(vovworld)- ປີ 2013 ດ້ວຍບັນດາຄວາມມານະພະຍາຍາມໃນການບໍລິຫານຂອງລັດຖະບານ, ວິວັດການສ້າງໂຄງປະກອບພື້ນຖານເສດຖະກິດຄືນໃຫມ່ທີ່ຜັນຂະຫຍາຍໃນໄລຍະຜ່ານມາ ບັນລຸໄດ້ໝາກຜົນໃນເບື້ອງຕົ້ນ, ປະກອບສ່ວນຍົກສູງປະສິດທິຜົນການພັດທະນາເສດຖະກິດ.
ພາບປະກອບ:internet
|
ປີ 2013, ໃນລາຍການສັງລວມສ້າງໂຄງປະກອບພື້ນຖານເສດຖະກິດຄືນໃຫມ່, ລັດຖະບານຫວຽດນາມ ໄດ້ເອົາໃຈໃສ່ເປັນພິເສດເຖິງການປັບປຸງລະບອບ, ນະໂຍບາຍສ້າງໂຄງປະກອບເສດຖະກິດ, ປ່ຽນໃຫມ່ຮູບແບບການເຕີບໂຕ. ໃນນັ້ນສຸມໃສ່ເຂົ້າໃນບັນດາຂົງເຂດ: ສ້າງໂຄງປະກອບການລົງທຶນຄືນໃຫມ່, ຈຸດສຸມແມ່ນລົງທຶນຂອງລັດ, ສ້າງໂຄງປະກອບການເງິນ, ສິນເຊື່ອ,ໃນນັ້ນສຸມໃສ່ບັນດາທະນາຄານການຄ້າ ແລະ ສ້າງໂຄງປະກອບວິສາຫະກິດຄືນໃຫມ່, ເປັນຕົ້ນແມ່ນລັດວິສາຫະກິດ. ປີ 2013 ແມ່ນປີທຳອິດທີ່ກະຊວງອຸດສາຫະກຳ ແລະ ການຄ້າຫວຽດນາມ ຜັນຂະຫຍາຍມະຕິຂອງລັດຖະບານກ່ຽວກັບການສ້າງໂຄງປະກອບບັນດາກຸ່ມບໍລິສັດ, ບໍລິສັດໃຫຍ່ແຫ່ງລັດຄືນໃຫມ່. ແຜນຮ່າງສ້າງໂຄງປະກອບລັດວິສາຫະກິດແມ່ນສຸມໃສ່ເຂົ້າໃນບັນດາຂະແຫນງການ, ຂົງເຂດຫລັກແຫລ່ງ ແລະ ສະຫນອງບັນດາບໍລິການທີ່ຈຳເປັນ, ການປ້ອງກັນຊາດປ້ອງກັນຄວາມສະຫງົບ. ຕາມວິວັດການນີ້, ກະຊວງອຸດສາຫະກຳ ແລະ ການຄ້າ ໄດ້ດຳເນີນການກວດກາ, ກຳນົດຫນ້າທີ່, ຂະແຫນງອາຊີບດຳເນີນທຸລະກິດຕົ້ນຕໍຄືນໃຫມ່, ຖອນທຶນຮອນຢູ່ບັນດາຂະແຫນງອາຊີບບໍ່ຂຶ້ນກັບຂະແຫນງອາຊີບ ດຳເນີນທຸລະກິດ ຕົ້ນຕໍ. ທ່ານ ຫວູຮູຍຮວ່າງ, ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ:
“ກະຊວງອຸດສາຫະກຳ ແລະ ການຄ້າ ໄດ້ເປັນເຈົ້າການໃນການຜັນຂະຫຍາຍປະຕິບັດບັນດານະໂຍບາຍຂອງລັດກ່ຽວກັບການສ້າງໂຄງປະກອບວິສາຫະກິດຄືນໃຫມ່, ກ່ຽວກັບການປະຕິບັດສິດ, ຫນ້າທີ່ຮັບຜິດຊອບຂອງເຈົ້າຂອງກຳມະສິດທີ່ໄດ້ຮັບການມອບຫມາຍສຳລັບບັນດາກຸ່ມບໍລິສັດເສດຖະກິດ, ບັນດາບໍລິສັດໃຫຍ່ ແລະ ບັນດາບໍລິສັດຂຶ້ນກັບກະຊວງຢ່າງເຂັ້ມງວດ. ບາງຂົງເຂດພວມສືບຕໍ່ຄົ້ນຄ້ວາເພື່ອປະກາດໃຊ້ຮັບປະກັນລັກສະນະຄົບຊຸດໃນການປະຕິບັດ, ພິເສດ ບັນດານະໂຍບາຍກ່ຽວຂ້ອງເຖິງການສ້າງໂຄງປະກອບຄືນໃຫມ່ ແລະ ຮັບປະກັນລັກສະນະປະສິດທິຜົນຂອງບັນດາລັດວິສາຫະກິດ.”
