(vovworld) - ກິດຈະກຳເຂື່ອນໄຟຟ້ານ້ຳຕົກ ເຊີນລາ ຫາກໍ່ຕ້ອນຮັບບຸນເຕັດເປັນຄັ້ງທຳອິດ ພາຍຫລັງເຊື່ອມຕໍ່ກະແສໄຟຟ້າແຫ່ງຊາດ. ເລື່ອງນຳໂຮງງານໄຟຟ້ານ້ຳຕົກເຊີນລາເຂົ້າໃຊ້ການ ໄດ້ຮັບຖືວ່າ ເປັນຂີດໝາຍສຳຄັນຂອງຂະແຫນງໄຟຟ້າ ຫວຽດນາມ, ບໍ່ພຽງແຕ່ນຳມາເຊິ່ງຄວາມເອກອ້າງທະນົງໃຈກ່ຽວກັບກິດຈະກຳໄຟຟ້ານ້ຳຕົກໃຫຍ່ກວ່າໝູ່, ມີຂອບຂະຫນາດລະດັບພາກພື້ນ ໂດຍ ຫວຽດນາມ ອອກແບບ ແລະ ປະຕິບັດເອງເທົ່ານັ້ນ ຫາກຍັງແມ່ນກິດຈະກຳທີ່ພົ້ນເດັ່ນຂອງພູມປັນຍາ ແລະ ຄຸນນະທາດຫວຽດນາມ ອີກດ້ວຍ.
ເຂື່ອນໄຟຟ້ານ້ຳຕົກເຊີນລາ
ພາບ:internet |
ໂຄງການໄຟຟ້ານ້ຳຕົກເຊີນລາ ແມ່ນກິດຈະກຳຈຸດສຸມແຫ່ງຊາດນອນໃນແມ່ນ້ຳດ່າ ຢູ່ບໍລິເວນຕາແສງ ອິດອອງ ເມືອງເມື່ອງລາ ແຂວງ ເຊີນລາ. ພາຍຫລັງກໍ່ສ້າງມາເປັນເວລາ 7 ປີ, ເຂື່ອນໄຟຟ້ານ້ຳຕົກເຊີນລາ ສາມາດສະຫນອງໄຟຟ້າສະເລ່ຍແຕ່ລະປີກວ່າ 10 ຕື້ Kw/h (ເທົ່າກັບ 10% ປະລິມານການຜະລິດໄຟຟ້າຂອງຫວຽດນາມ), ດ້ວຍກຳລັງການຜະລິດໄຟຟ້າ 2.400 Mw. ປະລິມານບັນຈຸນ້ຳຂອງເຂື່ອນໄຟຟ້າເຊີນລາແມ່ນ ກວ່າ 9 ຕື້ ແມັດກ້ອນ ແລະ 4 ຕື້ແມັດກ້ອນແມ່ນຮັບໃຊ້ວຽກງານຕ້ານໄພນ້ຳຖ້ວມໃຫ້ແກ່ເຂດທົ່ງພຽງລຸ່ມແມ່ນ້ຳ. ຖ້າຫາກຍອດຈຳນວນເງິນລົງທຶນໃຫ້ແກ່ໂຄງການໄຟຟ້ານ້ຳຕົກເຊີນລາແມ່ນ ກວ່າ 60.000 ຕື້ດົ່ງ, ໄລ່ສະເພາະໄລຍະ 3 ປີທີ່ກິດຈະກຳດັ່ງກ່າວສຳເລັດກ່ອນກຳນົດເວລານັ້ນໄດ້ນຳມາເຊິ່ງມູນຄ່າປະມານ 45.000 ຕື້ດົ່ງ. ທ່ານ ເຢືອງແຄງຕວານ, ຜູ້ອຳນວຍການໃຫຍ່ບໍລິສັດ ຊົງດ່າ, ຊຶ່ງແມ່ນຫົວຫນ່ວຍທີ່ເປັນເຈົ້າຂອງການປະມູນກໍ່ສ້າງເຂື່ອນໄຟຟ້ານ້ຳຕົກ ເຊີນລາ ຢືນຢັນວ່າ:
“ເລື່ອງກິດຈະກຳເຂື່ອນໄຟຟ້ານ້ຳຕົກເຊີນລາສຳເລັດການກໍ່ສ້າງກ່ອນກຳນົດເວລາ 3 ປີ ເມື່ອທຽບໃສ່ມະຕິຂອງສະພາແຫ່ງຊາດນັ້ນ ໄດ້ເປັນການປະຢັດ ແລະ ນຳມາເຊິ່ງຜົນປະໂຫຍດໃຫ້ແກ່ປະເທດນັບ ສິບໆ ຕື້ດົ່ງ, ປະກອບສ່ວນເຂົ້າໃນພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ. ເລື່ອງກໍ່ສ້າງເຂື່ອນໄຟຟ້ານ້ຳຕົກເຊີນລາສຳເລັດຜົນແມ່ນໝາກຜົນຂອງແນວທາງປ່ຽນແປງໃຫມ່, ເສີມຂະຫຍາຍພູມປັນຍາ ແລະ ກຳລັງແຮງພາຍໃນຂອງປະເທດ ແມ່ນສັນຍາລັກຂອງກຳມະກອນ ຫວຽດນາມ ເວົ້າລວມ ແລະ ຄວາມເອກອ້າງທະນົງໃຈຂອງຜູ້ກໍ່ສ້າງເຂື່ອນໄຟຟ້ານ້ຳຕົກເວົ້າສະເພາະໃນຍຸກສະໄຫມໃຫມ່ - ຍຸກສະໄຫມໂຮ່ຈິມິນ.”
