(vovworld)- ຜ່ານໄລຍະ 5 ປີແຫ່ງການຜັນຂະຫຍາຍບັ້ນຂົນຂວາຍ “ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ” ໄດ້ປະກອບສ່ວນປ່ຽນແປງຄວາມຄິດ, ຄວາມຊີນເຄີຍຂອງຜູ້ໃຊ້ສອຍພາຍໃນປະເທດ. ມີຫລາຍເຄື່ອງໝາຍການຄ້າຫວຽດນາມ ໄດ້ກວມອັດຕາສ່ວນຕະຫລາດເປັນສ່ວນຫລາຍໃນບັນດາສູນການຄ້າ, ຮ້ານຊັບພະສິນຄ້າ, ຮ້ານຄ້າ ແລະ ບັນດາຕະຫລາດຢູ່ເຂດຊົນນະບົດ, ເຂດຫ່າງໄກສອກຫລີກ. ພິເສດ ບັ້ນຂົນຂວາຍກໍຊຸກຍູ້ວິສາຫະກິດພາຍໃນປະເທດຍົກສູງຄຸນນະພາບຜະລິດຕະພັນ, ເພີ່ມກຳລັງແກ້ງແຍ້ງ, ປະກອບສ່ວນພັດທະນາເສດຖະກິດສັງຄົມ.
ພາບປະກອບ:antt.vn
|
5 ປີກ່ອນນີ້ ພຽງ 23% ຈຳນວນຜູ້ໃຊ້ສອຍສົນໃຈ ແລະ ຕອບສະຫນອງ ບັ້ນຂົນຂວາຍ “ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ” ແຕ່ມາຮອດປະຈຸບັນ ແມ່ນ 92%. ຕາມໝາກຜົນແຫ່ງການສຳຫລວດຂອງສະຖາບັນຄົ້ນຄ້ວາຫາງສຽງສັງຄົມ, ຄະນະໂຄສະນາສຶກສາສູນກາງ ແລ້ວ, ຜູ້ໃຊ້ສອຍພາຍໃນປະເທດ ນັບມື້ນັບຕີລາຄາສູງສິນຄ້າຂອງຫວຽດນາມ, ດ້ວຍ ສິນຄ້າມີຄຸນນະພາບສູງ ຫລາຍປະເພດ ຊື່ງ ເຮັດໃຫ້ຜູ້ໃຊ້ສອຍກວ່າ 80% ນິຍົມຄື: ເຄື່ອງຕ່ຳແຜ່ນຕັດຫຍິບ, ເກີບຫນັງ. ສ່ວນອາຫານ, ໝາກໄມ້ ມີ 58% ຈຳນວນຜູ້ໃຊ້ສອຍເລືອກເຟັ້ນ. ສິນຄ້າຫວຽດນາມໄດ້ກາຍເປັນການເລືອກເຟັ້ນເປັນປະຈຳຂອງຜູ້ໃຊ້ສອຍຫວຽດນາມ. ນາງຫງວຽນມາຍລຽນ, ຊາວຮ່າໂນ້ຍ ໃຫ້ຮູ້ວ່າ:
“ຂ້າພະເຈົ້າເຫັນວ່າ ຄຸນນະພາບສິນຄ້າຫວຽດນາມ ດີທີ່ສຸດ, ສະນັ້ນ ຂ້າພະເຈົ້າສະຫນັບສະຫນູນຊື້ສິນຄ້າຫວຽດນາມຫລາຍປະເພດ. ຂ້າພະເຈົ້າເຄີຍພ້ອມກັບເພື່ອນຮ່ວມງານ, ໝູ່ເພື່ອນຊື້ ສິນຄ້າຫລາຍປະເພດ ທີ່ຈຳເປັນຄື: ໂສ້ງເສື້ອ, ອາຫານ, ເຄື່ອງໃຊ້ສອຍ. ຕອບສະຫນອງບັ້ນຂົນຂວາຍ ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ ກໍເປັນການປະກອບສ່ວນເຮັດໃຫ້ເສດຖະກິດປະເທດຊາດພັດທະນາ.”
