(vovworld)- ກົມລົງທຶນຕ່າງປະເທດ ສັງກັດກະຊວງແຜນການ ແລະ ການລົງທຶນຫວຽດນາມ ຫາກໍ່ປະກາດສະພາບການລົງທຶນໂດຍກົງຂອງຫວຽດນາມ ອອກສູ່ຕ່າງປະເທດ. ຈາກປະເທດດຶງດູດການລົງທຶນຕ່າງປະເທດເປັນຕົ້ນຕໍ, ມາຮອດປະຈຸບັນ ຫວຽດນາມ ໄດ້ລົງທຶນອອກສູ່ 59 ປະເທດ ແລະ ເຂດແຄ້ວນ ດ້ວຍຍອດຈຳນວນເງິນລົງທຶນຂຶ້ນເຖິງ 15,5 ຕື້ USD. ຕົວເລກດັ່ງກ່າວສະແດງໃຫ້ເຫັນວ່າ: ບັນດາວິສາຫະກິດຫວຽດນາມ ພວມຢືນຢັນກຳລັງແຮງພາຍໃນຂອງຕົນ ແລະ ເຊື່ອມໂຍງຢ່າງເລິກເຊິ່ງເຂົ້າພື້ນຖານເສດຖະກິດໂລກ.
ໄລ່ສະເພາະໄຕມາດທີ 1 ປີ 2013 ໄດ້ມີໂຄງການລົງທຶນຂອງຫວຽດນາມ ອອກສູ່ຕ່າງປະເທດຕື່ມອີກ 22 ໂຄງການໄດ້ຮັບຫນັງສືອະນຸຍາດລົງທຶນດ້ວຍຍອດຈຳນວນທຶນກວ່າ 720 ລ້ານ USD. ຂອບຂະຫນາດທຶນຈົດທະບຽນສະເລ່ຍແມ່ນ ກວ່າ 32 ລ້ານ USD/ໂຄງການ. ບັນດາຂົງເຂດລົງທຶນອອກສູ່ຕ່າງປະເທດສ່ວນຫລາຍແມ່ນຂຸດຄົ້ນແຮ່ທາດ ກວມກວ່າ 72% ຈຳນວນທຶນຈົດທະບຽນ, ຖັດມາແມ່ນບັນດາໂຄງການບໍລິການພັກເຊົາ, ກິນດື່ມ ກວມ 12,6% ຍອດຈຳນວນເງິນລົງທຶນ. ບັນດາໂຄງການຖະແຫລງຂ່າວ, ສື່ສານ ຢືນອັນດັບທີ 3 ກວມ 8,9% ຍອດຈຳນວນເງິນລົງທຶນ ແລະ ກໍ່ໃນ 3 ເດືອນຕົ້ນປີນີ້ ມີ 5 ໂຄງການເພີ່ມເງິນລົງທຶນ, ດ້ວຍຍອດຈຳນວນເງິນລົງທຶນເພີ່ມເຕີມບັນລຸກວ່າ 1,9 ຕື້ USD. ໃນນັ້ນ ໂຄງການຂອງບໍລິສັດຮ່ວມທຸລະກິດ Rusvietpetro ຂອງກຸ່ມບໍລິສັດນ້ຳມັນອາຍແກສ ຫວຽດນາມ ຢູ່ ສະຫະພັນລັດເຊຍ ເພີ່ມຈຳນວນເງິນລົງທຶນກວ່າ 1,4 ຕື້ USD ແລະ ໂຄງການສຳຫລວດບໍ່ເກືອຢູ່ ລາວ ຂອງບໍລິສັດໃຫຍ່ເຄມີ ຫວຽດນາມ ໄດ້ເພີ່ມເງິນລົງທຶນກວ່າ 518 ລ້ານ USD. ເປັນອັນວ່າ ໄລ່ລວມທຶນຈົດທະບຽນສະຫນອງໃຫມ່ ແລະ ເພີ່ມເຕີມຂອງບັນດາວິສາຫະກິດຫວຽດນາມ ອອກສູ່ຕ່າງປະເທດໃນໄຕມາດ 1 ຂອງປີ 2013 ບັນລຸ 2,65 ຕື້ USD. ລັດເຊຍ, ລາວ ແລະ ມຽນມາ ແມ່ນບັນດາປະເທດດຶງດູດເງິນລົງທຶນຂອງບັນດາວິສາຫະກິດຫວຽດນາມ ຫລາຍກວ່າໝູ່ໃນໄຕມາດ 1 ປີ 2013. ທ່ານ ຫງວຽນວັນຕ່ວານ, ຮອງປະທານສະຫະສະມາຄົມວິສາຫະກິດຫວຽດນາມ ລົງທຶນອອກສູ່ຕ່າງປະເທດ ໄດ້ໃຫ້ຂໍ້ສັງເກດວ່າ:
“ນີ້ແມ່ນສັນຍານອັນຕັ້ງຫນ້າ ເພາະວ່າ ເມື່ອລົງທຶນອອກສູ່ຕ່າງປະເທດ ບັນດາວິສາຫະກິດຫວຽດນາມ ເອງຕ້ອງແຂງແຮງກວ່າບັນດາວິສາຫະກິດຂອງປະເທດປະຈຳຖິ່ນ ຈຶ່ງສາມາດລົງທຶນໄດ້. ນອກນັ້ນ ສຳລັບບັນດາວິສາຫະກິດຫວຽດນາມ, ສະພາບແວດລ້ອມແຫ່ງການລົງທຶນຢູ່ຕ່າງປະເທດ ແມ່ນສິ່ງທີ່ໃຫມ່ອ່ຽມ ສະນັ້ນ ກໍປະສົບກັບຄວາມຫຍຸ້ງຍາກກວ່າ. ໄລຍະຈະມາເຖິງ, ຫວຽດນາມ ກໍລົງທຶນຢູ່ບັນດາປະເທດມີພື້ນຖານເສດຖະກິດກ້າວຫນ້າກວ່າຄື: ຍີ່ປຸ່ນ, ສເກົາຫລີ, ອາເມລິກາ ແລະ ເອີລົບ. ເພາະສະນັ້ນ ເລື່ອງເພີ່ມທະວີການລົງທຶນອອກສູ່ຕ່າງປະເທດແມ່ນສັນຍານອັນຕັ້ງຫນ້າ ຢືນຢັນການເຕີບໃຫຍ່ຂອງບັນດາວິສາຫະກິດຫວຽດນາມ.”
 |
ການເຄື່ອນໄຫວລົງທຶນອອກສູ່ຕ່າງປະເທດຂອງບັນດາວິສາຫະກິດຫວຽດນາມ ໃນເບື້ອງຕົ້ນບັນລຸໄດ້ໝາກຜົນເປັນຫນ້າຊື່ນຊົມ, ຢືນຢັນຄວາມມານະພະຍາຍາມ ແລະ ຄຸນນະທາດຂອງວິສາຫະກິດຫວຽດນາມ ພ້ອມທັງເປີດກາລະໂອກາດໃຫ້ແກ່ບັນດາຍຸດທະສາດດຳເນີນທຸລະກິດ. ພາຍຫລັງປະສົບຜົນສຳເລັດຢູ່ຕະຫລາດພາຍໃນແລ້ວ, ມີວິສາຫະກິດຫວຽດນາມ ຫລາຍແຫ່ງ ປະຈຸບັນ ພວມມີທ່າອ່ຽງຍູ້ແຮງການລົງທຶນອອກສູ່ຕ່າງປະເທດ. ບໍລິສັດ ດຶກເຢືອງ ຈຳກັດ ຢູ່ ຮ່າໂນ້ຍ ຜະລິດສະເພາະກົນຈັກ, ເຄື່ອງເຟີນີເຈີ ຍີ່ຫໍ້ Ocen Door ແມ່ນຫນຶ່ງໃນບັນດາວິສາຫະກິດຄືດັ່ງກ່າວ. ເຖິງວ່າ ລົງທຶນອອກສູ່ຕ່າງປະເທດບໍ່ດົນປານໃດກໍຕາມ, ແຕ່ການເຄື່ອນໄຫວລົງທຶນອອກສູ່ຕ່າງປະເທດຂອງບໍລິສັດໄດ້ຮັບການປະຕິບັດຢ່າງເປັນລະບົບ. ຈຸດໝາຍຂອງບໍລິສັດແມ່ນລົງທຶນອອກສູ່ຕ່າງປະເທດຕ້ອງປະກອບສ່ວນຍູ້ແຮງການສົ່ງອອກ ແລະ ໂຄສະນາເຄື່ອງໝາຍການຄ້າຫວຽດນາມອອກສູ່ໂລກ. ທ່ານ ຟ້າມຊວນຮຸ່ງ, ຜູ້ອຳນວຍການບໍລິສັດ ດຶກເຢືອງ ຈຳກັດ ໃຫ້ຮູ້ວ່າ:
“ການເຄື່ອນໄຫວລົງທຶນອອກສູ່ຕ່າງປະເທດຂອງບໍລິສັດດຶກເຢືອງຈຳກັດ ຍີ່ຫໍ້ Ocen Door ໄດ້ຮັບການປະຕິບັດຢ່າງເປັນລະບົບ ຄື: ຊອກຮູ້ສະພາບຕົວຈິງ, ຄົ້ນຄ້ວາຕະຫລາດ, ກົດໝາຍຢູ່ຕ່າງປະເທດຜ່ານງານວາງສະແດງ, ງານຕະຫລາດນັດ ແລະ ສຳພັດກັບລູກຄ້າ, ຫຼັງຈາກນັ້ນພວກຂ້າພະເຈົ້າຈຶ່ງຜັນຂະຫຍາຍການລົງທຶນ. ຢູ່ Dubai, ບັນດາປະເທດ ອາຣັບ ເອມີເຣດຢູໄນເຕັດ, ພວກຂ້າພະເຈົ້າພວມຊຸກຍູ້ບັນດາໂຄງການໃຫຍ່, ຫວັງວ່າຈະນຳຜະລິດຕະພັນຫວຽດນາມ, ເຄື່ອງໝາຍການຄ້າຫວຽດນາມ ອອກສູ່ຕ່າງປະເທດຢ່າງສະດວກ.”
ບັນດາການເຄື່ອນໄຫວລົງທຶນອອກສູ່ຕ່າງປະເທດຂອງວິສາຫະກິດຫວຽດນາມໃນໄລຍະຜ່ານມາໄດ້ສ້າງວຽກເຮັດງານທຳໃຫ້ແກ່ຄົນງານຫວຽດນາມນັບພັນໆຄົນ ແລະ ຄົນງານຕ່າງປະເທດນັບໝື່ນໆຄົນ. ການລົງທຶນອອກສູ່ຕ່າງປະເທດໃນໄລຍະຈະມາເຖິງຈະຊ່ວຍວິສາຫະກິດຫວຽດນາມ ມີເງື່ອນໄຂເປີດກວ້າງຕະຫລາດ ພ້ອມທັງມີກາລະໂອກາດສຳພັດກັບວິທະຍາສາດເຕັກໂນໂລຊີ, ຖອດຖອນບົດຮຽນກ່ຽວກັບການໝູນໃຊ້ເຕັກໂນໂລຊີເຂົ້າໃນການຜະລິດ ຈາກນັ້ນຄ່ອຍໆຍົກສູງກຳລັງແກ້ງແຍ້ງຂອງຕົນຂຶ້ນ.