(vovworld)- ໂດຍແມ່ນຫນຶ່ງໃນບັນດາສູນພັດທະນາເສດຖະກິດໃຫຍ່ຂອງທັງປະເທດ, ໃນຫລາຍປີຜ່ານມາ ນະຄອນໂຮ່ຈິມີນ ໄດ້ລົງທຶນແຫລ່ງກຳລັງ, ພູມປັນຍາ ແລະ ທຶນຮອນເປັນຈຳນວນຫລາຍ ເພື່ອກໍ່ສ້າງເຂດເຕັກໂນໂລຊີສູງນະຄອນໂຮ່ຈິມີນ. ຈຸດໝາຍພັດທະນາຂອງນະຄອນໂຮ່ຈິມີນ ແມ່ນບາດກ້າວບຸກທະລຸໃນການດຶງດູດການລົງທຶນເຕັກໂນໂລຊີສູງ ດ້ວຍບັນດາການໝູນໃຊ້ຢ່າງມີປະສິດທິຜົນ, ຮັບໃຊ້ຄວາມຮຽກຮ້ອງຕ້ອງການການພັດທະນາເສດຖະກິດສັງຄົມ ແລະ ເຊື່ອມໂຍງເຂົ້າກັບໂລກ. ມາຮອດປະຈຸບັນ, ຈຸດໝາຍນີ້ ໄດ້ ແລະ ພວມໄດ້ຮັບການຢືນຢັນແມ່ນທິດກ້າວເດີນຢ່າງຖືກຕ້ອງ.
ເຂດ ເຕັກໂນໂລຊີສູງ ນະຄອນໂຮ່ຈິມີນ ປະຈຸບັນ ແມ່ນຫນຶ່ງໃນເຂດ ເຕັກໂນໂລຊີສູງ 3 ແຫ່ງໄດ້ຮັບການຕີລາຄາວ່າ ແມ່ນສະຖານທີ່ດຶງດູດການລົງທຶນ ເຕັກໂນໂລຊີສູງຂອງທັງປະເທດ. ເຂດ ເຕັກໂນໂລຊີສູງ ນະຄອນໂຮ່ຈິມີນ ປະຈຸບັນດຶງດູດກຸ່ມບໍລິສັດ ເຕັກໂນໂລຊີສູງຊັ້ນນຳຂອງໂລກຫລາຍແຫ່ງຄື: Intel ຜະລິດ, ຕິດຕັ້ງ Chipset ແລະ Jabil ຜະລິດເຄື່ອງອາໄຫລ່ເອເລັກໂຕນິກ ຂອງອາເມລິກາ; Nidec ຜະລິດເຄື່ອງຈັກຂອງຍີ່ປຸ່ນ, Datalogic ຜະລິດອຸປະກອນອ່ານລະຫັດສິນຄ້າຂອງອີຕາລີ. ນັບແຕ່ເມື່ອສ້າງຕັ້ງຂຶ້ນມາຮອດປະຈຸບັນ ການນຳນະຄອນ ແລະ ເຂດ ເຕັກໂນໂລຊີສູງ ໄດ້ກຳນົດທິດພັດທະນາເຂດ ເຕັກໂນໂລຊີສູງ ນະຄອນໂຮ່ຈິມີນໃຫ້ກາຍເປັນສູນ ເຕັກໂນໂລຊີສູງ ຢືນອັນດັບຫນຶ່ງຂອງທັງປະເທດ, ສ້າງອິດທິພົນຊື່ສຽງເພື່ອດຶງດູດບັນດານັກລົງທຶນຊັ້ນນຳຂອງໂລກ. ທ່ານ ເລແມ້ງຫ່າ, ຮອງປະທານຄະນະກຳມະການປະຊາຊົນນະຄອນໂຮ່ຈິມີນໃຫ້ຮູ້ວ່າ:
“ເຂດ ເຕັກໂນໂລຊີສູງມີບົດບາດອັນໃຫຍ່ຫລວງໃນການພັດທະນາເສດຖະກິດສັງຄົມຂອງນະຄອນ. ກ່ຽວກັບການຜະລິດ, ນີ້ແມ່ນສະຖານທີ່ ໄດ້ ແລະ ຈະເຕົ້າໂຮມບັນດາໂຮງງານຜະລິດບັນດາຜະລິດຕະພັນ ເຕັກໂນໂລຊີສູງ. ປະຈຸບັນ ມີ ບໍລິສັດ Intel ແລະ Samsung ແມ່ນບໍລິສັດເອເລັກໂຕນິກຊັ້ນນຳຂອງໂລກ ແລະ ບັນດາບໍລິສັດອື່ນໃນຂົງເຂດ ເຕັກໂນໂລຊີສູງ ຈາກການຜະລິດອາຫານຕະຫລອດຮອດຊີວະສາດ. ສິ່ງສຳຄັນກວ່າ ເຂດ ເຕັກໂນໂລຊີສູງສວມບົດບາດສຳຄັນໃນວຽກງານຄົ້ນຄວ້າວິທະຍາສາດ, ກໍ່ສ້າງບັນດາວິສາຫະກິດ.”
