, ທ່ານ ເຈີນຕວນແອງ, ປະທານສະພາບໍລິຫານບໍລິສັດຫຸ້ນສ່ວນກົນຈັກ 19-8 ຖືວ່າ: ນັ້ນແມ່ນ ຍ້ອນຫວຽດນາມ ພວມຂາດການຮ່ວມສຳພັນ ແລະ ຂະແຫນງອຸດສາຫະກຳຫນູນຊ່ວຍຂອງຫວຽດນາມ ບໍ່ທັນຕອບສະຫນອງຄຸນນະພາບຕາມຄວາມຮຽກຮ້ອງຕ້ອງການບັນດາມາດຖານສາກົນ.
“ປະຈຸບັນ ຢູ່ ຫວຽດນາມ ບໍລິສັດຜະລິດເຄື່ອງອາໄລ່ ບໍ່ມີຫລາຍ. ເຂົາເຈົ້າ ບໍ່ທັນຢາກເຂົ້າຮ່ວມລະບົບສະຫນອງເຄື່ອງອາໄລ່ ຍ້ອນສົ້ນອອກຜະລິດຕະພັນຂອງຫວຽດນາມ ບໍ່ທັນຕອບສະຫນອງຄຸນນະພາບໄດ້, ກໍ່ຄວາມຫຍຸ້ງຍາກໃນການສຳພັດກັບບັນດາບໍລິສັດຜະລິດໃຫຍ່. ທຳມະດາ ຢູ່ ປະເທດອື່ນ, ນອກຈາກບໍລິສັດຜະລິດເຄື່ອງອາໄລ່ແລ້ວ ເຂົາເຈົ້າຍັງມີບັນດາບໍລິສັດການຄ້າເພື່ອຫນູນຊ່ວຍໃນການຈຳຫນ່າຍຜະລິດຕະພັນ ສ່ວນຢູ່ຫວຽດນາມ ການພັດທະນາບໍລິສັດການຄ້າຫນູນຊ່ວຍໃຫ້ແກ່ບັນດາໂຮງງານຜະລິດບໍ່ມີຫລາຍ.”
ເມື່ອການເປີດປະຕູເຊື່ອມໂຍງຂອງຫວຽດນາມ ນັບມື້ນັບເລິກເຊິ່ງ, ກວ້າງຂວາງ, ພິເສດ ເມື່ອປະຊາຄົມອາຊຽນໄດ້ຮັບການສ້າງຕັ້ງຂຶ້ນໃນທ້າຍປີນີ້ ເວລານັ້ນສະພາບແກ້ງແຍ້ງກ່ຽວກັບການດຶງດູດການລົງທຶນລະຫວ່າງບັນດາປະເທດ ອາຊຽນ ຈະແຮງກວ່າ, ຖ້າຫາກຫວຽດນາມ ບໍ່ຍູ້ແຮງການດຶງດູດການລົງທຶນເຂົ້າຂົງເຂດນີ້ ຍາກທີ່ຈະຍາດແຍ່ງບັນດາກາລະໂອກາດປະຕິບັດຈຸດໝາຍກາຍເປັນປະເທດອຸດສາຫະກຳໃນປີ 2020 ໄດ້.
ໂດຍກຳນົດການບຸລິມະສິດຍູ້ແຮງການພັດທະນາບັນດາຂະແຫນງອຸດສາຫະກຳຫນູນຊ່ວຍ ແມ່ນບາດກ້າວບຸກທະລຸຍຸດທະສາດ ເພື່ອແກ້ໄຂດ້ານອ່ອນຂອງຂະແຫນງອຸດສາຫະກຳ ຫວຽດນາມໃນໄລຍະຈະມາເຖິງ, ລັດຖະບານຫວຽດນາມ ໄດ້ປະກາດໃຊ້ຫລາຍນະໂຍບາຍສົ່ງເສີມການພັດທະນາອຸດສາຫະກຳຫນູນຊ່ວຍ. ກ່ອນອື່ນໝົດແມ່ນສ້າງກອບກົດໝາຍໃຫ້ແກ່ການເຄື່ອນໄຫວນີ້. ເດືອນ 10/2014, ກະຊວງອຸດສາຫະກຳ ແລະ ການຄ້າ ໄດ້ມີຂໍ້ຕົກລົງອະນຸມັດແຜນກຳນົດສັງລວມກ່ຽວກັບການພັດທະນາອຸດສາຫະກຳຫນູນຊ່ວຍຮອດປີ 2020, ວິໄສທັດຮອດປີ 2030. ຈຸດໝາຍລວມຂອງແຜນກຳນົດ ແມ່ນເພື່ອຮັບປະກັນຮອດປີ 2020, ຫວຽດນາມ ກາຍເປັນປະເທດອຸດສາຫະກຳໂດຍພື້ນຖານ. ທ່ານ ຫງວຽນແມ້ງກວນ, ຫົວຫນ້າກົມອຸດສາຫະກຳຫນັກ, ສັງກັດກະຊວງອຸດສາຫະກຳ ແລະ ການຄ້າຫວຽດນາມ ຢືນຢັນວ່າ:
“ກະຊວງອຸດສາຫະກຳ ການຄ້າ ໄດ້ສົມທົບກັບບັນດາກະຊວງ, ຂະແຫນງການກ່ຽວຂ້ອງ ສືບຕໍ່ກວດກາ ແລະ ສະເຫນີຕໍ່ທ່ານນາຍົກລັດຖະມົນຕີ ເພື່ອດັດປັບຂໍ້ຕົກລົງຫັນບັນດາການບຸລິມະສິດເປັນລະອຽດ ເພື່ອສົ່ງເສີມ, ພັດທະນາຂະແຫນງວາງແຜນກຳນົດອຸດສາຫະກຳນຫນູນຊ່ວຍ. ດ້ວຍຈິດໃຈຫນູນຊ່ວຍຢ່າງສູງສຸດ ແລະ ຮັບປະກັນຄວາມເປັນປົກກະຕິໃນນະໂຍບາຍ, ພວກຂ້າພະເຈົ້າຈະປະຕິບັດຕາມທິດທາງນີ້.”
