ໂຄງການສ້າງໂຄງປະກອບພື້ນຖານເສດຖະກິດຄືນໃໝ່ໄລຍະ 2011 – 2015 ໄດ້ສຸມໃສ່ເຂົ້າໃນການຮັບປະກັນສະຖຽນລະພາບດ້ານເສດຖະກິດມະຫາພາກ, ສ້າງໂຄງປະກອບພື້ນຖານເສດຖະກິດຄືນໃໝ່ ຕິດພັນກັບການປ່ຽນໃໝ່ການເຕີບໂຕ. ພ້ອມກັບການເຕີບໂຕດ້ານເສດຖະກິດແມ່ນສະພາບລາຄາ ແລະ ເງິນຕາໄດ້ຮັບການຮັກສາໄວ້ເປັນປົກກະຕິ, ໄພເງິນເຟີ້ໄດ້ຮັບການຄວບຄຸມ… ບົນພື້ນຖານບັນດາໝາກຜົນທີ່ບັນລຸໄດ້ນັ້ນ, ຫວຽດນາມ ສືບຕໍ່ປະຕິບັດແຜນການສ້າງໂຄງປະກອບພື້ນຖານເສດຖະກິດຄືນໃໝ່ໄລຍະ 2016 – 2020, ຕາມນັ້ນແລ້ວ ເອົາໃຈໃສ່ເປັນພິເສດເຖິງການຫັນປ່ຽນຮູບແບບການເຕີບໂຕຕາມທິດ ຍົກສູງຄຸນນະພາບ, ປະສິດທິຜົນ ແລະ ກຳລັງແກ່ງແຍ້ງຂອງພື້ນຖານເສດຖະກິດ; ຍົກສູງຊີວິດການເປັນຢູ່ຂອງປະຊາຊົນ, ເພີ່ມລັກສະນະແກ່ງແຍ້ງ ກໍຄືຍົກສູງທີ່ຕັ້ງທ່ວງທ່າຂອງຫວຽດນາມ ບົນເວທີສາກົນ. ຄາດໝາຍທຳອິດເຊິ່ງໂຄງການໄດ້ວາງອອກແມ່ນຮັບປະກັນການເຕີບໂຕດ້ານເສດຖະກິດຢູ່ໃນລະດັບເໝາະສົມ, ປະກອບສ່ວນຮັບປະກັນສະຖຽນລະພາບດ້ານເສດຖະກິດມະຫາພາກຢ່າງໝັ້ນຄົງ; ຄວບຄຸ້ມໄພເງິນເຟີ້ໃຫ້ຢູ່ໃນລະດັບຕ່ຳ ແລະ ສ້າງພື້ນຖານມະຫາພາກຢ່າງໝັ້ນຄົງເຂັ້ມແຂງ; ແກ້ໄຂບັນດາບັນຫາຊີວິດສັງຄົມ ແລະ ພັດທະນາແບບຍືນຍົງ. ທີ່ກອງປະຊຸມສະໄໝສາມັນເທື່ອທີ 2, ສະພາແຫ່ງຊາດຫວຽດນາມ ຊຸດທີ 14 ທີ່ດຳເນີນໄປຢູ່ຮ່າໂນ້ຍ, ມີສະມາຊິກສະພາແຫ່ງຊາດຫຼາຍທ່ານໄດ້ຖືວ່າ: ເພື່ອສ້າງໂຄງປະກອບພື້ນຖານເສດຖະກິດຄືນໃໝ່ສຳເລັດຜົນ ແມ່ນຕ້ອງສ້າງສະພາບແວດລ້ອມແຫ່ງການດຳເນີນທຸລະກິດໃຫ້ສະດວກ, ກະຈາງແຈ້ງ, ໂປ່ງໃສ. ທ່ານນາງ ຫງວຽນທິແທງ, ສະມາຊິກສະພາແຫ່ງຊາດແຂວງນິງບິ່ງ, ໃຫ້ຮູ້ວ່າ.
