(vovworld)- ກະສິກຳ ຫວຽດນາມ ພວມກາຍເປັນຂົງເຂດດຶງດູດການລົງທຶນຂອງວິສາຫະກິດຢູ່ພາຍໃນ ແລະ ຕ່າງປະເທດຫລາຍແຫ່ງ ດ້ວຍແຫລ່ງທຶນນັບມື້ນັບເພີ່ມຂຶ້ນ. ເພື່ອດຶງດູດ ແລະ ເສີມຂະຫຍາຍປະສິດທິຜົນແຫ່ຼງທຶນນີ້, ລັດຖະບານຫວຽດນາມ ພວມມີກົນໄກ, ນະໂຍບາຍເພື່ອສ້າງເງື່ອນໄຂກໍຄືແກ້ໄຂບັນດາຄວາມຫຍຸ້ງຍາກຂໍ້ຕິດຂັດເພື່ອຊ່ວຍວິສາຫະກິດທຳມາຫາກິນຢ່າງມີປະສິດທິຜົນ.
ກຸ່ມບໍລິສັດ TH True milk
ພາບ:internet
|
ເນື້ອທີ່ດິນທຳການຜະລິດກະສິກຳຍັງມີຄວາມສາມາດບົ່ມຊ້ອນຫລາຍຢ່າງໃນການລົງທຶນ. ນັ້ນແມ່ນຂໍ້ສັງເກດຂອງວິສາຫະກິດຫລາຍແຫ່ງ ໄດ້, ພວມ ແລະ ກະກຽມລົງທຶນເຂົ້າຂົງເຂດກະສິກຳ. ປະຈຸບັນ ມີກຸ່ມບໍລິສັດໃຫຍ່ຫລາຍແຫ່ງ ໝັ້ນໝາຍລົງທຶນເຂົ້າຂົງເຂດນີ້ ດ້ວຍຈຳນວນເງິນລົງທຶນນັບພັນຕື້ດົງ. ມີບໍລິສັດຫລາຍແຫ່ງລົງທຶນເຂົ້າຂົງເຂດກະສິກຳປະສົບຜົນສຳເລັດຄື: ກຸ່ມບໍລິສັດ TH. ດ້ວຍເຄື່ອງໝາຍການຄ້າ TH True milk, ກຸ່ມບໍລິສັດ TH ລົງທຶນເຂົ້າຂົງເຂດກະສິກຳແຕ່ປີ 2009, ດ້ວຍໂຄງການ “ລ້ຽງງົວນົມ ແລະ ປຸງແຕ່ງນ້ຳນົມ ສຸມໃສ່ຂອບຂະຫນາດອຸດສາຫະກຳເຕັກໂນໂລຊີສູງ” ຢູ່ ເມືອງ ຫງຽຍດານ ແຂວງ ເງ້ອານ. ມາຮອດປະຈຸບັນ, ຟາມລ້ຽງງົວນົມຂອງກຸ່ມບໍລິສັດ TH ບັນລຸຂອບຂະຫນາດອາຊີ ດ້ວຍຈຳນວນງົວນົມຂຶ້ນເຖິງ 45.000 ໂຕ, ແຕ່ລະມື້ຜະລິດນ້ຳນົມໄດ້ 800.000-900.000 ລິດ. ຈາກຜົນສຳເລັດຂອງກຸ່ມບໍລິສັດ TH, ກະແສການລົງທຶນເຂົ້າຂົງເຂດກະສິກຳໄດ້ພັດທະນາຢ່າງແຮງ ດ້ວຍບັນດາກຸ່ມບໍລິສັດ, ບໍລິສັດໃຫຍ່ຄື: ບໍລິສັດຫຸ້ນສ່ວນ ຮ່ວາງແອງຢາລາຍ, ກຸ່ມບໍລິສັດ ຮ່ວາຟາດ, ກຸ່ມບໍລິສັດVingroup ແລະ ຫວ່າງແລ້ວນີ້ແມ່ນບັນດາກຸ່ມບໍລິສັດ FPT, Viettel.. ການລົງທຶນເຂົ້າຂົງເຂດກະສິກຳສາມາດນຳມາເຊິ່ງແຫລ່ງຜົນປະໂຫຍດໃຫຍ່ຫລວງ, ແຕ່ ເພື່ອໃຫ້ວິສາຫະກິດພັດທະນາເປັນປົກກະຕິ ຕ້ອງມີການບຸກທະລຸໃນນະໂຍບາຍດຶງດູດລົງທຶນ. ທ່ານ ເຈີນແມ້ງບ໋າວ, ປະທານສະພາບໍລິຫານ, ຜູ້ອຳນວຍການໃຫຍ່ບໍລິສັດຫຸ້ນສ່ວນແນວພັນປູກ ທາຍບີງ ໃຫ້ຮູ້ວ່າ:
“ມີຫລາຍນະໂຍບາຍ, ກົນໄກໄດ້ຮັບການປະກາດໃຊ້ ແຕ່ການໝູນໃຊ້ເຂົ້າພຶດຕິກຳຕົວຈິງຂອງບັນດາວິສາຫະກິດຕ້ອງເສຍເວລາຫລາຍ. ສະນັ້ນ ຄວນມີການຮ່ວມສຳພັນລະຫວ່າງບັນດາອົງການຄຸ້ມຄອງລັດ, ວິສາຫະກິດ ແລະ ບັນດາຫົວຫນ່ວຍໃຫ້ຄຳປຶກສາເພື່ອໃຫ້ບັນດາວິສາຫະກິດໝູນໃຊ້ບັນດານະໂຍບາຍດັ່ງກ່າວ ເຂົ້າພຶດຕິກຳ ຕົວຈິງຢ່າງມີປະສິດທິຜົນ ນັ້ນແມ່ນບັນຫາຕ້ອງແກ້ໄຂປະຈຸບັນ.”