ບໍລິສັດ Samsung ຢູ່ເຂດເຕັກໂນໂລຊີສູງ
ພາບ:nguyentandung.org
|
ປີ 2014 ເຂດ ເຕັກໂນໂລຊີສູງ ໄດ້ດຶງດູດ 10 ໂຄງການລົງທຶນຂອງຕ່າງປະເທດ ດ້ວຍຍອດຈຳນວນທຶນເກືອບ 2 ຕື້ USD, ມູນຄ່າການສົ່ງອອກຜະລິດຕະພັນ ເຕັກໂນໂລຊີສູງກວ່າ 3 ຕື້ USD. ພາຍຫລັງສ້າງຕັ້ງ ແລະ ພັດທະນາມາເປັນເວລາ 12 ປີ ໄດ້ດຶງດູດການລົງທຶນເຂົ້າເຂດ ເຕັກໂນໂລຊີສູງ ບັນລຸກວ່າ 10 ຕື້ USD. ສະເລ່ຍໃນເນຶ້ື້ອທີ່ດິນ1 ha ແລະ ສະມັດຕະພາບຂອງແຮງງານຜູ້ຫນຶ່ງຢູ່ເຂດ ເຕັກໂນໂລຊີສູງ ໄດ້ສ້າງມູນຄ່າສົ່ງອອກເກືອບ 30 ລ້ານ USD ແລະ ບັນລຸ 150.000 USD/ປີ. ປະຈຸບັນເຂດ ເຕັກໂນໂລຊີສູງ ມີ 60 ໂຄງການຍັງມີຜົນສັກສິດ, ໃນນັ້ນ 38 ໂຄງການໄດ້ນຳເຂົ້າເຄື່ອນໄຫວ. ພິເສດ ໃນປີ 2014, ກຸ່ມບໍລິສັດເອເລັກໂຕນິກ Samsung ຂອງ ສເກົາຫລີ ໄດ້ຕົກລົງລົງທຶນເຂົ້າໂຄງການ Samsung CE Complex ຜະລິດບັນດາຜະລິດຕະພັນເອເລັກໂຕນິກມີເງິນລົງທຶນ 1,4 ຕື້ USD. ນອກຈາກຜະລິດເຄື່ອງອາໄຫລ່ຂອງໂທລະທັດແລ້ວ, ໂຄງການຂອງ Samsung ຍັງຜະລິດຕູ້ເຢັນ, ແອເຢັນ, ຈັກຊັກເຄື່ອງນຳໃຊ້ ເຕັກໂນໂລຊີສູງ. ນີ້ແມ່ນບັນດາຜະລິດຕະພັນເອເລັກໂຕນິກນຳໃຊ້ໃນຄອບຄົວ ຊື່ງ Samsung ພວມຍູ້ແຮງການດຳເນີນທຸລະກິດຢູ່ຕະຫລາດ ຫວຽດນາມ ຜ່ານການນຳເຂົ້າ. ພ້ອມກັບການຜັນຂະຫຍາຍໂຄງການນີ້, Samsung ຜັນຂະຫຍາຍການສ້າງຕັ້ງສູນຄົ້ນຄ້ວາ ແລະ ພັດທະນາ ເພື່ອຄົ້ນຄ້ວາລາຍການ ແລະ ຊອບແວນຳໃຊ້ບັນດາຜະລິດຕະພັນເອເລັກໂຕນິກຂອງໂຄງການ. ຕາມແຜນການ, ໂຄງການນີ້ຈະເລີ່ມເຄື່ອນໄຫວໃນໄຕມາດທີ 2/2016. ເມື່ອນຳເຂົ້າເຄື່ອນໄຫວ, ໂຄງການຈະດຶງດູດຄົນງານປະມານ 6000 ຄົນ.