“ເມື່ອຕະຫຼາດແມ່ນກຳລັງໜູນຂອງການຜະລິດສິນຄ້າແລ້ວ ວິສາຫະກິດຕ້ອງແມ່ນເສົ້າຄ້ຳ, ແມ່ນແກ່ນສານຂອງການຜະລິດ. ຈາກການເຂົ້າຮ່ວມຂອງວິສາຫະກິດຈະດຶງດູດໄດ້ແຫຼ່ງກຳລັງໃຫ້ແກ່ການລົງທຶນຂອງສັງຄົມ, ບັນດາສະຖາບັນຄົ້ນຄວ້າໄດ້ຕິດພັນກັບບັນດານັກວິທະຍາສາດ, ບັນດາອົງການຜະລິດ, ວິທະຍາສາດເຕັກໂນໂລຊີໃໝ່ ຜະລິດຢ່າງມີປະສິດທິຜົນ. ສະນັ້ນ, ຕ້ອງປ່ຽນໃໝ່ຈີນຕະນາການໃນແຜນການດຳເນີນງານກ່ຽວກັບກະສິກຳ, ຊົນນະບົດ, ໃນນັ້ນລັດສວນບົດບາດນຳພາ, ວິສາຫະກິດເປັນໃຈກາງ, ວິທະຍາສາດຮ່ວມດຳເນີນ, ຊາວກະສິກອນແມ່ນເຈົ້າຂອງ, ພັດທະນາ ແລະ ໜູນຊ່ວຍວິສາຫະກິດລົງທຶນເຂົ້າກະສິກຳ”.
ໜຶ່ງໃນບັນດາໜ້າທີ່ຂອງການປະຕິຮູບພື້ນຖານເສດຖະກິດແມ່ນປັບປຸງ, ຍົກສູງລະດັບພັດທະນາບັນດາຂະແໜງເສດຖະກິດ ຜ່ານການນຳໃຊ້ເຕັກໂນໂລຊີສູງ, ມີມູນຄ່າເພີ່ມສູງ. ເພື່ອວິວັດການສ້າງໂຄງປະກອບພື້ນຖານເສດຖະກິດຄືນໃໝ່ບັນລຸປະສິດທິຜົນສູງ, ໃນໄລຍະ 5 ປີຈະມາເຖິງ, ລັດຖະບານຕ້ອງແກ້ໄຂສະພາບລົງທຶນແບບກະແຈກກະຈາຍ, ຂາດການເຊື່ອມຕໍ່, ຟູມເຟືອຍແຫຼ່ງກຳລັງ, ພ້ອມທັງເສີມຂະຫຍາຍບົດບາດ, ລັກສະນະເຊື່ອມຕໍ່ຂອງບາງເຂດເສດຖະກິດຈຸດສຸມ, ເຂດເສດຖະກິດ. ທ່ານ ຈູເລເຈົາ, ສະມາຊິກສະພາແຫ່ງຊາດແຂວງ ລາຍເຈົາ, ໃຫ້ຮູ້ວ່າ.
“ຍົກສູງຄວາມສາມາດໃນການຮັບມື, ຄາດຄະເນຢ່າງໄວ, ຕັ້ງໜ້າຕໍ່ການຜັນແປຂອງສະພາບພາຍໃນປະເທດ ແລະ ສາກົນ. ປະຕິບັດແຜນພັດທະນາເສດຖະກິດເຊື່ອມຕໍ່ເຂດຢ່າງເຂັ້ມງວດ, ກຳກົດແຈ້ງຂົງເຂດຈຸດສຸມ, ຂະແໜງສິນຄ້າ, ຜະລິດຕະພັນຕົ້ນຕໍ່ທີ່ມີທ່າໄດ້ປຽບ, ມີກຳລັງແຍ້ງຢູ່ພາຍໃນປະເທດ, ພາກພື້ນ ແລະ ສາກົນ. ສະເໜີໃຫ້ລັດຖະບານສຸມໃສ່ບຸລິມະສິດແຫຼ່ງກຳລັງ, ແຫຼ່ງທຶນເພື່ອຮັບປະກັນມີແຫຼ່ງທຶນຢ່າງພຽງພໍ ເພື່ອຈັດຕັ້ງປະຕິບັດບັນດາໜ້າທີ່ຈຸດສຸມໜ້າທີ່ບຸລິມະສິດ. ພັດທະນາເສດຖະກິດຕິດພັນກັບການແກ້ໄຂບັນດາບັນຫາເສດຖະກິດ, ສັງຄົມ ແລະ ສິ່ງແວດລ້ອມໃຫ້ກົມກຽວໃຫ້ເປັນຢ່າງດີ.”