ຟາມລ້ຽງງົວນົມຂອງບໍລິສັດ TH True milk
|
ຍັງມີບັນຫາຫນຶ່ງອີກ ຊື່ງບັນດາວິສາຫະກິດລົງທຶນເຂົ້າຂົງເຂດກະສິກຳຍັງເປັນຫ່ວງ ນັ້ນແມ່ນນະໂຍບາຍພາສີອາກອນເມື່ອຕ້ອງລົງທຶນໄລຍະຍາວ. ທ່ານ ຫງວຽນດີງເຊີນ, ປະທານສະພາບໍລິຫານ ທັງເປັນຜູ້ອຳນວຍການໃຫຍ່ບໍລິສັດຫຸ້ນສ່ວນເຕັກໂນໂລຊີຊີວະສາດສວນດອກໄມ້ ດາລາດໃຫ້ຮູ້ວ່າ: ຖ້າຫາກບໍ່ມີບັນດານະໂຍບາຍບຸລິມະສິດພາສີ, ສ້າງເງື່ອນໄຂດຳເນີນທຸລະກິດ ຈະເຮັດໃຫ້ກຳລັງຄວາມແກ້ງແຍ້ງຂອງວິສາຫະກິດໃນຕະຫລາດສົ່ງອອກຫລຸດລົງ. ທ່ານ ຫງວຽນເລີມວຽນ, ປະທານສະພາບໍລິຫານບໍລິສັດ Vinamit ຖືວ່າ:
“ຕະຫລາດພາຍໃນຂອງບໍລິສັດ ປະຈຸບັນ ກວມ 60% ແລະ ສົ່ງອອກ 40% ແລະ ລາຍຮັບນັບຮ້ອຍຕື້/ປີ. ບໍລິສັດພວກຂ້າພະເຈົ້າ ຕ້ອງເສຍ ອາກອນມູນຄ່າເພີ່ມ ໃຫ້ຊາວກະສິກອນ 10%, ສະນັ້ນ ວິສາຫະກິດປາດຖະຫນາຢາກ ກະຊວງກະສິກຳ ເອົາໃຈໃສ່ ແລະ ເຮັດວຽກກັບບັນດາກະຊວງກ່ຽວຂ້ອງເພື່ອສ້າງເງື່ອນໄຂໃຫ້ແກ່ວິສາຫະກິດລົງທຶນ ແລະ ພັດທະນາກະສິກຳແບບຍືນຍົງ.”
ດຣ ດັ້ງກີມເຊີນ, ຫົວຫນ້າສະຖາບັນນະໂຍບາຍ, ຍຸດທະສາດພັດທະນາກະສິກຳ ແລະຊົນນະບົດ, ກະຊວງກະສິກຳ ແລະ ພັດທະນາຊົນນະບົດ ຖືວ່າ: ຄວນມີບັນດາການປ່ຽນແປງເພື່ອດຶງດູດການລົງທຶນເຂົ້າຂົງເຂດກະສິກຳ, ຊົນນະບົດ ແລະ ສ້າງຄວາມດູດດື່ມສຳລັບບັນດານັກລົງທຶນ.
“ເປັນທີ່ຈະແຈ້ງແລ້ວວ່າ ກະສິກຳ ແມ່ນຂົງເຂດລົງທຶນຢ່າງມີປະສິດທິຜົນ ແລະ ຍືນຍົງ. ກ່ຽວກັບນະໂຍບາຍໃຫມ່, ພວກເຮົາຄວນສຳພັດ ແລະ ເປີດປະຕູການຕະຫລາດພາຍໃນປະເທດ ແລະ ສົ່ງອອກ. ພວກຂ້າພະເຈົ້າຄິດວ່າ ຕ້ອງສ້າງລາຍການຫນຶ່ງ ບໍ່ພຽງແຕ່ຕ້ອງປັບປຸງ, ເພີ່ມເຕີມເທົ່ານັ້ນ ຫາກມີພາກສ່ວນຫນຶ່ງເປັນຂົວຕໍ່ລະຫວ່າງວິສາຫະກິດກັບບັນດາອົງການກ່ຽວຂ້ອງເພື່ອແກ້ໄຂ ແລະ ນຳນະໂຍບາຍເຂົ້າສູ່ຊີວິດ.”
ກະຊວງກະສິກຳ ແລະ ພັດທະນາຊົນນະບົດ ໄດ້ຍົກອອກ “ແຜນຮ່າງສ້າງໂຄງປະກອບຂະແຫນງກະສິກຳຄືນໃຫມ່ ຕາມທິດຍົກສູງມູນຄ່າເພີ່ມ ແລະ ພັດທະນາແບບຍືນຍົງ” ເຂົ້າພຶດຕິກຳຕົວຈິງ ດ້ວຍຄວາມຫວັງ ຢາກຂະແຫນງກະສິກຳກາຍເປັນຂະແຫນງເສດຖະກິດປາຍແຫລມຂອງປະເທດຊາດ. ໄລຍະຈະມາເຖິງ, ເພື່ອໃຫ້ແຜນຮ່າງສຳເລັດຜົນ, ຕ້ອງມີການບຸກທະລຸກ່ຽວກັບກົນໄກ, ນະໂຍບາຍ ເພື່ອສ້າງເງື່ອນໄຂ ແລະ ສ້າງຄວາມດູດດື່ມໃຫ້ແກ່ວິສາຫະກິດລົງທຶນເຂົ້າໃນຂົງເຂດກະສິກຳ.