ໂຄງການກໍ່ສ້າງເຂື່ອນໄຟຟ້ານ້ຳຕົກເຊີນລາ ມີຖັນແຖວນັກວິສາວະກອນຫລາຍສຸດ ແລະ ສາມາດເປັນເຈົ້າການເຕັກໂນໂລຊີທັນສະໄຫມທີ່ສຸດຢູ່ ຫວຽດນາມ ໃນປະຈຸບັນ. ທ່ານ ທາຍຟຸ້ງເນ, ຮອງຫົວຫນ້າຄະນະຊີ້ນຳແຫ່ງລັດກ່ຽວກັບໂຄງການເຂື່ອນໄຟຟ້ານ້ຳຕົກເຊີນລາ ຖືວ່າ: ສິ່ງທີ່ເປັນຫນ້າເຄົາລົບ ແລະ ມີຄວາມເອກອ້າງທະນົງໃຈ ນັ້ນແມ່ນວຽກງານຄຸ້ມຄອງໂຄງການ, ການອອກແບບ ແລະ ຕິດຕາມກວດກາການປະຕິບັດກິດຈະກຳລ້ວນແຕ່ແມ່ນບັນດາວິສາຫະກິດ ຫວຽດນາມ ປະຕິບັດ.
“ນີ້ເປັນຄັ້ງທຳອິດທີ່ ຫວຽດນາມ ສວມບົດບາດເປັນທີ່ປຶກສາຕົ້ນຕໍໃນໂຄງການທີ່ມີຂອບຂະຫນາດໃຫຍ່ຂອງໂລກ. ມາຮອດປະຈຸບັນ ລະດັບການອອກແບບ, ການກໍ່ສ້າງ ກໍຄືຕິດຕັ້ງອຸປະກອນຂອງ ຫວຽດນາມ ໄດ້ມີຄວາມຄືບຫນ້າຫລາຍ. ກ່ອນນີ້ຢາກກໍ່ສ້າງກິດຈະກຳຄືແນວນີ້ ຕ້ອງລະດົມກຳມະກອນ 35.000 ຄົນ ແຕ່ສຳລັບໂຄງການເຂື່ອນໄຟຟ້ານ້ຳຕົກເຊີນລາ ຈຳນວນກຳມະກອນກໍ່ສ້າງ ແລະ ຕິດຕັ້ງກົນຈັກແມ່ນບໍ່ຮອດ 10.000 ຄົນ.”
ຂົນສົ່ງອຸປະກອນຮັບໃຊ້ການກໍ່ສ້າງເຂື່ອນໄຟຟ້າ
ພາບ:internet
|
ບັນລຸໄດ້ຜົນງານຄືດັ່ງກ່າວ ແມ່ນຍ້ອນມີການຊີ້ນຳນຳພາຢ່າງຂ້ຽວຂາດ, ການບໍລິຫານຢ່າງວອ່ງໄວຂອງລັດຖະບານ, ອຳນາດການປົກຄອງທຸກຂັ້ນ ແລະ ໄດ້ຮັບຄວາມເຫັນດີເຫັນພ້ອມຈາກປະຊາຊົນ. ເພື່ອກະແສໄຟຟ້າຂອງປະເທດຊາດ, ໄດ້ມີ 20.000 ກວ່າຄອບຄົວຢູ່ສາມແຂວງ ເຊີນລາ, ລາຍເຈົາ ແລະ ດ້ຽນບຽນ ຕ້ອງຍົກຍ້າຍທີ່ຢູ່ໄປຍັງແຫ່ງໃຫມ່ເພື່ອມອບທີ່ດິນໃຫ້ແກ່ໂຄງການກໍ່ສ້າງກິດຈະກຳໄຟຟ້ານ້ຳຕົກ. ທ່ານ ເຈືອງກວາງເຫງຍ, ເລຂາຄະນະພັກແຂວງເຊີນລາ ໄດ້ຢືນຢັນວ່າ:
“ໃນໄລຍະເກືອບ 8 ປີແຫ່ງການປະຕິບັດ, ອົງຄະນະພັກ ແລະ ປະຊາຊົນ 3 ແຂວງໃນເຂດກໍ່ສ້າງໂຄງການເຂື່ອນໄຟຟ້ານ້ຳຕົກມີຄວາມເອກອ້າງທະນົງໃຈທີ່ໄດ້ກໍ່ສ້າງໂຄງການສຳເລັດຖືກກັບຄວາມຄືບຫນ້າ, ຮັບປະກັນຄວາມປອດໄພຢ່າງສ້ິນເຊີງ ກໍ່ຄືຮັບປະກັນຊີວິດການເປັນຢູ່ຂອງ 20.000 ຄອບຄົວທີ່ຍ້າຍໄປອາໄສຢູ່ແຫ່ງໃຫມ່ເປັນປົກກະຕິ ແລະ ມີເງື່ອນໄຂເພື່ອພັດທະນາແບບຍືນຍົງ”
