ທ່ານ ກາວກວັກຮຶງ, ຮອງລັດຖະມົນຕີກະຊວງອຸດສາຫະກຳ ການຄ້າຫວຽດນາມກ່າວຄຳເຫັນທີ່ເວທີປາໄສ ພາບ: qdnd.vn

ໃນສະພາບເກີດໂລກລະບາດໂຄວິດ 19 ຜັນແປໄປຢ່າງສັບສົນ, ຍ້ອນມີການຫັນເປັນດີຈີຕອນໃນການນຳເຂົ້າສົ່ງອອກສິນຄ້າ, ການເຄື່ອນໄຫວຜະລິດດຳເນີນທຸລະກິດຂອງບັນດາວິສາຫະກິດຫວຽດນາມ ໄດ້ຫລຸດຜ່ອນຄວາມເສຍຫາຍ ລົງ ເມື່ອມີວິສາຫະກິດຫລາຍແຫ່ງ, ຂະແຫນງສິນຄ້າຍັງຄົງສືບຕໍ່ມີໃບສັ່ງຊື້ສິນຄ້າ, ການເຄື່ອນໄຫວຜະລິດກັບຄືນສູ່ສະພາບເປັນປົກກະຕິພາຍຫລັງການເວັ້ນໄລຍະຫ່າງທາງສັງຄົມ. ຕາມທ່ານ ກາວກວັກຮຶງ, ຮອງລັດຖະມົນຕີກະຊວງອຸດສາຫະກຳ ການຄ້າແລ້ວ, ໄລ່ລວມ 6 ເດືອນຕົ້ນປີ, ວົງເງິນສົ່ງອອກສິນຄ້າຂອງຫວຽດນາມ ຍັງຄົງບັນລຸ 122,8 ຕື້ USD, ເພີ່ມຂຶ້ນ 0,2% ເມື່ອທຽບໃສ່ໄລຍະດຽວກັນຂອງປີກາຍ ແລະ ຍ້ອນເຫດນັ້ນ ວົງເງິນນຳເຂົ້າສົ່ງອອກຊຸມເດືອນທ້າຍປີ ແມ່ນມີແງ່ຫວັງທີ່ດີກວ່າ.

 ຈາກຄວາມຈິງນັ້ນ ບັນດາອົງການທີ່ມີພາລະຫນ້າທີ່ພວມຜັນຂະຫຍາຍຫລາຍມາດຕະການຫນູນຊ່ວຍການເຄື່ອນໄຫວນຳເຂົ້າສົ່ງອອກທາງໄກ.

“ວິວັດການຫັນເປັນດີຈີຕອນໃນການນຳເຂົ້າສົ່ງອອກ ໄດ້ປະກອບສ່ວນເພີ່ມຄຸນນະພາບບໍລິການສາທາລະນະ, ສ້າງເງື່ອນໄຂສະດວກເພື່ອໃຫ້ບັນດາວິສາຫະກິດເຂົ້າຮ່ວມບັນດາການເຄື່ອນໄຫວດ້ານການຄ້າສາກົນ, ປະຢັດເວລາ, ລາຍຈ່າຍ, ກຳລັງເຫື່ອແຮງ, ຈາກນັ້ນ ກໍຊຸກຍູ້ການເຄື່ອນໄຫວນຳເຂົ້າສົ່ງອອກ. ຄຽງຄູ່ກັນນັ້ນ ພວກເຮົາອາດມີຄວາມຫວັງຈະຍາດແຍ່ງໄດ້ບັນດາກາລະໂອກາດຈາກ ສັນຍາການຄ້າ ຫວຽດນາມ - ສະຫະພາບເອີລົບ (EVFTA).”

 ການເຄື່ອນໄຫວນຳເຂົ້າສົ່ງອອກທີ່ທັນສະໄຫມ ໄດ້ຮຽກຮ້ອງບັນດາວິສາຫະກິດ ຕ້ອງຫັນເປັນດີຈີຕອນຢ່າງ ວ່ອງໄວ, ແຮງ ແລະ ໄວວາ. ກ່ອນຫນ້ານີ້ ຖ້າຫາກການເຄື່ອນໄຫວ ດັ່ງກ່າວ ພຽງແຕ່ສະຫງວນໃຫ້ບັນດາວິສາຫະກິດທີ່ມີຂອບຂະຫນາດໃຫຍ່, ມີກຳລັງແຮງດ້ານເສດຖະກິດ ການເງິນສູງ ແຕ່ປະຈຸບັນ ກິດການຈະການຫັນເປັນດີຈີຕອນ ດ້ວຍການປະກົດຕົວ ຂອງການຄ້າເອເລັກໂຕນິກ ແລະ ການຄ້າເອເລັກໂຕນິກຂ້າມຊາຍແດນ ໄດ້ມີການປ່ຽນແປງ, ມີວິສາຫະກິດຂະຫນາດນ້ອຍ ແລະ ກາງຫລາຍແຫ່ງຂອງຫວຽດນາມ ໄດ້ຕັ້ງຫນ້າໝູນໃຊ້ການຫັນເປັນດີຈີຕອນ ໃນການຊອກຫາບໍລິສັດນຳເຂົ້າກໍ່ຄືເຊັນໃບສັ່ງຊື້ຫລາຍສະບັບ.

 ທ່ານ ຫວູຕຽນລົກ, ປະທານຫ້ອງການການຄ້າອຸດສາຫະກຳ ຫວຽດນາມ ຖືວ່າ:

“ນັບແຕ່ເມື່ອມີ ອີນເຕີແນັດ ບັນດາວິສາຫະກິດຂະຫນາດນ້ອຍ ແລະ ຈຸນລະວິສາຫະກິດ ບໍ່ພຽງແຕ່ເຂົ້າຮ່ວມຂົງເຂດນີ້ເທົ່ານັ້ນ ຫາກຍັງກາຍເປັນຄູ່ແຂ່ງຂອງບັນດາວິສາຫະກິດໃຫຍ່ອີກດ້ວຍ. ຕະຫລາດທົ່ວໂລກ, ລູກຄ້າທົ່ວໂລກ ທັງແມ່ນກາລະໂອກາດ ທັງແມ່ນສິ່ງທ້າທາຍຂອງບັນດາວິສາຫະກິດ. ການກະທົບຕອບໂດຍກົງລະຫວ່າງຜູ້ຜະລິດ ແລະ ຜູ້ອຸປະໂພກບໍລິໂພກ, ຄວາມນິຍົມຂອງຜູ້ໃຊ້ສອຍ ຈະແມ່ນທ່າອ່ຽງຂອງພື້ນຖານດ້ານການຄ້າໃນໄລຍະຈະມາເຖິງ.”

ຫັນເປັນ ດີຈີຕອນ ໃນຂົງເຂດນຳເຂົ້າສົ່ງອອກ ແມ່ນວິວັດການໝູນໃຊ້ເຕັກໂນໂລຊີຂໍ້ມູນຂ່າວສານເຂົ້າໃນຂັ້ນຕອນລະບຽບການບໍລິຫານ. ນອກຈາກບັນດາຜົນປະໂຫຍດຊ່ວຍປະຢັດເວລາ, ລາຍຈ່າຍໃຫ້ແກ່ວິສາຫະກິດແລ້ວ, ຕົວເລກສະຖິຕິໃນໄລຍະມໍ່ໆມານີ້ ກໍ ຢັ້ງຢືນວ່າ ວິທີການນີ້ ຊ່ວຍປະຢັດລາຍຈ່າຍຄຸ້ມຄອງ, ປະຢັດງົບປະມານ ແລະ ນຳມາເຊິ່ງຄວາມດຶງດູດພິເສດສຳລັບບັນດານັກລົງທຶນສາກົນ.

 ເພາະສະນັ້ນ ນີ້ແມ່ນທິດກ້າວເດີນທີ່ຈຳເປັນສຳລັບບັນດາວິສາຫະກິດເວົ້າລວມ ພິເສດ ແມ່ນບັນດາວິສາຫະກິດເຄື່ອນໄຫວໃນຂົງເຂດນຳເຂົ້າສົ່ງອອກ ເມື່ອບັນດາສັນຍາການຄ້າພວມເປີດຫລາຍກາລະໂອກາດ.

 ກະຊວງອຸດສາຫະກຳການຄ້າ ຫາກໍ່ເປີດຕົວພື້ນຖານຫນູນຊ່ວຍການສົ່ງອອກຂອງຫວຽດນາມ ECVN ໃນປີ 2020 ເພື່ອແນໃສ່ຊ່ວຍວິສາຫະກິດຫລາຍແຫ່ງຜ່ານຜ່າຄວາມຫຍຸ້ງຍາກຍ້ອນໂລກລະບາດໂດຍໄວ ແລະ ສຳຜັດກັບກາລະໂອກາດຈາກບັນດາສັນຍາການຄ້າເສລີ. ນີ້ກໍ່ແມ່ນການເຄື່ອນໄຫວແທດຈິງ ເພື່ອຜັນຂະຫຍາຍແຜນການສັງລວມພັດທະນາການຄ້າເອເລັກໂຕນິກແຫ່ງຊາດໄລຍະ 2021 – 2025 ແລະ ໂຄງການຫັນເປັນດີຈີຕອນແຫ່ງຊາດຮອດປີ 2025 ການກຳນົດທິດຮອດປີ 2030 ໂດຍໄດ້ຮັບການອະນຸມັດຈາກທ່ານນາຍົກລັດຖະມົນຕີໃນເດືອນ ພຶດສະພາ ແລະ ເດືອນມິຖຸນາ, ເພື່ອແນໃສ່ມຸ່ງໄປເຖິງເລື່ອງນຳການຄ້າເອເລັກໂຕນິກກາຍເປັນຂົງເຂດນຳຫນ້າຂອງພື້ນຖານເສດຖະກິດ ດີຈີຕອນ ຫວຽດນາມ.