ໂດຍມີການຜັນຂະຫຍາຍບັນດາມາດຕະການດັ່ງກ່າວ, ມາຮອດປະຈຸບັນ ປະສິດທິຜົນການເຄື່ອນໄຫວຂອງລັດວິສາຫະກິດໄດ້ຮັບການປັບປຸງ. ບັນດາລັດວິສາຫະກິດປະຕິບັດບົດບາດຫນ້າທີ່ທີ່ໄດ້ຮັບການມອບໝາຍໂດຍພື້ນຖານ ແລະ ໄດ້ຮັບການປັບປຸງສົມບູນແບບ, ເໝາະສົມກັບລະບອບເສດຖະກິດການຕະຫລາດ ແລະ ຄຳຮຽກຮ້ອງຕ້ອງການເຊື່ອມໂຍງເຂົ້າກັບສາກົນ. ມາຮອດປະຈຸບັນ, ມີ ລັດວິສາຫະກິດ ປະມານ 80% ພວມເຄື່ອນໄຫວດຳເນີນທຸລະກິດມີກຳໄລ. ບັນດາກຸ່ມບໍລິສັດ, ບໍລິສັດໃຫຍ່ແຫ່ງລັດປະກອບ 33% GDP.
ໃນຂົງເຂດສ້າງໂຄງປະກອບການລົງທຶນຄືນໃຫມ່, ຊື່ງຈຸດສຸມແມ່ນການລົງທຶນຂອງລັດ, ລັດຖະບານ ໄດ້ຊີ້ນຳປັບປຸງໂຄງປະກອບ ແລະ ກົນໄກຈັດແບ່ງເງິນລົງທຶນ, ສຸມທຶນໃຫ້ແກ່ບັນດາກິດຈະກຳ, ໂຄງການສຳຄັນ, ມີຄວາມຈຳເປັນ ແລະ ທຶນສົມທົບໃຫ້ແກ່ບັນດາໂຄງການ ODA. ກວດກາບັນດາໂຄງການ, ກິດຈະກຳທີ່ຫາກໍລົງມືກໍ່ສ້າງໃຫມ່ຢ່າງແຫນ້ນແຟ້ນ, ແກ້ໄຂສະພາບລົງທຶນບໍ່ເປັນຈຸດສຸມ, ບໍ່ບັນລຸປະສິດທິຜົນ. ປັບປຸງກົນໄກແບ່ງຂັ້ນຄຸ້ມຄອງລົງທຶນ, ຮັບປະກັນການຄຸ້ມຄອງເປັນເອກະພາບຂອງສູນກາງ, ເພີ່ມທະວີຄວາມຮັບຜິດຊອບຂອງທ້ອງຖິ່ນ ແລະ ເຈົ້າຂອງລົງທຶນ. ຍູ້ແຮງການດຶງດູດການລົງທຶນສັງຄົມ. ມາຮອດປະຈຸບັນ, ອັດຕາເງິນລົງທຶນຢູ່ເຂດນອກລັດເພີ່ມຂຶ້ນ 61,3% ໄລຍະ 2006-2010 ຂຶ້ນເຖິງ 62,6% ໄລຍະ 2011-2013.
ກ່ຽວກັບການສ້າງໂຄງປະກອບການເງິນ, ສິນເຊື່ອຄືນໃຫມ່, ມາຮອດປະຈຸບັນ ໄດ້ຜັນຂະຫຍາຍຢ່າງຄົບຊຸດບັນດາມາດຕະການສ້າງໂຄງປະກອບລະບົບບັນດາອົງການສິນເຊື່ອຄືນໃຫມ່ ແລະ ບັນລຸໝາກຜົນໃນເບື້ອງຕົ້ນ. ບັນດາທະນາຄານດຳເນີນທຸລະກິດບໍ່ມີປະສິດທິຜົນໄດ້ຮັບການສ້າງໂຄງປະກອບຄືນໃຫມ່. ໃນປີ 2013 ໄດ້ຫັນທະນາຄານການຄ້າແຫ່ງລັດ 4 ແຫ່ງເປັນຫຸ້ນສ່ວນ. ພ້ອມກັບວິວັດການສ້າງໂຄງປະກອບທະນາຄານ, ການເງິນ ຄືນໃຫມ່, ສະພາບຫນີ້ເສຍເບື້ອງຕົ້ນໄດ້ຮັບການຄວບຄຸມ. ໃນ 8 ເດືອນຕົ້ນປີ, ລະດັບຫນີ້ເສຍເພີ່ມຂຶ້ນສະເລ່ຍ 2,5%/ເດືອນ, ຫລຸດລົງພໍສົມຄວນເມື່ອທຽບໃສ່ລະດັບ 3,9%/ເດືອນເມື່ອທຽບໃສ່ໄລຍະດຽວກັນຂອງປີກາຍ.
