ໄລ່ຮອດຈຸດເວລານີ້, ຫວຽດນາມ ໄດ້ເຂົ້າຮ່ວມ ແລະ ສຳເລັດການເຈລະຈາ FTA 2 ຝ່າຍ ແລະ ຫຼາຍຝ່າຍ 12 ສະບັບ. ໃນຈຳນວນນັ້ນ, ມີ FTA 8 ສະບັບໄດ້ມີຜົນສັກສິດ ແລະ ພວມໄດ້ຮັບການປະຕິບັດ. ບັນດາ FTA ລຸ້ນໃໝ່ໄດ້ສິ້ນສຸດການເຈລະຈາ ລວມມີ: FTA ຫວຽດນາມ - ສະຫະພາບເອີລົບ ແລະ ສັນຍາຄູ່ຮ່ວມມືຂ້າມປາຊີຟິກ (TPP). ດ້ວຍການເຈລະຈາ, ລົງນາມໃນບັນດາສັນຍາ FTA ນີ້, ຫວຽດນາມ ພວມກ້າວເຂົ້າສູ່ການເຊື່ອມໂຍງຢ່າງເລິກເຊິ່ງ, ກວ້າງຂວາງ ແລະ ໄດ້ຮັບການຕີລາຄາສູງທີ່ສຸດຈາກບັນດາຄູ່ຮ່ວມມື. ທ່ານເອກອັກຄະລັດຖະທູດແດນມາກ ປະຈຳຫວຽດນາມ, Charlotte Laursen, ແມ່ນໜຶ່ງໃນບັນດາສະມາຊິກເຂົ້າຮ່ວມການເຈລະຈາ FTA ຫວຽດນາມ - ອີຢູ, ໃຫ້ຂໍ້ສັງເກດວ່າ.
“ຂ້າພະເຈົ້າມີຄວາມປະທັບໃຈ ທີ່ສຸດຕໍ່ຄວາມຕັດສິນໃຈຂອງລັດຖະບານຫວຽດນາມ ໃນການສິ້ນສຸດການເຈລະຈາ FTA ຫວຽດນາມ - ອີຢູ ແລະ TPP. ດ້ວຍບັນດາແຜນການຮ່ວມມືທີ່ເຕັມໄປດ້ວຍຄວາມສາມາດບົມຊ້ອນ, ຫວຽດນາມ ຈະໄດ້ຮັບຜົນປະໂຫຍດຫຼາຍຢ່າງຈາກບັນດາສັນຍານີ້. ສິ່ງນີ້ກໍ່ໝາຍຄວາມວ່າ, ຫວຽດນາມ ກໍຕ້ອງປະເຊີນໜ້າກັບບັນດາສິ່ງທ້າທາຍໃໝ່ ເພື່ອສາມາດບັນລຸໄດ້ບັນດາຜົນປະໂຫຍດລວມຈາກບັນດາສັນຍາການຄ້າເສລີນີ້”.
ສະນັ້ນ, FTA ລຸ້ນໃໝ່ ມີຄວາມແຕກຕ່າງກັນຄືແນວໃດ? ທີ່ໜຶ່ງກ່ຽວກັບການສົ່ງອອກ, ບັນດາ FTA ລຸ້ນໃໝ່ ໄດ້ລົບລ້າງພາສີອາກອນສ່ວນຫຼາຍໃຫ້ສິນຄ້າຫວຽດນາມ ແລະ ບັນດາປະເທດຄູ່ຮ່ວມມື. ໃນນັ້ນມີບັນດາຄູ່ຮ່ວມມືໃຫຍ່ພິເສດຄື ອາເມລິກາ ຫຼື ອີຢູ. ນີ້ແມ່ນກາລະໂອກາດທີ່ດີ ເພື່ອໃຫ້ຫວຽດນາມ ເພີ່ມກຳລັງແກ່ງແຍ້ງກ່ຽວກັບດ້ານລາຄາ. ຖ້າຫາກສົມທຽບ WTO, ບັນດາປະເທດພຽງໃຫ້ຄຳໝັ້ນສັນຍາ “ຫຼຸດຜ່ອນພາສີ” ເທົ່ານັ້ນ ຫາກບໍ່ແມ່ນ “ຍົກເລີກພາສີ” ແລະ ພຽງແຕ່ສຳລັບພາສີບາງປະເພດເທົ່ານັ້ນ ຫາກບໍ່ແມ່ນພາສີ “ເກືອບໝົດ”, ບັນດາ FTA ໄດ້ນຳມາເຊິ່ງທ່າແຮງຫຼາຍກວ່າ ເມື່ອທຽບໃສ່ພາສີບຸລິມະສິດ. ເຖິງຢ່າງໃດກໍ່ຕາມ, ສິ່ງທ້າທາຍກໍ່ນອນໃນບັນດາທ່າແຮງດ້ານພາສີນີ້. ຕາມທ່ານເອກອັກຄະລັດຖະທູດຫວຍດນາມ ປະຈຳອາເມລິກາ ຟ້າມກວາງວິງ ແລ້ວ, ຫວຽດນາມ ສາມາດໝູນໃຊ້ບັນດາບຸລິມະສິດດ້ານພາສີຢ່າງສຸດຂີດ, ແຕ່ກ່ອນອື່ນໝົດສິນຄ້າຂອງຫວຽດນາມ ຕ້ອງຕອບສະໜອງບັນດາເງື່ອນໄຂກ່ຽວກັບຕົ້ນກຳເນີດ, ຮົ້ວກີດຂວາງດ້ານເຕັກນິກ, ອະນາໄມກັນພະຍາດຈາກບັນດາຕະຫຼາດນຳເຂົ້າໃຫ້ໄດ້.
