(vovworld)-ປະຊາຄົມເສດຖະກິດ ອາຊຽນ(AEC) ຄາດວ່າ ຈະໄດ້ຮັບການສ້າງຕັ້ງຂຶ້ນໃນທ້າຍປີ 2015 ດ້ວຍຈຸດໝາຍສ້າງຕະຫລາດລວມຂອງພາກພື້ນ. ນີ້ຈະແມ່ນບາດລ້ຽວນຳມາເຊິ່ງຜົນປະໂຫຍດໃຫ້ແກ່ວິສາຫະກິດບັນດາປະເທດ ອາຊຽນ ເວົ້າລວມ ແລະ ວິສາຫະກິດຫວຽດນາມ ເວົ້າສະເພາະ. ບັນດາວິສາຫະກິດຫວຽດນາມ ໄດ້ ແລະ ພວມກະກຽມຄືແນວໃດໃຫ້ແກ່ການເຂົ້າຮ່ວມປະຊາຄົມເສດຖະກິດອາຊຽນ? ນີ້ກໍແມ່ນເນື້ອໃນບົດຂຽນຂອງ ນັກຂ່າວຫວຽດຮ່າ.
 |
ໃນໄລຍະມໍ່ໆມານີ້, ການເຊື່ອມໂຍງເຂົ້າກັບເສດຖະກິດ ອາຊຽນ ແມ່ນບັນຫາບໍ່ພຽງແຕ່ໄດ້ຮັບຄວາມສົນໃຈຈາກຫວຽດນາມເທົ່ານັ້ນ ຫາກນັບທັງບັນດາປະເທດໃນພາກພື້ນອີກດ້ວຍ. ສິ່ງດັ່ງກ່າວສະແດງອອກດ້ວຍເລື່ອງບັນດາປະເທດ ອາຊຽນ ຕັ້ງຫນ້າຜັນຂະຫຍາຍການເຄື່ອນໄຫວກະກຽມສ້າງຕັ້ງປະຊາຄົມເສດຖະກິດອາຊຽນ ໃນປີ 2015. AEC ໄດ້ຮັບການສ້າງຕັ້ງຂຶ້ນ ຈະເປັນຂີດໝາຍແຫ່ງການເຊ່ືອມໂຍງເຂົ້າກັບພາກພື້ນຢ່າງຮອບດ້ານຂອງບັນດາພື້ນຖານເສດຖະກິດອາຊີຕາເວັນອອກສ່ຽງໃຕ້, ມູ່ງໄປເຖິງຮູບແບບປະຊາຄົມເສດຖະກິດ-ຄວາມໝັ້ນຄົງ-ສັງຄົມ. AEC ຈະປະສານພື້ນຖານເສດຖະກິດຂອງ 10 ປະເທດສະມາຊິກໃນທຸກການເຄື່ອນໄຫວຜະລິດດຳເນີນທຸລະກິດ, ການຄ້າ ແລະ ການລົງທຶນ, ສ້າງຕະຫລາດລວມຂອງພາກພື້ນທີ່ມີພົນລະເມືອງ 600 ລ້ານຄົນ ດ້ວຍຍອດຜະລິດຕະພັນພາຍໃນ GDP ແຕ່ລະປີປະມານ 2.000 ຕື້ USD. ອາດເວົ້າໄດ້ວ່າ ນີ້ແມ່ນກາລະໂອກາດໃຫຍ່ໃຫ້ບັນດາວິສາຫະກິດຫວຽດນາມ,ເພາະວ່າ ມີວິສາຫະກິດຫລາຍແຫ່ງ, ເປັນຕົ້ນແມ່ນວິສາຫະກິດຂະຫນາດໃຫຍ່ ໄດ້ສ້າງແຜນການກະກຽມເພື່ອເຂົ້າຮ່ວມປະຊາຄົມເສດຖະກິດ ອາຊຽນ, ໃນຂະນະ ບັນດາວິສາຫະກິດຂະຫນາດກາງ ແລະ ນ້ອຍ ມີເງື່ອນໄຂສຳພັດ, ຊອກຮູ້ເພື່ອແຊກຊືມເຂົ້າຕະຫລາດກວ້າງໃຫຍ່ນີ້. ທ່ານ ຫງວຽນກົງແຢງ, ຜູ້ຮັບຜິດຊອບຂາອອກຂາເຂົ້າຂອງ ບໍລິສັດຫຸ້ນສ່ວນວັດສະດຸ ແລະ ອຸປະກອນ ຕວານໂບ້(Toan Bo) ແບ່ງປັນວ່າ:
“ປະຈຸບັນ, ບັນດາວິສາຫະກິດຫວຽດນາມ ມີທ່າໄດ້ປຽບກ່ຽວກັບຜະລິດຕະພັນກະເສດ, ສ່ວນສິນຄ້າບາງປະເພດອື່ນຍັງປະສົບກັບຄວາມຫຍຸ້ງຍາກ. ບໍລິສັດຂອງພວກຂ້າພະເຈົ້າສົ່ງອອກລົດຈັກ ກໍແມ່ນປະເພດສິນຄ້າມີທ່າໄດ້ປຽບ, ແຕ່ພວມປະສົບກັບຄວາມແກ້ງແຍ້ງຈາກບັນດາປະເທດຄື ໄທ, ຈີນ ເພາະ ລາຄາລົດຈັກຢູ່ບັນດາປະເທດເຫລົ່ານີ້ ຖືກກວ່າ, ຮູບແບບງາມກວ່າ. ສະນັ້ນ ບໍລິສັດຂ້າພະເຈົ້າຕ້ອງເຮັດແນວໃດໃຫ້ມີລາຄາແກ້ງແຍ້ງ ແລະ ຄຸນນະພາບດີກວ່າ ຈື່ງແຊກຊືມເຂົ້າຕະຫລາດນີ້ໄດ້.”
ດຣ ຫງວຽນດືກແທ່ງ, ຜູ້ອຳນວຍການສູນຄົ້ນຄ້ວາເສດຖະກິດ ແລະ ນະໂຍບາຍຖືວ່າ: ບັນດາວິສາຫະກິດຫວຽດນາມ ຄວນເປັນເຈົ້າການກວ່າເພື່ອຊອກຮູ້ກາລະໂອກາດ ແລະ ຊ່ອງທາງໃຫ້ເໝາະສົມກັບຕົນເອງ.
“ຫວຽດນາມ ມີທີ່ຕັ້ງສະດວກໃນການເຊື່ອມຈອດ ອາຊຽນ ແລະ ອາຊີຕາເວັນອອກສ່ຽງເຫນືອ. ເມື່ອເຊື່ອມໂຍງ, ຮົ້ວກີດຂວາງດ້ານການຄ້າ ແລະ ການລົງທຶນ, ທຸລະກຳດ້ານການຄ້າຂອງມະນຸດຫລຸດລົງ, ສ້າງເງື່ອນໄຂໃຫ້ການເຊື່ອມຕໍ່ພົວພັນກັບສະຖານທີ່ຫ່າງໄກຢ່າງສະດວກສະບາຍກວ່າ. ການຜະລິດ, ການສົ່ງອອກຂອງວິສາຫະກິດ ຄວນຄິດໄລ່ເຖິງລັກສະນະພິເສດສະເພາະ. ຖ້າສຸມໃສ່ຂະແຫນງເກົ່າ ເພື່ອສ້າງເຄືອຄ່າຍການຜະລິດຈະບໍ່ໄດ້ຮັບຜົນ. ຫວຽດນາມ ຕ້ອງສຸມໃສ່ບັນດາຜະລິດຕະພັນທີ່ມີທ່າໄດ້ປຽບຂອງຕົນ.”
