(vovworld)- ນາຍົກລັດຖະມົນຕີ ຫວຽດນາມ ຫາກໍອອກຄຳສັ່ງກ່ຽວກັບການເພີ່ມທະວີວຽກງານຄຸ້ມຄອງ, ບໍລິຫານ ແລະ ຮັກສາລາຄາສິນຄ້າເປັນປົກກະຕິໃນຊຸມເດືອນທ້າຍປີ 2012. ຄຳສັ່ງດັ່ງກ່າວສະເຫນີຕ້ອງຮັບປະກັນການດຸນດຽງລະຫວ່າງການສະຫນອງ ແລະ ຄວາມຕ້ອງການ, ຮັກສາລາຄາສິນຄ້າ, ບໍລິການທີ່ຈຳເປັນທີ່ເປັນປົກກະຕິໃຫ້ແກ່ປະຊາຊົນ,ເປັນຕົ້ນໃນໂອກາດບຸນປີໃຫມ່ໃກ້ຈະມາເຖິງ. ນີ້ແມ່ນການກະທຳອັນຕັ້ງຫນ້າ, ເພື່ອສ້າງເງື່ອນໄຂຊຸກຍູ້ການພັດທະນາການຜະລິດດຳເນີນທຸລະກິດ, ກະຕຸ້ນການໃຊ້ສອຍເພື່ອເພີ່ມກຳລັງຊື້, ແກ້ໄຂສະພາບສິນຄ້າຄ້າງສາງ, ພັດທະນາຕະຫລາດພາຍໃນປະເທດເປັນຕົ້ນແມ່ນປະກອບສ່ວນໂຄສະນາ, ປະຕິບັດບັ້ນຂົນຂວາຍ “ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ”ຢ່າງມີປະສິດທິຜົນ.
ຮັກສາລາຄາສິນຄ້າເປັນປົກກະຕິໃນຊຸມເດືອນທ້າຍປີ 2012
ພາບ: internet
|
ໃນຊຸມເດືອນທ້າຍປີ, ລາຄາສິນຄ້າຫລາຍປະເພດເຄີຍມີທ່າອ່ຽງເພີ່ມຂຶ້ນສູງ, ພິເສດບັນດາປະເພດສິນຄ້າທີ່ຈຳເປັນ. ພ້ອມກັບເລື່ອງລາຄາສິນຄ້າຫລາຍປະເພດອາດຈະເພີ່ມຂຶ້ນໃນໄລຍະຈະມາເຖິງ, ບັນດາຄວາມຫຍຸ້ງຍາກຂອງສະພາບເສດຖະກິດ ສັງຄົມຄື: ການເຕີບໂຕການສົ່ງອອກສິນຄ້າມີທ່າອ່ຽງຊັກຊ້າລົງ, ການນຳເຂົ້າຫລຸດລົງ, ກຳລັງຊື້ຂອງຕະຫລາດພາຍໃນປະເທດຕ່ຳ, ສິນຄ້າຄ້າງສາງຂອງບາງຂະແຫນງຍັງຢູ່ໃນດັບສູງ ພວມກໍ່ຄວາມວິຕົກກັງວົນກ່ຽວກັບດັດຊະນີລາຄາໃຊ້ສອຍ (CPI) ຈະເພີ່ມຂຶ້ນຄືນໃຫມ່. ໃນເດືອນ 9/2012, CPI ເພີ່ມຂຶ້ນ 2,2% ເມື່ອທຽບໃສ່ເດືອນ 8/2012. ນີ້ແມ່ນລະດັບເພີ່ມຂຶ້ນສູງສຸດນັບແຕ່ຕົ້ນປີມາຮອດປະຈຸບັນ. ທ້າຍເດືອນ 9/2012, ທ່ານນາຍົກລັດຖະມົນຕີໄດ້ມີຄຳສັ່ງສະເຫນີຕໍ່ກຳນົດເວລາເພີ່ມລາຄາການບໍລິການຈຳເປັນຈຳນວນຫນຶ່ງ, ເຖິງຢ່າງໃດກໍຕາມ CPI ຢູ່ບາງໝວດຄື: ບໍລິການສາທາລະນະສຸກ, ການສຶກສາຍັງຄົງຢູ່ໃນລະດັບສູງ. ເພື່ອປະຕິບັດຈຸດໝາຍບຸລິມະສິດຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິໃຫ້ໄດ້, ນາຍົກລັດຖະມົນຕີ ໄດ້ປະກາດໃຊ້ຄຳສັ່ງກ່ຽວກັບການເພີ່ມທະວີວຽກງານຄຸ້ມຄອງບໍລິຫານ ແລະ ຮັກສາລາຄາສິນຄ້າເປັນປົກກະຕິໃນຊຸມເດືອນທ້າຍປີ 2012. ກາງເດືອນ 6/2012, ລັດຖະບານໄດ້ຈັດຕັ້ງກອງປະຊຸມໂດຍກົງຜ່ານເຄືອຂ່າຍອິນເຕີແນດກັບ 36 