(vovworld)- ມີກະແສຟອງໃຫມ່ຈາກ ຍີ່ປຸ່ນ ຈະລົງທຶນເຂົ້າຫວຽດນາມ, ວິສາຫະກິດ ຍີ່ປຸ່ນ ພວມສົນໃຈເຖິງຕະຫລາດຫວຽດນາມ, ຫວຽດນາມ ແມ່ນສະຖານທີ່ລົງທຶນອັນດູດດື່ມສຳລັບບັນດາວິສາຫະກິດ ຍີ່ປຸ່ນ. ນີ້ແມ່ນສິ່ງທີ່ບັນດານັກລົງທຶນຍີ່ປຸ່ນ ໄດ້ເຕື້ອງເຖິງ ທີ່ເວທີປາໄສ, ກອງປະຊຸມສຳມະນາ ກ່ຽວກັບການຮ່ວມມືເສດຖະກິດ ລະຫວ່າງຫວຽດນາມ ແລະ ຍີປຸ່່ນຖືກຈັດຂຶ້ນໃນໄລຍະຜ່ານມາ.
ທ່ານນາຍົກລັດຖະມົນຕີຫງວຽນເຕີນຢູງ ຕ້ອນຮັບທ່ານ
Toshimitsu Motegi ລັດຖະມົນຕີເສດຖະກິດ,ການຄ້າ ອຸດສາຫະກຳຍີ່ປຸ່ນ
ພາບ:chinhphu.vn
|
ການເຄື່ອນໄຫວພົວພັນແລກປ່ຽນສິນຄ້າ ລະຫວ່າງຫວຽດນາມ ແລະ ຍີ່ປຸ່ນ ໃນຊຸມມື້ມໍ່ໆມານີ້ ໄດ້ມີບາດກ້າວພັດທະນາດີພໍສົມຄວນ. ພິເສດ ໃນປີ 2013, ຊື່ງແມ່ນປີທີ່ສອງປະເທດ ຫວຽດນາມ ແລະ ຍີ່ປຸ່ນ ສະເຫລີມສະຫລອງ 40 ປີແຫ່ງວັນສ້າງສາຍພົວພັນທາງການທູດ, ສະນັ້ນ ການຮ່ວມມືດ້ານເສດຖະກິດລະຫວ່າງ 2 ປະເທດ ຟົດຟື້ນຍິ່ງກວ່າເວລາໃດໝົດ. ສິ່ງດັ່ງກ່າວແມ່ນສະແດງໃຫ້ເຫັນຜ່ານຕົວເລກສະຖິຕິໃນປີ 2012 ແລະ ໃນ 6 ເດືອນຕົ້ນປີ 2013. ຕາມການສຳຫລວດຂອງອົງການສົ່ງເສີມການຄ້າລົງທຶນ ຍີ່ປຸນ (JETRO) ແລ້ວ, ການຄ້າສອງສົ້ນລະຫວ່າງ ຍີ່ປຸ່ນ ແລະ ຫວຽດນາມ ນັບມື້ນັບໄດ້ຮັບການເປີດກວ້າງ. ວົງເງິນສົ່ງອອກສິນຄ້າຈາກ ຫວຽດນາມ ໄປຍັງຍີ່ປຸ່ນ ບັນລຸກວ່າ 13 ລ້ານ USD ໃນປີ 2012,ໃນນັ້ນ ບັນດາປະເພດສິນຄ້າສົ່ງອອກມີການເຕີບໂຕຢ່າງແຮງຄື: ເຄື່ອງກົນຈັກ, ເຄື່ອງອາໄຫລ່, ນ້ຳມັນອາຍແກສ, ເກີບຫນັງ…. ສ່ວນບັນດາປະເພດສິນຄ້າທີ່ຫວຽດນາມ ນຳເຂົ້າຈາກ ຍີ່ປຸ່ນ ນັ້ນແມ່ນ: ເຫລັກເສດເຫລືອ, ແພໄຫມ, ເຄື່ອງອາໄຫລ່ລົດໂອໂຕ… ດ້ວຍຍອດວົງເງິນ 