ຄຽງຄູ່ກັນນັ້ນ, ລັດຖະບານ ກໍໄດ້ປະກາດໃຊ້ຫລາຍກົນໄກ, ນະໂຍບາຍບຸລິມະສິດໃຫມ່ ສຳລັບຂະແຫນງອຸດສາຫະກຳຫນູນຊ່ວຍມີລັກສະນະໄຫວພິບກວ່າ. ຕົວຢ່າງຄື: ຍົກເວັ້ນ, ຫລຸດຜ່ອນຄ່າເຊົ່າທີ່ດິນ, ບຸລິມະສິດກ່ຽວກັບເວລາເຊົ່າທີ່ດິນຄືນ, ຍົກເວັ້ນ ແລະ ຫລຸດຜ່ອນອາກອນລາຍຮັບວິສາຫະກິດ, ຍົກເວັ້ນພາສີນຳເຂົ້າສຳລັບອຸປະກອນ, ວັດສະດຸ, ເຄື່ອງອາໄລ່ນຳເຂົ້າເພື່ອຮັບໃຊ້ການຜະລິດສຳລັບແຕ່ລະໂຄງການລົງທຶນ. ພ້ອມກັນນັ້ນ, ບັນດາທ້ອງຖິ່ນກໍເພີ່ມທະວີລັກສະນະເປັນເຈົ້າການ, ເພື່ອຕ້ອນຮັບກະແສເງິນລົງທຶນຈາກບັນດານັກລົງທຶນຕ່າງປະເທດເຂົ້າຂົງເຂດນີ້. ທ່ານ ໂຮ່ກວກຢູງ, ປະທານ ຄະນະກຳມະການປະຊາຊົນ ແຂວງ ບີງດີ້ງ ໃຫ້ຮູ້ວ່າ:
“ແຂວງ ບີງດີ້ງ ໄດ້ເປັນເຈົ້າການເພື່ອກະກຽມດຶງດູດການລົງທຶນເຂົ້າຂົງເຂດອຸດສາຫະກຳຫນູນຊ່ວຍ. ຫວ່າງແລ້ວນີ້, ກຸ່ມບໍລິສັດ ຫວຽດນາມ - ສິງກະໂປ ໄດ້ຊອກຮູ້ ແລະ ຢາກລົງທຶນເຂົ້າເຂດອຸດສາຫະກຳຢູ່ ແຂວງ ກູຍເຍີນ ແລະ ຕູຍເຟືອກ, ຮັບໃຊ້ໃຫ້ແກ່ອຸດສາຫະກຳຫນູນຊ່ວຍ.”
ເຖິງວ່າ ຂະແຫນງອຸດສາຫະກຳຫນູນຊ່ວຍຂອງຫວຽດນາມ ບໍ່ທັນພັດທະນາ ກໍຕາມ ແຕ່ດ້ວຍບັນດາຄວາມສາມາດບົ່ມຊ້ອນທີ່ມີຢູ່ແລ້ວ ຄື: ແຫລ່ງຄົນງານອຸດົມສົມບູນ, ພິເສດ ແມ່ນບັນດາການປະຕິຮູບກ່ຽວກັບລະບອບນະໂຍບາຍ ນັ້ນແມ່ນບັນດາທ່າໄດ້ປຽບດຶງດຸດແຫລ່ງເງິນລົງທຶນຂອງຕ່າງປະເທດ ສຸມໃສ່ລົງທຶນຂົງເຂດອຸດສາຫະກຳຫນູນຊ່ວຍຢູ່ ຫວຽດນາມ ໃນໄລຍະຈະມາເຖິງ. ຕໍ່ຫນ້າຄວາມຕ້ອງການເຊື່ອມໂຍງ, ຫວຽດນາມ ພວມມານະພະຍາຍາມພັດທະນາບັນດາຂະແຫນງອຸດສາຫະກຳຫນູນຊ່ວຍ ແລະ ຖືວ່າ ນີ້ແມ່ນບາດກ້າວບຸກທະລຸຍຸດທະສາດເພື່ອ ແກ້ໄຂຄວາມຈຳກັດຂອງຂະແຫນງອຸດສາຫະກຳຫວຽດນາມ ໃນໄລຍະຈະມາເຖິງໄດ້.