(vovworld)- ພື້ນຖານເສດຖະກິດຫວຽດນາມ ໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫລາຍຢ່າງໃນປີ 2013 ດ້ວຍລະດັບເຕີບໂຕທີ່ຫນ້າປະທັບໃຈ. ບັນດາໝາກຜົນດັ່ງກ່າວ ພ້ອມກັບການຖອດຖອນບົດຮຽນຜ່ານຜ່າຄວາມຫຍຸ້ງຍາກຂອງ 2 ປີກ່ອນນີ້ ແລະ ປະສິດທິຜົນຢ່າງຕັ້ງຫນ້າຂອງບັນດານະໂຍບາຍທີ່ໄດ້ຮັບການປະກາດໃຊ້, ບັນດາຜູ້ຊ່ຽວຊານເສດຖະກິດຄາດຄະເນວ່າ ສະພາບການເສດຖະກິດຫວຽດນາມ ຈະມີສັນຍານດີໃນປີ 2014. ນັກຂ່າວ ຈູງຖູຍ ມີບົດຂຽນທີ່ພາດຫົວເລື່ອງວ່າ: ປີ 2014: ເສດຖະກິດຫວຽດນາມ ເຕີມໂຕຕາມທິດໝັ້ນຄົງ.
ພາບປະກອບ:internet
|
ຫນຶ່ງໃນບັນດາສັນຍານຈະແຈ້ງທີ່ສຸດ ແລະ ກໍແມ່ນພື້ນຖານເພື່ອຢັ້ງຢືນວ່າ: ເສດຖະກິດຫວຽດນາມໃນປີ 2014 ຈະເຕີບໂຕຕາມທິດຕັ້ງຫນ້າ ນັ້ນແມ່ນ ສິນຄ້າສົ່ງອອກຂອງຫວຽດນາມ ປະຈຸບັນ ຖືກສົ່ງໄປຂາຍຢູ່ ກວ່າ 200 ປະເທດໃນໂລກ. ເຖິງວ່າ ປີ 2013, ເສດຖະກິດໂລກ ແລະ ພາຍໃນປະເທດປະສົບກັບຄວາມຫຍຸ້ງຍາກຫລາຍຢ່າງກໍຕາມ ແຕ່ຫວຽດນາມ ຍັງມີ 20 ໝວດສິນຄ້າສົ່ງອອກບັນລຸວົງເງິນກວ່າ 1 ຕື້ USD. ພ້ອມກັນນັ້ນ 2 ໝວດສິນຄ້າສົ່ງອອກຕົ້ນຕໍຂອງຫວຽດນາມ ແມ່ນເຄື່ອງເອເລັກໂຕນິກ, ຄອມພິວເຕີ, ເຄື່ອງອາໄຫລ່ ແລະ ເຄື່ອງຕ່ຳແຜ່ນຕັດຫຍິບ, ເກີບຫນັງ ທີ່ກວມເກືອບ 50% ຍອດວົງເງິນສົ່ງອອກ ຍັງຄົງບັນລຸລະດັບເຕີບໂຕສູງພໍສົມຄວນ. ຄຽງຄູ່ກັບຄວາມຕ້ອງການພັດທະນາການສົ່ງອອກບັນດາປະເພດສິນຄ້າໃຫມ່, ປະເພດສິນຄ້າຜະລິດທີ່ສອດຄອ່ງກັບທ່າອ່ຽງຈຳຫນ່າຍຂອງຕະຫລາດໂລກ ແລະ ທິດຍຸດທະສາດສົ່ງອອກນັ້ນ, ຫວຽດນາມ ຍັງມີບັນດາປະເພດສິນຄ້າມີທ່າໄດ້ປຽບກ່ຽວກັບເງື່ອນໄຂທຳມະຊາດ ແລະ ແຫລ່ງແຮງງານຄື: ສິນໃນນ້ຳ, ຜະລິດຕະພັນກະເສດ, ເຄື່ອງຕ່ຳແຜ່ນຕັດຫຍິບ, ເຄື່ອງເອເລັກໂຕນິກ... ດ້ວຍບັນດາໝາກຜົນທີ່ບັນລຸໄດ້ນັ້ນ, ຜູ້ຊ່ຽວຊານດ້ານເສດຖະກິດຫວຽດນາມ ເລດັງແຢງ ໄດ້ໃຫ້ຂໍ້ສັງເກດວ່າ:
“ ແງ່ຫວັງເສດຖະກິດໃນ 2 ປີຈະມາເຖິງແມ່ນອີງໃສ່ຄວາມສາມາດປະຕິຮູບແລະການປ່ຽນໃຫມ່, ຖ້າມີການປ່ຽນໃໝ່ຈຶ່ງມີຄວາມສາມາດບົ່ມຊ້ອນເພື່ອເຕີບໂຕໄດ້. ປະຈຸບັນ ລັດຖະບານ ໄດ້ມີການປ່ຽນແປງຫລາຍຢ່າງຄື: ສ້າງໂຄງປະກອບພື້ນຖານເສດຖະກິດຄືນໃຫມ່, ປະຕິຮູບລະບົບທະນາຄານ, ປະກາດໃຊ້ນະໂຍບາຍໃຫມ່, ຄວນປະຕິຮູບລັດວິສາຫະກິດ ແລະ ແກ້ໄຂບັນຫາອາສັງຫາລິມະຊັບ.”