11,603 ລ້ານ USD. ໄລ່ຮອດເດືອນ 6/2013, ຍີ່ປຸ່ນ ມີ 1.990 ໂຄງການລົງທຶນເຂົ້າ ຫວຽດນາມ ດ້ວຍຍອດທຶນຈົດທະບຽນ ເກືອບ 33 ຕື້ USD, ຢືນອັນດັບຫນຶ່ງໃນຈຳນວນບັນດາປະເທດມີເງິນລົງທຶນໂດຍກົງຢູ່ ຫວຽດນາມ. ຍີ່ປຸ່ນ ແມ່ນນັກລົງທຶນລາຍໃຫຍ່ກວ່າໝູ່ໃນຈຳນວນ 100 ປະເທດ ແລະ ເຂດແຄ້ວນທີ່ພວມລົງທຶນຢູ່ ຫວຽດນາມ. ທ່ານ Motonobu Sato ປະທານສະຫະສະມາຄົມບັນດາວິສາຫະກິດ ຍີ່ປຸ່ນ ປະຈຳ ຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າຄິດວ່າ ຫວຽດນາມ ຄືດັ່ງຄູ່ຮ່ວມມືຂອງຍີ່ປຸ່ນ, ຄືດັ່ງຄອບຄົວດຽວ. ຫວຽດນາມ ຕ້ອງການຄວາມຊ່ວຍເຫລືອຈາກຍິ່ປຸ່ນ ແລະ ກົງກັນຂ້າມ. ນັ້ນແມ່ນສາຍເຫດເຮັດໃຫ້ພວກຂ້າພະເຈົ້າຍູ້ໄວການລົງທຶນເຂົ້າຫວຽດນາມກວ່າ. ຍີ່ປຸ່ນ ແມ່ນປະເທດພັດທະນາ ແຕ່ພວກຂ້າພະເຈົ້າບໍ່ອາດກ້າວເດີນດ້ວຍຕົນເອງໄດ້. ແລະ ຫວຽດນາມ ກໍເຊັນດຽວກັນ ຢາກໄດ້ຮັບການຊ່ວຍເຫລືອຈາກ ຍີ່ປຸ່ນ. ພວກເຮົາຄວນຊອກຫາຄູ່ຮ່ວມມື. ສິ່ງດັ່ງກ່າວແມ່ນສຳຄັນທີ່ສຸດ. ພວກເຮົາຄວນຮ່ວມມືນຳກັນ.”
ເຖິງວ່າເສດຖະກິດທົ່ວໂລກຍັງປະສົບກັບຄວາມຫຍຸ້ງຍາກຫລາຍຢ່າງ ແຕ່ນັບມື້ນັບມີວິສາຫະກິດຍີ່ປຸ່ນ ຫລາຍແຫ່ງມາເປີດຫ້ອງການຫລືສາຂາ ຢູ່ ຫວຽດນາມ, ພິເສດແມ່ນຢູ່ ຮ່າໂນ້ຍ, ມີບັນດາໂຮງງານຂອງບໍລິສັດໃຫຍ່ຄື: Honda, Toyota, Yamaha Canon. ສິ່ງດັ່ງກ່າວສະແດງໃຫ້ເຫັນວ່າ: ຫວຽດນາມ ນັບມື້ນັບສາມາດຕອບສະຫນອງບັນດາເງື່ອນໄຂບຸລິມະສິດເພື່ອໃຫ້ບັນດາວິສາຫະກິດ ຍີ່ປຸ່ນ ເຂົ້າມາລົງທຶນ. ອົງການສົ່ງເສີມການຄ້າລົງທຶນ ຍີ່ປຸ່ນ (JETRO) ຫວ່າງແລ້ວນີ້ໄດ້ປະກາດໝາກຜົນ “ການສືບສວນກ່ຽວກັບສະພາບການເຄື່ອນໄຫວຂອງບັນດາວິສາຫະກິດຍີ່ປຸ່ນ ຢູ່ ອາຊີ ແລະ ທະວີບ ໂອເຊອານີ ຊື່ງສະແດງໃຫ້ເຫັນວ່າ: ມີ 65,9% ຈຳນວນວິສາຫະກິດຍີ່ປຸ່ນ ຍັງຄົງເລືອກເຟັ້ນ ຫວຽດນາມ ແມ່ນສະຖານທີ່ລົງທຶນໃນໄລຍະຈະມາເຖິງ. ສິ່ງດັ່ງກ່າວໃຫ້ເຫັນວ່າ, ວິສາຫະກິດ ຍີ່ປຸ່ນ ຍັງຄົງເຊື່ອໝັ້ນຕໍ່ສະພາບແວດລ້ອມແຫ່ງການລົງທຶນຢູ່ ຫວຽດນາມ. ທ່ານ Shinichi Wakita, ຜູ້ອຳນວຍການບໍລິສັດ Panasonic ປະຈຳ ຫວຽດນາມ ຖືວ່າ:
“ລັດຖະບານ ຫວຽດນາມ ໄດ້ຍົກສູງສະພາບແວດລ້ອມແຫ່ງການລົງທຶນໃຫ້ແກ່ບັນດາໂຄງການ FDI ແລະ ໄດ້ຮັບຫລາຍແຫລ່ງເງິນລົງທຶນໂດຍກົງຈາກບັນດານັກລົງທຶນ. ສະພາບແວດລ້ອມແຫ່ງການລົງທຶນຢູ່ ຫວຽດນາມ ໄດ້ມີການປ່ຽນແປງຢ່າງວ່ອງໄວ. ຫວຽດນາມ ບໍ່ພຽງແຕ່ກະກຽມພື້ນຖານໂຄງລ່າງດີເທົ່ານັ້ນ ຫາກຍັງສ້າງເງື່ອນໄຂສະດວກໃຫ້ແກ່ບັນດາວິສາຫະກິດອີກດ້ວຍ. ນີ້ແມ່ນວິທີດີສຸດເພື່ອຊຸກຍູ້ບັນດາວິສາຫະກິດລົງທຶນດຳເນີນທຸລະກິດຢູ່ ຫວຽດນາມ ຫລາຍກວ່າ. ຫວຽດນາມ ແມ່ນຕະຫລາດທີ່ມີຄວາມສາມາດບົ່ມຊ້ອນຫລາຍຢ່າງເພື່ອພັດທະນາ.”
ຫວຽດນາມ ມີທ່າໄດ້ປຽບຫລາຍຢ່າງກ່ຽວກັບລະບອບການເມືອງມີສະຖຽນລະພາບ, ແຫລ່ງຊັບພະຍາກອນມະນຸດອຸດົມສົມບູນ. ບັນດາວິສາຫະກິດ ຍີ່ປຸ່ນ ໃຫ້ຂໍ້ສັງເກດວ່າ: ບັນດາຂົງເຂດຄື ເຕັກໂນໂລຊີຂໍ້ມູນຂ່າວສານ, ຊອບແວ, ຂາຍຍົກ, ຂາຍຍ່ອຍບັນດາຜະລິດຕະພັນ, ເຄມີ, ສາທາລະນະສຸກ … ໃນໄລຍະຈະມາເຖິງຈະສາມາດສ້າງມູນຄ່າເສດຖະກິດສູງ. ສະນັ້ນ ໃນອະນາຄົດ, ບັນດາວິສາຫະກິດ ຫວຽດນາມ ແລະ ຍີ່ປຸ່ນ ຈະມີການສົມທົບຢ່າງຄົບຊຸດຄື: ຍູ້ແຮງການພັດທະນາອຸດສາຫະກຳສຳຮອງ, ສ້າງສະພາບແວດລ້ອມດຳເນີນທຸລະກິດຢ່າງສະດວກກວ່າອີກເພື່ອໃຫ້ວິສາຫະກິດສອງປະເທດພ້ອມກັນພັດທະນາ.