ຖ້າກ່ອນນີ້ ສິນຄ້າຫວຽດນາມ ກວມພຽງສ່ວນຫນຶ່ງໃນລະບົບຮ້ານຊັບພະສິນຄ້າ, ຮ້ານຄ້າ, ຕະຫລາດຫລາຍແຫ່ງ, ແຕ່ມາຮອດປະຈຸບັນ ໃນບັນດາລະບົບ ຈຳຫນ່າຍສິນຄ້າຢູ່ບັນດາແຂວງ, ນະຄອນ ປະລິມານສິນຄ້າຫວຽດນາມ ໄດ້ກວມເອົາເຖິງ 80-90%. ໃນ 5 ປີຜ່ານມາ, ໄດ້ຈັດຕັ້ງບັ້ນສົ່ງສິນຄ້າຫວຽດນາມ ລົງໄປຂາຍຢູ່ເຂດຊົນນະບົດເກືອບ 2000 ຄັ້ງ ໂດຍມີການເຂົ້າຮ່ວມຂອງ 53.000 ເທື່ອ ວິສາຫະກິດ, ດຶງດູດຊາວທ້ອງຖິ່ນກວ່າ 3 ລ້ານເທື່ອຄົນມາຢ້ຽມຊົມ ແລະ ຊື້ສິນຄ້າ. ທ່ານ ໂຕຮ່ວາຍນາມ, ຮອງປະທານ, ທັງເປັນເລຂາທິການ ສະຫະສະມາຄົມວິສາຫະກິດ ຂະຫນາດກາງ ແລະ ນ້ອຍ ຫວຽດນາມ ຖືວ່າ: ບັ້ນຂົນຂວາຍ “ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ ໄດ້ສົ່ງຜົນກະທົບຢ່າງຕັ້ງຫນ້າເຖິງທົ່ວສັງຄົມ, ຊ່ວຍໃຫ້ຜູ້ໃຊ້ສອຍຮັບຮູ້ກ່ຽວກັບຄວາມຮັບຜິດຊອບ, ສິດຜົນປະໂຫຍດຂອງຕົນສຳລັບຜະລິດຕະພັນ, ສິນຄ້າພາຍໃນປະເທດຢ່າງຄົບຖ້ວນກວ່າ.
“ສິ່ງເປັນຫນ້າຊື່ນຊົມທີ່ສຸດ ນັ້ນແມ່ນ ວິສາຫະກິດຫວຽດນາມໄດ້ກັບຄືນຮັບໃຊ້ຕະຫລາດຫວຽດນາມ ແລະ ຊາວຫວຽດນາມ ກັບຄືນຊື້ສິນຄ້າຫວຽດນາມ ຫລາຍກວ່າ. ນີ້ແມ່ນພື້ນຖານເພື່ອຕີລາຄາບັ້ນຂົນຂວາຍດັ່ງກ່າວມີປະສິດທິຜົນດີສຸດ.”
ເຖິງຢ່າງໃດກໍຕາມ, ເພື່ອໃຫ້ຊາວຫວຽດນາມ ບຸລິມະສິດຊົມໃຊ້ສິນຄ້າຫວຽດນາມ ສິ່ງສຳຄັນກວ່າໝູ່ ນັ້ນແມ່ນຄຸນນະພາບຂອງຜະລິດຕະພັນ, ຈາກນັ້ນ ຍົກສູງກຳລັງແກ້ງແຍ້ງຂອງຕົນ. ທ່ານ ຫງວຽນກວກເກື່ອງ, ປະທານສະມາຄົມຊາວກະສິກອນຫວຽດນາມ ຖືວ່າ:
“ ສຳລັບສິນຄ້າປະເພດດຽວກັນ, ສິນຄ້າຜະລິດພາຍໃນປະເທດຄຸນນະພາບ ຕ່ຳກວ່າ, ລາຄາພັດເທົ່າກັນຫລືສູງກວ່າ, ການບໍລິການ, ການຮັບໃຊ້ບໍ່ດີເມື່ອທຽບກັບສິນຄ້າຂອງຕ່າງປະເທດ ບໍ່ສາມາດຂົນຂວາຍຊາວຫວຽດນາມຊົມໃຊ້ສິນຄ້າຂອງຫວຽດນາມໄດ້. ດັ່ງນັ້ນຕ້ອງຍົກສູງລະດັບຂອງນັກຜະລິດສິນຄ້າໃຫ້ເທົ່າທຽບກັບຕ່າງປະເທດ.. ເຮັດໄດ້ຄືແນວນັ້ນ ສິນຄ້າຫວຽດນາມ ຈຶ່ງແກ້ງແຍ້ງກັບສິນຄ້ານຳເຂົ້າຈາກຕ່າງປະເທດໄດ້ ແລະ ເວລານັ້ນຈຶ່ງຂົນຂວາຍຊາວຫວຽດນາມ ຊົມໃຊ້ສິນຄ້າຂອງຫວຽດນາມ.”