ປີ 2014, ພື້ນຖານເສດຖະກິດ ຫວຽດນາມ ຖືກຄາດຄະເນວ່າຍັງຄົງສືບຕໍ່ບັນລຸລະດັບເຕີບໂຕແຕ່ຍັງຊັກຊ້າຢູ່. ພາກສ່ວນທີ່ມີເງິນລົງທຶນໂດຍກົງຂອງຕ່າງປະເທດ ຮັກສາໄດ້ທ່າເຕີບໂຕ ແຕ່ບໍ່ມີບາດກ້າວບຸກທະລຸໃນປີນີ້. ພາກສ່ວນບໍລິການຈະບັນລຸລະດັບເຕີບໂຕສູງກວ່າປີ 2013, ແຕ່ບໍ່ທັນມີຄວາມສາມາດຊຸກຍູ້ທັງພື້ນຖານເສດຖະກິດ. ຕາມທ່ານ ຫງວຽນບາເອີນ, ເລຂານຸການໃຫຍ່ສະພາແຫ່ງຊາດກ່ຽວກັບການພັດທະນາແບບຍືນຍົງ ແລະ ຍົກສູງກຳລັງແກ້ງແຍ້ງ ແລ້ວ, ໃນໄລຍະຈະມາເຖິງ, ເພື່ອໃຫ້ວິສາຫະກິດພັດທະນາ, ເສດຖະກິດມະຫາພາກຕ້ອງໄດ້ຮັບການຮັກສາເປັນປົກກະຕິ, ນະໂຍບາຍງົບປະມານ, ເງິນຕາ ຕ້ອງມີຄວາມກົມກຽວ ເພື່ອສ້າງຄວາມໄວ້ເນື້ອເຊື່ອໃຈໃຫ້ແກ່ຕະຫລາດ, ໃຫ້ແກ່ບັນດານັກລົງທຶນ. ສິ່ງດັ່ງກ່າວຈະປະກອບສ່ວນເຂົ້າໃນການເຕີບໂຕ ພື້ນຖານເສດຖະກິດໃນປີ 2014.
“ ບັນດານະໂຍບາຍງົບປະມານຮັກສາເສດຖະກິດມະຫາພາກເປັນປົກກະຕິ, ຄວາມໄວ້ເນື້ອເຊື່ອໃຈຂອງຕະຫລາດໄດ້ຮັບການຢັ້ງຢືນ, ສະພາບແວດລ້ອມແຫ່ງການລົງທຶນຂອງຫວຽດນາມສຳລັບພາກພື້ນຍັງຄົງສ້າງຄວາມດູດດື່ມ. ຄວາມສາມາດປ່ອຍເງິນຍັງຢູ່ໃນລະດັບສູງ, ອັດຕາສ່ວນການລົງທຶນຈາກງົບປະມານຖືກຫລຸດລົງ ແຕ່ການລົງທຶນສັງຄົມເພີ່ມຂຶ້ນພໍສົມຄວນ, ນະໂຍບາຍດຶງດູດການລົງທຶນຂອງພວກເຮົາຈະແກ້ໄຂບັນດາຄວາມຫຍຸ້ງຍາກນັ້ນ. ພິເສດ ຖ້າສືບຕໍ່ປ່ຽນໃຫມ່ ແລະ ມີບັນດານະໂຍບາຍຍູ້ແຮງການຫັນວິສາຫະກິດເປັນຫຸ້ນສ່ວນ, ສັບຊ້ອນລັດວິສາຫະກິດຄືນໃຫມ່, ຍົກສູງປະສິດທິຜົນລັດວິສາຫະກິດ ສ້າງເປັນເສດຖະກິດການຕະຫລາດ ສະເຫມີພາບ, ໂປ່ງໃສ, ສ້າງເງື່ອນໄຂໃຫ້ພາກສ່ວນເສດຖະກິດ ເອກະຊົນ, ມີການລົງທຶນຂອງຕ່າງປະເທດເຂົ້າມາລົງທຶນ, ພວກເຮົາສາມາດບັນລຸລະດັບເຕີບໂຕ 6%ໄດ້ ”