ແຂວງ, ນະຄອນເພື່ອຕີລາຄາວຽກງານຮັກສາລາຄາສິນຄ້າໃຫ້ເປັນປົກກະຕິ ແລະ ຊີ້ນຳການຜັນຂະຫຍາຍບັນດາມາດຕະການຮັກສາລາຄາສິນຄ້າເປັນປົກກະຕິໃນຊຸມເດືອນທ້າຍປີ. ມາຮອດປະຈຸບັນ ທົ່ວປະເທດໄດ້ມີສະຖານທີ່ຂາຍສິນຄ້າດ້ວຍລາຄາປົກກະຕິ 6.400 ແຫ່ງ. ພິເສດ ຕາຫນ່າງສະຖານທີ່ຂາຍສິນຄ້າດ້ວຍການຮັກສາລາຄາປົກກະຕິ ນັບມື້ນັບໄດ້ຮັບການທະວີຄູນຢ່າງກວ້າງຂວາງ, ຂະຫຍາຍລົງຮອດບັນດາເຂດຊົນນະບົດ, ເຂດຫ່າງໄກສອກຫລີກ, ເຂດຊຸມຊົນ ແລະ ເຂດອຸດສາຫະກຳ, ເຂດຜະລິດສົ່ງອອກ. ຕາມກະຊວງ ອຸດສາຫະກຳ ການຄ້າຫວຽດນາມແລ້ວ, ຍາມໃດສິນຄ້າທີ່ໄດ້ຮັບການຮັກສາລາຄາ ເປັນປົກກະຕິນັ້ນຕ້ອງຕ່ຳກວ່າເມື່ອທຽບໃສ່ລາຄາສິນຄ້າໃນທ້ອງຕະຫລາດແຕ່ 5 - 10%. ພ້ອມກັບວິວັດທະນາການນີ້, ງົບປະມານຮັບໃຊ້ໂຄງການຮັກສາລາຄາສິນຄ້າເປັນປົກກະຕິຂອງລັດຖະບານກໍນັບມື້ນັບເພີ່ມຂຶ້ນ. ທ່ານນາງ Ho Kim Thoa, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ:
“ມາຮອດປະຈຸບັນ, ສະຖານທີ່ຂາຍສິນຄ້າດ້ວຍລາຄາເປັນປົກກະຕິນັບມື້ນັບຂະຫຍາຍອອກຢ່າງກວ້າງຂວາງ. ກ່ອນນີ້ 100% ວິສາຫະກິດເຂົ້າຮ່ວມລາຍການຮັກສາລາຄາສິນຄ້າເປັນປົກກະຕິລ້ວນແຕ່ຕ້ອງລົງທຶນຂອງຕົນເສຍກ່ອນ, ມາຮອດປະຈຸບັນ ໃນຈຳນວນວິສາຫະກິດເຂົ້າຮ່ວມລາຍການນັ້ນ ມີ 60% ນຳໃຊ້ທຶນສ່ວນຕົວ. ສິ່ງດັ່ງກ່າວສະແດງໃຫ້ເຫັນວ່າ ບັນດາວິສາຫະກິດໄດ້ປະກອບທຶນສົມທົບເພື່ອ.ເຂົ້າຮ່ວມໂຄງການຮັກສາລາຄາສິນຄ້າເປັນປົກກະຕິນັບມື້ນັບເພີ່ມຂຶ້ນ.”
 |
ເພື່ອຕອບສະຫນອງຈຸດໝາຍຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ຮັກສາລາຄາສິນຄ້າເປັນປົກກະຕິໃນຊຸມເດືອນທ້າຍປີ, ທ່ານນາຍົກລັດຖະມົນຕີໄດ້ສະເຫນີບັນດາກະຊວງ, ຂະແຫນງການ ແລະ ທ້ອງຖິ່ນຕ່າງໆຈົ່ງຄວບຄຸມລາຄາສິນຄ້າທຸກປະເພດ, ບໍລິການທີ່ຈຳເປັນໃຫ້ແຫນ້ນແຟ້ນ, ພິເສດແມ່ນຮັກສາລາຄາສິນຄ້າທີ່ຈຳເປັນເພື່ອຮັບໃຊ້ຊີວິດການເປັນຢູ່ຂອງປະຊາຊົນ. ໃນນັ້ນ ບັນດາໝວດມາດຕະການສຸມໃສ່ເຂົ້າໃນ 2 ຕະຫລາດໃຫຍ່ຂອງທັງປະເທດ, ນັ້ນແມ່ນນະຄອນ ໂຮ່ຈິມິນ ແລະ ຮ່າໂນ້ຍ. ມາຮອດປະຈຸບັນ, ນະຄອນ ໂຮ່ຈິມິນ ໄດ້ຜັນຂະຫຍາຍສະຖານທີ່ຂາຍສິນຄ້າດ້ວຍລາຄາເປັນປົກກະຕິກວ່າ 3500 ແຫ່ງ ແລະ ນັບແຕ່ຕົ້ນປີມາຮອດປະຈຸບັນ, ບັນດາວິສາຫະກິດກໍໄດ້ປະຕິບັດການຂາຍສິນຄ້າເຄື່ອນທີ່ 500 ຄັ້ງ, ບັນລຸຍອດລາຍຮັບກວ່າ 11 ຕື້ດົ່ງ.