ພ້ອມກັບທ່າອ່ຽງເຊື່ອມໂຍງຄືໃນປະຈຸບັນ, ແຜນການສ້າງໂຄງປະກອບພື້ນຖານເສດຖະກິດຄືນໃໝ່ໄລຍະ 2016 – 2020 ຂອງຫວຽດນາມ ໄດ້ເອົາໃຈໃສ່ເປັນພິເສດເຖິງວຽກງານສ້າງພື້ນຖານເສດຖະກິດເອກະລາດ, ເປັນເຈົ້າການເຊື່ອມໂຍງເຂົ້າກັບສາກົນ ແລະ ປັບປຸງທີ່ຕັ້ງແຫ່ງຊາດໃນການພົວພັນກັບສາກົນ. ທ່ານປະລິຍາເອກ ຫງວຽນຈິ໋ຮ໋ຽວ, ນັກຊ່ຽວຊານດ້ານເສດຖະກິດ, ຖືວ່າ.
“ໃນການສ້າງໂຄງປະກອບພື້ນຖານເສດຖະກິດຄືນໃໝ່, ຕ້ອງຍົກສູງຄວາມໄວ້ເນື້ອເຊື່ອໃຈຂອງຫວຽດນາມ ບົນເວທີສາກົນ ເພື່ອໃຫ້ບັນດານັກລົງທຶນຕ່າງປະເທດມີຄວາມເຊື່ອໃຈ, ຕີລາຄາສູງກວ່າກ່ຽວກັບພື້ນຖານເສດຖະກິດຂອງຫວຽດນາມ. ນັກລົງທຶນຕ່າງປະເທດເມື່ອອີງໃສ່ຄະແນນໄວ້ເນື້ອເຊື່ອໃຈນີ້ ເຂົາເຈົ້າຈະລົງທຶນເຂົ້າຫວຽດນາມ ຫຼາຍກວ່າ. ໃນການສ້າງໂຄງປະກອບພື້ນຖານເສດຖະກິດຄືນໃໝ່, ສິ່ງສຳຄັນແມ່ນຕ້ອງສ້າງໂຄງປະກອບຄືນໃໝ່ຢ່າງແທ້ຈິງ, ຍົກສູງຊີວິດການເປັນຢູ່ຂອງປະຊາຊົນ, ເພີ່ມລັກສະນະແກ່ງແຍ້ງ, ເພີ່ມຄະແນນໄວ້ເຊື້ອເຊື່ອໃຈຂອງຫວຽດນາມ ບົນເວທີປາໄສສາກົນ”.
ເພື່ອສ້າງໂຄງປະກອບພື້ນຖານເສດຖະກິດຄືນໃໝ່ໃຫ້ບັນລຸຜົນສຳເລັດ, ຫວຽດນາມ ຈະສ້າງສະພາບແວດລ້ອມແຫ່ງການດຳເນີນທຸລະກິດທີ່ສະດວກ, ກະຈ່າງແຈ້ງ, ໂປ່ງໃສ ເພື່ອໃຫ້ວິສາຫະກິດ ແລະ ປະຊາຊົນພ້ອມແລ້ວທີ່ຈະລົງທຶນຢ່າງປອດໄພ, ມີປະສິດທິຜົນ. ຄຽງຂ້າງນັ້ນ, ບັນດາກະຊວງ, ຂະແໜງການ, ທ້ອງຖິ່ນຕ່າງໆຕ້ອງສຸມແຫຼ່ງກຳລັງໃຫ້ແກ່ການສ້າງໂຄງປະກອບພື້ນຖານເສດຖະກິດຄືນໃໝ່, ຕິດພັນກັບການຫັນປ່ຽນຮູບແບບການເຕີບໂຕຕາມທິດຍືນຍົງ.