ເລື່ອງນຳເຂື່ອນໄຟຟ້ານ້ຳຕົກເຂົ້າໃຊ້ການກ່ອນກຳນົດເວລາ ໄດ້ປະກອບສ່ວນສຳຄັນຮັບປະກັນການສະຫນອງໄຟຟ້າໃຫ້ແກ່ປະເທດຊາດ, ປັບປຸງຊີວິດການເປັນຢູ່ຂອງປະຊາຊົນ ພ້ອມທັງປະກອບສ່ວນຮັບປະກັນການພັດທະນາແບບຍືນຍົງ ແລະ ມອບເຂົ້າງົບປະມານແຂວງ ເຊີນລາ ປະມານ 1000 ຕື້ດົ່ງ/ປີ. ພ້ອມກັບການກໍ່ສ້າງເຂື່ອນໄຟຟ້ານ້ຳຕົກເຊີນລາ ຍັງມີທາງຄົມມະນາຄົມຫລາຍສາຍກໍ່ໄດ້ຮັບການກໍ່ສ້າງໃຫມ່, ເປີດກວ້າງ ແລະ ຍົກລະດັບ. ທ່ານນາຍົກລັດຖະມົນຕີ ຫງວຽນເຕີນຢູງ ຖືວ່າ:
“ກິດຈະກຳເຂື່ອນໄຟຟ້ານ້ຳຕົກເຊີນລາ ແມ່ນກິດຈະກຳໂດຍບັນດາກຸ່ມບໍລິສັດເສດຖະກິດ, ບັນດາບໍລິສັດໃຫຍ່ແຫ່ງລັດຮັບຫນ້າທີ່ເປັນເຈົ້າຂອງລົງທຶນ, ອອກແບບ, ຈັດຕັ້ງການກໍ່ສ້າງ ແລະ ຄຸ້ມຄອງການເຄື່ອນໄຫວ. ບັນດາກະຊວງ, ກຸ່ມບໍລິສັດໃຫຍ່, ບໍລິສັດໃຫຍ່ແຫ່ງລັດ ຕ້ອງຖອດຖອນບົດຮຽນ ແລະ ເສີມຂະຫຍາຍບັນດາຜົນງານ, ຄວາມຄືບຫນ້າຢ່າງແຮງ, ແກ້ໄຂຂໍ້ຈຳກັດເພື່ອສືບຕໍ່ກໍ່ສ້າງບັນດາກຸ່ມບໍລິສັດເສດຖະກິດ, ບັນດາບໍລິສັດໃຫຍ່ແຫ່ງລັດຢ່າງແຮງ, ແນໃສ່ກໍ່ສ້າງກິດຈະກຳໃຫຍ່ທັນສະໄຫມຫລາຍແຫ່ງຢ່າງວ່ອງໄວ ແລະ ມີປະສິດທິຜົນໃນວິວັດການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ.”
ອາດເວົ້າໄດ້ວ່າ ກິດຈະກຳເຂື່ອນໄຟຟ້ານ້ຳຕົກເຊີນລາ ໄດ້ກາຍເປັນສັນຍາລັກຢ່າງມີຊີວິດຊີວາກ່ຽວກັບລັດທິວິລະຊົນປະຕິວັດ ຂອງນ້ຳໃຈເພິ່ງຕົນເອງ ສ້າງຄວາມເຂັ້ມແຂງດ້ວຍຕົນເອງ ຜ່ານຜ່າຄວາມຫຍຸ້ງຍາກເພື່ອບືນຕົວຂຶ້ນ ໃນພາລະກິດສ້າງສາປະເທດ ຫວຽດນາມ ໃຫ້ຈະເລີນຮຸ່ງເຮືອງ. ຜົນສຳເລັດຂອງໂຄງການແມ່ນຍ້ອນນ້ຳໃຈອອກແຮງງານຢ່າງດຸໝັ່ນຂະຫຍັນພຽນ, ມີຫົວຄິດປະດິດສ້າງຂອງໝູ່ຄະນະພະນັກງານກຳມະກອນ ແລະ ສະແດງໃຫ້ເຫັນກຳລັງແຮງແຫ່ງພູມປັນຍາຂອງຊາວ ຫວຽດນາມ.