ທ່ານເຈີນແທງຫາຍ, ຮອງຫົວຫນ້າກົມຂາອອກຂາເຂົ້າ- ກະຊວງອຸດສາຫະກຳ ການຄ້າຫວຽດນາມ ຖືວ່າ: ເມື່ອເຊື່ອມໂຍງເຂົ້າກັບປະຊາຄົມເສດຖະກິດອາຊຽນ, ບັນດາວິສາຫະກິດ ຫວຽດນາມຕ້ອງເຂົ້າໃຈສິ່ງທ້າທາຍຢ່າງຈະແຈ້ງ ພິເສດ, ວິສາຫະກິດ ຢາກໄດ້ຮັບບຸລິມະສິດດ້ານພາສີຕາມສັນຍາການຄ້າ ອາຊຽນ (ATIGA) ຕ້ອງຮັບປະກັນຫລັກການແຫຼ່ງຜະລິດສິນຄ້າ ຂອງບັນດາປະເທດ ອາຊຽນ. ທ່ານ ເຈີນແທງຫາຍ, ໃຫ້ຮູ້ວ່າ:
“ອັດຕາພາສີຫລຸດລົງ, ແຕ່ຍັງມີຮົ້ວກີດຂວາງອື່ນຄື: ຫລັກການກ່ຽວກັບແຫຼ່ງຜະລິດສິນຄ້າ. ໝາຍຄວາມວ່າ ຕ້ອງມີຢ່າງຫນ້ອຍສຸດ 40% ປະລິມານສິນຄ້າຜະລິດພາຍໃນກຸ່ມອາຊຽນຈື່ງໄດ້ຮັບບຸລິມະສິດ. ຖ້າຫາກນຳເຂົ້າວັດຖຸດິບຈາກຕ່າງປະເທດ ຈະບໍ່ໄດ້ຮັບບຸລິມະສິດດ້ານພາສີ. ນອກນັ້ນ, ຍັງມີມາດຕະການອ່ືນຈຳນວນຫນຶ່ງຄື: ຕ້ານການອຸດຫນູນ, ຕ້ານການຂາຍບຸບລາຄາກໍແມ່ນຮົ້ວກີດຂວາງດ້ານການຄ້າຊື່ງວິສາຫະກິດຄວນເອົາໃຈໃສ່.”
ສຳລັບບັນດາວິສາຫະກິດຫວຽດນາມ, ນອກຈາກຕ້ອງມີບຸກຄະລາກອນສະເພາະກິດໃນການສ້າງຕະຫລາດ, ຄວນມີການກະກຽມບັນດາຜະລິດຕະພັນ, ການຫຸ້ມຫໍ່, ຮູບແບບຢ່າງລອງຄອບຖິ່ຖ້ວນ….ກໍ່ຄືມີບັນດາວິທີການແຊກຊືມເຂົ້າຕະຫລາດຢ່າງເໝາະສົມ. ພ້ອມກັນນັ້ນ, ໃນວິວັດການພັດທະນາຕະຫລາດຕ້ອງອີງຕາມທ່າອ່ຽງໃຊ້ສອຍຂອງປະຊາຊົນແຕ່ລະປະເທດອາຊຽນ. ໃນວິວັດການດຳເນີນທຸລະກິດ ຄວນຮ່ວມສຳພັນກັບບໍລິສັດຈຳຫນ່າຍຢູ່ພາຍໃນປະເທດ ທີ່ມີຊື່ສຽງ ແລະມີກຳລັງຄວາມສາມາດ. ພຶດຕິກຳຕົວຈິງໃຫ້ເຫັນວ່າ, ຜະລິດຕະພັນຂອງແຕ່ລະປະເທດ, ແຕ່ລະວິສາຫະກິດ ລ້ວນແຕ່ນອນໃນລະບົບມູນຄ່າຂອງພາກພື້ນ ຫລື ລະບົບມູນຄ່າຂອງທົ່ວໂລກ. ປະຊາຄົມເສດຖະກິດ ອາຊຽນ ຈະສ້າງໂອກາດອັນລຳ້ຄ່າ ເພື່ອໃຫ້ຫວຽດນາມ ພັດທະນາຕາມທ່າອ່ຽງ ແລະ ລະດັບການພັດທະນາເສດຖະກິດຂອງພາກພື້ນ ແລະ ໂລກ. ສະນັ້ນ ລັດຖະບານ ແລະ ບັນດາວິສາຫະກິດ ຫວຽດນາມ ໄດ້ ແລະ ພວມຍາດແຍ່ງກາລະໂອກາດ, ຜ່ານຜ່າສິ່ງທ້າທາຍໃນວິວັດທະນາການສ້າງ AEC.