ແຜນຮ່າງສ້າງໂຄງປະກອບກະສິກຳຄືນໃຫມ່ກໍໄດ້ຮັບການຜັນຂະຫຍາຍຢ່າງຕັ້ງຫນ້າຕາມທິດຍົກສູງມູນຄ່າເພີ່ມ ແລະ ພັດທະນາແບບຍືນຍົງ. ສຸມໃສ່ຫັນປ່ຽນຜົນລະປູກ, ສັດລ້ຽງ, ຍູ້ແຮງການໝູນໃຊ້ຄວາມກ້າວຫນ້າດ້ານວິທະຍາສາດເຕັກນິກ, ສ້າງບັນດາເຂດຜະລິດສະເພາະ, ຜະລິດດ້ວຍຂອບຂະຫນາດໃຫຍ່, ເຂດກະສິກຳເຕັກໂນໂລຊີສູງ, ຮ່ວມສຳພັນການຜະລິດກັບການປຸງແຕ່ງ, ຮັກສາ ແລະ ຈຳຫນ່າຍຜະລິດຕະພັນ, ເຂົ້າຮ່ວມເຄືອຂ່າຍການຜະລິດ ແລະ ລະບົບມູນຄ່າທົ່ວໂລກ.
ເລື່ອງລັດຖະບານຮັບຮອງເອົາ ແລະ ຜັນຂະຫຍາຍບັນດາແຜນຮ່າງສ້າງໂຄງປະກອບພື້ນຖານເສດຖະກິດຄືນໃຫມ່ ໄດ້ປະກອບສ່ວນພໍສົມຄວນເຂົ້າໃນການປັບປຸງເສດຖະກິດມະຫາພາກ ກໍຄື ຈຸລະພາກ. ເຖິງຢ່າງໃດກໍຕາມ, ຖ້າເບິ່ງສັງລວມກ່ຽວກັບວິວັດການພັດທະນາເສດຖະກິດສັງຄົມໄລຍະ 2011-2015 ໃຫ້ເຫັນວ່າ ພື້ນຖານເສດຖະກິດຫວຽດນາມ ຍັງປະສົບກັບຄວາມຫຍູ້ງຍາກຢູ່, ເປັນຕົ້ນແມ່ນສິ່ງທ້າທາຍກ່ຽວກັບການຈະເລີນເຕີບໂຕຊັກຊ້າ. ທີ່ເວທີປາໄສຄູ່ຮ່ວມມືພັດທະນາຫວຽດນາມ 2013 ຫາກໍດຳເນີນໄປຢູ່ ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ຢືນຢັນ ຄວາມຕັດສິນໃຈຍູ້ແຮງວິວັດການສ້າງໂຄງປະກອບພື້ນຖານເສດຖະກິດ, ສ້າງທ່ວງທ່າໃຫ້ແກ່ເສດຖະກິດຫວຽດນາມ ພັດທະນາ ຢ່າງວ່ອງໄວ ແລະ ໝັ້ນຄົງໃນໄລຍະຈະມາເຖິງ.
“ລັດຖະບານຫວຽດນາມ ສືບຕໍ່ສຸມໃສ່ຍູ້ແຮງການສ້າງໂຄງປະກອບພື້ນຖານເສດຖະກິດຄືນໃຫມ່, ຫັນປ່ຽນຮູບແບບຈະເລີນເຕີບໂຕເພື່ອໃຫ້ພື້ນຖານເສດຖະກິດຫວຽດນາມບັນລຸປະສິດທິຜົນສູງກວ່າ, ກຳລັງແກ້ງແຍ້ງສູງກວ່າ ແລະ ພັດທະນາແບບຍືນຍົງກວ່າ. ລັດຖະບານຫວຽດນາມ ຈະສຸມກຳລັງແຮງປະຕິບັດບັນດາຈຸດສຸມ, ຫນ້າທີ່ຕົ້ນຕໍເປັນຢ່າງດີ, ຮັບປະກັນການຮັກສາເສດຖະກິດມະຫາພາກຢ່າງໝັ້ນແກ່ນ, ເປັນເຈົ້າການຄວບຄຸມໄພເງິນເຟີ້ໃຫ້ດີກວ່າ, ຮັກສາການຈະເລີນເຕີບໂຕ GDP ໃນປີ 2014 ປະມານ 5,8% ແລະ ປີ 2015 ແມ່ນ 6%, ສືບຕໍ່ຮັກສາອັດຕາແລກປ່ຽນເງິນຕາເປັນປົກກະຕິ, ຮັກສາລະດັບການສົ່ງອອກ.”
ສ້າງໂຄງປະກອບພື້ນຖານເສດຖະກິດຄືນໃຫມ່ຢູ່ ຫວຽດນາມ ໃນໄລຍະຈະມາເຖິງ ຈະສືບຕໍ່ໄດ້ຮັບການຜັນຂະຫຍາຍຢ່າງແຂງແຮງ ເພື່ອຍົກສູງປະສິດທິຜົນ, ກຳລັງແກ້ງແຍ້ງ. ປະຕິບັດການຫັນລັດວິສາຫະກິດ 500 ແຫ່ງເປັນຫຸ້ນສ່ວນ ຕາມວິວັດການຊື່ງອົງການການຄ້າໂລກ (WTO)ໄດ້ໃຫ້ຄຳໝັ້ນສັນຍາ ແລະ ໄລຍະຈະມາເຖິງແມ່ນສັນຍາຄູ່ຮ່ວມມືເຂດປາຊີຟີກ TPP.