ພ້ອມກັບໂຄງການຮັກສາລາຄາສິນຄ້າໃຫ້ເປັນປົກກະຕິຂອງລັດຖະບານ, ນະຄອນ ຮ່າໂນ້ຍກໍໄດ້ຜັນຂະຫຍາຍສະຖານທີ່ຂາຍສິນຄ້າດ້ວຍລາຄາເປັນປົກກະຕິກວ່າ 600 ແຫ່ງ, ໃນນັ້ນ ກວ່າ 250 ແຫ່ງຢູ່ຊານນະຄອນ(ເພີ່ມຂຶ້ນທົບ 3 ເທົ່າເມື່ອທຽບໃສ່ປີ 2010). ພະແນກອຸດສາຫະກຳ ການຄ້າ ຮ່າໂນ້ຍ ໄດ້ຊີ້ນຳປະຕິບັດການຮັກລາລາຄາສິນຄ້າເປັນປົກກະຕິສຳລັບ 10 ປະເພດສິນຄ້າທີ່ຈຳເປັນຄື: ສະບຽງອາຫານ, ປື້ມ, ເຈ້ຍຮັບໃຊ້ນັກຮຽນ... ສິ່ງທີ່ເປັນຫນ້າສົນໃຈ, ນັ້ນແມ່ນນັບແຕ່ປີກາຍນີ້ ມີວິສາຫະກິດພາກເອກະຊົນຫລາຍແຫ່ງກໍໄດ້ເຂົ້າຮ່ວມໂຄງການຮັກສາລາຄາສິນຄ້າເປັນປົກກະຕິ, ສົ່ງສິນຄ້າໄປຂາຍຢູ່ເຂດຊົນນະບົດ, ປະກອບສ່ວນໂຄສະນາ ແລະ ຂະຫຍາຍໂຄງການ ຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ ”. ທ່ານ Nguyen Ngoc Boi ຜູ້ອຳນວຍການລະບົບຮ້ານສັບພະສິນຄ້າ ລານຈີ ໃຫ້ຮູ້ວ່າ:
“ພວກຂ້າພະເຈົ້າເລືອກເຟັ້ນເຂດຊົນນະບົດເພື່ອສ້າງລະບົບສັບພະສິນຄ້າແບບຍືນຍົງກໍແມ່ນການປະຕິບັດຂະບວນການສົ່ງສິນຄ້າລົງໄປຂາຍຢູ່ເຂດຊົນນະບົດ. ດ້ວຍເລື່ອງແຕ່ລະເມືອງຢູ່ຊານນະຄອນຕັ້ງຮ້ານສັບພະສິນຄ້າແຫ່ງຫນຶ່ງເພື່ອປະກອບສ່ວນຮັບປະກັນນະໂຍບາຍຂອງນະຄອນແມ່ນນຳສິນຄ້າເຖິງຜູ້ອຸປະໂພກບໍລິໂພກ.”
ດ້ວຍຄວາມມານະພະຍາຍາມໃນການບໍລິຫານຂອງລັດຖະບານ, ໝາກຜົນຂອງCPI ໃນເດືອນ 10 ຂອງນະຄອນຮ່າໂນ້ຍພຽງເພີ່ມຂຶ້ນ 0,37% ແລະ ນະຄອນ ໂຮ່ຈິມິນເພີ່ມຂຶ້ນ 0,4% ແລະ CPI ທັງປະເທດເພີ່ມຂຶ້ນລະດັບຕ່ຳກວ່າ 1%ເມື່ອທຽບໃສ່ເດືອນ 9. ດ້ວຍບັນດາມາດຕະການຄວບຄຸມໄພເງິນເຟີ້ ຢ່າງຕັ້ງຫນ້າ ແລະ ປະຕິບັດການຮັກສາລາຄາເປັນປົກກະຕິ, CPI ທັງປີ 2012 ໄດ້ຮັບການຄາດຄະເນຈາກລັດຖະບານແມ່ນ 8% ແລະ ຍັງຄົງສາມາດສຳເລັດຄາດໝານຍຊຶ່ງສະພາແຫ່ງຊາດວາງອອກແມ່ນ CPI ຕ່ຳກວ່າ 2 ຕົວເລກ.