“ຖ້າຫາກພວກເຮົາເພີ່ມກຳລັງແກ່ງແຍ້ງບັນດາຜະລິດຕະພັນຂອງຕົນໄດ້ ແມ່ນສາມາດຫຼີກລ້ຽງໄດ້ຫຼາຍບັນຫາກວ່າຄື ການຈັດວາງອັດຕາພາສີສູງ, ເງື່ອນໄຂດ້ານເຕັກນິກ. ພວກເຮົາມີສິນຄ້າຫຼາຍປະເພດທີ່ມີທ່າແຮງຄື: ເກີບໜັງ, ເຄື່ອງຕ່ຳແຜ່ນຕັດຫຍິບ, ສິນໃນນ້ຳ ເມື່ອທຽບໃສ່ບັນດາປະເທດອື່ນກໍມີສິນຄ້າປະເພດນີ້. ນັບທັງ, ເມື່ອ TPP ຍັງບໍ່ທັນມີຜົນສັກສິດ, ຖ້າຫາກພວກເຮົາເລີ່ມດຳເນີນວິວັດການກະກຽມ, ມັນຈະເໝາະສົມກັບແຜນນະໂຍບາຍປ່ຽນໃໝ່, ແຜນນະໂຍບາຍເຊື່ອມໂຍງຂອງຕົນ, ສ້າງກຳລັງດຶງດູດໃໝ່ຂອງພື້ນຖານເສດຖະກິດຫວຽດນາມ ໃຫ້ບັນດານັກລົງທຶນຕ່າງປະເທດ”.
ເປັນທີ່ຈະແຈ້ງແລ້ວວ່າ, ບັນດາຮົ້ວກີດຂວາງດ້ານເຕັກນິກ, ລະບົບອະນາໄມ ແລະ ກວດໂລກລະບາດພືດຢ່າງເຄັ່ງຄັດ ອາດຈະແມ່ນຮົ້ວກີດຂວາງເຮັດໃຫ້ສິນຄ້າຂອງຫວຽດນາມ ຍາກທີ່ຈະເຂົ້າຕະຫຼາດບັນດາປະເທດຄູ່ຮ່ວມມື FTA. ນອກນັ້ນ, ດ້ວຍການເປີດປະຕູຕະຫຼາດຫວຽດນາມ ໃຫ້ສິນຄ້າ, ການບໍລິການຈາກບັນດາປະເທດຄູ່ຮ່ວມມື FTA ເຂົ້າຫວຽດນາມ ນັ້ນ, ສິນຄ້າຂອງ ຫວຽດນາມ ບໍ່ພຽງແຕ່ແກ່ງແຍ້ງ “ຢູ່ໃນປະເທດ” ເທົ່ານັ້ນ. ສິ່ງທ້າທາຍສຳລັບວິສາຫະກິດຫວຽດນາມ ນັ້ນແມ່ນກຳລັງແກ່ງແຍ້ງກັບສິນຄ້າທີ່ມີລາຄາຖືກ, ການບໍລິການມີຄຸນນະພາບດີ ຈາກບັນດາປະເທດຄູ່ຮ່ວມມືຢູ່ຕະຫຼາດພາຍໃນປະເທດ. ສະນັ້ນ, ລັດຖະບານ, ບັນດາກະຊວງ, ຂະແໜງການ ແລະ ວິສາຫະກິດຫວຽດນາມເອງ ພວມມີສະຕິກ່ຽວກັບສິ່ງທ້າທາຍນີ້ຢ່າງຈະແຈ້ງ ເພື່ອຜ່ານຜ່າ. ທ່ານນາງ ຫງວຽນແອງທູ, ຮອງອະທິການບໍດີມະຫາວິທະຍາໄລເສດຖະກິດ, ມະຫາວິທະຍາໄລແຫ່ງຊາດຮ່າໂນ້ຍ ໃຫ້ຮູ້ວ່າ.
“ປະຈຸບັນ, ພວກເຮົາພວມປະຕິບັດການປັບປຸງສະພາບແວດລ້ອມແຫ່ງການດຳເນີນທຸລະກິດຢ່າງຂ້ຽວຂາດ ແລະ ຂ້າພະເຈົ້າຄິດວ່າ, ນີ້ແມ່ນວຽກງານທີ່ພວກເຮົາຕ້ອງປະຕິບັດຢ່າງຂ້ຽວຂາດກວ່າອີກ, ບໍ່ພຽງແຕ່ຢຸດຕິຢູ່ເລື່ອງຫຼຸດຜ່ອນເວລາປະຕິບັດລະບຽບການບໍລິຫານໃຫ້ວິສາຫະກິດເທົ່ານັ້ນ, ຫາກຕ້ອງລົງເລິກດ້ານພື້ນຖານໂຄງລ່າງ, ລະບອບກວ່າອີກ. ທີ່ 2 ແມ່ນ, ບັນດາວິສາຫະກິດເອງ ຕ້ອງເປັນເຈົ້າການກວ່າອີກ. ລັດຖະບານຕ້ອງສົມທົບກັບບັນດາສະຫະສະມາຄົມ, ວິສາຫະກິດເພື່ອສ້າງບັນດາລາຍການທີ່ມີປະສິດທິຜົນກວ່າ ເພື່ອໃຫ້ວິສາຫະກິດສາມາດເຂົ້າໃຈກວ່າ ເພື່ອສາມາດໝູນໃຊ້ກາລະໂອກາດ, ຜ່ານຜ່າສິ່ງທ້າທາຍຂອງວິວັດທະນາການເຊື່ອມໂຍງ”.
ໄດ້ມີການຄົ້ນຄ້ວາຫຼາຍຄັ້ງຊີ້ໃຫ້ເຫັນວ່າ, ຫວຽດນາມ ຈະແມ່ນປະເທດໄດ້ຮັບຜົນປະໂຫຍດຫຼາຍກວ່າໝູ່ ໃນຈຳນວນ 12 ປະເທດເຂົ້າຮ່ວມ TPP. GDP ຈະເພີ່ມຂຶ້ນ 23,5 ຕື້ USD ໃນປີ 2020, ການສົ່ງອອກຈະເພີ່ມຂຶ້ນ 68 ຕື້ USD ໃນປີ 2025. ບັນດາ FTA ອື່ນໆຄື FTA ຫວຽດນາມ ກັບ ອີຢູ ກໍນຳມາໃຫ້ບັນດາກາລະໂອກາດສົ່ງອອກໃຫຍ່ຫຼວງທີ່ສຸດໃຫ້ແກ່ຫວຽດນາມ ເມື່ອສຳພັດກັບຕະຫຼາດທີ່ກວ້າງໃຫຍ່ລວມມີບັນດາພື້ນຖານເສດຖະກິດແຖວໜ້າ. ຫວຽດນາມ ດ້ວຍທີ່ຕັ້ງທີ່ມີຄວາມສະດວກດ້ານພູມສາດເສດຖະກິດ, ພູມຊາດການເມືອງ, ຊັບພະຍາກອນທຳມະຊາດ, ກຳລັງຄົນງານ, ຈະນຳມາເຊິ່ງກາລະໂອກາດຮ່ວມມືດ້ານແຫຼ່ງທຶນ, ກ່ຽວກັບຮູບແບບ, ແບບວິທີຄຸ້ມຄອງໃໝ່, ທັນສະໄໝ ແລະ ມີປະສິດທິຜົນກວ່າໃຫ້ແກ່ວິສາຫະກິດຫວຽດນາມ.
ພາຍຫຼັງໄລຍະເກືອບ 10 ປີທີ່ເຂົ້າເປັນສະມາຊິກອົງການການຄ້າໂລກ (WTO), ເປັນຂີດໝາຍເລີ່ມຕົ້ນຂອງການເຊື່ອມໂຍງຄັ້ງທຳອິດຂອງຫວຽດນາມ, ປະຈຸບັນ, ບັນດາສັນຍາການຄ້າເສລີລຸ້ນໃໝ່ໄດ້ຮັບຄວາມຫວັງວ່າ ຈະສ້າງການເຊື່ອມໂຍງຄັ້ງທີ 2 ຢ່າງແຮງກວ່າສຳລັບຫວຽດນາມ. FTA ລຸ້ນໃໝ່ອາດຈະກາຍເປັນກຳລັງໜູນໃຫ້ແກ່ການປະຕິຮູບດ້ານລະບອບ ແລະ ການບໍລິຫານໃໝ່ທີ່ມີປະສິດທິຜົນ ແລະ ມີການກຳນົດທິດໃຫ້ຫວຽດນາມ. ຫວຽດນາມ ໄດ້ ແລະ ພວມກະກຽມເປັນຢ່າງດີເພື່ອກຳແໜ້ນບັນດາກາລະໂອກາດເຊິ່ງບັນດາ FTA ນີ້ນຳມາໃຫ້.