ທ່ານນາງ ມາຍທິທູ, ຜູ້ອຳນວຍການສູນຄາດຄະເນເສດຖະກິດສັງຄົມ ແລະ ຖະແຫລງຂ່າວແຫ່ງຊາດ ສັງກັດກະຊວງແຜນການ ແລະ ການລົງທຶນຫວຽດນາມ ໄດ້ໃຫ້ຂໍ້ສັງເກດວ່າ: ປີ 2014, ເສດຖະກິດຫວຽດນາມ ຈະຟື້ນຕົວ, ເຖິງວ່າ ຍາກທີ່ຈະບັນລຸໄດ້ລະດັບສູງ ແຕ່ມີສັນຍານດີພໍສົມຄວນ. ສາຍເຫດ ແມ່ນຍ້ອນວິວັດການສ້າງໂຄງປະກອບເສດຖະກິດຄືນໃຫມ່ ຫາກໍເລີ່ມຕົ້ນ ແລະ ຮຽກຮ້ອງຄວນມີເວລາເພື່ອຫັນປ່ຽນຮູບແບບການເຕີບໂຕ. ເຖິງວ່າຖືກຊັກຊ້າໄວ້ໃນ 1-2 ປີກໍ່ຕາມ, ແຕ່ດ້ວຍການກະທົບຂອງການລົງທຶນເຖິງການເຕີບໂຕກໍ່ຄືເຖິງບັນດາປັດໄຈອື່ນໆໃນປີ 2014-2015 ນັ້ນ, ການເຕີບໂຕຂອງພື້ນຖານເສດຖະກິດຈະບັນລຸລະດັບເປັນຫນ້າປະທັບໃຈ. ທ່ານນາງ ມາຍທິທູ ເວົ້າວ່າ:
“ ວິສາຫະກິດໄດ້ຜ່ານຜ່າໄລຍະຫຍຸ້ງຍາກທີ່ສຸດ ແລະ ສ້າງໂຄງປະກອບການເຄື່ອນໄຫວຂອງຕົນຄືນໃຫມ່, ປະຈຸບັນ ບັນດາວິສາຫະກິດພວມສືບຕໍ່ເຄື່ອນໄຫວ ສິ່ງດັ່ງກ່າວພິສູດໃຫ້ເຫັນກຳລັງຄວາມສາມາດຂອງຕົນໃນການຊອກຫາບັນດາກາລະໂອກາດລົງທຶນ ແລະ ດຳເນີນທຸລະກິດ. ກ່ຽວກັບການເພີ່ມທະວີດ້ານການຄ້າ ແລະ ການລົງທຶນຂອງຕ່າງປະເທດ ຈະສ້າງເງື່ອນໄຂຊຸກຍູ້ການພັດທະນາວິສາຫະກິດ. ນອກນັ້ນການຍູ້ແຮງການປະຕິຮູບລັດວິສາຫະກິດ ກໍຄືຫນູນຊ່ວຍວິສາຫະກິດຂະຫນາດກາງ ແລະ ນ້ອຍ ຈະປະກອບສ່ວນແກ້ໄຂຄວາມຫຍຸ້ງຍາກ, ສ້າງບາດກ້າວບຸກທະລຸໃຫ້ແກ່ວິສາຫະກິດ ເພື່ອເພີ່ມກຳລັງແກ້ງແຍ້ງ ແລະ ເຂົ້າຮ່ວມລະບົບມູນຄ່າເພີ່ມ, ມູນຄ່າທົ່ວໂລກ”
ປີ 2014, ການລົງທຶນຢູ່ພາກສ່ວນເສດຖະກິດເອກະຊົນພາຍໃນປະເທດ ຈະໄດ້ຮັບການປັບປຸງ ຍ້ອນມີບັນດານະໂຍບາຍຫນູນຊ່ວຍການຜະລິດດຳເນີນທຸລະກິດທີ່ຜັນຂະຫຍາຍໃນໄລຍະຜ່ານມາໄດ້ເສີມຂະຫຍາຍຄຸນປະໂຫຍດ. ນອກນັ້ນ ການເຄື່ອນໄຫວຊື້ຂາຍ, ໂອນບັນດາໂຄງການ, ດຶຶງດູດເງິນລົງທຶນໂດຍກົງຂອງຕ່າງປະເທດກໍ່ຈະເພີ່ມຂຶ້ນຢ່າງແຮງໃນປີນີ້. ບັນດາວຽກງານດັ່ງກ່າວ ພ້ອມກັບຍູ້ແຮງວິວັດການຫັນລັດວິສາຫະກິດເປັນຫຸ້ນສ່ວນ, ແລະ ຄວາມມານະພະຍາຍາມຂອງບັນດາວິສາຫະກິດ, ປີ 2014 ຈະເປັນປີທີ່ພື້ນຖານເສດຖະກິດຫວຽດນາມ ເຕີບໂຕຕາມທິດໝັ້ນຄົງ./.