ທີ່ກອງປະຊຸມສະຫລຸບ 5 ປີ ແຫ່ງການຜັນຂະຫຍາຍ ບັ້ນຂົນຂວາຍ “ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ ດຳເນີນໄປຢູ່ຮ່າໂນ້ຍ ຫວ່າງແລ້ວນີ້, ບັນດາຜູ້ແທນຖືວ່າ: ບັນດາລາຍການສົ່ງສິນຄ້າຫວຽດນາມ ລົງໄປຂາຍຢູ່ເຂດຊົນນະບົດ ຄວນປະຕິບັດແບບຍືນຍົງ, ຍາວນານກວ່າ, ພ້ອມກັນນັ້ນ ວິສາຫະກິດ ແລະ ທ້ອງຖິ່ນ ຕ້ອງສ້າງໄດ້ເຄືອຂ່າຍຈຳຫນ່າຍສິນຄ້າຢ່າງໝັ້ນຄົງເພື່ອສົ່ງສິນຄ້າຫວຽດນາມລົງໄປຂາຍຢູ່ເຂດຊົນນະບົດ, ເຂດຫ່າງໄກສອກຫລີກ. ທ່ານນາງ ໂຮ່ທິກີມທວາ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າຫວຽດນາມ ຖືວ່າ:
“ໄລຍະຈະມາເຖິງ, ພວກຂ້າພະເຈົ້າເອົາໃຈໃສ່ເຖິງວຽກງານໂຄສະນາຢ່າງເລິກເຊິ່ງ ແລະ ກວ້າງຂວາງກວ່າ, ເພີ່ມທະວີການກວດກາຄືນບັນດາກົນໄກນະໂຍບາຍພິເສດກ່ຽວກັບການປະຕິຮູບລະບຽບການບໍລິຫານເພື່ອສ້າງຄວາມສະດວກກວ່າໃຫ້ແກ່ວິສາຫະກິດ ແລະ ປະຊາຊົນ. ພວກຂ້າພະເຈົ້າກໍເອົາໃຈໃສ່ເປັນພິເສດເຖິງການສົ່ງເສີມການຄ້າ, ເຊື່ອມຕໍ່ລະຫວ່າງຜູ້ໃຊ້ສອຍກັບລະບົບຈຳຫນ່າຍ ແລະ ບັນດານັກຜະລິດ. ຄຽງຄູ່ກັນນັ້ນ, ພວກຂ້າພະເຈົ້າສືບຕໍ່ມີລາຍການບຳລຸງສ້າງ ຍົກສູງການຄຸ້ມຄອງການຄ້າ; ເພີ່ມທະວີວຽກງານກວດການອກຕະຫລາດ, ຕ້ານສໍ້ໂກງການຄ້າ, ສິນຄ້າປອມ ເພື່ອໃຫ້ການແກ້ງແຍ້ງຢ່າງໂປ່ງໃສ, ປະສິດທິຜົນກວ່າ.”
ຈຸດໝາຍຂອງບັ້ນຂົນຂວາຍ“ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ” ຮອດປີ 2020 ຈະມີ 90% ຈຳນວນຜູ້ໃຊ້ສອຍ ຫວຽດນາມ ບຸລິມະສິດຊົມໃຊ້ສິນຄ້າຜະລິດພາຍໃນປະເທດ; 90% ຈຳນວນຕາແສງ ຢູ່ ຊົນນະບົດ, ເຂດພູດອຍ, ເຂດຫ່າງໄກສອກຫລີກ ມີຮ້ານຂາຍສິນຄ້າ ຫວຽດນາມ ຮັບໃຊ້ຄວາມຕ້ອງການຊື້ສິນຄ້າຂອງປະຊາຊົນ. ສິ່ງດັ່ງກ່າວ ຮຽກຮ້ອງບັນດາວິສາຫະກິດຕ້ອງມີການປ່ຽນແປງຢ່າງບໍ່ຢຸດຢັ້ງ, ຍົກສູງຄຸນນະພາບ, ກຳລັງແກ້ງແຍ້ງເພື່ອໃຫ້ສິນຄ້າຫວຽດນາມ ກາຍເປັນການເລືອກເຟັ້ນຕົ້ນຕໍຂອງ ຊາວຫວຽດນາມ.