ຄຽງຄູ່ກັບບັນດາການເຄື່ອນໄຫວຜະລິດ, ຄົ້ນຄ້ວາ ແລະ ດຶງດູດການລົງທຶນ ເຕັກໂນໂລຊີສູງ, ນະຄອນ ໂຮ່ຈິມີນ ຍັງປະຕິບັດບັນດາການເຄື່ອນໄຫວມີຄວາມໝາຍວິທະຍາສາດ, ຄົ້ນຄ້ວາມີລັກສະນະສາກົນ ຜ່ານການຈັດຕັ້ງກອງປະຊຸມສາກົນປະຈຳປີຢູ່ເຂດ ເຕັກໂນໂລຊີສູງ. ທ່ານ ເລຮ່ວາຍກວກ, ຫົວຫນ້າຄະນະຄຸ້ມຄອງເຂດ ເຕັກໂນໂລຊີສູງນະຄອນ ໂຮ່ຈິມີນ ຢືນຢັນວ່າ:
“ການກຳນົດທິດພັດທະນາເຂດ ເຕັກໂນໂລຊີສູງ ແມ່ນອີງໃສ່ບັນດາລັກສະນະພິເສດຂອງນະຄອນ ໂຮ່ຈິມີນ, ນັ້ນແມ່ນບ່ອນເຕົ້າໂຮມແຫລ່ງຊັບພະຍາກອນມະນຸດມີຄຸນນະພາບສູງ, ແມ່ນສະຖານທີ່ພົບປະແລກປ່ຽນສາກົນ. ຢູ່ທີ່ນີ້ ຍັງຈັດຕັ້ງບັນດາເຫດການພົບປະກັບບັນດານັກວິທະຍາສາດ, ນັກຄົ້ນຄ້ວາສາກົນ, ຊາວຫວຽດນາມ ອາໄສຢູ່ຕ່າງປະເທດ. ພວກເຮົາຍາດແຍ່ງບັນດາຄວາມສາມາດບົ່ມຊ້ອນ ທ່າໄດ້ປຽບນີ້ ເພື່ອພັດທະນາບັນດາການເຄື່ອນໄຫວນຳມາເຊິ່ງມູນຄ່າເພີ່ມສູງ, ບໍ່ພຽງແຕ່ໃນຂົງເຂດການຜະລິດເທົ່ານັ້ນ ຫາກນັບທັງໃນຂົງເຂດຄົ້ນຄ້ວາ, ບຳລຸງສ້າງ ແລະ ພິເສດ ເອົາໃຈໃສ່ເຖິງແນວຄວາມຄິດ, ໝາກຜົນການຄົ້ນຄ້ວາທີ່ມີຢູ່ແລ້ວ ເພື່ອກ້າວໄປເຖິງການຫັນເປັນການຄ້າ, ສ້າງບັນດາຜະລິດຕະພັນປະກອບສ່ວນໃຫ້ແກ່ສັງຄົມ.”
ພາຍຫລັງ 12 ປີແຫ່ງການພັດທະນາ, ເຂດ ເຕັກໂນໂລຊີສູງ ນະຄອນ ໂຮ່ຈິມີນ ໄດ້ ແລະ ພວມຢັ້ງຢືນທິດອັນຖືກຕ້ອງ ແລະ ສ້າງເປັນຂີດໝາຍໃຫ້ແກ່ບັນດານັກລົງທຶນ, ບັນດາກຸ່ມບໍລິສັດລົງທຶນໃຫຍ່. ບັນດາຜົນງານເບື້ອງຕົ້ນຂອງເຂດ ເຕັກໂນໂລຊີສູງ ນະຄອນໂຮ່ຈິມີນ ບໍ່ພຽງແຕ່ສ້າງບາດກ້າວບຸກທະລຸກ່ຽວກັບການດຶງດູດ ເຕັກໂນໂລຊີສູງເທົ່ານັ້ນ ຫາກຍັງປະກອບສ່ວນນຳຫວຽດນາມ ເຂົ້າໃນແຜນທີ່ ເຕັກໂນໂລຊີສູງຂອງໂລກອີກດ້ວຍ.